30
Chuíicarij tyaj jɨn tyaatatyójtziꞌreꞌen ɨ Tavástaraꞌ
Chuíicarij. Jeꞌej maj tyuꞌtáchuiicaj matɨꞌɨj tyámuaꞌ tyeetyátoonyij ɨ tyeyúuj. David tɨ jaꞌaꞌrij
1 Tavástaraꞌ, nyáaj nu muéetzij tyíꞌmuatzojtziꞌreꞌ
jiꞌnye muáaj paj naatáꞌ nyej nyij nyaxáahuaj séjreꞌej,
jiꞌnye muáaj paj quee tyuꞌtáꞌ
mej mij aꞌɨ́ɨmaj naatyáxaahuataj ɨ maj nyéjchaꞌɨɨreꞌ.
2 Tavástaraꞌ, nyaj Dios,
muéetzij nu muaatáhuaviiriꞌ paj naatáhuɨɨreꞌen, muáaj pej pij tyináahuaj,
3 muáaj, Tavástaraꞌ, muáaj paj náahuɨɨ nyej nyij quee huámuɨꞌnyij,
júuricamej paj naatáꞌ, pajta nyajapuáj huatanyúj nyej nyij quee huámuɨꞌnyij.
4 Muaꞌaj, mu siaj tyámuaꞌ een ɨ Tavástaraꞌ jimi, ¡siataꞌaj jimi tyuꞌtáchuiicaj!,
¡siajta tyaatatyójtziꞌreꞌen ɨ tɨ naa een ɨ tɨ jɨn ántyapuaj!
5 Jiꞌnye capu aꞌchu áꞌtyeeren ɨ tɨ jɨn nyúꞌcamuɨꞌ,
ajta ɨ tɨ jɨn tyámuaꞌ naa tyaꞌajxɨéꞌviꞌraꞌ, jusén pu jɨn séejreꞌ.
Tɨpuaꞌaj tɨ́caꞌ tyátayiinyaꞌaj,
íiyaꞌ tu tyijtá tatyámuaꞌveꞌej táꞌjuꞌun.
6 Aꞌyaa pu nyéetzij nyaꞌaxcaj tɨquee tyiꞌtɨ́j jeꞌej nyoorej, nyajta aꞌyan tyiꞌriáꞌmuaꞌaj tɨjɨn:
“Capu cheꞌ aꞌnáj tyiꞌtɨ́j jeꞌej nyaꞌuurej.”
7 Pajta muáaj, Tavástaraꞌ, aꞌɨ́jna ɨ paj jɨn tyámuaꞌ tyitatáꞌcaa
muáaj paj períj tyámuaꞌ náaꞌuuriajcaꞌaj aꞌájna joꞌtɨj tyámuaꞌ tyejéꞌeen,
ajta patɨꞌɨj quee cheꞌ nyahuɨɨriaꞌcaꞌaj
aꞌɨ́jna ɨ tɨ tzɨ́ɨnyiꞌreꞌ pu nyojoꞌrɨej.
8 Tavástaraꞌ, muéetzij jimi nu huatyényuusij,
Tavástaraꞌ, muéetzij jimi nu jéehua jahuoo.
9 ¿Tyiꞌtanyí jeꞌej tyúumueꞌtɨj tɨpuaꞌaj nyáaj náamuɨꞌnyij,
nusu tɨpuaꞌaj nyéetzij manaꞌváꞌnaj?
¡Capu ɨꞌríj tɨ ɨ chuéj tɨ muɨɨnyíj tyimuaatatyójtziꞌreꞌen
nusu tɨ jaataxáj ɨ paj jɨn naa een!
10 Tavástaraꞌ, náanamuaj pajta nyéetzij náꞌancuꞌvaxɨꞌ,
Tavástaraꞌ, ¡naatáhuɨɨreꞌ!
11 Paj puꞌríj naatáꞌ nyaj aꞌɨ́jna jɨn huatányetyamuaꞌveꞌen ɨ nyaj jɨn nyaxaamuɨjrityaꞌcaꞌaj;
papuꞌríj néijmiꞌi tyinyacáaꞌriꞌriꞌ ɨ nyaj jɨn nyaxaamujrityeꞌ
pajta aꞌɨ́j tyinatyéechejtye ɨ nyaj jɨn tyúꞌyeꞌesten.
12 Aꞌɨ́j nu jɨn Tavástaraꞌ nyaj Dios,
capu ɨꞌríj nyaj quee aveꞌnyuucaꞌan,
¡aꞌ jimi nu tyuꞌtáchuiicaj
nyajta aꞌnáj tɨnaꞌaj tyimuaatatyójtziꞌreꞌej!