2
ᒌᓴᔅ ᙭ ᒌ ᐐᒋᐦᐄᑯᓂᐤ
1 ᒋᒥᓯᓂᐦᐋᒫᑎᓈᐙᐤ ᓂᑎᐙᔑᔒᒥᑐᒃ ᐋᑳ ᒑ ᒌ ᒥᒋᐦᑑᑎᒫᒄ᙮ ᐋ ᑖᒀ ᒫᒃ ᐊᐙᓐ ᐋ ᒥᒋᐦᑐᑎᐦᒃ ᒌᓴᔅ ᙭ ᑳ ᑯᐃᔅᑯᑖᑎᓰᑦ ᐋᐅᒄ ᐆ ᐋᔨᒥᔥᑎᒫᑎᐦᒄ ᐅᐦᑖᐐᒫᐤ ᐋᐦ ᑖᔨᒡ᙮
2 ᐐᔨ ᙭ ᒋᒌ ᓂᐳᔅᑎᒫᑯᓂᐤ ᒑ ᒌ ᐅᐦᒋ ᐙᐹᔨᐦᑎᒫᑭᐎᔨᐦᒄ ᒋᒥᒋᐦᑣᐎᓂᓂᐤ᙮ ᓂᒧᐃ ᒫᒃ ᒥᒄ ᒌᔮᓂᐤ ᒋᒥᒋᐦᑣᐎᓂᓂᐤ ᒋᑭ ᒌ ᐙᐹᔨᐦᑎᒫᑯᓈᓂᐤ ᑭᔮᐦ ᒥᓯᐙ ᐊᐙᓐ ᐅᑎᐦ ᐊᔅᒌᐦᒡ ᑳᐦ ᑖᑦ ᑭᑎ ᒌ ᐙᐹᔨᐦᑎᒧᐙᑭᓂᐤ ᐅᒥᒋᐦᑣᐎᓐ᙮
3 ᑐᑎᒧᐦᒀ ᐋᑎᔓᒥᑎᐦᒄ ᒋᔖᒥᓂᑑ ᐋᑯᑖᐦ ᒑ ᐅᐦᒋ ᓅᑯᐦᒡ ᑖᑆᐦ ᐋ ᒋᔅᒑᔨᒥᐦᒄ᙮
4 ᐋᐦ ᐃᔨᑦ ᐊᐙᓐ “ᓂᒋᔅᒑᔨᒫᐤ ᒋᔖᒥᓂᑑ,” ᐋᑳ ᒫᒃ ᑐᑎᐦᑳ ᐋᑎᔓᒥᑯᑦ, ᓂᑎᔨᐤ, ᓂᒧᐃ ᐲᐦᒋᔥᑳᑰ ᑖᑆᐎᓂᔨᐤ᙮
5 ᐋᒄ ᒫᒃ ᐊᐙᓐ ᐋ ᓂᓂᐦᐄᐦᑎᐙᑦ ᑖᓐ ᐋᑎᔓᒥᑯᑦ ᒋᔖᒥᓂᑑ ᓅᑯᐦᑖᐤ ᑖᑆᐦ ᒥᑐᓐ ᐋ ᓵᒋᐦᐋᑦ᙮ ᐆ ᑎᔨᐦᒀ ᒋᑭ ᒋᔅᒑᔨᐦᑖᓈᓂᐤ ᑖᑆᐦ ᐋ ᐐᒑᐅᐦᒄ ᒋᔖᒥᓂᑑ᙮
6 ᐊᓐ ᐊᐙᓐ ᑳᐦ ᐃᔨᑦ ᐋ ᐐᒑᐙᑦ ᒋᔖᒥᓂᑑ ᒨᔮᒻ ᑳ ᐄᔑ ᐱᒧᐦᑖᔨᒡ ᒌᓴᔅᐦ ᒋᐱᐦ ᐄᔑ ᐱᒧᐦᑖᐤ᙮
ᐊᐙᓐ ᑖᑆᐦ ᐋ ᓵᒋᐦᐋᑦ ᐐᒋᔖᓐᐦ
7 ᓃᒋᔖᓂᑎᒄ ᑳ ᓵᒋᐦᐄᑎᑯᒡ, ᓂᒧᐃ ᐅᔅᑳᐤ ᐆ ᐄᑎᔓᐙᐎᓐ ᑳᐦ ᐋᔨᒨᑎᒫᑎᑯᒡ ᐆ ᑳ ᒥᓯᓂᐦᐋᒫᑎᑯᒡ, ᐙᔥᑭᒡ ᒌ ᑎᑯᓐ ᐆ, ᒫᐅᒡ ᐊᓂᑖᐦ ᐅᔅᑭᒡ ᔖᔥ ᒋᒌᔨᔮᓈᐙᐤ᙮ ᐆ ᐙᔅᑭᒡ ᐄᑎᔓᐙᐎᓐ ᐋᐅᒄ ᐆ ᔖᔥ ᒋᒌ ᐹᐦᑖᓈᐙᐤ ᑳᐦ ᐋᔨᒨᑎᒫᑎᑯᒡ᙮
8 ᒥᒄ ᒫᒃ ᐊᔮᐱᒡ ᐋ ᐅᔅᑳᒡ ᐄᑖᔨᐦᑖᑯᓐ ᐆ ᐄᑎᔓᐙᐎᓐ ᑳ ᐄᔑ ᒥᓯᓂᐦᐋᒫᑎᑯᒡ᙮ ᙭ ᓅᑯᐦᑖᐤ ᐋ ᑖᑆᒥᑭᓃᔨᒡ᙮ ᑭᔮᐦ ᒌᔨᐙᐤ ᒫᒃ ᒋᓅᑯᐦᑖᓈᐙᐤ ᐋ ᑖᑆᒥᑭᐦᒡ᙮ ᐊᐅᑳᔥᑖᔮᐎᓐ ᒥᔮᐅᐱᔨᐤ, ᐋᒄ ᐊᓐ ᒋᐦᒋᐙ ᐙᔥᑖᐎᓐ ᔖᔥ ᒌᐦᑳᔮᔥᑖᐤ᙮
9 ᐊᐙᓐ ᐋᐦ ᐃᔨᑦ ᐙᔥᑖᐎᓂᐦᒡ ᐋ ᐄᔑ ᐱᒫᑎᓰᑦ, ᐋ ᐅᐦᑳᑖᑦ ᒫᒃ ᐐᒋᔖᓐᐦ ᐋᔥᒄ ᐊᐅᑳᔥᑖᔮᐎᓂᐦᒡ ᑖᐤ᙮
10 ᐊᓐ ᐊᐙᓐ ᑖᑆᐦ ᑳ ᓵᒋᐦᐋᑦ ᐐᒋᔖᓐᐦ ᐋᐅᒄ ᐙᔥᑖᐎᓂᐦᒡ ᐋᐦ ᑖᑦ᙮ ᓂᒧᐃ ᑎᑯᓂᔨᐤ ᒑᒀᔨᐤ ᐊᓂᑎᐦ ᐋᐦ ᑖᑦ ᒑ ᒌ ᐱᐦᒋᔑᒧᐙᔨᒡ᙮
11 ᐋᒄ ᐊᓐ ᐊᐙᓐ ᑳ ᐅᐦᑳᑖᑦ ᐐᒋᔖᓐᐦ, ᐊᐅᑳᔥᑖᔮᐎᓂᐦᒡ ᑖᐤ᙮ ᐋᑯᑖᐦ ᐱᐹᒧᐦᑖᑦ ᐋᐦᐋᑳ ᒋᔅᒑᔨᐦᑎᐦᒃ ᑖᓂᑖᐦ ᐋᑐᐦᑖᑦ ᐙᔥ ᑐᑖᑰ ᐊᓂᔮᔨᐤ ᐊᐅᑳᔅᑖᐎᓂᔨᐤ ᐋᑳ ᒑ ᒌ ᐙᐱᐦᑎᐦᒃ᙮
12 ᒋᒥᓯᓂᐦᐋᒫᑎᓈᐙᐤ, ᐊᐱᔥᑖᐙᔑᑐᒄ, ᒋᒥᒋᐦᑣᐎᓂᐙᐤ ᐙᔥ ᐋ ᒌ ᐙᐹᔨᐦᑎᒫᑯᐎᔮᒄ ᐐᔨ ᒌᓴᔅ ᙭ ᐅᐦᒋ᙮
13 ᒋᒥᓯᓂᐦᐋᒫᑎᓈᐙᐤ ᐅᐦᑖᐐᒫᑐᒄ ᐋ ᒋᔅᒑᔨᒫᒄ ᐊᓐ ᔖᔥ ᑳᑖᑖᑰᐱᓐ ᐊᓂᑖᐦ ᒫᐅᒡ ᐅᔅᑭᒡ, ᐋᔥᒄ ᐋᒸᔮ ᒥᑐᓐ ᒑᒀᔨᐤ ᐅᐦᒋ ᐅᔑᐦᑖᑭᓂᐎᔨᒡ᙮ ᒋᒥᓯᓂᐦᐋᒫᑎᓈᐙᐤ, ᐅᔅᒋᓃᒌᑐᒄ, ᐋ ᒌ ᔑᑯᒋᐦᐋᒄ ᒥᒋᒥᓂᑑ᙮ ᒋᒥᓯᓂᐦᐋᒫᑎᓈᐙᐤ, ᐊᐙᔑᑐᒄ, ᐙᔥ ᒌ ᒋᔅᒑᔨᒫᐙᐤ ᒋᔖᒥᓂᑑ ᐅᐦᑖᐐᒫᐤ᙮
14 ᒋᒥᓯᓂᐦᐋᒫᑎᓈᐙᐤ, ᐅᐦᑖᐐᒫᑐᒄ, ᐋ ᒋᔅᒑᔨᒫᒄ ᐊᓐ ᔖᔥ ᑳᑖᑖᑰᐱᓐ ᐊᓂᑖᐦ ᒫᐅᒡ ᐅᔅᑭᒡ, ᐋᔥᒄ ᐋᒸᔮ ᒥᑐᓐ ᒑᒀᔨᐤ ᐅᐦᒋ ᐅᔑᐦᑖᑭᓂᐎᔨᒡ᙮ ᒋᒥᓯᓂᐦᐋᒫᑎᓈᐙᐤ ᐅᔅᒋᓃᒌᑐᒄ ᐙᔥ ᒋᓲᐦᒋᑳᐳᓈᐙᐤ, ᒋᔖᒥᓂᑑ ᐅᑎᔨᒧᐎᓐᐦ ᐋ ᐲᐦᒋᔥᑳᑯᐙᒄ, ᑭᔮᐦ ᒫᒃ ᐋ ᒌ ᐃᔥᐱᔑᐦᐋᒄ ᒥᒋᒥᓂᑑ᙮
ᐊᑳᐐ ᓵᒋᐦᑖᒄ ᐊᔅᒌᐦᒡ ᒑᒀᓐ
15 ᐊᑳᐐ ᓵᒋᐦᑖᒄ ᐊᔅᒌᐦᒡ ᒑᒀᓂᐦᐄ ᑭᔮᐦ ᐊᔅᒌᐦᒡ ᐄᑖᑎᓰᐎᓐ ᐋ ᓂᔅᑯᔅᑖᒥᑭᓃᔨᒡ ᐊᓂᔮᔨᐤ ᒋᔖᒥᓂᑑ ᓈᑎᐙᔨᐦᑎᐦᒃ, ᐙᔥ ᐊᐙᓐ ᓰᔮᒋᐦᑖᑦ ᐅᔮᔨᐤ ᓂᒧᐃ ᐲᐦᒋᔥᑳᑯᐙᐤ ᐅᐦᑖᐐᒫᐤ ᐅᓵᒋᐦᐄᐙᐎᓂᔨᐤ᙮
16 ᐙᔥ ᒥᓯᐙ ᑖᓐ ᐋ ᐄᑖᑎᓰᓈᓅᒡ ᐅᑎᐦ ᐊᔅᒌᐦᒡ, ᐋ ᒥᒋᒧᔥᑖᓈᔮᐱᐦᑎᐦᒃ ᐊᐙᓐ ᒑᒀᔨᐤ, ᐋ ᐄᔑ ᒥᒋᒧᔥᑖᓈᔮᔨᐦᑎᐦᒃ, ᑭᔮᐦ ᐊᓂᔮᔨᐤ ᐋ ᒥᒥᑖᑯᓯᑦ ᑖᓐ ᐋ ᐄᔑ ᐱᒫᑎᓰᑦ, ᓂᒧᐃ ᐅᐦᑖᐐᒫᐤ ᐋᐦ ᑖᑦ ᐅᐦᒋᐱᔨᐤ ᐆ ᐄᑖᔨᐦᑖᑯᓯᐎᓐ, ᐅᑎᐦ ᐊᔅᒌᐦᒡ ᐅᐦᒌᒥᑭᓐ᙮
17 ᒥᓯᐙ ᐋᐦ ᐄᑖᔨᑖᑯᓯᓈᓂᐎᒡ ᐅᑎᐦ ᐊᔅᒌᐦᒡ ᑭᔮᐦ ᐋ ᐄᔑ ᑎᑯᐦᒡ ᓂᓈᐦᑭᐤ ᒥᒋᒧᔥᑖᓈᔮᔨᐦᑎᒧᐎᓐ ᒋᑭ ᐃᔅᒀᐱᔨᐤ᙮ ᒥᒄ ᒫᒃ ᐊᓐ ᐊᐙᓐ ᑳᐦ ᑐᑎᒸᑦ ᒋᔖᒥᓂᑑ ᐅᑎᑖᔨᐦᑎᒧᐎᓂᔨᐤ ᑳᒋᒡ ᒋᑭ ᐱᒫᑎᓰᐤ᙮
ᐊᐙᓐ ᑳ ᓲᐦᒑᔨᒧᑐᑎᐙᑦ ᙭
18 ᐊᐙᔑᑐᒃ, ᐋᔪᐎᑯᓐᐦ ᐅᐦᐄ ᒫᐦᒋᒡ ᐋ ᒌᓂᒀᓂᐦᑖᒡ᙮ ᒋᒌ ᐐᐦᑎᒫᑭᐎᓈᐙᐤ ᒑ ᑎᑯᔑᐦᒃ ᐊᓐ ᐊᐙᓐ ᑳ ᓂᔥᑯᔥᑐᐙᑦ ᙭᙮ ᔖᔥ ᒫᒃ ᒌ ᑎᑯᔑᓐ ᒥᐦᒑᑐ ᐊᐙᓐ ᐋ ᐐᐦ ᓂᔥᑯᔥᑐᐙᑦ ᙭᙮ ᐋᑯᑖᐦ ᒫᒃ ᐙᐦᒋ ᒋᔅᒑᔨᐦᑎᒥᐦᒄ ᐋᐦ ᐋᐎᒡ ᐅᐦᐄ ᒫᐦᒑᔨ ᐋ ᒌᓂᒀᓂᐦᑖᒡᐦ᙮
19 ᐅᒌ ᒫᒃ ᐄᔨᔨᐅᒡ ᐋᐦᐋᑦ ᒌ ᐐᒑᐅᑎᐦᑯᒡ, ᓂᒧᐃ ᒋᐦᒋᐙ ᑰᐦᒋ ᐐᒋᑖᑆᔮᔨᐦᑎᒧᒥᑭᓂᐎᒡ, ᐋᔪᐎᒄ ᒫᒃ ᐅᔮᔨᐤ ᐙᐦᒋ ᓂᑭᑎᑎᐦᑯᐦᒡ᙮ ᐙᔥ ᑖᑆᐦ ᒌ ᐐᒑᐅᑎᐦᑯᐦᒡ ᐋᔥᒄ ᒋᐱᐦ ᐐᒑᐅᑯᓅᒡ᙮ ᐊᓂᔮᔨᐤ ᒫᒃ ᑳ ᓂᑭᑎᑎᐦᑯᐦᒡ ᐋᑯᑖᐦ ᑳ ᐅᐦᒋ ᒥᔪ ᒋᔅᒑᔨᐦᑖᑯᓃᔨᒡ ᐋᐦᐋᑳ ᒋᐦᒋᐙ ᐅᐦᒋ ᐐᒑᐅᑎᐦᑯᐦᒡ᙮
20 ᙭ ᑳ ᐱᔮᐦᒋᓰᑦ, ᒋᒌ ᑑᒥᔅᑯᓂᑯᐙᐤ ᐱᔮᐦᒋ ᐊᐦᒑᐦᒄ, ᐋᒄ ᒫᒃ ᒥᓯᐙ ᒌᔨᐙᐤ ᓈᔅᑐᐦᑎᒫᒄ᙮
21 ᓂᒧᐃ ᐐ ᐋᑖᔨᒥᑎᑯᒡ ᐋᐦᐋᑳ ᒋᔅᒑᔨᐦᑎᒫᒄ ᑖᑆᐎᓐ ᐙᐦᒋ ᒥᓯᓂᐦᐋᒫᑎᑯᒡ᙮ ᐋ ᒋᔅᒑᔨᐦᑎᒫᒄ ᑖᑆᐎᓐ ᑭᔮᐦ ᒫᒃ ᐋ ᒋᔅᒑᔨᐦᑎᒫᒄ ᐋᐦᐋᑳ ᑎᑯᐦᒡ ᓂᓂᑎᔨᐎᓐ ᐊᓂᑖᐦ ᑖᑆᐎᓂᐦᒡ ᐋᐅᒄ ᐙᐦᒋ ᒥᓯᓂᐦᐋᒫᑎᑯᒡ᙮
22 ᐊᐙᓐ ᒫᒃ ᐊᓐ ᑳ ᓂᓂᑎᔨᑦ? ᐋᐅᒄ ᑭᔨᑆ ᐊᓐ ᑳᐦ ᐋᓍᐦᑎᐦᒃ ᒌᓴᔅᐦ ᐋᐦ ᐋᐎᔨᒡ ᙭᙮ ᐋᐅᒄ ᑳ ᓂᔥᑯᔥᑐᐙᑦ ᙭, ᑖᐱᔥᑯᓐ ᐅᐦᑖᐐᒫᐤ ᑭᔮᐦ ᒫᒃ ᐅᑯᓯᓯᒫᐤ ᑳᐦ ᐋᑎᐙᔨᒫᑦ᙮
23 ᐙᔥ ᐊᓐ ᐊᐙᓐ ᑳᐦ ᐋᑎᐙᔨᒫᑦ ᐅᑯᓰᓯᒫᐤ ᐋᑎᐙᔨᒫᐤ ᑭᔮᐦ ᐅᐦᑖᐐᒫᐤ᙮ ᐋᒄ ᒫᒃ ᐊᓐ ᐊᐙᓐ ᑳᐦ ᐃᔨᑦ ᐋ ᑖᑆᔮᔨᒫᑦ ᐅᑯᓯᓯᒫᐤ ᑖᑆᔮᔨᒫᐤ ᑭᔮᐦ ᐅᐦᑖᐐᒫᐤ᙮
24 ᐃᔮᒀᒦᒄ ᒫᒃ ᒑ ᒌ ᑭᓂᐙᔨᐦᑎᒫᒄ ᐊᓐ ᓃᔥᑎᒻ ᑳ ᐄᔑ ᐹᐦᑎᒫᒄ ᐅᔅᑭᒡ ᑳ ᑖᑆᔮᔨᒫᒄ ᒌᓴᔅ᙮ ᒨᔥ ᑭᓂᐙᔨᐦᑎᒫᒀ ᐆ ᓃᔥᑎᒻ ᑳ ᐄᔑ ᐹᐦᑎᒫᒄ ᒨᔥ ᒋᑭ ᐐᒑᐙᐙᐤ ᐅᑯᓯᓯᒫᐤ ᑭᔮᐦ ᐅᐦᑖᐐᒫᐤ᙮
25 ᐋᔪᐎᒄ ᒫᒃ ᐅᔮᔨᐤ ᑳᐦ ᐃᔨᑦ ᙭, ᒑᔥᑎᓈᔥ ᒑ ᒥᔨᑎᐦᒄ ᑳᒋᒡ ᐱᒫᑎᓰᐎᓂᔨᐤ᙮
26 ᒋᒥᓯᓂᐦᐋᒫᑎᓈᐙᐤ ᐋᐦ ᐋᔨᒨᑎᒫᑎᑯᒡ ᐊᓂᒌ ᑳ ᐐᐦ ᑳᒌᔑᒥᑖᑯᒡ᙮
27 ᒥᒄ ᒫᒃ ᒌᔨᐙᐤ ᙭ ᒋᒌ ᑑᒥᔅᑯᓂᑯᐙᐤ ᐅᑎᐦᒑᐦᒄ, ᒨᔥ ᐋ ᐱᒋᔅᑳᑏᑖᒄ, ᓂᒧᐃ ᒌ ᓂᑎᐙᔨᒫᐙᐤ ᑯᑎᒃ ᐊᐙᓐ ᒑ ᒌ ᒋᔅᑯᑎᒫᑖᒄ᙮ ᐙᔥ ᐅᔮᔨᐤ ᙭ ᐅᑎᐦᒑᐦᒄ ᐋᐅᒄ ᐆ ᒑ ᒋᔅᑯᑎᒫᑖᒄ ᒥᓯᐙ ᒑᒀᔨᐤ, ᒨᔥ ᒫᒃ ᑖᑆᒥᑭᓂᔨᐤ ᐊᓂᔮᔨᐤ ᐋ ᐄᔑ ᒋᔅᑯᑎᒫᒑᑦ, ᓂᒧᐃ ᓂᑎᔨᒥᑭᓂᔨᐤ᙮ ᓂᓂᐦᐄᐦᑎᐙᐦᒄ ᑖᓐ ᐋ ᐄᔑ ᒋᔅᑯᑎᒫᑖᒄ ᑳ ᐱᔮᐦᒋᓰᑦ ᐊᐦᒑᐦᒄ ᑭᔮᐦ ᒨᔥ ᐐᒑᐙᐦᒃ ᙭᙮
28 ᐊᐙᔑᑐᒃ, ᒨᔥ ᐐᒑᐙᐦᒄ ᒌᓴᔅ᙮ ᐋᒄ ᒫᒃ ᒑ ᒑᔥᑎᓈᑖᔨᒧᔮᒄ ᐹᒋ ᓅᑯᓯᒑ ᑭᔮᐦ ᓂᒧᐃ ᒋᑭ ᐅᐦᒋ ᐱᐱᒫᒫᔨᒧᓈᐙᐤ ᑎᑯᔑᐦᑳ᙮
29 ᒋᒋᔅᒑᔨᐦᑖᓈᐙᐤ ᙭ ᐋ ᑯᐃᔅᑯᑖᑎᓰᑦ, ᑭᔮᐦ ᒫᒃ ᒋᐱᐦ ᒋᔅᒑᔨᐦᑖᓈᐙᐤ ᐊᓐ ᐊᐙᓐ ᑳ ᑯᐃᔅᑯᑖᑎᓰᑦ ᐋ ᐅᑎᐙᔑᔒᒥᑐᑖᑯᑦ ᒋᔖᒥᓂᑑ᙮