98
Tavástaraꞌ pu arí jatáaꞌsacaꞌ ɨ tɨ jɨn tyuꞌtyámueꞌtɨn
Chuíicarij
1 ¡Siataꞌaj jájcuacan tyuꞌtáchuiicaj ɨ Tavástaraꞌ jimi,
jiꞌnye tyámuaꞌ pu vaꞌcán jɨn tyúꞌruuj tajimí ɨ tyaj jɨn jeꞌej tyoꞌtaséj!
¡Puꞌríj jatáaꞌsacaꞌ ɨ tɨ jɨn tyuꞌtyámueꞌtɨn
aꞌɨ́jcɨ jɨmeꞌ ɨ tɨ néijmiꞌi jɨn putyíꞌuurej, ajta ɨ jumuácaꞌ jɨmeꞌ tɨ tyámuaꞌ een!
2 Ɨ Tavástaraꞌ pu arí jaataxájtacaꞌ ɨ tɨ jɨn tyuꞌtyáamueꞌtɨj,
ajta arí jaataséjratacaꞌ ɨ tɨ jɨn tyámuaꞌ tyáꞌxaꞌpuɨꞌɨntareꞌ
aꞌɨ́ɨmaj mu mij jaaséj ɨ maj aꞌyan huacháatɨmee ɨ cháanacaj japua,
3 aꞌnáj tɨnaꞌaj pu jitzán séejreꞌ ɨ tɨ jɨn tyúꞌxɨeꞌveꞌ ajta ɨ tɨ jɨn tyámuaꞌ tyíꞌtyevij
aꞌɨ́ɨjma jimi ɨ tyeɨ́tyee ɨ maj Israel jitze ajtyámaꞌcan.
¡Majta meríj néijmiꞌi jaaséj aꞌájna ɨmuáj joꞌtɨj ɨ cháanacaj jooꞌástɨmee
aꞌɨ́jcɨ ɨ taj Dios tɨ jɨn tyuꞌtyáamueꞌtɨj!
4 Xuutyámuaꞌveꞌej xu setyuꞌtáchuiicaj ɨ Dios jimi,
mu siaj yan huacháatɨmee néijmiꞌqueꞌ ɨ cháanacaj japua;
jéehua xu naa tyityatóotyamuaꞌveꞌen
siajta jimi tyuꞌtáchuiicaj.
5 Setyuꞌtáchuiicaj ɨ Tavástaraꞌ jimi aꞌɨ́jcɨ jitze setyiꞌcuíinaj ɨ arpaj,
siajta aꞌɨ́jcɨ jitze canárij tɨ tyeꞌejvivin.
6 Siataꞌaj jutyamuaꞌveꞌej setyuꞌtáchuiicaj aꞌɨ́jcɨ jimi ɨ Tavástaraꞌ, ɨ tɨ Rey puéꞌeen,
siajta néijmiꞌi aꞌɨ́jcɨ jitze ɨ cɨꞌsítyeꞌrij tɨ tyíꞌsejreꞌ.
7 Cheꞌ huatánamuajreꞌen ɨ jájrij ajta néijmiꞌi aꞌɨ́j tɨ jitze tyíꞌsejreꞌ,
ɨ cháanacaj majta ɨ maj japuan huacháatɨmee;
8 cheꞌ ajta huatánamuajreꞌen ɨ játyaꞌnaj;
micheꞌ antyóosɨɨreꞌen ɨ jɨríj mej mij huajíjhua muutyámuaꞌvaꞌaj
9 aꞌɨ́jcɨ jimi ɨ Tavástaraꞌ,
ɨ tɨ mujoꞌvéꞌmej tɨꞌij tyuꞌtaꞌíjtaj ɨ cháanacaj japua.
Aꞌɨ́ɨ pu tyuꞌtaꞌíjtaj tɨꞌɨj naꞌaj tyiꞌchájtaꞌnajmee íiyan ɨ cháanacaj japua
tyámuaꞌ tyuꞌtoojéꞌyacan jɨmeꞌ ajta juxaꞌaj naꞌaj tyihuoꞌtaꞌíjtyeꞌsij.