63
Dios pu aꞌɨ́ɨn puéꞌeen ɨ tɨ jɨn naa jaꞌasej aꞌɨ́jcɨ ɨ tyévij
Chuíicarij David tɨ joꞌyúꞌxacaꞌ, tɨꞌɨj aꞌáa joꞌtyávaacaꞌaj joꞌtɨj quee jáꞌtyiꞌtɨj aꞌáa tɨ jaꞌajtyámaꞌcan a Judá
1 ¡Nyaj Dios, muáaj paj aꞌɨ́ɨn puéꞌeen ɨ nyaj Dios!
Jéehua nu muaxɨeꞌveꞌ nyámuahuoo, jiꞌnye muáaj paj aꞌɨ́ɨn puéꞌeen ɨ jájtyij tɨ nyejitzé juxɨeꞌveꞌ;
néijmiꞌi pu ɨ nye tyévij muéetzij muaxɨeꞌveꞌ,
aꞌyájna tɨꞌɨj joꞌtɨj joꞌhuáchij, joꞌtɨj jéehua ɨ jájtyij jóoxɨeꞌveꞌ.
2 ¡Nyámuaseejramuꞌ aꞌájna joꞌtɨj tyámuaꞌ tyejéꞌeen,
nyajta jeꞌen jaaséj ɨ paj néijmiꞌi jɨn putyíꞌuurej ajta ɨ paj jɨn naa huaséꞌrin,
3 jiꞌnye ɨ paj jɨn nyaxɨeꞌveꞌ jéetzeꞌ pu tyíꞌhuɨɨreꞌ quee ɨ nyaj jɨn júurij!
Nye tyenyij nu jɨn tyimuaatatyójtziꞌreꞌej,
4 néijmiꞌi nu ɨ nyajúuricamej jɨn tyiꞌmuatyóotziꞌreꞌej naꞌmej,
muéetzij jimi nu ajméjcaꞌtaxɨꞌɨj nyatɨꞌɨjta huatyényuunyij.
5 Huápuɨꞌɨj pu naa naatáꞌastij,
aꞌyájna tɨꞌɨj ɨ tɨ tyíꞌcuaꞌ aꞌájna joꞌmaj naa eenyeꞌ tyajáꞌcueꞌraataj,
nye tyenyij nu jɨn tyimuaatatyójtziꞌreꞌej nyenyetyámuaꞌvaꞌaj.
6 Tɨꞌɨjta tɨ́caꞌ, nyatɨꞌɨjta huaqueꞌtɨ́j,
muéetzij nu muaꞌtamuáꞌreꞌrii nyajta muéetzij jitze tyíꞌmuaꞌtzej,
7 jiꞌnye muáaj paj aꞌɨ́ɨn puéꞌeen ɨ tɨ nyahuɨɨreꞌ.
¡Aꞌ anáj jityej nu nyetyamuaꞌveꞌ!
8 Néijmiꞌi pu ɨ nyajúuricamej muéetzij jitze séejreꞌ,
pajta aꞌmuácaꞌtaꞌ jɨn quee nyatatoꞌraj.
9 Aꞌɨ́ɨmaj ɨ maj aꞌyan tyáꞌxɨeꞌveꞌ maj naajéꞌcaj
aꞌáa mu jaꞌtyávatzɨj joꞌtɨj jaꞌtyácun majta jeꞌen antyipuaꞌrij,
10 ¡aꞌɨ́ɨ mu cuiꞌiihuan aꞌɨ́jcɨ jɨmeꞌ ɨ chúun
majta jeꞌen ɨ ɨ́ɨraꞌvetyee huaꞌcɨꞌmen!
11 Ajta aꞌɨ́jna ɨ tɨ rey jɨn tyiꞌtyéjvee aꞌɨ́ɨ pu huatóotyamuaꞌveꞌsij ɨ Dios jimi,
aꞌɨ́ɨ mu tyuꞌtáchuiicaj aꞌɨ́ɨmaj ɨ maj jimi tyaꞌtóoratziiriꞌ,
majta ɨ maj tyíꞌhueꞌtacaa aꞌɨ́ɨ mu quee cheꞌ atanyúuvaꞌaj muáꞌjuꞌun.