115
Aꞌɨ́jna ɨ taj Dios tajapuá pu jáꞌsejreꞌ
1 Tavástaraꞌ, pataꞌaj asɨ́ɨj tyámuaꞌ tyuꞌtáꞌsejrataj, capáj ityájma;
¡tyámuaꞌ paj tyuꞌtyátoonyij, aꞌɨ́jcɨ jɨmeꞌ paj jɨꞌréꞌcan jɨmeꞌ taxɨeꞌveꞌ!
2 ¿Jiꞌnye mej mij aꞌyan tyíꞌihuoꞌ ɨ maj quee tyáꞌtzaahuatyeꞌ
yee joꞌnyij jeꞌej jeꞌen ɨ jaꞌmua Dios?
3 Taj Dios pu tajapuá jáꞌsejreꞌ;
aꞌɨ́ɨ pu néijmiꞌi jɨn aꞌyan huarɨ́j jeꞌej tɨ tyiꞌtɨ́j tyíꞌxɨeꞌvaꞌcaꞌaj.
4 Huaꞌ sáanturistyamuaꞌ ɨ maj quee tyáꞌtzaahuatyeꞌ ooroj mu jɨn taavijhua majta pláataj,
tyiꞌtɨ́j puꞌuj tyiꞌpuéꞌeen tyeɨ́tyee maj jumuácaꞌ jɨn tyúꞌtaahuacaꞌ:
5 muaꞌancatyányijmee, ajta capu ɨꞌríj maj tyuꞌtaxáj,
muaꞌajrɨꞌɨjsíjmee, ajta camu atanyéjnyeꞌ,
6 muaꞌajtanaxɨéejmee ajta camu iityanamuáarajmee;
majta mu ajtzuꞌrijmee, ajta camu tyiꞌtɨ́j ɨꞌchuej;
7 muaꞌajtamuácaꞌajmee, ajta camu pújoorej maj tyiꞌtɨ́j tyivíꞌ;
muiꞌraꞌɨ́ɨcajmee, ajta camu rácɨjcɨꞌnyiveꞌ;
¡capu tyiꞌtɨ́j cɨ́ɨ tyíꞌnamuajreꞌ ɨ huaꞌ tyenyij jitze!
8 Aꞌyaa mu chaꞌtaj manaꞌaj een matɨꞌɨj ɨ sáanturij
aꞌɨ́ɨmaj ɨ maj huaꞌtaꞌhuacaa
majta ɨ maj huaꞌ jimi tyáꞌtzaahuatyeꞌ.
9 Muaꞌaj mu siaj Israel jitze ajtyámaꞌcan, ¡Tavástaraꞌ xu jitze tyúꞌcaꞌnyej!
Aꞌɨ́ɨ pu tahuɨɨreꞌ ajta tyámuaꞌ tyíꞌtachaꞌɨj.
10 Siajta muaꞌaj puaaríij, ¡Tavástaraꞌ xu jitze tyúꞌcaꞌnyej!
Aꞌɨ́ɨ pu tahuɨɨreꞌ ajta tyámuaꞌ tyíꞌtachaꞌɨj.
11 Muaꞌaj mu siaj tzáahuatyiꞌraꞌaj jimi tyíchaꞌɨj ɨ Tavástaraꞌ,
¡aꞌɨ́j xu jitze tyúꞌcaꞌnyej!
Aꞌɨ́ɨ pu tahuɨɨreꞌ ajta tyámuaꞌ tyíꞌtachaꞌɨj.
12 ¡Tavástaraꞌ pu arí ityájma toꞌtámuaꞌreeriꞌ
tyámuaꞌ puꞌij tyitaatyátoosij!
Tyámuaꞌ pu tyihuoꞌtyátoosij aꞌɨ́ɨjma ɨ Israel maj jitze ajtyámaꞌcan,
tyámuaꞌ pu tyihuoꞌtyátoosij aꞌɨ́ɨjma ɨ puaaríij,
13 tyámuaꞌ pu tyihuoꞌtyátoosij aꞌɨ́ɨjma ɨ maj tzáahuatyiꞌraꞌaj jimi tyíchaꞌɨj,
aꞌɨ́ɨjma ɨ maj óotzaahuatyeꞌ ajta ɨ maj tyóoxaahuaj.
14 ¡Cheꞌ ɨ Tavástaraꞌ huoꞌtámuiꞌrej ɨ maj jaꞌmua jitze eerányesij
muaꞌajmaj ajta ɨ jáꞌmuayojmuaꞌ!
15 ¡Cheꞌ ɨ Tavástaraꞌ, ɨ tɨ jaatyátaahuacaꞌ ɨ tajapuá tɨ séejreꞌ ajta ɨ cháanacaj,
aꞌɨ́ɨn tyámuaꞌ muaꞌajmaj tyajamuaatyátoonyij!
16 Aꞌɨ́jna ɨ tajapuá tɨ séejreꞌ Tavástaraꞌ pu jitze ajtyámaꞌcan,
ajta ɨ cháanacaj aꞌɨ́j pu huatátuiirej ɨ tyévij.
17 Aꞌɨ́ɨmaj ɨ maj meríj aꞌáa joꞌtyáꞌɨtzee joꞌmaj ɨ muɨꞌchítyee jáꞌavaꞌtacaa,
ɨ maj meríj huácuij, camu pújoorej mej mij tyaatatyójtziꞌreꞌen ɨ Tavástaraꞌ;
18 ajta ityáj tu tyaatatyójtziꞌreꞌej
ijíij tyajta jusén jɨmeꞌ.
¡Alelúuyaj!