4
ᐊᓂᒌ ᑭᐦᒋᑮᔑᑯᐦᒡ ᑳ ᐃᐦᑖᑣᐤ ᒫᒥᐦᒋᒣᐅᒡ ᒋᔐᒪᓂᑑᐦ
1 ᐋᐦᒌᐤᐦ ᒦᓐ ᓂᒌ ᐃᔑ ᐙᐸᐦᑏᑰᓐ᙮ ᐃᔥᐱᒥᐦᒡ ᐁ ᐄᑖᐱᔮᓐ ᓂᒌ ᐙᐸᒫᐤ ᒋᔥᑐᐦᑲᓐ ᐁ ᐋᐸᐦᐄᑯᒋᓂᑦ ᐊᓂᑌ ᑭᐦᒋᑮᔑᑯᐦᒡ᙮ ᐁᒄ ᑳ ᐯᒋ ᐊᔨᒥᐦᐄᑦ ᒦᓐ ᐊᓐ ᐊᐌᓐ ᔖᔥ ᐊᓂᑌ ᐁ ᒌ ᐯᒋ ᐊᔨᒥᐦᐄᑦ᙮ ᒧᔮᒻ ᐴᑖᒋᑲᓂᔫ ᐁ ᒋᔐᐌᒪᑲᓂᔨᒡ ᑳ ᐃᑎᐦᑖᑯᓂᔨᒡ ᐁᑯᓐ ᑳ ᐃᑎᐦᑖᑯᓂᔨᒡ ᐅᐯᐦᑖᑯᓱᐎᓐ᙮ ᓂᒌ ᐃᑎᒄ, ᐋᔥᑕᒻ ᐅᑌ᙮ ᒉ ᐙᐸᐦᑏᑖᓐ ᑖᓐ ᒦᓐ ᒉ ᐊᑎ ᐃᔅᐸᔨᐦᒡ᙮
2 ᑏᐌᐦᒡ ᒫᒃ ᑳ ᐸᔦᐦᒋᓰᑦ ᐊᐦᒑᐦᒄ ᓂᒌ ᐯᒋ ᐲᐦᒋᔥᑳᒄ ᐁᒄ ᑳ ᐙᐸᐦᑕᒫᓐ ᐊᓂᑌ ᑭᐦᒋᑮᔑᑯᐦᒡ ᒋᔐᐅᒋᒫᐤ ᑌᐦᑕᐳᐎᓐ᙮ ᒌ ᐊᐴ ᒫᒃ ᐊᐌᓐ ᐊᓂᑦ᙮
3 ᐊᓐ ᒫᒃ ᐊᐌᓐ ᑳ ᐊᐱᑦ ᐊᓂᑦ ᒋᔐᐅᒋᒫᐤ ᑌᐦᑕᐳᐎᓂᐦᒡ ᓈᔥᒡ ᑖᐺ ᒌ ᒥᔻᔑᔫ ᐁ ᐃᔑ ᒌᐦᑳᔮᔥᑐᐌᑦ, ᒧᔮᒻ ᐊᓯᓃᔕᒡ ᑳ ᒥᔅᑕ ᒥᔪᔑᑣᐤ ᒐᔅᐸᕐ ᐁᒄ ᒫᒃ ᑲᕐᓀᓕᔭᓐ ᑳ ᐃᔑᓂᐦᑳᓱᑣᐤ ᐁᑯᓐ ᑳ ᐃᑖᔥᑐᐌᑦ ᐊᓐ ᐊᐌᓐ᙮ ᒥᓯᐌ ᐙᔅᑳ ᐊᓐ ᒋᔐᐅᒋᒫᐤ ᑌᐦᑕᐳᐎᓐ ᒌ ᐃᑖᐱᐦᒉᒨ ᐲᓯᒧᔮᐲᐦ ᓈᔥᒡ ᐁ ᒥᔻᔥᑕᐌᒡ ᒧᔮᒻ ᐊᓯᓃᔥ ᐁᒪᕋᓪᑦ ᑳ ᐃᔑᓂᐦᑳᓱᑦ ᐁ ᐃᑖᔥᑐᐌᒡ᙮
4 ᐙᔅᑳ ᒫᒃ ᐊᓐ ᒋᔐᐅᒋᒫᐤ ᑌᐦᑕᐳᐎᓐ ᐁᑯᑦ ᑳ ᐃᐦᑕᑯᐦᒀᐤᐦ ᓃᔅᑕᓅ ᓀᐤ ᒋᔐᐅᒋᒫᐤ ᑌᐦᑕᐳᐎᓐᐦ᙮ ᓃᔅᑕᓅ ᓀᐤ ᐁ ᒋᔅᑌᔨᐦᑖᑯᓯᑣᐤ ᒋᔐᐃᓅᒡ ᒌ ᐊᐴᒡ ᐊᓂᑦ᙮ ᒌ ᐙᐹᔫᐦ ᐅᒉᒀᓂᒧᐙᐤᐦ ᑲᔦ ᒌ ᒋᒋᔥᑲᒧᒡ ᐁ ᐅᔖᐅᔔᓕᔮᐅᓈᐱᔅᑰᓂᔨᒀᐤᐦ ᒋᔐᐅᒋᒫᐤ ᐊᔅᑐᑎᓐᐦ᙮
5 ᐊᓂᑌ ᐅᒋᔐᐅᒋᒫᐤ ᑌᐦᑕᐳᐎᓂᐦᒡ ᐊᓐ ᑳ ᐊᐱᑦ ᒌ ᐅᐦᒋ ᐙᔂᔅᑌᐸᔫ᙮ ᒌ ᐯᐦᑖᑯᓐᐦ ᐯᐦᑖᑯᓱᐎᓐᐦ ᑲᔦ ᒬᐦᒡ ᓂᒥᔅᒎᒡ ᐁ ᐯᐦᑖᑯᓯᑣᐤ ᒌ ᐃᑎᐦᑖᑯᓐ ᐊᓂᑌ ᐁ ᐊᐱᑦ ᐅᐦᒋ᙮ ᐅᐦᒋᔥᑰ ᒫᒃ ᐊᓂᑦ ᒋᔐᐅᒋᒫᐤ ᑌᐦᑕᐳᐎᓂᐦᒡ ᒌ ᐃᐦᑕᑯᓐ ᓃᔣᔥᒡ ᐃᔥᑯᑌᐤ ᐙᔥᑌᓇᒫᑲᓐᐦ ᐁ ᐃᔥᑯᑌᐅᐦᒀᐤᐦ᙮ ᐁᐅᑯᓂᒡ ᐅᒌ ᓃᔣᔥᒡ ᐊᐦᒑᐦᑯᒡ ᑳ ᐊᑐᔥᑯᐙᑣᐤ ᒋᔐᒪᓂᑑᐦ᙮
6 ᐅᐦᒋᔥᑰ ᐊᓐ ᒋᔐᐅᒋᒫᐤ ᑌᐦᑕᐳᐎᓐ ᒌ ᐃᐦᑕᑯᓐ ᓵᑲᐦᐄᑲᓂᔥ ᒬᐦᒡ ᐙᓭᓂᐦᑖᑲᓈᐱᔅᒄ ᐁ ᐃᔑᓈᑯᐦᒡ, ᐁ ᔖᐳᓈᑯᐦᒡ ᒧᔮᒻ ᒥᔅᑯᒦ ᐁ ᔖᐳᓈᑯᓯᑦ᙮
ᐯᔓᒡ ᒫᒃ ᐙᔅᑳ ᐊᓂᑦ ᒋᔐᐅᒋᒫᐤ ᑌᐦᑕᐳᐎᓂᐦᒡ ᓂᒌ ᐙᐸᒫᐅᒡ ᓀᐤ ᐊᐌᓂᒌ ᐁ ᐱᒫᑎᓰᑣᐤ᙮ ᒥᓯᐌ ᐁ ᐃᔅᐱᒋᔥᑎᑣᐤ ᐁ ᐃᐦᑕᑯᓂᔨᒀᐤᐦ ᐅᔅᒌᔑᑯᐙᐤᐦ᙮
7 ᐊᓐ ᒫᒃ ᓃᔥᑕᒻ ᐊᓂᒌ ᑳ ᓀᐅᑣᐤ ᑳ ᐱᒫᑎᓰᑣᐤ ᐊᐌᓂᒌ ᒧᔮᒻ ᒥᔅᑕᑎᒻ ᒌ ᐃᔑᓈᑯᓲ᙮ ᐊᓐ ᒦᓐ ᐌᐦᒋ ᐃᐦᑖᑦ ᒧᔮᒻ ᒥᔅᑐᓯᔅ ᒌ ᐃᔑᓈᑯᓲ᙮ ᒦᓐ ᐊᓐ ᓂᔥᑐ ᐌᐦᒋ ᐃᐦᑖᑦ ᐅᑖᔥᑕᒧᐦᒄ ᒧᔮᒻ ᐄᓅ ᒥᑖᔅᑕᒧᐦᑯᔫᐦ ᒌ ᐃᔑᓈᑯᓂᔫ ᐊᓂᔫ ᐅᑖᔥᑕᒧᐦᒄ᙮ ᐁᒄ ᐊᓐ ᓀᐤ ᐌᐦᒋ ᐃᐦᑖᑦ ᒧᔮᒻ ᒥᔅᑎᓲ ᐁ ᐱᒥᐦᐃᔮᑦ ᒌ ᐃᔑᓈᑯᓲ᙮
8 ᒥᓯᐌ ᒫᒃ ᐁ ᓀᐅᑣᐤ ᑯᑣᔥᒡ ᑕᐦᑎᓂᔫᐦ ᐅᑎᐦᑕᐦᑯᓇᐙᐤᐦ᙮ ᒥᓯᐌ ᐁ ᐃᔅᐱᒋᔥᑎᑣᐤ ᐃᐦᑕᑯᓂᔫᐦ ᐅᔅᒌᔑᑯᐙᐤᐦ, ᐙᐙᒡ ᔒᐹ ᐅᑎᐦᑕᐦᑯᓂᐙᐦᒡ ᐃᐦᑕᑯᓂᔫᐦ᙮ ᓇᒧᐃ ᒫᒃ ᒋᐱᐦᑐᐌᐅᒡ ᐁ ᓂᑲᒧᑣᐤ ᐁ ᑎᐱᔅᑳᔨᒡ ᑲᔦ ᐁ ᒌᔑᑳᔨᒡ, ᐁ ᐃᑗᑣᐤ, ᐸᔦᐦᒋᓯᔫ, ᐸᔦᐦᒋᓯᔫ, ᐸᔦᐦᒋᓯᔫ ᐅᑎᐯᔨᐦᒋᑫᐤ ᒋᔐᒪᓂᑑ ᒫᐅᒡ ᑳ ᓲᐦᑳᑎᓰᑦ, ᐊᓐ ᒨᔥ ᑳ ᐯᒋ ᐃᐦᑖᑦ, ᐊᓐ ᐊᓄᐦᒌᔥ ᑳ ᐃᐦᑖᑦ, ᑲᔦ ᐊᓐ ᒉ ᑕᑯᔑᐦᒃ᙮
9 ᐃᔅᑯᑕᒃ ᒫᒃ ᓀᑲᒧᑣᐤᐦ ᐊᓂᒌ ᓀᐤ ᑳ ᐱᒫᑎᓰᑣᐤ ᐊᐌᓂᒌ ᐁ ᒋᔅᑌᔨᐦᑖᑯᐦᐋᑣᐤ, ᐁ ᒋᔥᑖᒋᒫᑣᐤ ᑲᔦ ᐁ ᓇᓈᔅᑯᒫᑣᐤ ᐊᓂᔫᐦ ᐊᓂᑦ ᒋᔐᐅᒋᒫᐤ ᑌᐦᑕᐳᐎᓂᐦᒡ ᑳ ᐊᐱᔨᒡ, ᐊᓂᔫ ᑳᒋᒉ ᑳ ᐱᒫᑎᓯᔨᒡ,
10 ᐊᓂᒌ ᓃᔅᑕᓅ ᓀᐤ ᑳ ᒋᔅᑌᔨᐦᑖᑯᓯᑣᐤ ᒋᔐᐃᓅᒡ ᒌ ᐸᐦᒋᔑᒥᐸᔨᐦᐆᒡ ᐊᓂᑌ ᐃᔑ ᐁ ᐃᐦᑖᔨᒡ ᐊᓂᔫᐦ ᑳ ᐊᐱᔨᒡ ᒋᔐᐅᒋᒫᐤ ᑌᐦᑕᐳᐎᓂᐦᒡ, ᐁ ᓅᒌᔥᑐᐙᑣᐤ ᐊᓂᔫ ᑳᒋᒉ ᑳ ᐱᒫᑎᓯᔨᒡ᙮ ᒌ ᒪᓇᒧᒡ ᐊᓂᔫᐦ ᐅᒋᔐᐅᒋᒫᐤ ᐊᔅᑐᑎᓇᐙᐤᐦ ᐁᒄ ᐅᐦᒋᔥᑰ ᐊᓂᑦ ᒋᔐᐅᒋᒫᐤ ᑌᐦᑕᐳᐎᓂᐦᒡ ᑳ ᐃᔓᐌᐱᓂᐦᒀᐤ, ᐁ ᐃᑗᑣᐤ,
11 ᒋᔭ ᓂᑎᐯᔨᐦᒋᑫᒥᓈᓐ ᑲᔦ ᓂᒋᔐᒪᓂᑑᒥᓈᓐ ᑳ ᐊᑐᔥᑳᑖᐦᒡ ᒋᑌᐱᒉᔨᐦᑖᑯᓯᓐ ᒉᒌ ᒋᔅᑌᔨᐦᑖᑯᐦᐄᑯᔨᓐ ᑲᔦ ᒉᒌ ᒋᔥᑖᒋᒥᑯᔨᓐ ᑲᔦ ᒉᒌ ᒫᒥᐦᒋᒥᑯᔨᓐ ᐁ ᐃᔥᐱᔥ ᓲᐦᑳᑎᓯᔨᓐ᙮ ᐌᔥ ᒋᔭ ᒥᓯᐌ ᒉᒀᓐ ᒋᒌ ᐅᔑᐦᑖᓐ᙮ ᒋᔭ ᒋᒌ ᐃᑌᔨᐦᑌᓐ ᒉᒌ ᐃᐦᑕᑯᐦᒡ ᒥᓯᐌ ᒉᒀᓐ ᑳ ᐃᐦᑕᑯᐦᒡ ᐁᒄ ᒫᒃ ᒥᓯᐌ ᑳ ᐅᔑᐦᑖᔨᓐ᙮