141
Nyáaj nu muéetzij jitze rányeej
Chuíicarij David tɨ jaꞌaꞌrij
1 Muéetzij jimi nu huatyényuusij, Tavástaraꞌ, ¡jiyeꞌtzín paj mujoꞌvéꞌmeꞌen!,
¡huánamuajriꞌ ɨ nyenyúucaa nyatɨꞌɨjta muéetzij jimi huatyényuunyij!
2 Cheꞌ aꞌyan eenyeꞌ ɨ nyaj jɨn huatyényuusij a jimi tɨꞌɨj ɨ ɨ́ɨjcua,
ajta ɨ nyaj aꞌ jimi ajméjcaꞌtaxɨꞌɨn, aꞌyájna tɨꞌɨj chúmuaꞌ maj aꞌjimi tyuꞌtámuꞌvejritaj.
3 Tavástaraꞌ, muáaj paj tyámuaꞌ tyéechaꞌɨɨn jeꞌej nyaj tyuꞌtaxájtaj;
tyámuaꞌ paj tyináachaꞌɨɨn nyatɨꞌɨjta tyíꞌxajtaj.
4 Capáj tyiꞌtáꞌcareꞌen nyej nyij aꞌɨ́j jitze tyiꞌriáꞌmuaꞌsimeꞌen ɨ tɨ quee xáꞌpuɨꞌ,
capáj tyiꞌtáꞌcareꞌen nyej nyij jeꞌej puaꞌaj tyiꞌtyínyechaꞌɨɨj
nusu nyej nyij aꞌɨ́ɨjma jamuán tyíꞌcuaꞌajcaj ɨ maj jeꞌej puaꞌaj tyityetyúuchaꞌɨj.
5 Aꞌyaa pu tyíꞌxaꞌpuɨꞌ tɨ puéjtzij naataꞌan aꞌɨ́jna ɨ tyévij tɨ tyámuaꞌ tyiꞌtyúuchaꞌɨj,
cheꞌ ajta ɨ tɨ naa curiáꞌrɨeꞌ nyejtyaꞌxɨꞌɨn.
Néijmiꞌi nu aꞌɨ́j tyaꞌancuriáaꞌsij,
tyij ajta nye jimi jeꞌej puaꞌaj tyíꞌrɨjcaa, muéetzij jimi nu huatyényuusij.
6 Aꞌɨ́ɨmaj ɨ maj tyihuáꞌijtyeꞌ ɨ maj jeꞌej puaꞌaj rɨcɨj aꞌɨ́ɨjma mu puéjtzij huoꞌtáꞌsij,
majta jeꞌen jaséjran nyej nyáaj tyámuaꞌ eenyeꞌ tyíꞌxajtacaꞌaj.
7 Tyihuáꞌcarij pu aꞌáa tyojoꞌjeꞌestɨ́maꞌaj jaꞌmej joꞌmaj tyityajáꞌavaꞌtacaa,
aꞌyájna tɨꞌɨj chóotaꞌ maj metyoꞌíichaꞌajraꞌnyij.
8 Tavástaraꞌ, Tavástaraꞌ, nyáaj nu muéetzij jitze rányeej.
Muéetzij jimi nu jahuoo paj naatyáhuɨɨreꞌen: capáj manúujɨpuan.
9 Pajta nyajapuáj huatányuunyij tyiꞌtɨ́j maj jɨn jaxɨeꞌveꞌ maj náacuanamuaj;
pajta nyajapuáj huatányuunyij aꞌɨ́ɨjma jimi ɨ maj jeꞌej puaꞌaj tyityetyúuchaꞌɨj.
10 Micheꞌ aꞌɨ́ɨmaj aꞌɨ́jna jɨn huavíviꞌriꞌhuaj ɨ maj tyámuaꞌ jáaruuj,
ajta nyáaj nyicheꞌ nyooj huameꞌen.