57
Jeꞌej tyaj tyityeetyényuunyij tɨꞌij aꞌɨ́ɨn taatyáhuɨɨreꞌen ɨ tajapuá tɨ jáꞌmaꞌcan
Ɨ tɨ aꞌɨ́jna jɨn antyúumuaꞌreej jeꞌej maj tyuꞌtáchuiicaj: “Capáj tyiꞌtɨ́j antyíuꞌnaꞌan.” Nyúucarij tɨ naa huánamuajrii aꞌɨ́ɨn tɨ jariaꞌmuaꞌaj aꞌɨ́jna ɨ David, tɨꞌɨj huatóoꞌuj aꞌɨ́jcɨ jimi ɨ Saúl ajta jeꞌen aꞌáa joꞌtyóoꞌavaatacaꞌaj joꞌtɨj jáꞌtyastaꞌ
1 Náꞌancuꞌvaxɨꞌ nyéetzij, nyaj Dios, náꞌancuꞌvaxɨꞌ nyéetzij,
jiꞌnye muéetzij jimi nu jahuoo pej pij naatyáhuɨɨreꞌen.
Aꞌyaa nu tyáꞌxɨeꞌveꞌ nyaj aꞌ anáj jityej huatyényaꞌavaaj,
ꞌasta naꞌaj quee néijmiꞌi mutyojoꞌmeꞌen.
2 Aꞌɨ́j nu jimi huatyényuusij ɨ Dios jútyeꞌ ɨmuáj tɨ jáꞌsejreꞌ,
aꞌɨ́jcɨ jimi ɨ Dios ɨ tɨ néijmiꞌi jɨn nyahuɨɨreꞌ.
3 Aꞌɨ́ɨ pu jútyeꞌ ɨmuáj uyoꞌtaꞌítyij ɨ tɨ jɨn taxɨeꞌveꞌ ajta ɨ tɨ jimi jɨꞌréꞌcan jɨmeꞌ,
aꞌɨ́ɨ puꞌij nyajapuáj huatányuusij aꞌɨ́ɨjma jimi ɨ maj huápuɨꞌɨj jeꞌej puaꞌaj nyaꞌuurej.
4 Aꞌáa nu nyáaj chóotaꞌ joꞌriáꞌcaꞌaj,
huaꞌtzajtaꞌ ɨ muájyej tyeɨ́tyee maj cɨꞌmacaa,
huaꞌ tamej pu aꞌyan een tɨꞌɨj ɨ tyapúustiꞌ tɨ antyípityij ajta tɨꞌɨj ɨꞌrɨ́j,
ajta ɨ huaꞌ nyanuu tɨꞌɨj chúun tɨ tyíꞌɨtzɨj.
5 Nyaj Dios, muáaj paj japuan jáꞌsejreꞌ ɨ tajapuá tɨ séejreꞌ.
Aꞌɨ́jna ɨ paj jɨn naa huaséꞌrin pu néijmiꞌqueꞌ aꞌyan séejreꞌ ɨ cháanacaj japua.
6 Aꞌɨ́ɨmaj ɨ maj nyéjchaꞌɨɨreꞌ aꞌɨ́ɨ mu tyiꞌtɨ́j tyámuaꞌ huáruuj mej mij naatyéeviꞌ
tɨꞌij quee cheꞌ nyacaꞌnyistiꞌraj,
aꞌɨ́ɨ mu mij jaꞌtyáacuj jóꞌnyaj joꞌréꞌnyinyiij,
majta aꞌɨ́ɨmaj mu jujɨ́ɨmuaꞌaj aꞌáa jaꞌtyáavatzɨj.
7 Ɨ nyaj xɨéjnyuꞌcaa pu néijmiꞌi jɨn óocaꞌnyej, nyaj Dios,
ɨ nyaxɨéjnyuꞌcaa pu tyámuaꞌ een tɨꞌij aꞌjimi tyuꞌtáchuiicaj.
8 Nyajúuricamej, pataꞌaj huájɨstij,
xaatájɨsij, canárij ɨ maj jitzán tyíꞌcuiꞌnacaa,
tyámuaꞌ xu huóoꞌuurej tɨꞌɨj quee eexúj ɨ xɨcáj eeréꞌnyej.
9 Chuíicarij nu jɨn tyimuaatatyójtziꞌreꞌej, Tavástaraꞌ,
jéꞌtaꞌ aꞌájna joꞌmaj jáꞌsejreꞌ aꞌtyéɨtyeristyamuaꞌ majta ɨ maj séej chuéj japua jáꞌmaꞌcan.
10 Jiꞌnye ɨ paj jɨn taxɨeꞌveꞌ tajapuá pu ɨmuáj jaꞌráꞌasej,
ajta ɨ paj jɨn tyámuaꞌ een aꞌáa pu jaꞌráꞌasej ɨ tɨ huáꞌraa jitze tajapuá tɨ séejreꞌ.
11 Nyaj Dios, muáaj paj japuan jáꞌsejreꞌ ɨ tajapuá tɨ séejreꞌ.
¡Aꞌɨ́jna ɨ paj jɨn naa huaséꞌrin aꞌɨ́ɨ pu néijmiꞌqueꞌ oorióonajchi ɨ cháanacaj japua!