15
ᓃᔣᔥᒡ ᐁᓐᒋᓪᒡ ᒉ ᐯᑖᑣᐤ ᓃᔣᔥᒡ ᓇᓀᐦᑳᑌᔨᒧᐦᐄᐌᐎᓐᐦ
1 ᒦᓐ ᒫᒃ ᑯᑕᒡ ᒉᒀᓐ ᓂᒌ ᐙᐸᐦᑌᓐ ᐊᓂᑌ ᑭᐦᒋᑮᔑᑯᐦᒡ ᓈᔥᒡ ᐁ ᒥᔅᑳᓯᓈᑯᐦᒡ᙮ ᓂᒌ ᐙᐸᒫᐅᒡ ᓃᔣᔥᒡ ᐁᓐᒋᓪᒡ᙮ ᒥᓯᐌ ᐹᐦᐯᔭᒄ ᒌ ᐊᔮᐅᒡ ᓇᓈᐦᑰ ᒉ ᐃᔑ ᓇᓀᐦᑳᑌᔨᒧᐦᐋᑣᐤ ᐊᐌᔫ᙮ ᐁᐅᒄ ᒫᒃ ᐅᔫ ᒫᐦᒋᔥᑕᐃ ᒉ ᐃᔑ ᓇᓀᐦᑳᑌᔨᒧᓈᓄᔨᒡ ᐌᔥ ᐁᑯᑦ ᐅᔫ ᒉ ᒌᔑᐸᔨᔨᒡ ᒋᔐᒪᓂᑑ ᐅᑖᐦᑯᔪᐌᓱᐎᓐ᙮
2 ᐁᒄ ᑳ ᐙᐸᐦᑕᒫᓐ ᒉᒀᓐ ᒧᔮᒻ ᒋᐦᒋᑲᒦ ᐁ ᔖᑆᔅᑌᓈᑯᐦᒡ ᒬᐦᒡ ᐙᓭᓂᐦᑖᑲᓈᐱᔅᒄ ᐁ ᐃᔑᓈᑯᐦᒡ ᒌᑰ ᐃᔥᑯᑌᐤ ᐁ ᐃᐦᑕᑯᐦᒡ ᐊᓂᑌ᙮ ᑲᔦ ᓂᒌ ᐙᐸᒫᐅᒡ ᐊᓂᒌ ᐊᐌᓂᒌ ᑳ ᔖᑰᒋᐦᐋᑣᐤ ᐊᓂᔫᐦ ᒪᒋ ᐊᐌᓰᓴ᙮ ᓇᒧᐃ ᐅᐦᒋ ᓅᒌᔥᑐᐌᐙᑯᐸᓀᓂᒡ ᐅᔫ ᒪᒋ ᐊᐌᓰᓴ ᑲᔦ ᐊᓂᔫ ᒪᓂᑑᐦᑳᓐ ᑲᔦ ᓇᒧᐃ ᐅᐦᒋ ᐅᑎᓇᒧᐌᐙᑯᐸᓀᓂᒡ ᐊᓂᔫ ᐊᒋᐦᑖᓱᐎᓂᔫ ᐅᑎᔑᓂᐦᑳᓱᐎᓂᔫ ᐁ ᐃᑕᓯᓈᑌᔨᒡ᙮ ᒌ ᓃᐴᒡ ᐊᓂᑌ ᔮᔦᐤ ᐊᓂᔫ ᓵᑲᐦᐄᑲᓂᔫ ᐊᔨᒥᐦᐁᐅᒋᔅᑐᐦᒋᑲᓐᐦ ᐁ ᑕᐦᑯᓂᐦᒀᐤ ᐊᓂᔫᐦ ᒋᔐᒪᓂᑑ ᑳ ᒦᑯᑣᐤ᙮
3 ᒌ ᓂᑲᒨᒡ ᒫᒃ ᒧᓯᔅ ᐅᓂᑲᒧᐎᓂᔫ᙮ ᐁᐅᒄ ᐆ ᒧᓯᔅ ᒋᔐᒪᓂᑑ ᑳ ᐅᑖᐸᒋᐦᐋᑲᓂᑐᑖᑯᑦ᙮ ᐅᔫ ᒫᒃ ᐅᓂᑲᒧᐎᓂᔫ ᒌ ᓂᑲᒨᒡ ᐁ ᒋᔥᑖᒋᒫᑣᐤ ᒫᓂᔥᒑᓂᔕ᙮ ᐁᐅᒄ ᐅᔫ ᑳ ᐃᔑ ᓂᑲᒧᑣᐤ, ᐅᑎᐯᔨᐦᒋᑫᐤ ᒋᔐᒪᓂᑑ ᒋᔭ ᒫᐅᒡ ᑳ ᓲᐦᑳᑎᓯᔨᓐ᙮ ᓈᔥᒡ ᑖᐺ ᒥᔦᔨᐦᑖᑯᓐ ᑲᔦ ᒋᔅᑌᔨᐦᑖᑯᓐ ᑖᓐ ᐁ ᐃᔑ ᐃᐦᑑᑕᒪᓐ᙮ ᒋᔭ ᒋᒋᔐᐅᒋᒫᐅᑐᑕᐙᐅᒡ ᒥᓯᐌ ᐁ ᐃᑎᔅᑳᓀᓯᑣᐤ ᐊᐌᓂᒌ, ᒨᔥ ᑯᐃᔅᒄ ᒋᑎᐦᑎᓐ ᑲᔦ ᒨᔥ ᑖᐺᒪᑲᓐ ᑖᓐ ᐁ ᐃᑗᔨᓐ᙮
4 ᐅᑎᐯᔨᐦᒋᑫᐤ, ᐊᐌᓐ ᐁᑳ ᒉ ᓇᓂᐦᒌᔥᑖᔅᒃ ᑲᔦ ᐁᑳ ᒉ ᒋᔥᑖᑐᑕᐦᒃ ᒋᑎᔑᓂᐦᑳᓱᐎᓂᔫ᙮ ᐌᔥ ᒥᒄ ᒋᔭ ᒋᐸᔦᐦᒋᓰᓐ᙮ ᒥᓯᐌ ᐊᐌᓂᒌ ᐁ ᐃᑎᔅᑳᓀᓯᑣᐤ ᒋᑲ ᐯᒋ ᓅᒌᔥᑖᑯᒡ ᐌᔥ ᒋᒌ ᐙᐸᐦᑏᐌᓐ ᐁ ᐃᔥᐱᔥ ᑯᐃᔅᒄ ᐃᐦᑎᔨᓐ᙮ ᐁᐅᒄ ᐅᔫ ᑳ ᐃᑕᐦᐊᒫᓱᑣᐤ ᐁ ᓂᑲᒧᑣᐤ᙮
5 ᐃᔅᑯᑕᒃ ᒫᒃ ᑳ ᒌᔑᐸᔨᐦᒡ ᐆ ᐁᒄ ᒦᓐ ᑯᑕᒡ ᒉᒀᓐ ᑳ ᐙᐸᐦᑕᒫᓐ᙮ ᒋᔐᒪᓂᑑ ᐅᒋᔐᐊᔨᒥᐦᐁᐅᑲᒥᒄ ᐊᓂᑌ ᑭᐦᒋᑮᔑᑯᐦᒡ ᑳ ᐃᐦᑕᑯᓂᔨᒡ ᒌ ᐋᐸᐦᐄᐸᔨᓂᔫ᙮ ᐁᐅᒄ ᐅᔫ ᒫᐦᑮᔫ ᐊᓂᑌ ᑳ ᒌ ᐃᐦᑖᑦ ᒋᔐᒪᓂᑑ ᐁ ᐸᐹᐐᒉᐙᑦ ᐅᑏᓃᒻ᙮
6 ᐁᒄ ᐊᓂᒌ ᓃᔣᔥᒡ ᐁᓐᒋᓕᒡ ᑳ ᐯᑖᑣᐤ ᑖᓐ ᒉ ᐃᔑ ᓇᓀᐦᑳᑌᔨᒧᓈᓄᔨᒡ ᑳ ᐅᐦᒋ ᐐᐐᑣᐤ ᐊᓂᔫ ᒋᔐᐊᔨᒥᐦᐁᐅᑲᒥᑯᔫ᙮ ᒌ ᐙᐹᔅᐱᓲᒡ ᒫᒃ ᐁ ᐙᔅᑯᔥᑌᔨᒀᐤ ᐅᒉᒀᓂᒧᐙᐤ ᐁ ᐃᔥᐱᔥ ᐸᔦᐦᑲᓂᔨᒀᐤ, ᐁᒄ ᐊᓂᑌ ᐅᔅᑳᔅᒋᑲᓂᐙᐦᒡ ᒌ ᒫᐦᑯᐱᓲᒡ ᒉᒀᔫ ᒧᔮᒻ ᐁ ᐅᔖᐅᔔᓕᔮᐅᓈᐱᔅᑯᓯᔨᒡ ᐸᐦᑯᐦᑌᐦᐅᓐ ᐁ ᐃᔑᓈᑯᓂᔨᒡ᙮
7 ᐁᒄ ᐯᔭᒄ ᐊᓂᒌ ᐁ ᓀᐅᑣᐤ ᑳ ᐱᒫᑎᓰᑣᐤ ᐊᐌᓂᒌ ᑳ ᒥᔮᑦ ᐹᐦᐯᔭᒄ ᐊᓂᔫ ᓃᔣᔥᒡ ᐁᓐᒋᓪ ᐎᔮᑲᓂᔫ ᐁ ᒨᑖᔮᔨᒡ ᐁ ᓵᑲᔅᒋᓀᔥᑌᔨᒡ ᐊᓂᑦ ᒋᔐᒪᓂᑑ ᐊᓐ ᑳᒋᒉ ᑳ ᐱᒫᑎᓰᑦ ᐅᑖᐦᑯᔪᐌᓱᐎᓐ᙮
8 ᒌ ᒌᔅᑆᐸᐦᑌᐤ ᒫᒃ ᐊᓐ ᒋᔐᐊᔨᒥᐦᐁᐅᑲᒥᒄ ᐊᓂᑌ ᐌᐦᒋᐸᔨᐦᒡ ᒋᔐᒪᓂᑑ ᐅᒋᔅᑌᔨᐦᑖᑯᓱᐎᓐ ᑲᔦ ᐅᓲᐦᑳᑎᓰᐎᓐ᙮ ᓇᒧᐃ ᒫᒃ ᐊᐌᓐ ᒋᑲ ᒌ ᐲᐦᒉᐤ ᐊᓂᑌ ᐹᑎᔥ ᑌᑲᔥ ᒌᔑᐸᔨᐦᒉ ᐊᓐ ᑖᓐ ᒉ ᐃᔑ ᓇᓀᐦᑳᑌᔨᒧᓈᓅᐦᒡ᙮ ᓇᒧᐃ ᒫᒃ ᐊᐌᓐ ᐅᐦᒌᐦ ᐲᐦᒉᐤ ᐊᓂᑌ ᐹᑎᔥ ᑌᑲᔥ ᑳ ᒌᔑᐸᔨᐦᒡ ᐊᓂᔫ ᓃᔣᔓᔨᒡ ᒋᐹ ᐃᔑ ᓇᓀᐦᑳᑌᔨᒧᐦᐋᑲᓅᒡ ᐊᐌᓂᒌ ᐊᓂᒌ ᓃᔣᔥᒡ ᐁᓐᒋᓪᒡ ᑳ ᐃᔑ ᐯᒋ ᐸᒋᔥᑎᓇᐦᒀᐤ ᒉᒌ ᐃᔑ ᓇᓀᐦᑳᑌᔨᒧᓈᓄᔨᒡ᙮