118
Aꞌɨ́jna ɨ tɨ jɨn néijmiꞌi putyíꞌuurej ɨ Tavástaraꞌ néijmiꞌi pu jɨn tyámuaꞌ een
1 Setyuꞌtatyójtziꞌreꞌ ɨ Tavástaraꞌ, jiꞌnye aꞌɨ́ɨ pu tyámuaꞌ een,
jiꞌnye jusén pu jɨn séejreꞌ ɨ tɨ jɨn taxɨeꞌveꞌ.
2 Micheꞌ aꞌyan tyuꞌtaxáj aꞌɨ́ɨmaj ɨ maj Israel jitze ajtyámaꞌcan tɨjɨn:
“Aꞌɨ́jna ɨ Tavástaraꞌ tɨ jɨn taxɨeꞌveꞌ aꞌɨ́ɨ pu jusén jɨmeꞌ séejreꞌ.”
3 Micheꞌ aꞌyan tyuꞌtaxáj ɨ puaaríij tɨjɨn:
“Aꞌɨ́jna ɨ Tavástaraꞌ tɨ jɨn taxɨeꞌveꞌ aꞌɨ́ɨ pu jusén jɨmeꞌ séejreꞌ.”
4 Micheꞌ aꞌyan tyuꞌtaxáj aꞌɨ́ɨmaj ɨ maj tzáahuatyiꞌraꞌaj jimi tyíchaꞌɨj ɨ Tavástaraꞌ tɨjɨn:
“Aꞌɨ́jna ɨ Tavástaraꞌ tɨ jɨn taxɨeꞌveꞌ aꞌɨ́ɨ pu jusén jɨmeꞌ séejreꞌ.”
5 Nyatɨꞌɨj quee cheꞌ jeꞌej jájtyoovaꞌaj Tavástaraꞌ jimi nu huatyéenyuj;
aꞌɨ́ɨ puꞌij náanamuajriꞌ ajta jeꞌen nɨiꞌrájtoo.
6 Tavástaraꞌ pu nyajamuan yésejreꞌ, canu nyij tyíꞌtzɨɨnyeꞌ.
¿Jiꞌnye nyaꞌuuren ɨ tyévij?
7 Tavástaraꞌ pu nyajamuan yésejreꞌ, aꞌɨ́ɨ puꞌij nyahuɨɨreꞌ.
¡Nyáaj nu huaꞌsejran matɨꞌɨj huatyámueꞌtɨcheꞌen aꞌɨ́ɨmaj ɨ maj nyaxanaꞌveꞌ!
8 Jéetzeꞌ pu tyíꞌhuɨɨreꞌ tyaj Tavástaraꞌ jitze tyúꞌcaꞌnyej
quee aꞌyan tɨpuaꞌaj ɨ tyévij jitze tyetyúꞌcaꞌnyej.
9 Jéetzeꞌ pu tyíꞌhuɨɨreꞌ tyaj Tavástaraꞌ jitze tyúꞌcaꞌnyej
quee tɨpuaꞌaj tyeɨ́tyee jitze tyetyúꞌcaꞌnyej maj vaꞌcán jɨn tyityatatyíj.
10 Néijmiꞌi mu aꞌɨ́ɨmaj nyeriaꞌnaj ɨ maj séej chuéj japua joꞌcháatɨmee,
ajta aꞌɨ́j nu jitze maꞌcan ɨ Tavástaraꞌ huaꞌantyimueꞌtɨj.
11 Néijmiꞌqueꞌ mu nye jimi atahuíistɨraa,
ajta nyáaj nu aꞌɨ́j jitze maꞌcan ɨ Tavástaraꞌ huaꞌantyimueꞌtɨj.
12 Aꞌyaa mu tyinyeriáꞌnaj matɨꞌɨj ɨ tzíjcaꞌriisee,
ajta ɨ maj jɨn nyuꞌcamuɨꞌcaꞌaj aꞌyaa pu tyuꞌtyájtaa tɨꞌɨj ɨ tzícareꞌej,
¡nyáaj nu ɨ Tavástaraꞌ jitze maꞌcan huaꞌantyimueꞌtɨj!
13 Caꞌnyíin mu jɨn naatátajchacaꞌ, nyej nyij eetávetyijcheꞌ,
ajta ɨ Tavástaraꞌ pu mujoꞌvéꞌmej tɨꞌij naatáhuɨɨreꞌen.
14 Nyáaj nu tyuꞌtáchuiicaj ɨ Tavástaraꞌ jimi, ɨ tɨ caꞌnyíjraꞌaj nyatáꞌcaa.
¡Aꞌɨ́ɨ pu aꞌɨ́ɨn puéꞌeen ɨ tɨ nyajapuáj huatányuusij!
15 Aꞌájna joꞌmaj jaꞌchej ɨ tyeɨ́tyee maj tyámuaꞌ tyityetyúuchaꞌɨj
aꞌáa mu jutyamuaꞌveꞌej metyiꞌchuíicaj aꞌɨ́jcɨ jɨmeꞌ maj tyuꞌtyáamueꞌtɨj.
“¡Aꞌɨ́jna ɨ Tavástaraꞌ tɨ néijmiꞌi jɨn putyíꞌuurej aꞌɨ́ɨ pu néijmiꞌi tyuꞌtyáamueꞌtɨj!
16 ¡Aꞌɨ́jna ɨ Tavástaraꞌ tɨ jɨn néijmiꞌi putyíꞌuurej néijmiꞌi pu jɨn tyámuaꞌ een!
¡Aꞌɨ́jna ɨ Tavástaraꞌ tɨ néijmiꞌi jɨn putyíꞌuurej aꞌɨ́ɨ pu néijmiꞌi tyuꞌtyáamueꞌtɨj!”
17 ¡Canu muɨꞌnyij, sulu nyajúurij nu naꞌmej
nyataꞌaj nyij jaataxáj tyiꞌtɨ́j tɨ jeꞌej huáruuj ɨ Tavástaraꞌ!
18 Tavástaraꞌ pu jéehua huápuɨꞌɨj puéjtzij naatáꞌ,
ajta capu naatáꞌ nyej nyij huámuɨꞌnyij.
19 ¡Setyaꞌantácuunaxɨꞌ joꞌtɨj jaꞌpueertajmee ɨ tyeyúuj,
aꞌyaa nu tyáꞌxɨeꞌveꞌ nyaj utyájrutyej nyej nyij tyaatatyójtziꞌreꞌen ɨ Tavástaraꞌ!
20 Aꞌíi pu aꞌɨ́ɨn puéꞌeen ɨ puéertaraꞌ ɨ Tavástaraꞌ,
aꞌúu mu mij joꞌtyárutyij aꞌɨ́ɨmaj ɨ maj jɨꞌréꞌnyeꞌej jimi séejreꞌ.
21 Nyetyiꞌmuatyojtziꞌreꞌ, Tavástaraꞌ, jiꞌnye muáaj paj náanamuajriꞌ
pajta jeꞌen aꞌɨ́ɨn puéꞌeen ɨ tɨ nyajapuáj huatányuusij.
22 Aꞌɨ́jna ɨ tyetyéj maj majúurɨej aꞌɨ́ɨmaj ɨ chiꞌij maj taꞌhuacaa
aꞌyaa pu tyeꞌrájraa tɨ aꞌɨ́ɨn puéꞌeenyeꞌej jaꞌraa ɨ tɨ jéetzeꞌ juxɨeꞌveꞌ.
23 Aꞌɨ́ɨ pu ɨ Tavástaraꞌ aꞌyan jáaruuj,
aꞌɨ́j tu tyij jɨn ityáj tyámuaꞌ tyoꞌtaséj.
24 Aꞌíi pu xɨcáaraꞌ aꞌɨ́ɨ puéꞌeen tɨꞌɨj ɨ Tavástaraꞌ aꞌyan huarɨ́j:
¡cheꞌ ijíij naa taꞌaxcaj tyataꞌaj tyij huátatyamuaꞌveꞌen!
25 Aꞌtzúj cuiꞌ, Tavástaraꞌ, ¡tajapuá huatányuuchij!
Aꞌtzúj cuiꞌ, Tavástaraꞌ, ¡tajimí tyámuaꞌ tyúꞌuurej taꞌaj ij tyámuaꞌ atyojoꞌréꞌnyej!
26 ¡Cheꞌ tyámuaꞌ eenyeꞌ aꞌɨ́jna ɨ tɨ jitzán maꞌcan ɨ Tavástaraꞌ yejeꞌvéꞌmej!
Muaꞌajmaj tu tyámuaꞌ tyajamuaatyátoosij aꞌújna u tyeyúujraꞌ tzajtaꞌ ɨ Tavástaraꞌ.
27 Tavástaraꞌ pu aꞌɨ́ɨn puéꞌeen ɨ Dios, ¡aꞌɨ́ɨ pu tatatzaviꞌtyeꞌ!
Siataꞌaj huatyóohuiinyij siaj tyuꞌyéꞌestej xamuáj xaꞌantyipíij
siaj sij aꞌáa jaꞌráꞌastij joꞌtɨj joꞌtyéjvee ɨ siaj japuan tyuꞌtámuꞌvejritaj.
28 Nyetyiꞌmuatyojtziꞌreꞌ nyajta tyuꞌtáchuiicaj aꞌɨ́jcɨ jɨmeꞌ paj vaꞌcán jɨn tyiꞌtyéjvee,
jiꞌnye muáaj paj nyaj Dios puéꞌeen.
29 Setyuꞌtatyójtziꞌreꞌ ɨ Tavástaraꞌ, jiꞌnye aꞌɨ́ɨ pu tyámuaꞌ tojoꞌmuaꞌraj,
ajta jusén jɨmeꞌ séejreꞌ ɨ tɨ jɨn taxɨeꞌveꞌ.