6
ᐙᐐᒋᐦᐄᑐᑖᐤ ᐊᓂᑎᐦ ᒫᒋᐱᔨᔨᐦᒄ
1 ᓃᒋᔖᓂᑎᒄ, ᔑᐦᑯᒋᐦᐄᑯᒑ ᐊᐙᓐ ᒥᒑᑎᓰᐎᓂᔨᐤ, ᒌᔨᐙᐤ ᑳ ᐲᒋᔥᑳᑖᒄ ᑳ ᐱᔮᐦᒋᓰᑦ ᐊᐦᒑᐦᒄ ᒋᐱᐦ ᐐᒋᐦᐋᐙᐤ ᐊᓐ ᐊᐙᓐ ᐹᐦᑳᒡ ᒑ ᒌ ᒦᓄᐱᑖᒄ ᑖᓐ ᐄᔑ ᐱᔅᒑᐱᔨᑦ᙮ ᔮᒀᒦᔥᑖᓱᒄ ᒫᒃ, ᐋᑳ ᒑ ᒌ ᐊᔅᒋᐱᔨᔮᒄ ᑭᔮᐦ ᒌᔨᐙᐤ ᒑ ᒌ ᐋᑎ ᒥᒋᐦᑑᑎᒫᒄ᙮
2 ᐱᒨᐎᑣᑐᒄ ᒋᑖᔨᒥᐦᐅᐎᓂᐙᐤ᙮ ᐆ ᑎᔮᒀ ᒋᑭ ᑎᐱᐦᑐᑎᒧᓈᐙᐤ ᑖᓐ ᑳᐦ ᐄᑎᔓᐙᑦ ᙭᙮
3 ᒥᔔ ᒋᔅᑖᔨᒦᓱᒑ ᐊᐙᓐ ᐋᐦᐋᑳ ᒫᒃ ᑎᑯᓃᔨᒡ ᒑᒀᔨᐤ ᒑ ᒌ ᐅᐦᒋ ᒋᔅᑖᔨᒦᓱᑦ ᐐᔨ ᒥᑐᓐ ᑳᒌᔑᐦᐄᓲ᙮
4 ᒥᓯᐙ ᐹᐦᐹᔨᒄ ᐊᐙᓐ ᒋᐱᐦ ᓈᓂᑐ ᒋᔅᒑᔨᒥᓲ ᑯᐃᔅᒄ ᑳᐦ ᑎᒀ᙮ ᑯᐃᔅᒄ ᒫᒃ ᑳᐦ ᑎᒀ, ᑭᔨᑆ ᒑ ᒫᒥᐦᒋᐦᐄᓱᑦ, ᓂᒧᐃ ᐙᐙᒡ ᑭᑎ ᐅᐦᒋ ᑭᓂᐙᐱᐦᑎᒧᐙᐤ ᑯᑎᒃ ᐊᐙᔨᐤᐦ ᑖᓐ ᑳ ᐃᔨᐦᑎᔨᒡ᙮
5 ᐙᔥ ᒥᓯᐙ ᐊᐙᓐ ᐐᔨ ᒋᐱᐦ ᐱᒧᐎᑖᐤ ᐅᑖᔨᒥᐦᐅᐎᓐ᙮
6 ᐊᓐ ᐊᐙᓐ ᑳ ᒋᔅᑯᑎᒧᐙᑭᓅᑦ ᒥᔻᒋᒧᐎᓂᔨᐤ ᒋᐱᐦ ᒥᔮᐤ ᐊᓂᔮᔨᐤ ᑳ ᒋᔅᑯᑎᒫᑯᑦ ᒑ ᒌ ᐋᐱᒋᐦᑖᔨᒡ ᒥᓯᐙ ᑖᓐ ᐋ ᐄᔑ ᒥᔪ ᐃᔮᑦ ᒑᒀᔨᐤ᙮
7 ᐊᑳᐐ ᑳᒌᔑᐦᐄᓱᒄ, ᓂᒧᐃ ᐊᐙᓐ ᒋᑭ ᒌ ᑳᒌᔑᒫᐤ ᒋᔖᒥᓂᑑ᙮ ᐙᔥ ᐊᓂᔮᔨᐤ ᒑᒀᔨᐤ ᒑ ᐱᒋᔅᑎᓂᒧᒀ ᐊᐙᓐ ᐊᓂᑖᐦ ᐊᔅᒌᐦᒡ ᐋᔪᐎᒄ ᐊᓂᔮᔨᐤ ᒑ ᒫᒨᓯᐦᒋᓂᒃ ᐊᓂᔮᔨᐤ ᒑ ᓂᐦᑖᐅᒋᓃᔨᒡ ᐊᓂᑎᐦ ᐅᐦᒋ᙮
8 ᐊᐙᓐ ᐱᔑᔑᐦᒄ ᓂᑎᐐ ᒥᒄ ᑳ ᐄᔑ ᐱᒫᑎᓰᑦ ᐊᓂᔮᔨᐤ ᐐᔨ ᐋ ᐄᔑ ᒦᔻᔨᐦᑎᒃ ᐋᔨᐤᐦ ᓂᐦᑖᐅᒋᐦᑖᐤ ᒫᒑᑎᓯᐎᓂᔨᐤ, ᒑᒃ ᒑ ᐋᑎ ᒫᒨᓯᒋᓂᐦᒃ ᓂᔑᐎᓈᑎᓲᐎᓂᔨᐤ ᐊᓂᔮᔨᐤ ᐅᐦᒋ ᐋ ᒥᒋᐱᒫᑎᓰᑦ᙮ ᐋᒄ ᒫᒃ ᐊᐙᓐ ᓈᐦᑖᐆᒋᐦᑖᑦ ᒥᒄ ᐋ ᐄᔑ ᓂᑎᐙᔨᒥᑯᑦ ᑳ ᐱᔮᐦᒋᓰᔨᒡᐦ ᐊᐦᒑᐦᒄᐦ ᐄᔑ ᐱᒫᑎᓰᒑ ᒋᑭ ᒫᒨᓯᐦᒋᓂᒻ ᑳᒋᒡ ᐱᒫᑎᓰᐎᓂᔨᐤ᙮
9 ᐊᑳᐐ ᒋᑭ ᐅᐦᒋ ᓯᔅᑭᒌᓈᓂᐤ ᐋ ᒥᔪᑐᑎᒥᐦᒄ᙮ ᐙᔥ ᑭᑎ ᐅᑎᐦᒋᐱᔨᐤ ᐊᓂᑎᐦ ᒑ ᒥᔨᑯᐎᔨᐦᒄ ᒋᑎᐱᐦᐊᒫᑯᓰᐎᓂᐤ ᐋᑳ ᐴᓃᔨᒀ ᐋ ᒥᔪᑐᑎᒥᐦᒄ᙮
10 ᒥᒄ ᒫᒃ ᑖᓂᑖᐦ ᒥᒄ ᒑ ᒌ ᒥᔪᑐᑎᒧᐦᒀ ᐋᔪᐎᒄ ᒨᔥ ᒥᓯᐙ ᐊᐙᓐ ᒑ ᒌ ᐙᐐᒋᐦᐄᐦᒄ, ᐊᑎᑎᐤ ᒫᒃ ᐊᓂᒌ ᑳ ᑖᑆᔮᔨᒫᒡ ᒌᓴᔅᐦ ᒋᐱᐦ ᐐᐦ ᒥᔪᑐᑎᐙᓅᒡ᙮
ᑆᓪ ᒫᐦᒑᔨ ᑳ ᐄᔑ ᐊᔨᒥᐦᐋᑦ ᐊᓂᔮᔨᐤ ᑳᓓᔑᔨᓐ
11 ᓃᔨ ᑆᓪ ᑳ ᒥᓯᓂᐦᐋᒫᑎᑯᒡ᙮ ᒋᐙᐱᐦᑖᓈᐙᐤ ᑖᓐ ᐋ ᐃᔥᐱᔥ ᒥᒥᐦᑭᔅᑖᔮᓐ ᐋᒄ ᐋ ᒥᓯᓂᐦᐄᒑᔮᓐ᙮
12 ᐊᓂᒌ ᑳ ᔒᐦᒋᒨᐙᒡ ᒑ ᒌ ᒋᔅᒋᓄᐙᒋᔓᑯᐙᒄ ᒥᒄ ᐐᐦ ᓅᑯᐦᐄᓲᐎᒡ ᐋ ᓂᓂᐦᐄᐦᑎᐦᒡ ᒎᐤ ᐐᔓᐙᐎᓐ ᑭᔮᐦ ᒫᒃ ᓂᑎᐙᔨᐦᑎᒧᒡ ᒑ ᒌ ᒥᔻᒋᒫᑭᓂᐎᒡ᙮ ᐋᔪᐎᒄ ᐅᔮᔨᐤ ᐋᐦ ᑎᒡ ᐋᑳ ᒑ ᒌ ᓂᓈᐦᑳᑖᔨᒧᐦᐋᑭᓂᐎᒡ ᐋᐦ ᐋᔨᒨᒫᒡ ᙭ ᐅᑖᔑᑖᔮᐦᑎᑯᒥᔨᐤ᙮
13 ᓂᒧᐃ ᐙᐙᒡ ᓂᓂᐦᐄᐦᑎᒧᒡ ᒎᐤ ᐐᔓᐙᐎᓐ ᐊᓂᒌ ᑳ ᐱᒋᔅᑎᓂᓱᒡ ᒑ ᒌ ᒋᔅᒋᓄᐙᒋᔣᑭᓂᐎᒡ᙮ ᒌ ᓂᑎᐙᔨᒥᑯᐙᐅᒡ ᒑ ᒌ ᒋᔅᒋᓄᐙᒋᔓᑯᐙᒄ ᒥᒄ ᒑ ᒌ ᒫᒥᐦᒋᒧᒡ ᑭᔮᐦ ᒌᔨᐙᐤ ᐋ ᒌ ᑐᑖᑖᑯᒡ ᒑ ᒌ ᒋᔅᒋᓄᐙᒋᔓᑯᐙᒄ᙮
14 ᓂᔩ ᒫᒃ ᐐ, ᒥᒄ ᐹᔨᒄ ᒑᒀᓐ ᓂᒫᒥᐦᒋᐦᐄᑯᓐ ᐋᔨᐅᑯᓐ ᐊᓐ ᑎᐹᔨᐦᒋᒑᓯᐤ ᒋᓵᔅ ᙭ ᐅᑖᔑᐦᑖᔮᐦᑎᑯᒻ, ᐊᑯᑦ ᐅᐦᒋ ᐙᐦᒡ ᐋᑳ ᐃᔮᐱᑖᔨᐦᑎᒥᐦᐄᑰᐎᒡ ᑖᓐ ᐋ ᐄᔑ ᐃᔮᐱᑖᔨᐦᑎᒥᐦᐄᑯᒡ ᐊᓂᒌ ᐊᔅᒌᐦᒡ ᐄᔨᔨᐅᒡ ᐅᑎᑖᔨᐦᑎᒧᐎᓂᐙᐤ ᑭᔭ ᒫᒃ ᓂᒧᐃ ᓂᑎᔮᐱᑖᔨᐦᑎᒥᐦᐋᐎᒡ᙮
15 ᒑᔅᒋᓄᐙᒋᔣᑭᓅᒀ ᐊᐙᓐ ᑭᔮᐦ ᒫᒃ ᐋᑳ ᒑᔅᒋᓄᐙᒋᔣᑭᓅᒀ, ᓂᒥ ᒋᔥᑎᒫᐎᓐ᙮ ᒋᔖᒥᓂᑑ ᐋ ᒌ ᒥᔨᑎᐦᒄ ᐅᔅᒋ ᐱᒫᑎᓰᐎᓂᔨᐤ ᐋᐅᒄ ᒑᔅᑖᔨᑖᑯᒡ᙮
16 ᐋᒄ ᒫᒃ ᒥᓯᐙ ᐊᓂᒌ ᑳ ᓅᔔᔥᑭᒡ ᐅᔮᔨᐤ ᒋᔅᑯᑎᒫᒑᐎᓂᔨᐤ, ᒋᔖᒥᓂᑑ ᒋᑭ ᒥᔨᑯᒡ ᒋᔮᒫᔨᐦᑎᒧᐎᓂᔨᐤ ᑭᔮᐦ ᒋᑭ ᒋᔅᑎᒫᒑᔨᒥᑯᒡ ᑭᔮᐦ ᐋᔪᐎᒄ ᒑ ᑐᑎᐙᑦ ᒥᓯᐙ ᒋᐦᒋᐙ ᐅᑎᔨᔨᒻᐦ᙮
17 ᐊᑳᐐ ᒫᒃ ᐊᐙᓐ ᐊᑎᑎᐤ ᓂᑭ ᐐᐦ ᓂᓈᐦᑳᒋᐦᐄᒄ᙮ ᑎᑯᓐ ᑖᓐ ᑳ ᐄᔑ ᐎᔮᓯᓈᑯᐦᐄᑭᐎᔮᓐ ᓂᔮᐦᒡ ᒌᓴᔅ ᐅᐦᒋ ᐋᐦ ᐋᐱᑎᔒᔥᑑᒄ᙮
18 ᓂᑐᑎᒧᐙᐤ ᒌᓴᔅ ᙭ ᒑ ᒌ ᒋᔖᐙᑐᑖᑖᒄ ᒋᑎ ᐋᐦᒑᑰᐙᐦᒡ, ᓂᒋᔖᓂᑐᒃ᙮ ᐋᒥᓐ᙮