49
1 Ikaemakiri Jacob maawoeni itomipaeni, ikantakiri: “Pontsirokena okaakiini, nokamantatyeemirowa okaate awijimotemini paata.
2 ¡Itomipaeni Jacob! Pipokaeyeni okaakiini pikemantyaari.
Powayempitatyaariri pipaapate Israel.
3 Eeroka Rubén, neewarite notyomi,
Noshintsinka noyimi, eerokataki etakaantanakawori noshintsinka,
Eeroka etawori ipinkatheetzimi, oshekitzimotzimi pishintsinka.
4 Ari okaatzimaetapaaka piriroperotane,
Poshiyawitapiintakawo oshinchaari nijaa,
Tema pitheenkaneentzitakinawo nomaamento.
5 Rooma eeroka Simeón eejatzi Leví, pirentzi powawakaeyaani,
Powamaamento powayitakiro pichekopitepaeni.
6 Eerowa napiiteero notsipateeyeemini jempe pipiyoteeyapiintani.
Tema otyahakimi paerani pimashirenka osheki atziri powamaaki.
Okantakaantziro pikijawaetaka piitzinkakiiwaetanakiri piratsipaeni.
7 Koweenkari okantaka piyatsimankari,
Omaperota pikijanaka.
Naaka mataperoteemini notzimpookayiteemi notsipatahaemiri Israel-ite.
8 Rooma eeroka Judá, rajahaawenteemi pirentzipaeni.
Poteeyakentsiyiteeri kijaneentemini.
Ipinkathayiteemi pirentziteeyaari.
9 Eeroka Judá, notyomitari naaka.
Poshiyaari iryaani manitzi aririka ipakaeri rowari ratsikane.
Roeyoota, romaryaawaeta kepatsiki, ikantaha antari manitzi.
¿Iitaka materoni oñaashirenkaerini?
10 Tekatsira materoni raapithateeri ishintsinka Judá,
Tekatsi aapithateerini iwinkatharimento roteeyakiri,
Roojatzi ipokantakyaari ashitawori iwinkatharimento,
Ikemijantawakiri inashiyitachari roshekitawakayitaha.
11 Riitaki oojotakoterini iyawayote oponkitziki pankirentsi rireetziri,
Ikiwantawo rireetziri maawoeni iithaari, tema oshekiperotatzi chochoki rireetziri.
12 Kameethantzi ikanteeya, tema cheenkaakiri okantayitya rooki awijanakiro ocheenkatzi rireetziri.
Kitamaari okantayitya raeki awijanakiro okitamaatzi tenitsi.
13 Inampiteeyaawo Zabulón inkaarecheraki,
jempe aatapiintayita amaatakomentotsi.
Ari iweyaathapiyiteeyaani roojatzi janta Sidón-ki.
14 Roshiyeeyaari Isacar piratsi ikyaakahaetari,
Ari makoryaapiintatsini piratsipankoki.
15 Ikanta iñaawakirowa kameethari owetsikaka imakoryaanteetyaawo,
Oeyootanaka inatakahaeteri.
Maeriri ikantaka roshiyakahaetziri omperataarewo.
16 Ipinkathariwenteeri Dan isheninka ikimitaa itsipa ipinkathariwenteeri Israel-ite.
17 Roshiyeeyaari Dan maanki ijeeki awotsinampiki,
Riitaki atsikakiiterini kawayo,
Rowariimaetyaari kyaakotariri.
18 ¡Tajorentsi! Nawentahaemi powawijaakoteena.
19 Ikoshekawaetaari Had owayiri-paeni,
Riitaki kantacha aritaki nopiyatakyaari paata.
20 Riima Aser oshekitzimoteeri iwankiri rowaeyaari,
Kyaariperori owanawontsi ini, oshiyaawo rowanawo pinkathariperori.
21 Roshiyaari Neftalí maniro tekatsi ashitakoterini,
Owaneenkatacha ikantayita itomipaeni.
22 Riima José roshiyaawo pankirentsi shookatziiri ocheraki nijaa,
Osheki okithokinite,
Ithonkiro itaayitziro otanto.
23 Osheki ikijaneenteeri omanatzinkari,
Roma-natantapiinteeyaari chekopi,
Ikanteetatyeeyaani roñaashirenkapiinteeri.
24 Riitaki kantacha José shintsishempa ikanta rirori,
kijokiro royiro iwiani.
Ikaminthakiri Itajorentsite Jacob Shintsiri,
Okamintha iwaero kempoyaawentantaneri, kijakowentariri Israel.
25 Ikamintha Itajorentsite ashitzimiri, ri neshironkateemini.
Riitaki Tajorentsi Shintsiperori, riitaki tajonkawenteemini.
Opoñaawo itajorenka jenoki ikiteki.
Opoñaawo itajorenka inthomoeyaaki inkaareki.
Opoñaawo itajorenka tenitsiki eejatzi owamaarentsiki.
26 Okaatzira ipasonkitakotanakimi ashitzimiri,
Awijanakiro okaatzi ipasonkitakotanari ashitanari naaka.
Eero opeyaawo, roojatzi paata eero iñahaetantaawo eejatzi ochempi.
Oshiyakawo ijeepatziitotanteetyaarimi José irokapaeni tajorenkantsi,
Tema riitaki riyoyahaetakiri itsipatakari rirentzipaeni, riitaki riroperoyitaatsini.
27 Roshiyeeyaari Benjamín owantaneri,
rananinki rowamanaari ratsikane,
Arika otsireniityaane ipawakaeyaani tzimahaantapaentsiri.”
28 Riiyitakira isheninkapaeni Israel, rootaki ñaantsipaeni ikantanakiriri ipaapate ipasonkitakotanakari itomipaeni.
29 Ikantanakiri itomipaeni: “Okaatapaakiini nokamantyaari. Pitsipatahaenari nocharinipaeni pinkitateena, omookira iipatsiteki Efrón Het-jatzi,
30 jeekatsiri janta Canaán-ki. Rootaki omoowa jeekatsiri Macpela-ki, amontetari Mamre, ramanantakiri paerani Abraham itsipataakiro iipatsite Efrón, okitataaha iina.
31 Jaha ikiteetakiri Abraham itsipatahaetakiri iina Sara, eejatzi Isaac itsipatahaetakiri iina Rebeca. Ari nokitateero eejatzi Lea.
32 Ironta kepatsi eejatzi omookira jeekatsiri janta riira Het-jatzi pimantakirori paerani.”
33 Ikanta ithonkari Jacob riyotaayitanayiri itomipaeni, ari roma-ryaanakari, kamanaki. Itsipatapaari isheninkapaeni.