17
ᑳ ᐱᓯᒀᑎᓰᑦ ᐃᔅᑴᐤ ᑳ ᑌᐦᑕᐱᑦ ᒪᒋ ᐊᐌᓰᓴ
1 ᐁᒄ ᐯᔭᒄ ᐊᓂᒌ ᓃᔣᔥᒡ ᑳ ᑕᔑᑣᐤ ᐁᓐᒋᓕᒡ ᑳ ᐊᔮᑣᐤ ᐊᓂᔫ ᓃᔣᔥᒡ ᐎᔮᑲᓐᐦ ᑳ ᒨᑖᔮᔨᒀᐤ ᑳ ᐯᒋ ᓂᑐᐙᐸᒥᑦ ᐁᒄ ᑳ ᐄᔑᑦ, ᐋᔥᑕᒻ ᒫ᙮ ᒋᑲ ᐙᐸᐦᑏᑕᓐ ᑖᓐ ᒉ ᐃᔑ ᐗᐌᔑᐦᐋᑦ ᒋᔐᒪᓂᑑ ᐊᓂᔫ ᐃᔅᑴᐤᐦ ᑳ ᐱᓯᒀᑎᓯᔨᒡ᙮ ᐊᓐ ᐃᔅᑴᐤ ᑳ ᐊᐱᑦ ᐊᓂᑌ ᐁ ᐃᐦᑕᑯᓂᔨᒀᐤᐦ ᒥᐦᒉᑐ ᓰᐲᐦ᙮
2 ᒋᔐᐅᒋᒫᐅᒡ ᐅᑕᐦ ᐊᔅᒌᐦᒡ ᑳ ᐃᐦᑖᑣᐤ ᒌ ᐐᒡ ᐱᓯᒀᑎᓰᒣᐅᒡ ᐊᓂᔫᐦ ᐃᔅᑴᐤᐦ᙮ ᑲᔦ ᒫᒃ ᒥᓯᐌ ᐊᐌᓐ ᐅᑕᐦ ᐊᔅᒌᐦᒡ ᑳ ᐃᐦᑖᑦ ᒌ ᒥᔦᔨᐦᑕᒧᒡ ᓇᓈᐦᑰ ᐁ ᒌ ᐃᔑ ᐐᓂᓲ ᐃᐦᑑᑕᐙᑣᐤ ᐊᓂᔫᐦ ᐃᔅᑴᐤ, ᒧᔮᒻ ᐁ ᒌ ᒥᓂᐦᑴᐙᑣᐤ ᐅᔔᒥᓈᐴᔫ ᐁᑯᓐ ᐁ ᐃᔑᓈᑯᓯᑣᐤ ᐁᒄ ᒫᒃ ᑳ ᒌᔥᑴᐯᑣᐤ᙮ ᐁᐅᒄ ᐅᔫ ᑳ ᐄᔑᑦ ᐊᓐ ᐁᓐᒋᓪ᙮
3 ᐁᒄ ᑳ ᐸᔦᐦᒋᓰᑦ ᐊᐦᒑᐦᒄ ᑳ ᐯᒋ ᐲᐦᒋᔥᑰᑦ᙮ ᐁᒄ ᐊᓐ ᐁᓐᒋᓪ ᐊᓂᑌ ᐸᒀᑎᔅᑲᒥᑳᐦᒡ ᑳ ᐯᒋ ᐃᑐᐦᑕᐦᐄᑦ᙮ ᓂᒌ ᐙᐸᒫᐤ ᒫᒃ ᐊᓂᑌ ᐃᔅᑴᐤ ᐁ ᑌᐦᑕᐱᑦ ᒪᒋ ᐊᐌᔒᓴ ᐁ ᒥᐦᑯᓯᔨᒡ᙮ ᐆ ᒫᒃ ᒪᒋ ᐊᐌᓰᔅ ᐃᔑᓂᐦᑳᓱᐎᓂᔫ ᐁ ᒫᔦᔨᒥᑯᔨᒡ ᒋᔐᒪᓂᑑᐦ ᒌ ᒪᓯᓈᑌᔫᐦ ᐊᓂᑦ ᐁ ᐃᐦᑖᑦ᙮ ᓃᔣᔥᒡ ᒌ ᑕᐦᑎᓂᔫ ᐅᔅᑎᒀᓐ᙮ ᒌ ᒥᑖᐦᑕᔑᔫᐦ ᐅᑌᔅᑲᓐᐦ᙮
4 ᐊᓐ ᒫᒃ ᐃᔅᑴᐤ ᒌ ᒥᐦᒀᔅᐱᓲ ᑲᔦ ᒌ ᐐᓯᓲᒥᐦᒀᔫᐦ ᐅᒉᒀᓂᒻᐦ᙮ ᒌ ᐗᐌᔑᐦᐆ ᐁ ᐅᔖᐅᔔᓕᔮᐙᐱᔅᑯᓂᔨᒀᐤ ᒉᒀᔫ ᑲᔦ ᓇᓈᐦᑰ ᐁ ᒥᔪᔑᔨᒡ ᐊᓯᓃ ᐁᒄ ᒫᒃ ᐁ ᐙᓭᔮᐱᔅᒋᓯᔨᒡ ᐊᓯᓃᔕ ᐁ ᒋᒋᔥᑲᐙᑦ᙮ ᒌ ᑕᐦᑯᓇᒻ ᒫᒃ ᐁ ᐅᔖᐅᔔᓕᔮᐙᐱᔅᑯᓂᔨᒡ ᒥᓂᐦᒀᑲᓂᔫ᙮ ᐊᓂᑦ ᒫᒃ ᒥᓂᐦᒀᑲᓂᐦᒡ ᒌ ᓵᔅᑲᔅᑎᓀᔅᑌᔫ ᓇᓈᐦᑰ ᐐᓂᓲ ᐃᐦᑐᐎᓐᐦ ᐌᔥ ᐁᑯᓐ ᒥᒄ ᐙ ᐃᔑ ᐃᑖᑎᓰᑦ ᐆ ᐃᔅᑴᐤ᙮
5 ᐊᓂᑦ ᒫᒃ ᐅᔅᑲᐦᑎᑯᐦᒡ ᒌ ᒪᓯᓈᑌᔫ ᐃᔑᓂᐦᑳᓱᐎᓂᔫ ᐁᑳ ᒋᔅᒉᔨᐦᑖᑯᓂᔨᒡ ᑖᓐ ᐁ ᐃᔑ ᒌᓱᐌᒪᑲᓂᔨᒡ᙮ ᒸᐤ ᑳ ᐃᑕᔥᑌᔨᒡ, ᓂᔭ ᐹᐱᓨᓐ ᐊᓐ ᑳ ᒋᔅᑌᔨᐦᑖᑯᐦᒡ ᐃᐦᑖᐎᓐ᙮ ᓂᔭ ᓅᑳᐐᒫᐅᑐᑕᐙᐅᒡ ᐅᐱᓯᒀᑎᓰᔅᑴᐅᒡ ᑲᔦ ᒥᓯᐌ ᐊᓂᒌ ᑳ ᒥᔦᔨᐦᑕᐦᒀᐤ ᐁ ᒪᒋ ᐃᐦᑑᑕᐦᒀᐤ ᐅᑕᐦ ᐊᔅᒌᐦᒡ᙮
6 ᓂᒌ ᐙᐸᒫᐤ ᒫᒃ ᐊᓐ ᐃᔅᑴᐤ ᐁ ᒥᔪᐦᑲᓱᑦ ᐁ ᒌ ᒥᓂᐦᑴᐙᑦ ᐅᒥᐦᑯᔫ ᑳ ᑖᐺᐦᑕᒦᑣᐤᐦ ᐁᒄ ᒫᒃ ᐅᒥᐦᑯᔫ ᐊᓂᔫᐦ ᑳ ᓂᐸᐦᐋᑲᓄᔨᑯᐸᓀᓐᐦ ᐁ ᑖᐺᔨᒫᔨᒡ ᒌᓴᔅ᙮
ᐃᔅᑯᑕᒃ ᒫᒃ ᑳ ᐙᐸᒪᒃ ᓈᔥᒡ ᓂᒌ ᒪᔅᑳᓯᓇᐙᐤ᙮
7 ᐁᒄ ᑳ ᐯᒋ ᑲᑴᒋᒥᑦ ᐊᓐ ᐁᓐᒋᓪ ᒉᒀᔫ ᐌᐦᒋ ᓈᔥᒡ ᒪᔅᑳᓯᓈᒪᒡ᙮ ᐁᒄ ᑳ ᐃᑗᑦ, ᒋᑲ ᐐᐦᑕᒫᑎᓐ ᒉᒀᓐ ᑖᓐ ᐁ ᐃᔑ ᐁᑳ ᒋᔅᒉᔨᒪᑦ ᐊᓐ ᐃᔅᑴᐤ ᑲᔦ ᐊᓂᔫᐦ ᒪᒋ ᐊᐌᓰᓴ ᑳ ᑌᐦᑕᐱᑦ ᓃᔣᔥᒡ ᑳ ᑕᐦᑎᓂᔨᒀᐤ ᐅᔅᑎᒀᓂᔫᐦ ᑲᔦ ᒥᑖᐦᐣ ᑳ ᑕᐦᑎᓂᔨᒀᐤ ᐅᑌᔅᑲᓂᔫ᙮
8 ᐊᓐ ᒪᒋ ᐊᐌᓰᔅ ᑳ ᐙᐸᒥᑦ ᒌ ᐱᒫᑎᓯᔫ ᐯᔭᒀᐤ ᒥᒄ ᒫᒃ ᓇᒧᐃ ᔖᔥ ᐱᒫᑎᓯᔫ᙮ ᐊᓂᑌ ᐊᓂᔫ ᑳ ᒥᔅᑕ ᐳᑯᓀᔮᔨᒡ ᒋᑲ ᐅᐦᒋ ᓅᑯᐦᐄᓲ ᐁᒄ ᒫᒃ ᒉ ᓂᔔᓈᒋᐦᐋᑲᓅᑦ᙮ ᐊᓂᒌ ᒫᒃ ᐊᐌᓂᒌ ᐅᑕᐦ ᐊᔅᒌᐦᒡ ᑳ ᐱᒫᑎᓰᑣᐤ ᐁᑳ ᑳ ᒪᓯᓈᑌᔨᒀᐤ ᐅᑎᔑᓂᐦᑳᓱᐎᓇᐙᐤᐦ ᐊᓂᑌ ᒪᓯᓇᐦᐄᑲᓂᐦᒡ ᐊᓂᑦ ᑳ ᒪᓯᓇᐦᐙᑲᓄᔨᒡ ᐊᐌᔫᐦ ᒉ ᐊᔮᔨᒡ ᑳᒋᒉ ᐱᒫᑎᓰᐎᓂᔫ ᐁᔥᒄ ᐁᑳ ᑳ ᐅᐦᒋ ᐃᐦᑕᑯᓂᔨᒡ ᐅᔫ ᐊᔅᒌᔫ ᒋᑲ ᒥᔅᑳᓯᓇᐌᐅᒡ ᐙᐸᒫᑣᐌᓂᒡ ᐊᓂᔫᐦ ᒪᒋ ᐊᐌᔒᓴ᙮ ᐌᔥ ᒌ ᐱᒫᑎᓯᔫᐦ ᒥᒄ ᒫᒃ ᓇᒧᐃ ᔖᔥ ᐱᒫᑎᓯᔫᐦ᙮ ᑳᐤ ᒫᒃ ᒋᑲ ᐅᐦᒋ ᓅᑯᓯᔫ ᐁ ᐱᒫᑎᓯᔨᒡ᙮
9 ᐁᑯᑦ ᐆ ᓀᑐᐌᔨᐦᑖᑯᐦᒡ ᑲᒉᐦᑖᐌᔨᐦᑕᒨ ᒥᑐᓀᔨᐦᒋᑲᓐ᙮ ᐊᓂᔫᐦ ᓃᔣᔥᒡ ᑳ ᑕᐦᑎᓂᔨᒀᐤ ᐅᔅᑎᒀᓐ ᐊᓐ ᒪᒋ ᐊᐌᓰᔅ ᐁᐅᑯᓐᐦ ᐊᓂᔫᐦ ᓃᔣᔥᒡ ᐗᒌᓴ ᐊᓂᑦ ᑎᔦᐦᑕᐱᑦ ᐊᓐ ᐃᔅᑴᐤ᙮ ᐁᐅᑯᓂᒡ ᑲᔦ ᓃᔣᔥᒡ ᒋᔐᐅᒋᒫᐅᒡ᙮
10 ᓂᔮᔨᓅ ᐊᓂᒌ ᒋᔐᐅᒋᒫᐅᒡ ᔖᔥ ᓇᒧᐃ ᐃᐦᑖᐅᒡ᙮ ᐯᔭᒄ ᒣᒀᒡ ᒋᔐᐅᒋᒫᐤ᙮ ᐁᒄ ᐊᓐ ᑯᑕᒃ ᒋᔐᐅᒋᒫᐤ ᐁᔥᒄ ᓇᒧᐃ ᓅᑯᐦᐄᓲ᙮ ᐃᔅᑯᑕᒃ ᓅᑯᓯᑌ ᒥᒄ ᐌᐃᐱᔥᒌᔥ ᒋᑲ ᒋᔐᐅᒋᒫᐤ᙮
11 ᐊᓐ ᒫᒃ ᒪᒋ ᐊᐌᓰᔅ ᑳ ᐱᒫᑎᓰᑦ ᓃᔥᑕᒻ, ᒥᒄ ᒫᒃ ᐁᑳ ᔖᔥ ᑳ ᐱᒫᑎᓰᑦ, ᐁᐅᒄ ᐊᓐ ᔮᓈᓀᐤ ᐁ ᐃᐦᑖᑦ ᒋᔐᐅᒋᒫᐤ ᑲᔦ ᐁᐅᒄ ᐯᔭᒄ ᐊᓂᒌ ᓃᔣᔥᒡ ᑳ ᑕᔑᑣᐤ ᒋᔐᐅᒋᒫᐅᒡ᙮ ᒋᔐᒪᓂᑑᐦ ᒋᑲ ᐗᓈᒋᐦᐄᑰ ᐆ ᒪᒋ ᐊᐌᓰᔅ᙮
12 ᐊᓂᔫᐦ ᒫᒃ ᒥᑖᐦᐣ ᑳ ᑕᐦᑎᓂᔨᒀᐤ ᐅᑌᔅᑲᓐ ᐊᓐ ᒪᒋ ᐊᐌᓰᔅ, ᐐᐦᑕᒫᒉᒪᑲᓂᔫ ᒥᑖᐦᐣ ᒉ ᑕᔑᔨᒡ ᒋᔐᐅᒋᒫᐤᐦ ᐁᔥᒄ ᒉ ᒋᔐᐅᒋᒫᐎᔨᒡ᙮ ᒌ ᐸᒋᔥᑎᓈᑲᓅᒡ ᑲᔦ ᐎᔭᐙᐤ ᒥᒄ ᐌᐃᐱᔥᒌᔥ ᒉᒌ ᒋᔐᐅᒋᒫᐅᑣᐤ ᐅᒌ ᒋᔐᐅᒋᒫᐅᒡ ᒣᒀᒡ ᒋᔐᐅᒋᒫᐎᔨᒉᓐᐦ ᐊᓂᔫ ᒪᒋ ᐊᐌᔒᓴ᙮
13 ᒥᓯᐌ ᒫᒃ ᐅᒌ ᒥᑖᐦᐣ ᐁ ᑕᔑᑣᐤ ᒋᔐᐅᒋᒫᐅᒡ ᐯᔭᑯᓂᐦᒡ ᒋᑲ ᐃᑌᔨᐦᑕᒧᒡ ᐊᓂᔫ ᑖᓐ ᐙ ᐃᐦᑎᑣᐤ᙮ ᒥᓯᐌ ᒫᒃ ᑖᓐ ᐁ ᐃᔑ ᐊᔮᑣᐤ ᓲᐦᑳᑎᓰᐎᓂᔫ ᐁᒄ ᒫᒃ ᑎᐯᔨᐦᒋᒉᐎᓂᔫ ᐊᓂᔫᐦ ᒪᒋ ᐊᐌᔒᓴ ᒋᑲ ᒦᔦᐅᒡ᙮
14 ᐅᒌ ᒫᒃ ᒥᑖᐦᐣ ᒋᔐᐅᒋᒫᐅᒡ ᐁᒄ ᒫᒃ ᐊᓐ ᒪᒋ ᐊᐌᓰᔅ ᒋᑲ ᓂᑐᐸᔨᐦᑲᐦᑕᐌᐅᒡ ᐊᓂᔫᐦ ᒫᓂᔥᒑᓂᔕ᙮ ᒥᒄ ᒫᒃ ᒋᑲ ᑌᐸᐦᐄᑰᒡ ᐊᓂᔫᐦ ᒫᓂᔥᒑᓂᔕ ᐁᒄ ᒫᒃ ᐊᓂᔫᐦ ᑳ ᓅᔔᔥᑳᑯᔨᒡ᙮ ᐌᔥ ᐎᔭ ᐊᓐ ᒫᓂᔥᒑᓂᔥ ᒸᐅᒡ ᒋᔅᑌᔨᐦᑖᑯᓲ ᐁ ᑕᔑᔨᒡ ᒥᓯᐌ ᐅᑎᐯᔨᐦᒋᑫᐤᐦ ᑲᔦ ᐎᔭ ᒸᐅᒡ ᓲᐦᒉᔨᐦᑖᑯᓲ ᐁ ᑕᔑᔨᒡ ᒥᓯᐌ ᒋᔐᐅᒋᒫᐤᐦ᙮ ᐊᓂᔫᐦ ᒫᒃ ᑳ ᓅᔔᔥᑳᑯᑦ ᐁᐅᑯᓐᐦ ᐎᔭ ᐌᒌᐦᒡ ᑳ ᑌᑆᑖᑦ ᑲᔦ ᑳ ᐎᔮᐸᒫᑦ ᒉᒌ ᐅᑏᓃᒥᑦ ᑲᔦ ᐁᐅᑯᓐᐦ ᐊᓂᔫᐦ ᑯᐃᔅᒄ ᑳ ᐃᐦᑎᔨᒡ ᐁ ᓅᔔᔥᑳᑯᑦ᙮
15 ᐁᒄ ᑳ ᐄᔑᑦ ᐊᓐ ᐁᓐᒋᓪ, ᐊᓂᔫᐦ ᓰᐲᐦ ᑳ ᐙᐸᐦᑕᒪᓐ ᐊᓂᑦ ᑳ ᐊᐱᑦ ᐊᓐ ᐃᔅᑴᐤ, ᐄᓅᒡ ᐌᓯᓐ ᐊᓂᒌ, ᐁ ᒥᐦᒉᑎᑣᐤ ᐊᐌᓂᒌ, ᓇᓈᐦᑰ ᐁ ᐅᐦᑎᔅᑳᓀᓯᑣᐤ, ᑲᔦ ᓇᓈᐦᑰ ᐁ ᐃᔑ ᐊᔨᒥᑣᐤ᙮
16 ᐊᓂᔫᐦ ᒫᒃ ᒥᑖᐦᐣ ᒥᑌᔅᑲᓐᐦ ᑳ ᐙᐸᐦᑕᒪᓐ ᐁᒄ ᒫᒃ ᐊᓐ ᒪᒋ ᐊᐌᓰᔅ ᒋᑲ ᐊᑎ ᐅᐦᑳᑌᐅᒡ ᐊᓂᔫᐦ ᐃᔅᑴᐤᐦ ᑳ ᐱᓯᒀᑎᓯᔨᒡ᙮ ᒥᓯᐌ ᒋᑲ ᐅᑎᓇᒧᐌᐅᒡ ᑖᓐ ᐁ ᐃᔑ ᐊᔮᔨᒡ᙮ ᒉ ᐊᑎ ᒧᔐᔥᑲᑌᓈᑣᐤ ᑲᔦ ᒋᑲ ᐊᑎ ᒨᐌᐅᒡ ᑲᔦ ᑌᑲᔥ ᒋᑲ ᐗᓈᒋᐦᐁᐅᒡ ᐁ ᐃᔥᒀᔂᑣᐤ᙮
17 ᐌᔥ ᒋᔐᒪᓂᑑᐦ ᒌ ᐃᐦᑑᑖᑰᒡ ᐅᑌᐦᐄᐙᐦᒡ ᒉᒌ ᐅᐦᒋ ᐃᑌᔨᐦᑕᐦᒀᐤ ᒉᒌ ᐃᐦᑑᑕᒧᐙᑣᐤ ᑖᓐ ᐁ ᐃᔑ ᓂᑐᐌᔨᐦᑕᒥᔨᒡ ᒉᒌ ᐃᐦᑑᑖᑲᓄᔨᒡ᙮ ᐁᒄ ᒫᒃ ᐯᔭᑯᓂᐦᒡ ᑳ ᐃᑌᔨᐦᑕᒥᐦᐄᑯᑣᐤ ᒉ ᒥᔮᑣᐤ ᐊᓂᔫᐦ ᒪᒋ ᐊᐌᓰᓴ ᑖᓐ ᐁ ᐃᔑ ᐊᔮᑣᐤ ᒉᒌ ᐅᒋᒫᐅᑣᐤ᙮ ᒋᑲ ᐸᒋᔥᑌᔨᒥᑎᓲᔅᑕᐌᐅᒡ ᒫᒃ ᐹᑎᔥ ᒥᓯᐌ ᒌ ᑎᐸᐸᔨᒉ ᑖᓐ ᑳ ᐃᔑ ᓃᑳᓐ ᐐᐦᑕᒥᔨᒡ ᒋᔐᒪᓂᑑᐦ ᒉ ᐃᔅᐸᔨᔨᒡ᙮
18 ᐊᓐ ᒫᒃ ᐃᔅᑴᐤ ᑳ ᐙᐸᒪᑦ, ᐁᐅᒄ ᐌᓯᓐ ᐊᓐ ᑳ ᒋᔅᑌᔨᐦᑖᑯᐦᒡ ᐃᐦᑖᐎᓐ ᐊᓂᑌ ᐌᐦᒋ ᐅᒋᒫᐦᑲᐦᑐᐙᑲᓅᑣᐤ ᒥᓯᐌ ᒋᔐᐅᒋᒫᐅᒡ ᐅᑕᐦ ᐊᔅᒌᐦᒡ᙮