6
1 Napuinaw thung dawk a mei kahawipoung e
ka tawncanu, nange na pahren e teh
nâ e hmuen koe maw a cei vai.
Kaimouh ni nang hoi reirei tawng hanelah,
nange pahren e teh,
namaw na kâceihlinghlang roi tie hah dei haw.
2 Ka pahren teh, a pawnaw cat vaiteh,
lili peinaw ka la han a titeh,
takha thung hmuitui onae koe lah a cei toe.
3 Ka pahren hanelah kai teh ka o.
Ka pahren hai kai hanelah ao.
Ayawn dawk ka pouh e lah ao.
4 Ka pahren e ka tawncanu,
nang teh Tirzah kho patetlah na mei ahawi.
Jerusalem kho patetlah ngai ao.
Taran kâtuknae koe e patetlah
taki kawi lah na o.
5 Nange na mit teh,
kai koehoi alouklah kangvawi leih.
Ahnimouh ni kai teh na tâ toe.
Nange na san teh,
Gilead mon hoi ka kum e hmaehu patetlah ao.
6 Nange na hânaw teh tui pâhluknae koehoi
ka luen e tuhu patetlah ao.
Buet touh hai kahmat hoeh.
Kamphei e dueng doeh a khe awh.
7 Na minhmai ramuknae thung kaawm e
na tangboungnaw teh
talepaw tangawntangai hoi a kâvan.
8 Siangpahrang napui 60,
a yu ado lah 80,
touklek thai hoeh e tanglakacuemnaw ao.
9 Kaie bakhu, kaie ka kuep e,
buet touh dueng doeh kaawm.
Ahni ka khe e manu ni a pahren poung e lah ao.
Tanglanaw ni ahni hah a hmu teh,
yawhawi a poe awh.
Siangpahrangnu hoi a yudonaw ni hai
ahni teh a pholen awh.
10 Thapa patetlah ahawi teh,
kanî patetlah a sei teh,
tarankâtuknae koe e patetlah
taki hanlah na o.
Amom patetlah ngaihawi laihoi
ka khen e teh apimaw .
11 Kai teh misurkung roung hai a roung hoeh hai,
Tale a pei hoi a pei hoeh e hai panue hanelah,
ka khetyawt hanelah takha koe ka cei.
12 Kai ka panue hoehnahlan vah,
ka muitha teh,
Aminadab leng dawk kâcuie patetlah ao.
13 Oe Sulammit, bout tho haw.
Kaimouh ni nang teh na hmu thai nahanelah
bout tho haw. Bout tho haw.
Sulammit dawk bang hno maw
a hmu awh han vai.
Ransahu bokhni touh e patetlah a hmu awh han.