3
Yesu ntëbëka Moyis
1 Awa, vëỹënta mën vëfacah, ƴëkëryina Yesu, w̃uhnë vële macëk W̃ën. Umë ye ale paƴik W̃ën do ye asëna wasaɗëha asankaf hn'ikwëtahn nte fëƴahnëɗen.
2 W̃ënu ŋa tëhnaka soŋe iỹi ɗoku do kahnëndako, had gante nkeho Moyis hnë cery W̃ën hna fop.
3 Ale yëryëk cery ntënënik ntëbi cery ŋa dënk. Aki Yesu rëfëka nuỹa untënah ntëba Moyis.
4 Cery-wo-cery ahnë yëryëk, ɓare W̃ënu ŋa ye ale yëryëk fop ỹa.
5 Moyis, cape ntëw̃u ŋa, kahnëndako hnë fop cery W̃ën hna, gante nkeho aryokuŋ ale hwëtehnahnik ceɗeyahn ile ntehnëɗ W̃ënu ŋa hnë wati le yejëk.
6 Ɓare Këris, cape ntëw̃u ŋa, kahnëndak hnë cery W̃ën hna, gante nke Ajë ale hwëtik nkaf. Do cery ntëw̃u ŋa yeyinëk, ge kwëtayinëk iɗëkëna dëw̃ fu ŋa do mbëntaryin itama fu ŋa.
W̃ënu ŋa njinëgehnëɗ ɓulunda lëw̃u
7 Soŋe umë ye, had gante ntehnëk Iƴir Ipacah ka:
«Dol, ge nkwëryërun kopa W̃ënu ŋa,
8 antë afiɗu sakahn hun ha,
had koɓëri ka ante ntancëntirunëho ŋa,
wati rac, wula hna, njëkëhnahnërunëhawo.»
9 Do W̃ënu ŋa nkok ntehnënd:
«Hnam njëkëhnahnëniho vacërakëlo hun va
do nuni ile liɓuho ỹa
10 hnë wabëhn wafëhw wanah hna (40).
Soŋe rac ntavëko gë vëhni do ntehnëɓu:
“Ntaw̃ary ntëw̃ hni ŋa pitaɗ g'ami kwëlëkwël.
Vëyëtëna nkaw̃ mën ŋa.”
11 Hnë ntavah mën hna, akwëryëɓu:
“Vëyëtëɗina muk ƴinëga mën ŋa!”»
12 Vëỹënta mën, kwëtëryin hakili fagant hun ahnë ntë kwëhna ntaw̃ary meh nte wok kwëtahn hna, nte liyehnëɗëha tav a W̃ën hunte wok cëmëɗina.
13 Ɓare, fac-wo-fac, kamënaỹehnëlëryin wati le nkok mbiỹëɗ ile macëk Vikerëh vi «dol», ɗanko ahnë-wo-ahnë antë piɗ sakahn lëw̃u kaɓi tavëk wameh ŋa tokahna.
14 Ha, vërëfal Këris yeyinëk ge kwëtayinëk paryi hafo wapuyala hna tama nte hwëhnayinëko wapëgwalahna.
15 Had gante ntehnik ki:
«Dol, ge nkwëryërun kopa W̃ënu ŋa,
antë afiɗu sakahn hun ha,
had koɓëri ka ante ndáncëntirunëho ŋa.»
16 Mo w̃ëryëk do ryáncëntik? Vële canëko Moyis Esipët va ye.
17 Mo lavëndanëka W̃ënu ŋa wabëhn wafëhw wanah (40)? Vële w̃enëk va do sëmëk hnë wula hna ye.
18 W̃ënu ŋa nkwëryëk: «Vëyëtëɗina muk ƴinëga ntëw̃u ŋa.» Vëhni mo kwëryëhnëk? Vële ŋwëỹëhnëkawo va ye.
19 Tac kamahnëɓun vëỹin: vëw̃ëkëna njëtëni ƴinëga W̃ënu ŋa kaɓi vëhwëtahnëna.