55
Jeꞌej tɨ tyuꞌtyéenyuj aꞌɨ́jna ɨ maj jaatamuárij
Ɨ tɨ aꞌɨ́jna jɨn antyúumuaꞌreej jeꞌej maj tyuꞌtáchuiicaj, aꞌɨ́jcɨ jitze ɨ maj jitzán tyíꞌcuiꞌnacaa tɨ tyeꞌejvivin. Jeꞌej tɨ tyihuoꞌmuáꞌtyej aꞌɨ́jna ɨ David
1 Nyaj Dios, huánamuaj jeꞌej nyaj muéetzij jimi tyiꞌtyényuusij;
capáj yóꞌhuaꞌnan jeꞌej nyaj tyíꞌmuahuaviij.
2-3 Náanamuaj, naatájee,
muéetzij nu jimi huatyényuusij nyatɨꞌɨjta quee jeꞌej jájtyooveꞌen.
Aꞌɨ́ɨ mu nyamuarityeꞌ jeꞌej maj tyíꞌxaj ɨ maj nyéjchaꞌɨɨreꞌ
ajta jeꞌej maj tyíꞌtyejijhuaj ɨ maj jeꞌej puaꞌaj rɨcɨj.
Jéehua mu jeꞌej puaꞌaj tyiꞌnyamuarɨeꞌristeꞌ,
majta nyenyoꞌsiꞌtyeꞌej jéehua menyínyuꞌcacuj.
4 Caꞌnyíin pu huápuɨꞌɨj úꞌtzunaj ɨ nyaxɨéjnyuꞌcaa ɨ nyatzájtaꞌ,
aꞌɨ́ɨ pu nye jitze ráꞌaj ɨ tzɨ́ɨnyiꞌraꞌaj nyej nyij quee jaxɨeꞌvaꞌaj nyaj huámuɨꞌnyij.
5 Huápuɨꞌɨj nu tyíꞌtzɨɨnyeꞌ yunyatzájtaꞌ,
nyetyényeviveesij aꞌɨ́jcɨ jɨmeꞌ nyaj tyíꞌtzɨɨnyeꞌ.
6 Aꞌyaa nu nyij tyíꞌxaj tɨjɨn:
“Aꞌtzúj cuj nyáaj aꞌyan nyetyaꞌajtaꞌ anájmeꞌnyij tɨꞌɨj ɨ jáamuiꞌ,
aj nu nyij huataraꞌranyijcheꞌen nyej nyij huányasoꞌpeꞌen.
7 Naaráꞌrɨeꞌsimaꞌaj nu nyij ɨmuáj jeꞌej huarutyéecheꞌen,
aꞌáa nu jaꞌhuanyechéetyeꞌnyijcheꞌen joꞌtɨj quee jáꞌtyiꞌtɨj.
8 Aj nu nyij huatanyaꞌuunajcheꞌen tɨꞌij náahuɨɨreꞌen
aꞌɨ́jcɨ jɨmeꞌ tɨ caꞌnyíin jɨn huáꞌaacaj majta caꞌnyíin jɨn viiyej.”
9 Huaꞌantyipuaꞌrityeꞌ, Tavástaraꞌ, huojoꞌrɨéj huáꞌnyuucaa jɨmeꞌ,
jiꞌnye aꞌɨ́j nu séj maj jucuꞌraj majta jutyaꞌxɨꞌɨj,
10 tújca majta tɨ́caꞌ aꞌáa mu jaꞌtacɨꞌɨj ɨ chájtaꞌnaj jitze.
Aꞌɨ́j mu jitze séejreꞌ ɨ maj jeꞌej puaꞌaj rɨcɨj majta ɨ maj avíitzij jɨn jeꞌej puaꞌaj tyúuxaj,
jéehua mu néijmiꞌi huápuɨꞌɨj jeꞌej puaꞌaj tyityetyúuchaꞌɨj,
11 aꞌáa pu ɨ cáayej jitze séejreꞌ maj jucuꞌraj majta jucuanamuaj.
12 Capu aꞌɨ́ɨn jeꞌej puaꞌaj tyinaataxájtacaꞌ ɨ tɨ nyéjchaꞌɨɨreꞌ,
tyiꞌtɨ́j nyej nyáaj aꞌyan tyéꞌviicueꞌ,
capu ajta naatanyóꞌsiꞌtyej aꞌɨ́jna ɨ tɨ nyaxanaꞌveꞌ,
nyej nyajta jimi pújoorej nyej nyij huatyényaꞌavaaj.
13 ¡Ajta muáaj paj aꞌɨ́ɨn puéꞌeen, ɨ tyaj tyámuaꞌ naa tyíꞌtamuajtyej,
pajta muáaj huápuɨꞌɨj tyámuaꞌ naa tyíꞌnyamuaꞌtyej,
14 ɨ tyaj néemiꞌij aꞌáa jáꞌtasɨꞌrihuaꞌaj ɨ tyeyúujraꞌ tzajtaꞌ ɨ Dios
tyej tyij tyámuaꞌ naa tyiꞌhuátaꞌixaatyeꞌen,
tyajta tu néemiꞌij cɨɨnyacaꞌaj huaꞌ tzajtaꞌ ɨ tyeɨ́tyee!
15 ¡Micheꞌ jiyeꞌtzín huácuiꞌnyij ɨ maj nyéjchaꞌɨɨreꞌ!
Micheꞌ júurican avaꞌnaj,
jiꞌnye huaꞌxɨéjnyuꞌcaa tzajtaꞌ pu séejreꞌ ɨ tɨ jeꞌej puaꞌaj een.
16 Nyajta nyáaj nu ɨ Dios jimi huatyényuusij,
aꞌɨ́ɨ pu ɨ Tavástaraꞌ nyajapuáj huatányuusij.
17 Nyáaj nu nyenyuusteꞌen nyajta nyeyiinyen
íiyaꞌ, chúmuaꞌ nyajta tɨ́caꞌ,
aꞌɨ́ɨ puꞌij nyanamuajran.
18 Nyajapuáj pu huatányuusij nyatɨꞌɨj huatyényoꞌseꞌen,
japuan pu huatányuusij ɨ nyajúuricamej,
tyij majta jéehua aráꞌaxcaj ɨ maj nyéjchaꞌɨɨreꞌ.
19 Aꞌɨ́jna ɨ Dios, ɨ tɨ jusén jɨmeꞌ tyíꞌijta,
aꞌɨ́ɨ pu nyanamuajran ajta jeꞌen huoꞌtyáxaahuataj,
jiꞌnye camu aꞌɨ́ɨmaj jatapuáꞌcɨtacaa ɨ maj jɨn jeꞌej puaꞌaj tyityetyúuchaꞌɨj
camu majta jatzɨɨnyeꞌ ɨ Dios.
20 Aꞌɨ́ɨ mu jumuácaꞌ jɨn jeꞌej puaꞌaj huáꞌuurej ɨ juꞌ amíincustyamuaꞌ,
majta quee jaꞌráꞌastee jeꞌej maj tyityaꞌtóorasij aꞌɨ́ɨjma jimi ɨ maj huáꞌmuajtyej.
21 Majta huápuɨꞌɨj naa huatoocuaꞌnyéej metyíꞌxaj,
ajta ɨ huaꞌmuaꞌtziiraꞌaj pu tzajtaꞌ séejreꞌ ɨ maj jɨn nyoꞌseꞌ.
Ajta ɨ huáꞌnyuucaa jéetzeꞌ pu cuaꞌtyij quee ɨ aséityij,
ajta capu aꞌyan een sulu chúun pu puéꞌeen tɨ huápuɨꞌɨj tyíꞌɨtzɨj.
22 Tavástaraꞌ paj jitze tyuꞌtyátoonyij ɨ paj jɨn jeꞌej tyáꞌmuaꞌtzej,
aꞌɨ́ɨ puꞌij tyámuaꞌ tyiꞌmuachaꞌɨ́ɨj jaꞌmej;
capu aꞌnáj tyuꞌtáꞌsij tɨꞌij eetávetyij
aꞌɨ́jna ɨ tyáatɨꞌ tɨ tzáahuatyiꞌraꞌaj jimi tyíꞌchaꞌɨj.
23 Nyaj Dios, ɨ maj tyíꞌtyacuiꞌcaa majta ɨ maj tyíꞌhueꞌtacaa camu júurij muáꞌjuꞌun
camu manaꞌaj jéꞌtaꞌ úhuiixɨꞌɨj aꞌchu maj áꞌtɨjtɨꞌrej maj júurij,
muáaj paj aꞌáa huajaꞌtyáhuaꞌxɨj joꞌmaj tyityajáꞌavaꞌtacaa,
nyajta nyáaj nu aꞌ jitze tyíꞌcaꞌnyej.