21
ᑳ ᐅᔅᑳᒡ ᑭᐦᒋᑮᔑᒄ ᐁᒄ ᒫᒃ ᑳ ᐅᔅᑳᒡ ᐊᔅᒌ
1 ᐁᒄ ᑳ ᐙᐸᐦᑕᒫᓐ ᐁ ᐅᔅᑳᒡ ᑭᐦᒋᑮᔑᒄ ᑲᔦ ᐊᔅᒌ ᐁ ᐅᔅᑳᒡ᙮ ᐌᔥ ᐊᓐ ᐌᔅᑲᒡ ᑭᐦᒋᑮᔑᒄ ᑲᔦ ᐊᓐ ᐌᔅᑲᒡ ᐊᔅᒌ ᔖᔥ ᒌ ᐹᓯᑯᓈᑯᓐᐦ᙮ ᒋᐦᒋᑲᒦ ᑲᔦ ᓇᒧᐃ ᐅᐦᒋ ᐃᐦᑕᑯᓐ᙮
2 ᓂᒌ ᐙᐸᐦᑌᓐ ᒫᒃ ᐊᓐ ᑳ ᐸᔦᐦᒋᓰᒪᑲᐦᒡ ᐃᐦᑖᐎᓐ ᑭᐦᒋᑮᔑᑯᐦᒡ ᐁ ᐅᐦᒋ ᐊᓰᒪᑲᐦᒡ᙮ ᒋᔐᒪᓂᑑ ᐁ ᐃᐦᑖᑦ ᒌ ᐅᐦᒋᐸᔫ᙮ ᐁᐅᒄ ᐆ ᑳ ᐅᔅᑳᒡ ᒉᕉᓴᓚᒻ᙮ ᒧᔮᒻ ᐅᔅᒋᔅᑴᐙᓐ ᐁ ᒌ ᒥᔪᓈᑯᐦᐄᓱᑦ ᒉ ᐅᓈᐯᒥᑦ ᐁᑯᓐ ᑳ ᐃᔑᓈᑯᐦᒡ᙮
3 ᐁᒄ ᑳ ᐯᐦᑕᐗᒃ ᐊᐌᓐ ᐊᓂᑌ ᒋᔐᐅᒋᒫᐤ ᑌᐦᑕᐳᐎᓂᔫ ᐁ ᐃᐦᑕᑯᓂᔨᒡ ᐁ ᐅᐦᒋ ᐊᔨᒥᑦ᙮ ᒌ ᒋᔐᐌᐤ᙮ ᒸᐤ ᑳ ᐃᑗᑦ, ᐄᓐ ᐊᐌᔫᐦ ᐁ ᐃᐦᑖᔨᐦᒡ ᐁᑯᑦ ᒉ ᐃᐦᑖᑦ ᐁᒄ ᒋᔐᒪᓂᑑ᙮ ᑲᑕ ᐐᒋᒣᐤ᙮ ᐁᐅᑯᓐᐦ ᐊᓂᔫᐦ ᐄᓅᐦ ᒉ ᐅᑏᓃᒥᑦ᙮ ᐎᔭ ᑲᑕ ᐃᐦᑖᐤ ᒣᑴᓰᓅ ᐁ ᐃᐦᑖᔨᒡ ᐊᓂᔫᐦ ᐌᒋᔐᒪᓂᑑᒥᑐᑖᑯᑦ᙮
4 ᒋᑲ ᑳᓰᒑᐸᐦᐌᐤ ᒫᒃ ᑕᐦᑣᐤ ᐁ ᐅᐦᒋᑯᐙᐱᔨᒡ᙮ ᓇᒧᐃ ᐁᒄ ᑲᑕ ᐅᐦᒋ ᐃᐦᑕᑯᓂᔫ ᓂᐳᐎᓂᔫ ᒫᒃ ᒥᓯᒣᔨᐦᑕᒧᐎᓂᔫ᙮ ᓇᒧᐃ ᑲᔦ ᐁᒄ ᑲᑕ ᐅᐦᒋ ᐃᐦᑕᑯᓂᔫ ᒫᑑᐎᓂᔫ ᒫᒃ ᐁ ᐐᓴᒉᔨᐦᑖᑲᓄᔨᒡ᙮ ᐌᔥ ᒥᓯᐌ ᐊᓐ ᐌᔅᑲᒡ ᑳ ᐃᔅᐸᔨᐦᒡ ᒉᒀᓐ ᓇᒧᐃ ᔖᔥ ᐃᐦᑕᑯᓐ᙮
5 ᐁᒄ ᐊᓐ ᑳ ᐊᐱᑦ ᐊᓂᑦ ᒋᔐᐅᒋᒫᐤ ᑌᐦᑕᐳᐎᓂᐦᒡ ᑳ ᐃᑗᑦ, ᒥᓯᐌ ᒉᒀᓐ ᓅᔅᒋᐦᑖᓐ᙮ ᐁᒄ ᑳ ᐄᔑᑦ, ᒪᓯᓇᐦᐊ ᐆ᙮ ᐌᔥ ᒋᑲ ᒌ ᑖᐺᐦᑖᑲᓅᐦ ᑲᔦ ᑖᐺᒪᑲᓐ ᐆ ᐁ ᐃᑗᔮᓐ᙮
6 ᐁᒄ ᒫᒃ ᑳ ᐃᑗᑦ, ᔖᔥ ᒥᓯᐌ ᒉᒀᓐ ᓂᒌᔑᐦᑖᓐ᙮ ᐁᐅᒄ ᓂᔭ ᔖᔥ ᑳ ᐃᐦᑖᔮᓐ ᐁᔥᒄ ᐁᑳ ᒥᑐᓐ ᒉᒀᓐ ᐅᐦᒋ ᐃᐦᑕᑯᐦᒡ ᑲᔦ ᐁᐅᒄ ᓂᔭ ᐁᔥᒄ ᒉ ᐃᐦᑖᔮᓐ ᐃᔅᑯᑕᒃ ᒥᓯᐌ ᒉᒀᓐ ᒌᔑᐸᔨᐦᒉ᙮ ᐁᐅᒄ ᓂᔭ ᒥᓯᐌ ᒉᒀᔫ ᑳ ᒋᐦᒋᐸᔨᐦᑖᑦ ᑲᔦ ᐁᐅᒄ ᓂᔭ ᒉ ᒌᔑᐦᑖᔮᓐ ᒥᓯᐌ ᒉᒀᓐ᙮ ᐊᓐ ᐊᐌᓐ ᒉ ᓅᐦᑌᔮᐹᑴ ᓭᐦᒉᐃ ᓂᑲ ᒥᓂᐦᐋᐤ ᐊᓂᔫ ᓂᐲᔫ ᐊᓂᑌ ᐊᓂᔫ ᐊᓂᑦ ᐌᐦᒋ ᒥᔮᑲᓅᑦ ᐊᐌᓐ ᑳᒋᒉ ᐱᒫᑎᓰᐎᓂᔫ ᑳ ᐅᐦᒋ ᒨᔅᒋᒎᓂᔨᒡ᙮
7 ᐁᐅᒄ ᐅᔫ ᒉ ᐃᔑ ᐋᓂᔅᒉ ᒥᔭᒃ ᐊᓐ ᐊᐌᓐ ᒉ ᔖᑰᒋᐦᑖᑴ ᑖᓐ ᒉ ᐃᔑ ᑲᑴᒋᐦᐄᑯᑦ ᒪᒋ ᒉᒀᔫ᙮ ᑲᔦ ᒫᒃ ᓂᔭ ᓂᑲ ᐅᒋᔐᒪᓂᑑᒥᑐᑖᒄ ᐁᒄ ᒫᒃ ᐎᔭ ᒉ ᐅᑕᐙᔒᒥᑐᑕᐗᒃ᙮
8 ᐁᒄ ᐊᓂᒌ ᐊᐌᓂᒌ ᐁᑳ ᑳ ᓲᐦᒋᔅᑌᐦᐁᑣᐤ ᒉᒌ ᐐᐦᑕᐦᒀᐤ ᐁ ᑖᐺᔨᒫᑣᐤ ᒌᓴᔅ, ᐊᓂᒌ ᑳ ᒌᐌᑳᐴᔥᑕᐦᒀᐤ ᑖᓐ ᑳ ᐃᔑ ᑖᐺᔨᒫᑣᐤ ᒌᓴᔅ, ᐊᓂᒌ ᓈᔥᒡ ᑳ ᒪᒑᑎᓰᑣᐤ, ᐊᓂᒌ ᑳ ᓂᐸᐦᐋᑣᐤ ᐊᐌᔫ, ᐊᓂᒌ ᓇᓈᐦᑰ ᑳ ᐃᔑ ᐐᓂᓲ ᐱᒫᑎᓰᑣᐤ, ᐊᓂᒌ ᑳ ᒥᑌᐅᐙᑎᓰᑣᐤ, ᐊᓂᒌ ᑳ ᓅᒌᔥᑐᐙᑣᐤ ᒪᓂᑑᐦᑳᓐ ᐁᒄ ᒫᒃ ᐊᓂᒌ ᑳ ᐐᒡ ᓇᓇᑕᔨᑣᐤ ᒪᒋ ᐃᔥᑯᑌᐤ ᓵᑲᐦᐄᑲᓂᐦᒡ ᒋᑲ ᐃᔓᐌᐱᓈᑲᓅᒡ᙮ ᐁᐅᒄ ᐆ ᓃᔓ ᓂᐳᐎᓐ᙮
ᑳ ᐅᔅᑳᒡ ᒉᕉᓴᓚᒻ
9 ᐁᒄ ᐯᔭᒄ ᐊᓂᒌ ᓃᔣᔥᒡ ᑳ ᑕᔑᑣᐤ ᐁᓐᒋᓪᒡ ᑳ ᑕᐦᑯᓇᐦᒃ ᐯᔭᒄ ᐊᓂᔫᐦ ᑳ ᒨᑖᔮᔨᒀᐤᐦ ᐐᔮᑲᓐᐦ ᐊᓂᑦ ᑳ ᓵᑲᔅᒋᓀᔨᒡ ᑖᓐ ᒉ ᐃᔑ ᓇᓀᐦᑳᑌᔨᒧᐦᐋᑲᓄᔨᑯᐸᓀᓐᐦ ᐊᐌᔫᐦ ᑳ ᐯᒋ ᓈᓯᑦ᙮ ᐁᒄ ᑳ ᐄᔑᑦ, ᐋᔥᑕᒻ ᒫᐦ᙮ ᒋᑲ ᐙᐸᐦᑏᑕᓐ ᐊᓐ ᐅᔥᒋᔅᒀᐙᓐ, ᐊᓂᔫᐦ ᒉ ᐐᒋᒫᑦ ᐊᓐ ᒫᓂᔥᒑᓂᔥ᙮
10 ᐁᒄ ᑳ ᐸᔦᐦᒋᓰᑦ ᐊᐦᒑᐦᒄ ᑳ ᐯᒋ ᐲᐦᒋᔥᑰᑦ᙮ ᐁᒄ ᐊᓐ ᐁᓐᒋᓪ ᐊᓂᑌ ᓈᔥᒡ ᐁ ᐃᔥᐹᓈᔨᒡ ᐗᒋᔫ ᑳ ᐯᒋ ᐃᑐᐦᑕᐦᐄᑦ᙮ ᓂᒌ ᐙᐸᐦᑏᒄ ᒫᒃ ᐊᓂᔫ ᑳ ᐸᔦᐦᒋᓰᒪᑲᓂᔨᒡ ᐃᐦᑖᐎᓂᔫ ᒉᕉᓴᓚᒻ ᑳ ᐃᔑᓂᐦᑳᑌᔨᒡ ᑭᐦᒋᑮᔑᑯᐦᒡ ᐁ ᐅᐦᒋ ᐋᓰᒪᑲᓂᔨᒡ ᒋᔐᒪᓂᑑ ᐁ ᐃᐦᑖᔨᒡ ᐅᐦᒋ᙮
11 ᐁ ᐃᔑ ᒌᐦᑳᔮᔥᑐᐌᔨᒡ ᐊᓂᑦ ᐁ ᐃᐦᑖᑦ ᒋᔐᒪᓂᑑ ᐁᑯᑦ ᐌᐦᒋ ᒌᐦᑳᔮᔥᑌᒡ ᐊᓐ ᐃᐦᑖᐎᓐ᙮ ᓈᔥᒡ ᑳ ᒥᔫᔑᔑᑦ ᐊᓯᓃ ᐁ ᐃᑖᔥᑐᐌᑦ ᐁᑯᓐ ᑳ ᐃᑖᔥᑐᐌᒡ, ᒬᐦᒡ ᐊᓐ ᐊᓯᓃ ᒐᔅᐸᕐ ᑳ ᐃᔑᓂᐦᑳᓱᑦ ᑳ ᐅᓵᐙᔅᑕᐌᑦ ᐁᑯᓐ ᑳ ᐃᑖᔥᑐᐌᒡ ᐊᓐ ᐃᐦᑖᐎᓐ᙮ ᒌ ᓵᐳᓈᑯᓐ ᒫᒃ ᒬᐦᒡ ᐊᓐ ᔖᐳᐙᐱᔅᒄ ᐊᓯᓃ ᑳ ᐃᔑᓈᑯᓯᑦ ᐁᑯᓐ ᑳ ᐃᔑᓈᑯᐦᒡ᙮
12 ᓈᔥᒡ ᒌ ᐊᔅᐹᓈᐤ ᐊᓐ ᑳ ᐙᔅᑳᑳᐴᒡ ᐙᔅᑳ ᐊᓐ ᐃᐦᑖᐎᓐ᙮ ᒌ ᓃᔓᔖᐳᓐᐦ ᐃᔥᒀᐦᑌᒪᐦ ᐊᓂᑌ ᐌᐦᒋ ᐲᐦᑐᑳᓅᐦᒡ ᑲᔦ ᒌ ᓃᔓᔖᐴᒡ ᐁᓐᒋᓕᒡ ᐁ ᑲᓅᔥᑯᐙᐦᑕᐌᑣᐤ᙮ ᒥᓯᐌ ᒫᒃ ᐊᓂᑦ ᐊᓂᔫᐦ ᐁ ᓃᔓᔖᐴᐦᒀᐤᐦ ᐃᔥᒀᐦᑌᒪᐦ ᒌ ᒪᓯᓈᑌᔫᐦ ᐅᑎᔑᓂᐦᑳᓱᐎᓇᐙᐤᐦ ᐊᓂᒌ ᑳ ᓃᔓᔖᑉ ᐲᐦᑕᐤ ᐃᑎᔅᑳᓀᓯᑣᐤ ᐃᔅᕋᐁᓪ ᐄᓅᒡ᙮
13 ᐊᓂᑌ ᒫᒃ ᓀᐅᐐᒡ ᐁ ᐃᔑ ᐱᒥᑕᔥᑌᒡ ᐊᓐ ᐃᐦᑖᐎᓐ ᒌ ᓈᓂᔥᑎᓐ ᐊᓂᔫᐦ ᐃᔥᒀᐦᑌᒻᐦ᙮ ᐊᓂᑌ ᐃᔑ ᐙᐸᓅᑖᐦᒡ ᒌ ᓂᔥᑎᓐ᙮ ᑲᔦ ᐊᓂᑌ ᐙᐸᓅᑖᐦᒡ ᒌ ᓂᔥᑎᓐ᙮ ᒦᓐ ᐊᓂᑌ ᔖᐎᓅᑖᐦᒡ ᐁᒄ ᒫᒃ ᐊᓂᑌ ᓇᑳᐯᐦᐊᓅᑖᐦᒡ ᒌ ᓂᔥᑎᓐ᙮
14 ᒌ ᓃᔓᔖᐴᒡ ᐁ ᒫᒥᐦᒑᐱᔅᒋᓯᑣᐤ ᐊᓯᓃᒡ ᐊᓂᑦ ᑳ ᑌᐦᒋᑳᐴᐦᒡ ᐊᓐ ᒥᓯᐌ ᑳ ᐃᔑ ᐙᔅᑳᑳᐴᐦᒡ ᐊᓂᑦ ᐃᐦᑖᐎᓂᐦᒡ᙮ ᐅᒌ ᒫᒃ ᐊᓯᓃᒡ ᐁᑯᑦ ᑳ ᒪᓯᓈᑌᔨᒀᐤ ᐅᑎᔑᓂᐦᑳᓱᐎᓇᐙᐤ ᐊᓂᒌ ᑳ ᓃᔓᔖᐴᑣᐤ ᐊᐸᔅᑕᓚᒡ ᐊᓂᔫᐦ ᒫᓂᔥᒑᓂᔥ ᑳ ᐎᔮᐸᒫᑦ᙮
15 ᐁᒄ ᐊᓐ ᐁᓐᒋᓪ ᑳ ᐯᒋ ᐊᔨᒥᐦᐄᑦ ᒌ ᑕᐦᑯᓇᒻ ᑎᐸᔅᑯᓂᑲᓈᐦᑎᑯᔫ ᐁ ᐅᔖᐅᔔᓕᔮᐙᐱᔅᑰᓂᔨᒡ᙮ ᒋᐹ ᑎᐹᔅᑯᓇᒻ ᐊᓂᔫ ᐃᐦᑖᐎᓂᔫ ᑲᔦ ᐊᓂᔫᐦ ᐃᔥᒀᐦᑌᒻᐦ ᐁᒄ ᒫᒃ ᐊᓂᔫ ᑳ ᐙᔅᑳᑳᐴᓂᔨᒡ ᐙᔅᑳ ᐊᓂᔫ ᐃᐦᑖᐎᓂᔫ᙮
16 ᓀᐐᒡ ᒫᒃ ᑖᐱᑑ ᒌ ᐃᔑ ᑲᒌᐦᒉᔮᐤ ᐊᓐ ᐃᐦᑖᐎᓐ᙮ ᐯᔭᑯᓂᐦᒡ ᒌ ᐃᔅᒀᐤ ᐁ ᐃᔥᐱᔥ ᐃᔭᑲᔥᑳᒡ ᑲᔦ ᐁ ᐃᔥᐱᔥ ᐃᔥᐹᓈᒡ᙮ ᐁᒄ ᐊᓐ ᐁᓐᒋᓪ ᑳ ᑎᐹᔅᑯᓇᐦᒃ ᐊᓂᔫ ᐃᐦᑖᐎᓂᔫ ᐊᓂᔫ ᐅᑎᐹᔅᑯᓂᑲᓈᐦᑎᒄ ᐁ ᐋᐸᒋᐦᑖᑦ, ᓂᔮᔨᓄᔖᑆᐤ ᒥᑕᐦᑐᒥᑕᓅ ᐊᔅᒌᔫ ᑎᐸᐦᐄᑲᓐᐦ ᒌ ᐃᔅᒀᔫ ᑲᔦ ᐁᑯᓐ ᒬᐦᒡ ᑳ ᐃᔥᐱᔥ ᐊᔭᔅᑲᔅᑳᔨᒡ ᑲᔦ ᐁᑯᓐ ᑳ ᐃᔥᐱᔥ ᐃᔥᐹᓈᔨᒡ᙮
17 ᐁᒄ ᒦᓐ ᐊᓂᔫ ᑳ ᐙᔅᑳᑳᐴᓂᔨᒡ ᒥᓯᐌ ᐙᔅᑳ ᐊᓂᔫ ᐃᐦᑖᐎᓂᔫ ᑳ ᑎᐹᔅᑯᓇᐦᒃ᙮ ᓃᔣᐤ ᒥᑖᐦᑐᒪᑕᓅ ᒦᓐ ᑯᑣᔖᑉ ᒥᓯᑦ ᐁᑯᓐ ᑳ ᐃᔑ ᐃᔥᐹᓈᔨᒡ᙮ ᐊᓂᔫᐦ ᒫᒃ ᑖᓐ ᐁ ᐃᔑ ᑎᐹᔅᑯᓇᒥᔨᒡ ᓈᐯᐤᐦ ᒉᒀᔫ ᐁᑯᓐ ᑳ ᐃᔑ ᑎᐹᔅᑯᓇᐦᒃ ᐊᓐ ᐁᓐᒋᓪ ᐊᓂᔫ᙮
18 ᐊᓐ ᒫᒃ ᑳ ᐙᔅᑳᑳᐴᐦᒡ ᒥᓯᐌ ᐙᔅᑳ ᐊᓐ ᐃᐦᑖᐎᓐ, ᐊᓯᓃ ᒐᔅᐸᕐ ᑳ ᐃᔑᓂᐦᑳᓱᑦ ᒌ ᐅᐦᒋ ᐅᔑᐦᑖᑲᓅ᙮ ᐁᒄ ᐊᓐ ᐃᐦᑖᐎᓐ ᒫᐅᒡ ᐁ ᐸᔦᐦᒋᓯᔨᑦ ᑲᔦ ᒫᐅᒡ ᐁ ᒥᔪᔑᑦ ᐅᔖᐅᔔᓕᔮᐙᐱᔅᒄ ᒌ ᐅᐦᒋ ᐅᔑᐦᑖᑲᓅ᙮
19 ᐊᓂᒌ ᒫᒃ ᑳ ᒫᒥᐦᒑᐱᔅᒋᓯᑣᐤ ᐊᓯᓃᒡ ᐊᓂᑦ ᑳ ᑌᐦᒋᑳᐴᐦᒡ ᐊᓐ ᒥᓯᐌ ᑳ ᐃᔑ ᐙᔅᑳᑳᐴᐦᒡ ᐊᓂᑦ ᐃᐦᑖᐎᓂᐦᒡ᙮ ᒥᓯᐌ ᒌ ᒥᔪᓈᑯᐦᐋᑲᓅᒡ ᓇᓈᐦᑰ ᐁ ᐃᔑᓈᑯᓯᑣᐤ ᐁ ᒥᔪᔑᑣᐤ ᐊᓯᓃᒡ ᐁ ᐋᐸᑎᓯᑣᐤ᙮ ᐊᓐ ᓃᔥᑕᒻ ᐊᓯᓃ ᑳ ᐋᐸᑎᓯᑦ ᐁᐅᑯᓐ ᒐᔅᐸᕐ ᑳ ᐃᔑᓂᐦᑳᑖᑲᓅᑦ᙮ ᒦᓐ ᐊᓐ ᓃᔓ ᐁ ᐃᐦᑖᑦ ᐊᓯᓃ ᑳ ᐋᐸᑎᓯᑦ ᐁᐅᒄ ᓵᕙᐃᕐ ᑳ ᐃᔑᓂᐦᑳᑖᑲᓅᑦ᙮ ᐁᒄ ᐊᓐ ᓂᔥᑐ ᐁ ᐃᐦᑖᑦ ᐊᓯᓃ ᑳ ᐋᐸᒋᐦᐋᑲᓅᑦ ᐁᐅᒄ ᐊᑲᑦ ᑳ ᐃᔑᓂᐦᑳᑖᑲᓅᑦ᙮ ᒦᓐ ᐊᓐ ᐌᐦᒋ ᐃᐦᑖᑦ ᐁᐅᒄ ᐁᒪᕋᓪᑦ ᑳ ᐃᔑᓂᐦᑳᑖᑲᓅᑦ᙮
20 ᐁᒄ ᐊᓐ ᓂᔮᔨᓅ ᑳ ᐃᐦᑖᑦ ᐊᓯᓃ ᐁ ᐋᐸᒋᐦᐋᑲᓅᑦ ᐁᐅᒄ ᐅᓂᑭᔅ ᑳ ᐃᔑᓂᐦᑳᑖᑲᓅᑦ᙮ ᐊᓐ ᓂᑯᑣᔥᒡ ᑳ ᐃᐦᑖᑦ ᐁᐅᒄ ᑲᕐᓀᓕᔭᓐ ᑳ ᐃᔑᓂᐦᑳᑖᑲᓅᑦ᙮ ᐁᒄ ᐊᓐ ᓃᔣᔥᒡ ᐁ ᐃᐦᑖᑦ ᐁᐅᒄ ᑳ ᐅᓵᐅᓯᑦ ᑯᐙᕐᑦᔅ ᑳ ᐃᔑᓂᐦᑳᓱᑦ᙮ ᒦᓐ ᐊᓐ ᐌᐦᒋ ᐃᐦᑖᑦ ᐁᐅᒄ ᐯᕆᓪ ᑳ ᐃᔑᓂᐦᑳᑖᑲᓅᑦ᙮ ᐊᓐ ᐯᔭᑯᔥᑌᐤ ᑳ ᐃᐦᑖᑦ ᑣᐹᔅ ᐃᔑᓂᐦᑳᑖᑲᓅ᙮ ᐁᒄ ᒦᓐ ᐊᓐ ᐌᐦᒋ ᐃᐦᑖᑦ ᐁᐅᒄ ᑳᓪᓭᑣᓃ ᑳ ᐃᔑᓂᐦᑳᑖᑲᓅᑦ᙮ ᒦᓐ ᐊᓐ ᑳ ᐋᐸᑎᓯᑦ ᐯᔭᑯᔖᑉ ᑳ ᐃᐦᑖᑦ ᑐᕐᒀᐃᔅ ᐃᔑᓂᐦᑳᑖᑲᓅ, ᐁᒄ ᐊᓐ ᒫᐦᒋᔥᑕᐃ ᑳ ᐋᐸᑎᓯᑦ ᐊᒣᑎᔅᑦ ᐃᔑᓂᐦᑳᑖᑲᓅ᙮
21 ᐊᓂᔫ ᒫᒃ ᓃᔓᔖᑉ ᐃᔥᒀᐦᑌᒪᐦ ᑳ ᒥᔫᔑᔑᑦ ᑲᔦ ᐁ ᒥᓯᒋᐦᑎᑦ ᐁᔅ ᑳ ᐙᐱᓯᑦ ᒌ ᐅᐦᒋ ᐅᔑᑖᑲᓅᐦ᙮ ᐁᒄ ᐊᓂᔫᐦ ᒣᔅᑲᓅᐦ ᐊᓐ ᐃᐦᑖᐎᓐ ᑌᑲᔥ ᒌ ᐅᔖᐅᔔᓕᔮᐙᐱᔅᑰᓐᐦ, ᒌ ᔖᑆᔅᑌᐦᑎᓐᐦ ᒧᔮᒻ ᐙᓭᓂᑖᑲᓈᐱᔅᒄ ᑳ ᐃᔑᓈᑯᐦᒡ᙮
22 ᓇᒧᐃ ᒫᒃ ᐐ ᓅᐦᒋ ᐙᐸᐦᑌᓐ ᒋᔐᐊᔨᒥᐦᐁᐅᑲᒥᒄ ᐊᓂᑦ᙮ ᐌᔥ ᐅᑎᐯᔨᐦᒋᑫᐤ ᒋᔐᒪᓂᑑ ᒫᐅᒡ ᓯᔫᐦᑳᑎᓰᑦ ᐁᒄ ᒫᒃ ᐊᓐ ᒫᓂᔥᒑᓂᔥ ᒨᔥ ᐃᐦᑖᐅᒡ ᐊᓂᑦ ᐊᓂᔫ ᐃᐦᑖᐎᓂᔫ᙮ ᓇᒧᐃ ᑲᑕ ᐅᐦᒋ ᓂᑕᐌᔨᐦᑖᑯᓐ ᒉᒌ ᐃᐦᑕᑯᐦᒡ ᐊᔨᒥᐦᐁᐅᑲᒥᒄ ᐊᓂᑌ ᒉᒌ ᓂᑑ ᒫᒥᐦᒋᒫᑲᓅᑣᐤ᙮
23 ᓇᒧᐃ ᓂᑐᐌᔨᐦᑖᑯᓲ ᐲᓯᒻ ᒫᒃ ᑎᐱᔅᒋᐲᓯᒻ ᒉᒌ ᐅᐦᒋ ᐙᔥᑐᐌᒡ ᐊᓐ ᐃᐦᑖᐎᓐ᙮ ᐌᔥ ᐁ ᐃᔥᐱᔥ ᒌᐦᑳᔮᔥᑐᐌᔨᒡ ᐊᑎ ᐁ ᐃᐦᑖᑦ ᒋᔐᒪᓂᑑ ᐁᑯᑦ ᐌᐦᒋ ᒌᐦᑳᔮᔥᑌᒡ ᐊᓐ ᐃᐦᑖᐎᓐ᙮ ᑲᔦ ᐊᓐ ᒫᓂᔥᒑᓂᔥ ᐁ ᐃᐦᑖᑦ ᐁᑯᑦ ᐌᐦᒋ ᒌᐦᑳᔮᔥᑌᒡ᙮
24 ᒥᓯᐌ ᒫᒃ ᐊᐌᓂᒌ ᐁ ᐃᑎᔅᑳᓀᓯᑣᐤ ᐅᑕᐦ ᐊᔅᒌᐦᒡ ᐁᑯᑦ ᒉ ᐅᐦᒋ ᐙᔥᑌᓂᒫᑣᐤ ᐊᓂᔫ ᐙᔥᑌᐎᓂᔫ ᐊᓂᑦ ᐊᓂᔫ ᐃᐦᑖᐎᓂᐦᒡ ᑳ ᐅᐦᒋᐸᔨᔨᒡ᙮ ᐁᑯᑌ ᐁ ᐃᑐᐦᑕᑖᑣᐤ ᐅᒋᔅᑌᔨᐦᑖᑯᓱᐎᓇᐙᐤᐦ ᓀᔥᑕ ᐅᐌᔫᑎᓰᐎᓇᐙᐤ ᒋᔐᐅᒋᒫᐅᒡ ᐅᑕᐦ ᐊᔅᒌᐦᒡ ᑳ ᐃᐦᑖᑣᐤ᙮
25 ᒨᔥ ᒫᒃ ᒋᑲ ᐋᐸᐦᐄᑯᑌᐤᐦ ᐊᓂᔫᐦ ᐃᔥᒀᐦᑌᒻᐦ ᐊᑎ ᐌᐦᒋ ᐲᐦᑐᑳᓅᐦᒡ ᐊᓐ ᐃᐦᑖᐎᓐ᙮ ᓇᒧᐃ ᐐᔅᑳᑦ ᑲᑕ ᐅᐦᒋ ᒋᐸᐦᐄᑲᓅᐦ ᐌᔥ ᓇᒧᐃ ᓂᐦᑖ ᑲᑕ ᐅᐦᒋ ᑎᐱᔅᑳᐤ ᐊᓂᑌ᙮
26 ᐁᑯᑌ ᒉ ᐃᑐᐦᑕᑖᑣᐤ ᐅᐌᔫᑎᓰᐎᓇᐙᐤ ᑲᔦ ᐁ ᔔᓕᔮᐅᓂᔨᒀᐤ ᐅᒦᐌᐎᓇᐙᐤᐦ ᐊᓂᒌ ᐅᑕᐦ ᐊᔅᒌᐦᒡ ᑳ ᐃᐦᑖᑣᐤ᙮
27 ᓇᒧᐃ ᒋᑲ ᐅᐦᒋ ᐸᒋᔥᑎᓂᑲᓅ ᒉᒀᓐ ᐁ ᒫᔮᑕᐦᒡ ᒉᒌ ᐃᐦᑕᑯᐦᒡ ᐊᓂᑦ ᐊᓐ ᐃᐦᑖᐎᓐ᙮ ᓇᒧᐃ ᑲᔦ ᒋᑲ ᒌ ᐲᐦᒉᐤ ᐊᓐ ᐊᐌᓐ ᓂᑕᐐᓐ ᑳ ᐃᐦᑎᑦ ᒫᒃ ᑳ ᐐᒡ ᓇᓇᑕᔨᑦ᙮ ᒥᒄ ᐊᓂᒌ ᑳ ᒪᓯᓈᑌᔨᒀᐤ ᐅᑎᔑᓂᐦᑳᓱᐎᓇᐙᐤ ᐊᓂᑌ ᐊᓂᔫᐦ ᒫᓂᔥᒑᓂᔥ ᐅᐱᒫᑎᓯᔫ ᒪᓯᓇᐦᐄᑲᓃᐦᒡ ᒋᑲ ᒌ ᐲᐦᒉᐅᒡ ᐊᓂᔫ ᐃᐦᑖᐎᓂᔫ᙮