19
Israel-sapin-dummaganga wile-itoged
1 Bab-Jehová sogdebalid: “Israel-sapin-dummaganga, we-wile-itoged be soge:
2 ‘Be-nandi, achumigur-nono-wawaadmar-abargi,
achumigur-nono-wawaad-omeyob guenad.
Achumigur-nono-wawaad-e-burwigan-abargi-mai,
e-mimmigan-onumadaed.
3 Na e-mimmi-wargwendi, odummosad,
wedi achumigur-nono-wawaad gadi-urwedga gunonikid,
e-mas-ichimaked durdaksad,
dule-gunned durdaksabalid.
4 Dulemar-yar-baid-baidgi-bukwamaladi, achumigur-e-wilub-obichadaed itosmalad,
geb yamo-yardakar achumigur-gasmalad,
geb Egipto-yarse, esgoro-dubgi edinnar sesmalad.
5 ” ’Ar achumigur-nono-wawaad-ome, e-mimmi bar ese nonikosur daksoggu, e-mimmi-baid odummosbalid,
geb achumigur-nono-wawaad-ursilidga imaksad.
6 Ar we-achumigur-nono-wawaad gangued-nika gunonigua, e-sordamar-bamalad-abargi dobsuli nanadii gusad.
Na e-mas-ichimaked durdaksad, dule-gunned durdaksabalid.
7 Reynegmar omukusad, neggweburmar obelosad.
E-uurmakedba bela dulemar-ogwayedii gusad.
8 Dulemar-yar-baid-baidgi-bukwamaladi, degi, dikarba neggwebur-baigan bukwamaladi,
achumigurgi gwisguarmalad.
Yardakega e-idu galeged sobsamalad,
geb yaa-ollor-gwisaledgi galessunnad.
9 Galu-yaba esgoro-dubgi edinnar-sii Babilonia-e-reyse sesmalad.
Israel-yalaganba melle bar e-uurmaked-itolegega, galu-yaba-sii sesmalad.
10 ” ’Be-nan uva-digaled-abargi uva-dubyobi, dii-dikarba digar-gwichi gusad.
Ar bela-bela dii-sugwissoggu, yaisur-sanmakgwichi gusad,
yaisur-aramakgwichi gusbalid.
11 E-anagan gandikidba-dutusuli-gumai gusad,
reymar-e-suar-gaapoledga gusad.
Bela-belad bipisuli gusad.
Bela-belad muamakgwichi gusad.
E-matusulidbali dulemar magar daksamalad.
E-anagan-gandikidbali dulemar magar daksamalad.
12 Degi-inigwele, urwedgine sabsur-unnulesad,
napagi balimetemalad.
Dad-nakwedsik-burwa-uereged-goledi, uva-dub-odinnosad,
dulemala e-san-nanaid wesmalad.
E-anagan-dutusurmalad bela dinare gusad,
geb soose ogumaklessunnad.
13 Emigindi, we-uva-dub nega-dulesulidganba,
napa-dinnaregedgi, dii-satedgi, digar gwichid.
14 E-ana-wargwengi soo gaded,
we-soo e-sanmar ogumaksad.
E-anagan-dutusurmalad rey-e-suarmarga-guega,
bar gwen bessulid.’
”We-namakedi, wile-itogedid. Degisoggu, wile-itogedgi weyob namaklegergebed.”