9
Chuíicarij aꞌɨ́j tɨ jitze maꞌcan ɨ Dios tɨ tyámuaꞌ naa tyíꞌuurej
Ɨ tɨ aꞌɨ́jna jɨn antyúumuaꞌreej jeꞌej maj tyuꞌtáchuiicaj, aꞌɨ́jcɨ jitze ɨ cɨꞌsítyeꞌrij majta ɨ canárij jitze. Chuíicarij David tɨ joꞌyúꞌxacaꞌ
1 Tavástaraꞌ,
nyáaxɨeꞌveꞌ nyaj tyimuaatatyójtziꞌreꞌen néijmiꞌi ɨ nyaxɨéjnyuꞌcaa jɨmeꞌ
nyajta tyuꞌtaxáj ɨ tɨ jéehua a jitze tyíꞌsejreꞌ ɨ tɨ naa tyuꞌséꞌrin.
2 Muáaj jútyeꞌ ɨmuáj paj jáꞌsejreꞌ,
a jitze maꞌcan nu jaxɨeꞌveꞌ nyaj huajíjhua nyenyetyámuaꞌvaꞌaj,
¡nyáaxɨeꞌveꞌ nyaj aꞌɨ́j jitze maꞌcan tyuꞌtáchuiicaj jeꞌej paj ántyapuaj!
3 Aꞌɨ́ɨmaj ɨ maj nyéjchaꞌɨɨreꞌ aꞌɨ́ɨ mu muéetzij jimi huatóoꞌuunaj;
mueꞌtávatzɨj majta jeꞌen cuiꞌnyij.
4 Muáaj paj juées puéꞌeen ɨ tɨ quee tyiꞌtɨ́j jɨn áꞌɨtzeereꞌ,
papuꞌríj acáayixɨj aꞌ ɨpuáaj jitze, pej pij tyámuaꞌ tyinoꞌxáꞌpuɨꞌɨntariꞌtzeꞌen.
5 Papuꞌríj huaꞌajtyáꞌxɨj aꞌɨ́ɨjma ɨ maj quee tyáꞌtzaahuatyeꞌ,
pajta huaꞌantyipuaꞌrij aꞌɨ́ɨjma ɨ maj jeꞌej puaꞌaj tyityetyúuchaꞌɨj,
¡papuꞌríj jusén jɨmeꞌ joꞌriuꞌuj ɨ maj jɨn huaꞌtamuáꞌreꞌrihuaꞌaj!
6 Aꞌɨ́jna ɨ tɨ quee tyámuaꞌ tyihuojóꞌmuaꞌraj puꞌríj huamuɨ́ꞌ,
majta jamuán huácuij ɨ maj aꞌáa joꞌcháatɨmaꞌcaa ɨ chájtaꞌnaj jitze joꞌtɨj aꞌɨ́ɨn tyejéꞌijtaj,
muáaj paj huaꞌantyipuaꞌrityej,
capu cheꞌ huaꞌ jimi séejreꞌ ɨ maj jɨn huoꞌtámuaꞌree.
7 Ajta ɨ Tavástaraꞌ aꞌɨ́ɨ pu Rey jɨn tyiꞌtyéjvee jusén jɨmeꞌ,
aꞌɨ́ɨ pu arí tyámuaꞌ jáaruuj ɨ juꞌɨpuáa tɨꞌij huoꞌxaꞌpuɨꞌɨntariꞌtzeꞌen,
8 néijmiꞌcaa pu áꞌxɨjtyeꞌen ɨ maj yan huacháatɨmee ɨ cháanacaj japua,
aꞌɨ́ɨ pu tyámuaꞌ naa tyihuoꞌtaꞌíjtyeꞌsij tɨꞌɨj naꞌaj tyiꞌchájtaꞌnajmee.
9 Tavástaraꞌ pu tyámuaꞌ naa tyihuáꞌchaꞌɨj aꞌɨ́ɨjma ɨ maj quee cheꞌ jeꞌej jájtyoovej;
aꞌɨ́ɨ pu tyámuaꞌ tyihuáꞌchaꞌɨj matɨꞌɨjta jeꞌej tyityóomuajtyaj.
10 Tavástaraꞌ,
ɨ maj muamuaꞌtyej, muéetzij mu jitze tyíꞌcaꞌnyej,
jiꞌnye capáj aꞌnáj mahuóohuaꞌxɨj aꞌɨ́ɨjma ɨ maj muahuoo.
11 Setyuꞌtáchuiicaj ɨ Tavástaraꞌ jimi, ɨ tɨ aꞌáa tyejéꞌijtaj aꞌájna a Sión;
siahuoꞌréꞌixaatyeꞌ néijmiꞌqueꞌ ɨ chájtaꞌnaj jitze jeꞌej tɨ aꞌɨ́ɨn tyiꞌtɨ́j huáruuj.
12 Dios pu huaꞌtamuáꞌreꞌrii aꞌɨ́ɨjma ɨ maj jeꞌej tyityóomuajtyej
ajta quee yóꞌhuaꞌnaj ɨ maj juyiin;
puéjtzij pu huoꞌtaꞌsij aꞌɨ́ɨjma ɨ maj huaꞌnyoꞌsiꞌtyeꞌ.
13 Tavástaraꞌ, náꞌancuꞌvaxɨꞌ nyéetzij,
cásɨꞌ jeꞌej mu puaꞌaj nyaꞌuurej ɨ maj nyaxanaꞌveꞌ,
¡pataꞌaj nyaj japua huatányuunyij nyej nyij quee huámuɨꞌnyij!
14 Aꞌyaa nu nyij, aꞌájna joꞌtɨj jaꞌpueertaj a Jerusalén,
aꞌyaa nu tyihuoꞌtéꞌexaatyeꞌej néijmiꞌcaa aꞌyan maj huacháatɨmee ɨ cháanacaj japua tɨ muéetzij jimi xáꞌpuɨꞌ mej mij tyuꞌtáchuiicaj,
nyej nyajta nyetyamuaꞌveꞌ jiꞌnye muáaj paj nyajapuáj huatanyúj.
15 Aꞌɨ́ɨmaj ɨ maj quee tyáꞌtzaahuatyeꞌ aꞌɨ́ɨ mu jujɨ́ɨmuaꞌaj jeꞌej puaꞌaj juꞌuurej,
aꞌɨ́ɨ mu jujɨ́ɨmuaꞌaj eetávitzej
aꞌɨ́jcɨ jitze ɨ tápiꞌnarij aꞌɨ́ɨmaj maj tyuꞌtyáꞌavaatacaꞌ mej mij séecan huavíviꞌ.
16 Tavástaraꞌ pu arí tyuꞌtáꞌ mej mij jáamuaꞌtyij,
aꞌɨ́ɨ pu arí néijmiꞌi tyoꞌxáꞌpuɨꞌɨntarej.
Aꞌɨ́j mu huatyéviꞌraj ɨ tɨ jeꞌej puaꞌaj tyiꞌtyúuchaꞌɨj
aꞌɨ́jcɨ jɨmeꞌ ɨ tyiꞌtɨ́j aꞌɨ́ɨn tɨ tyámuaꞌ jáaruuj tɨꞌij séej huatyéeviꞌ.
17 Aꞌɨ́ɨmaj ɨ maj jeꞌej puaꞌaj tyityetyúuchaꞌɨj majta ɨ maj quee tyáꞌtzaahuatyeꞌ,
majta ɨ maj yoꞌhuáꞌxɨj ɨ Dios,
aꞌáa mu joꞌtyáꞌɨtzeereꞌej joꞌmaj ɨ muɨꞌchítyee jáꞌavaꞌtacaa,
18 jiꞌnye camu aꞌnáj huojoꞌhuáꞌxɨj ɨ maj quee jeꞌej tyéejviicueꞌ,
capu ajta jusén jɨmeꞌ jóꞌvesij ɨ maj jitzán tyiꞌijchóꞌveꞌ.
19 Ájchesij, Tavástaraꞌ,
capáj tyámuaꞌ tyeetyéjeevej aꞌɨ́jcɨ ɨ tyáatɨꞌ tɨ óotzaahuatyeꞌ,
pataꞌaj aꞌáa huoꞌxɨ́jtyeꞌen joꞌpaj muáaj jáꞌsejreꞌ aꞌɨ́ɨjma ɨ maj quee tyáꞌtzaahuatyeꞌ.
20 Aꞌyaa paj huóꞌuurej mej mij tyuꞌtátzɨɨnyeꞌen, Tavástaraꞌ,
¡huoꞌtaꞌ mej mij uhuóomuaꞌtzɨj maj tyétyecaa manaꞌaj puéꞌeen!