94
Aꞌɨ́jna ɨ Tavástaraꞌ aꞌɨ́ɨ pu juées puéꞌeen íiyan ɨ cháanacaj japua
1 ¡Huatáꞌsejrataj, Tavástaraꞌ, Dios paj aꞌɨ́jna jɨn antyíaꞌmuaꞌreej paj tyámuaꞌ tyoꞌxáꞌpuɨꞌɨntareꞌen!
2 Muáaj paj aꞌɨ́ɨn puéꞌeen ɨ juées paj jɨn tyiꞌtyéjvee íiyan ɨ cháanacaj japua;
¡ájchesij aꞌɨ́ɨjma jimi ɨ maj óotzaahuatyeꞌ
aꞌyaa paj tyihuoꞌxáꞌpuɨꞌɨntariꞌtzeꞌen jeꞌej tɨ huaꞌ jimi tyiꞌtyéevijtɨj!
3 ¿Aꞌchunyéj móoj áꞌtyeeren, Tavástaraꞌ,
aꞌchunyéj móoj áꞌtyeeren muutyámuaꞌvaꞌaj aꞌɨ́ɨmaj ɨ maj jeꞌej puaꞌaj tyityetyúuchaꞌɨj?
4 Néijmiꞌi mu jeꞌej puaꞌaj tyityetyúuchaꞌɨj
axáa mu tyíꞌjepeꞌ majta jéehua óotzaahuatyeꞌ;
¡aꞌɨ́ɨ mu jeꞌej tɨn huóoxaxaꞌaj!
5 Muáaj paj Tavástaraꞌ puéꞌeen,
aꞌɨ́ɨ mu jeꞌej puaꞌaj huáꞌuurej aꞌtyéɨtyeristyamuaꞌ;
mahuaꞌxaahuataj ɨ maj aꞌ jitze ajtyámaꞌcan.
6 Mahuáꞌcuꞌraj ɨ úucaa maj antyúujɨɨmuaꞌastariacaꞌ majta ɨ maj séej chuéj japua jáꞌmaꞌcan,
majta mu huaꞌcuꞌraj ɨ maj xáꞌrɨcaanyij.
7 Aꞌyaa mu tyíꞌxaj tɨ ɨ Tavástaraꞌ quee atányeej,
tɨ ɨ Dios raꞌ ɨ Jacob quee tyiꞌtɨ́j jeꞌej tyíꞌmuaꞌreej.
8 ¡Siataꞌaj tyihuojoꞌitéej xáꞌraꞌnyij, tyeɨ́tyee siaj quee tyiꞌtɨ́j huayíꞌtɨn siajta quee tyojóꞌitej!
¿Aꞌnajnyí sij tyiꞌtɨ́j jeꞌej tyuꞌtyátzaahuatyeꞌsij?
9 ¿Nyiquij quee iityánamuaj
aꞌɨ́jna ɨ tɨ jaatyátaahuacaꞌ ɨ tyaj jɨn iityanamuáarajmee?
¿Nyiquij quee ajta aꞌtányeej
aꞌɨ́jna ɨ tɨ jaatyátaahuacaꞌ ɨ jɨꞌsíj?
10 ¿Nyiquij quee puéjtzij huoꞌtáꞌsij
aꞌɨ́jna ɨ tɨ tyámuaꞌ huáꞌuurej ɨ tyeɨ́tyee séej chuéj japua maj jáꞌmaꞌcan?
¿Nyiquij quee ajta tyiꞌtɨ́j muaꞌreej
aꞌɨ́jna ɨ tɨ juꞌcámuaꞌriityej tɨꞌij tyuꞌyíꞌtɨhuaꞌan ɨ tyévij?
11 Tavástaraꞌ pu jamuaꞌreej tɨ ɨ tyáatɨꞌ
aꞌɨ́j naꞌaj tyiꞌriáꞌmuaꞌsij ɨ tɨ quee tyiꞌtɨ́j huɨɨreꞌ.
12 Muáaj paj Tavástaraꞌ puéꞌeen,
cheꞌ huatóotyamuaꞌveꞌen aꞌɨ́jna ɨ paj muáaj tyámuaꞌ joorej
pajta muáaj aꞌɨ́j tyámuaꞌ naa tyíꞌitɨɨj
13 taꞌaj ij quee tyiꞌtɨ́j jɨn jeꞌej tyóomuaꞌajcaj
tɨꞌɨjta jeꞌej puaꞌaj atyojoomeꞌen,
ajta aꞌɨ́jcɨ jimi ɨ tɨ jeꞌej puaꞌaj tyiꞌtyúuchaꞌɨj
aꞌɨ́j pu jimi tyámuaꞌ een joꞌtɨj jaꞌtyévesij.
14 Ɨ Tavástaraꞌ capu mahuóohuaꞌxɨj ɨ jutyéɨtyeristyamuaꞌ,
capu ajta jujɨ́ɨmuaꞌastacan ajóohuaꞌxɨj ɨ maj jimi tyáꞌtzaahuatyeꞌ.
15 Majtáhuaꞌaj mu tyámuaꞌ naa tyáꞌxaꞌpuɨꞌɨntareꞌen aꞌájna joꞌmaj jóosɨꞌrii,
majta néijmiꞌi ɨ maj tyámuaꞌ tyityetyúuchaꞌɨj aꞌyaa mu tyityoꞌcárutyij.
16 ¿Aꞌtanyíj nyaj japua huatányuusij
aꞌɨ́ɨjma jimi ɨ maj jeꞌej puaꞌaj rɨcɨj majta jeꞌej puaꞌaj tyíꞌuurej?
17 Tɨpuaꞌaj ɨ Tavástaraꞌ quee naatáhuɨɨreꞌnyijcheꞌen,
nyáaj nu nyij nyeríj aꞌáa jaꞌséeriaꞌcajcheꞌ joꞌmaj tyityajáꞌavaꞌtacaa.
18 Nyatɨꞌɨj aꞌyan tyuꞌtaxájtacaꞌ tɨjɨn: “Nyaꞌ ɨ́ɨcaj pu antyípuɨnyej”,
aꞌɨ́jna ɨ paj jɨn nyaxɨeꞌveꞌ, Tavástaraꞌ, aꞌɨ́ɨ pu mujoꞌvéꞌmej tɨꞌij naatáhuɨɨreꞌen.
19 Aꞌɨ́jna ɨ nyaj jɨn jeꞌej tyéꞌnyamuaꞌtzej
tɨ jitzán tásiseerii ɨ nyamuaꞌtzíiraꞌaj,
muáaj paj tyámuaꞌ tyinaatyéeje nyej nyij huatányetyamuaꞌveꞌen.
20 Capáj muáaj huáꞌjaahuatyeꞌ aꞌɨ́ɨjma ɨ juéesij ɨ maj quee tyámuaꞌ tyáꞌxaꞌpuɨꞌɨntareꞌ;
majta quee tyámuaꞌ rɨcɨj aꞌɨ́jcɨ jitze aꞌ nyuucaaj,
21 ɨ maj avíitzij jɨn jeꞌej puaꞌaj jaꞌuurej aꞌɨ́jcɨ ɨ tɨ quee tyiꞌtɨ́j jɨn áꞌɨtzeereꞌ ajta tyámuaꞌ tyiꞌtyúuchaꞌɨj,
majta jeꞌen tyuꞌtáꞌsij mej mij jaajéꞌcaj.
22 Ajta ɨ Tavástaraꞌ pu aꞌɨ́ɨn puéꞌeen ɨ tɨ naatyáhuɨɨreꞌej,
aꞌɨ́jna ɨ nyaj Dios pu aꞌɨ́ɨn puéꞌeen ɨ tyetyéj ɨ nyaj jitzan huatyényaꞌavaaj.
23 Tavástaraꞌ pu tyuꞌtáꞌsij mej mij ɨ maj jeꞌej puaꞌaj tyityetyúuchaꞌɨj
aꞌɨ́jna jɨn antyipuaꞌrej ɨ maj jɨn jujɨ́ɨmuaꞌaj jeꞌej puaꞌaj tyityetyúuchaꞌɨj.
¡Aꞌɨ́jna ɨ taj Dios pu huaꞌantyipuaꞌrityeꞌsij!