33
Chuíicarij ajta ɨ tyaj jɨn tyaatatyójtziꞌreꞌen ɨ Tavástaraꞌ
1 Siataꞌaj jimi tyuꞌtáchuiicaj ɨ Tavástaraꞌ, tyétyacaa siaj tyámuaꞌ een,
huaꞌ tyenyij jitze aꞌɨ́ɨjma ɨ maj tyámuaꞌ een, naa pu huánamuajrii ɨ chuíicarij.
2 Setyuꞌtatyójtziꞌreꞌ ɨ Tavástaraꞌ aꞌɨ́jcɨ jɨmeꞌ ɨ áarpaj,
siajta jimi tyuꞌtáchuiicaj aꞌɨ́jcɨ jɨmeꞌ ɨ canárij,
3 siataꞌaj chuíicarij tɨ jájcuaj huatáchuiicaj,
¡siajta jutyamuaꞌveꞌej tyámuaꞌ naa jimi setyuꞌtácuiinaj!
4 Aꞌɨ́jna ɨ nyúucariaꞌraꞌ ɨ Tavástaraꞌ jɨꞌréꞌcan jɨmeꞌ pu séejreꞌ,
aꞌɨ́j pu jɨn séejreꞌ tyiꞌtɨ́j tɨ aꞌɨ́ɨn tyúꞌtaahuacaꞌ.
5 Tavástaraꞌ pu aꞌɨ́j xɨeꞌveꞌ ɨ tɨ quee tyiꞌtɨ́j jɨn áꞌɨtzeereꞌ tɨ ajta tyámuaꞌ een,
¡aꞌɨ́jna ɨ tɨ jɨn taaxɨéꞌvej aꞌɨ́ɨ pu arí orióonajchacaꞌ néijmiꞌqueꞌ ɨ cháanacaj japua!
6 Aꞌɨ́jcɨ jɨmeꞌ ɨ nyúucariaꞌraꞌ ɨ Tavástaraꞌ
aꞌɨ́j pu jɨn huatyátaavijhuacaꞌ ɨ tajapuá tɨ séejreꞌ,
ajta tɨꞌɨj tyuꞌtajɨ́ꞌtzej ɨ jutyényij jɨmeꞌ
aj mu mij néijmiꞌi ɨ xúꞌraꞌvetyee huataséjre.
7 Aꞌɨ́ɨ pu jasɨɨreꞌ ajta tyámuaꞌ jaꞌuurej
aꞌɨ́jcɨ ɨ jájtyij aꞌájna joꞌtɨj huápuɨꞌɨj jaꞌtyáatɨꞌ.
8 Siataꞌaj néijmiꞌqueꞌ ɨ chuéj japua jaatyátzaahuatyeꞌen ɨ Tavástaraꞌ,
¡néijmiꞌi xu jaatyátzaahuatyeꞌen mu siaj aꞌyan huacháatɨmee ɨ cháanacaj japua!
9 Jiꞌnye aꞌɨ́ɨ pu tyuꞌtaxájtacaꞌ, ajta jeꞌen néijmiꞌi tyúꞌtaavijhuacaꞌ,
aꞌɨ́ɨ pu tyuꞌtaꞌíjtacaꞌ, ajta jeꞌen néijmiꞌi tyámuaꞌ tyiꞌéenyeꞌej jaꞌraa.
10 Tavástaraꞌ pu néijmiꞌi huaꞌantyíꞌuunyiꞌraj tyiꞌtɨ́j maj muarɨeꞌ
aꞌɨ́ɨmaj ɨ maj quee tyáꞌtzaahuatyeꞌ,
11 ajta jeꞌej tyiꞌtɨ́j jɨn ɨ Tavástaraꞌ tyíꞌmuarɨeꞌ
aꞌnáj tɨnaꞌaj pu tyámuaꞌ éenyeꞌej jaꞌmej.
12 Micheꞌ huatóotyamuaꞌveꞌen ɨ tyeɨ́tyee ɨ tɨ huaꞌ Dios aꞌɨ́ɨn puéꞌeen ɨ Tavástaraꞌ,
chájtaꞌnaj aꞌɨ́ɨn tɨ jaꞌantyíhuoj ajta huatyóoaꞌrij.
13 Tavástaraꞌ pu taséj jútyeꞌ ɨmuáj
ajta néijmiꞌcaa tyámuaꞌ tyíꞌsej ɨ tyeɨ́tyee,
14 aꞌájna ɨmuáj joꞌtɨj aꞌɨ́ɨn jaꞌchej
aꞌɨ́ɨ pu néijmiꞌcaa tyámuaꞌ tyíꞌsej ɨ cháanacaj japua maj huacháatɨmee,
15 aꞌɨ́ɨ pu aꞌɨ́ɨn puéꞌeen ɨ tɨ jaatyátaahuacaꞌ ɨ huaꞌxɨéjnyuꞌcaa
aꞌɨ́ɨ pu ajta néijmiꞌi tyíꞌsej tyiꞌtɨ́j maj jɨn jeꞌej rɨcɨj.
16 Capu sɨ́ɨj ɨ tɨ rey jɨn tyiꞌtyéjvee jujapuá huatányuusij aꞌɨ́ɨjma jɨmeꞌ ɨ maj mueꞌtɨ́j ɨ xantáaruꞌuj jimi tyíꞌhuɨɨreꞌ,
camu majta aꞌɨ́ɨmaj jujapuá huatányuusij ɨ maj jéehua jaayíꞌtɨn maj huatyényoꞌseꞌen majta jéehua uhuácacaꞌnyeꞌ,
17 camu tyiꞌtɨ́j huɨɨreꞌ ɨ cahuáayuꞌuj mej mij séej japuan huatányuunyij,
tyij majta jéehua uhuácacaꞌnyeꞌej, camu huaꞌ japua huatányuusij.
18 Ajta ɨ Tavástaraꞌ aꞌnáj tɨnaꞌaj pu huáꞌchaꞌɨj
aꞌɨ́ɨjma ɨ maj tzáahuatyiꞌraꞌaj jimi tyíchaꞌɨj majta aꞌɨ́j jitze tyíꞌcaꞌnyej ɨ tɨ jɨn huaꞌxɨeꞌveꞌ,
19 aꞌɨ́ɨ pu huaꞌ japua huatányuusij mej mij quee huácuiꞌnyij
ajta júuricamej huoꞌtaꞌsij tɨꞌɨjta huatújriꞌhuaj.
20 Ityáj tu aꞌɨ́j jitze tyíꞌcaꞌnyej ɨ Tavástaraꞌ,
¡aꞌɨ́ɨ pu tahuɨɨreꞌ ajta tyámuaꞌ tyíꞌtachaꞌɨj!
21 Ɨ taxɨéjnyuꞌcaa pu jutyamuaꞌveꞌ ɨ Tavástaraꞌ jimi,
aꞌɨ́j tu jitze tyíꞌcaꞌnyej ɨ tɨ jɨn ántyapuaj tɨ naa een.
22 ¡Tavástaraꞌ, cheꞌ aꞌɨ́jna ɨ paj jɨn taxɨeꞌveꞌ, aꞌnáj tɨnaꞌaj tajamuán séjreꞌej,
aꞌyájna tyatɨꞌɨj muéetzij tyimuajchoꞌveꞌ!