3
Yuemkamcunae teh a len
1 Kai teh nama e lungkhueknae dawk reithai rucatnae ka kâhmo e tami lah ka o.
2 Kai hah na pâlei teh angnae dawk laipalah hmonae dawk na cei sak.
3 Atangcalah, kai hah hnin touh thung a kut hoiyah na pakhuppathan.
4 Ka tak hoi ka vuennaw a hmawn sak teh, ka hrunaw hah a khoe.
5 Kai koe lah na rakhan teh reithai rucatnae hoi na kalup.
6 Ka dout tangcoungnaw patetlah a hmonae thung na o sak.
7 Na paung teh karipoung e rui hoi kahlout thai hoeh nahanlah na katek.
8 Hramki hoi ka ka teh, pahrennae ka kâhei nakunghai, ka ratoumnae hah na coe pouh hoeh.
9 Ka lamthung hai talung a e hoi na khan pouh. Ka lamthung a longkawi sak.
10 Kai na ka pawm e tavom patetlah kâhronae dawk kaawm e sendek patetlah na o sak.
11 Ka lamthung na phen sak teh, kai hah thawkthawk na raboung. Kângue han awm laipalah na o sak.
12 Ahnie licung a sawn teh, pala hoi ka hanelah a nue e patetlah na ta.
13 Ahnie palacung teh ka kuen thung a kâen sak.
14 Kai teh ka taminaw e hmalah hnin touh thung dudamnae hoi la lah na sak awh hanelah ka o toe.
15 Na min ni kakhat e kung hoi na kawi sak teh, lungkhueknae hoi na phum.
16 Ka hâ teh talung kate e hoi a khoe. Hraba hoi muen a ramuk.
17 Ka lungthin muitha teh roumnae thung hoi na takhoe toung dawkvah, bawinae tie teh ka pahnim toe.
18 Ka ngaihawinae hoi ka lentoenae teh, BAWIPA ama koehoi a kahma toe telah ka ti.
19 Kaie reithai rucat ka khangnae, lungkhueknae hoi kakhat e naw na pahnim pouh hanh.
20 Ka hringnae ni hote hnonaw hah pahnim hoeh niteh, ka thungvah pou ao. Kaie lungthin muitha hah tha ayoun sak.
21 Hettelah ka lungthin bout na pouk sak nah ka ngaihawinae bout ka tawn.
22 Bangkongtetpawiteh, BAWIPA mae pahren lungmanae hoi ngaithoumnae teh nâtuek hai a poutnae ao hoeh dawkvah, maimouh teh rawk laipalah o awh.
23 Amom tangkuem a tha lah pahren lungmanae na pang sak. Nama e yuemkamcunae teh a lenpoung.
24 BAWIPA teh kai hanelah doeh ao. Hatdawkvah, ka lungthin muitha ni ama teh a ngaihawi.
25 BAWIPA teh ama ka tawng e hoi ama kâuepnaw hanelah, ahawinae a sak pouh.
26 BAWIPA e rungngangnae duem ka ring e teh, kahawi e hno doeh.
27 Nawsai nah kahnam phu hanelah ao.
28 Cathut ni a van kahnam a toung dawkvah, amadueng a tahung vaiteh, duem awm naseh.
29 Hote hmuen koe ngaihawinae ao thai dawkvah, amae a pahni teh vaiphu dawk hrueng naseh.
30 Ka tambei e tami hah hmaibei vang rek patueng pouh, a minhmai mathout naseh.
31 Bangkongtetpawiteh, Bawipa ni a yungyoe na pahnawt mahoeh.
32 Ama ni lung na mathoe sak nakunghai, a lentoe lungmanae hoi bout na pahren han doeh.
33 Bangkongtetpawiteh, taminaw lungmathoe sak e hoi rucatnae pha sak hanelah ngai hoeh.
34 Talai dawkvah, thongkabawtnaw khok rahim coungroe e hai thoseh,
35 A lathueng Poung Cathut hmalah tami e lannae pahnawtnae hai thoseh,
36 Kayanae lahoi ayâ sungsaknae hai thoseh, Bawipa ni a ngai e nahoeh.
37 Bawipa ni kâpoenae awm laipalah, tami ni dei e hah coung thai han namaw.
38 A lathueng Poung e Cathut e pahni dawk hoi yawhawinae yawthoenae teh ka tho e doeh.
39 Ama e yon dawk reknae a khang e hah tami ni bangkongmaw a phuenang awh vaw.
40 Maimae lamthungnaw hah maimouh ni tanouknae hoi tawng awh sei. BAWIPA koe lah bout kamlang awh sei.
41 Kalvan kaawm e Cathut koe maimae lungthin hoi kutnaw dâw awh sei.
42 Kaimanaw ni ka payon teh na taran awh toe. Nama ni kayonnae na ngaithoum hoeh.
43 Nama e lungkhueknae dawk minhmai na kamlang takhai teh, kaimouh koe lungmanae awm laipalah na thei toe.
44 Kaimae ratoumnae teh nama koe a cei thai hoeh nahanelah, tâmai hoi na ramuk pouh toe.
45 Nama ni kaimanaw teh miphunnaw e rahak vah, kakhin e hoi panuettho e eitaboung lah na o sak.
46 Tarannaw ni kaimouh koe lah a pahni a ang awh.
47 Kaimouh koe takinae hoi karap teh a pha toe.
48 Kaie tami tanglanaw a rawk dawkvah, ka mit teh palang tui patetlah a lawng.
49 Ka mitphi teh palang tui ka lawng e patetlah poutnae awm laipalah a lawng.
50 BAWIPA ni kalvan hoi a khetcathuk teh a hmu.
51 Ka khopui thung e canu tanglanaw abuemlae kecu dawk, ka mit ni ka lungthin dawk a pataw sak.
52 Bang hoeh e dawk ka tarannaw ni, tava patetlah na pâyuep awh.
53 Ahnimouh ni ka hringo tangkom dawk na pabo teh, talungnaw hoi na ratet sin awh.
54 Ka lû dawk hoi tui ni muen na licung teh, ka due han toe telah ka pouk.
55 Oe BAWIPA, kai ni tangkom thung hoi nama e na min teh ka kaw.
56 Kaie ka kâheinae lawk na thai teh ka ka navah, na hnâpakeng laipalah awm hanh.
57 Kai ni nama na kawnae hnin nah ka teng na tho teh, taket hanh na ti pouh.
58 Oe BAWIPA nama ni ka lungthin na rungngang pouh teh, ka hringnae na ratang.
59 Oe BAWIPA nama ni kapayonnaw na hmu toe. Kai hanlah lawk na ceng pouh haw.
60 Nama ni kai ka tak dawk thoe ka sak e taminaw e kahawihoehe pouknae hah na hmu pouh.
61 Oe BAWIPA kai ka tak dawk thoe ka sak e pathoenae hoi khokhannae pueng teh, nama ni na thai.
62 Ka tarannaw ni a dei e hoi a pouk e naw pueng teh, hnin touh thung a sak awh.
63 Ahnimae tahungnae kangduenae hah khenhaw! Kai teh ahnimouh e pathoe hanelah ka o.
64 Oe BAWIPA amamae kut hoi a sak e pueng dawk aphu teh bout poe haw.
65 Ahnimae lungthin patak sak nateh, nama e thoebonae ahnimae lathueng phat naseh.
66 BAWIPA e kalvan rahim hoi na lungkhueknae hoi ahnimanaw teh be raphoe haw.