112
Tyiꞌtɨ́j tɨ jɨn jutyamuaꞌveꞌ aꞌɨ́jna ɨ tyévij tɨ tyámuaꞌ tyiꞌtyúuchaꞌɨj
1 ¡Alelúuyaj!
Cheꞌ huatóotyamuaꞌveꞌen ɨ tyévij tɨ tzáahuatyiꞌraꞌaj tyíchaꞌɨj ɨ Tavástaraꞌ jimi
ajta aꞌɨ́j jitze jutyamuaꞌveꞌ jeꞌej tɨ aꞌɨ́ɨn tyuꞌtaꞌíjtacaꞌ.
2 Aꞌɨ́ɨmaj ɨ maj aꞌɨ́j jitze eerámaꞌcan ɨ tyévij tɨ tyámuaꞌ tyiꞌtyúuchaꞌɨj
tyámuaꞌ mu tyityeetyátuiihuaj majta tyuꞌtaꞌíjtaj ɨ cháanacaj japua.
3 Aꞌájna joꞌtɨj aꞌɨ́ɨn jaꞌchej jéehua pu tyíꞌsejreꞌ aꞌɨ́ɨn tɨ tyíꞌijchaꞌɨj,
ajta aꞌnáj tɨnaꞌaj tyihuáꞌpuejveꞌ.
4 Tatzárij pu séejreꞌ aꞌájna joꞌtɨj joꞌtɨ́caꞌ
tɨꞌij aꞌɨ́ɨjma huatyátatzaviꞌtyeꞌen ɨ tyeɨ́tyee maj tyámuaꞌ tyityetyúuchaꞌɨj,
ajta aꞌɨ́jcɨ ɨ tɨ tyihuaꞌcuꞌvej, ajta néijmiꞌi jɨn tyámuaꞌ tyiꞌtyúuchaꞌɨj.
5 Aꞌɨ́jna ɨ tyévij tɨ tyámuaꞌ tyiꞌtyúuchaꞌɨj tyámuaꞌ pu naa tyíꞌtyevij ajta tyuꞌnyijtyeꞌ tyiꞌtɨ́j maj jaatáhuaviiraj,
tyámuaꞌ pu ajta naa tyeꞌchaꞌɨj jeꞌej tɨ tyiꞌtɨ́j tyíꞌmuarɨeꞌ,
6 aꞌɨ́j pu jɨn quee aꞌnáj tyiꞌtɨ́j jɨn eeráꞌɨtzeesij.
¡Aꞌɨ́jna ɨ tyévij tɨ tyámuaꞌ tyiꞌtyúuchaꞌɨj aꞌɨ́j mu atamuaꞌreꞌrihuaꞌaj muáꞌjuꞌun!
7 Capu tyíꞌtzɨɨnyeꞌ tɨpuaꞌaj tyiꞌtɨ́j jeꞌej puaꞌaj tyíꞌnamuajreꞌej;
xɨéjnyuꞌcariaꞌraꞌ pu tyámuaꞌ een, ajta ɨ Tavástaraꞌ jitze tyíꞌcaꞌnyej.
8 Xɨéjnyuꞌcariaꞌraꞌ pu tyámuaꞌ een, capu tyíꞌtzɨɨnyeꞌ,
ajta pu huaꞌaꞌtzej huaꞌráasej aꞌɨ́ɨjma ɨ maj jájchaꞌɨɨreꞌ.
9 Tyiꞌtɨ́j pu tyihuoꞌriáaꞌsij aꞌɨ́ɨjma ɨ maj quee jeꞌej tyéejviicueꞌ,
aꞌnáj tɨnaꞌaj pu tyámuaꞌ tyíꞌtyevij,
ajta tyámuaꞌ naa tyúusejrataj séecan jimi.
10 Aꞌɨ́ɨ puꞌij tyinyúꞌcaj ɨ tɨ jeꞌej puaꞌaj tyiꞌtyúuchaꞌɨj tɨꞌɨjta jaaséj;
ajta tɨꞌɨj quee jeꞌej huárɨnyij aj puꞌij ancuriocɨꞌmáaj jaꞌmej ɨ jutaméj jɨmeꞌ.
Capu tyiꞌtɨ́j huatyáhuɨɨreꞌej jeꞌej maj tyáꞌxɨeꞌveꞌ ɨ maj jeꞌej puaꞌaj tyityetyúuchaꞌɨj.