1-2 Mʉsanʉkonani oijʉ sani ñañu chiisinata'ni, saicu'akʉna saima'ñe pa'ijʉ cha'ajʉ ca'naso mʉsanʉkona pa'iche'te masiñu chini, mai majapãiʉja'iʉni Timoteoni saosinaa'me chʉkʉna. Repaʉ'te Timoteo'te ija'che i'kasi'kʉa'mʉ chʉ'ʉ: “Chʉ'ʉ ichejare Atenas vʉ'ejoopo'te Silana'me pa'iʉ cha'ara; mʉ'ʉpi te'eʉ ñajaijʉ̃'ʉ”, chiisi'kʉa'mʉ chʉ'ʉ. Chini, repaʉ'te Dios chʉ'ore ja'me chʉ'vakaiʉ Diore cho'oche cho'okaikʉ'te mʉsanʉkonani che'choa'kʉ chini saosi'kʉa'mʉ chʉ'ʉ, ũcuaʉji che'choʉna Jesucristoni pojojʉ na'a rʉa cuasajʉ paapʉ chini.

3-4 Mʉsanʉkonare cuasakʉ, “Pãire cu'ache cho'ocojñojʉ Jesucristo'te cuasache'te jo'kasojʉ”, chini jã'aja'ñe cuasa Timoteoni saosi'kʉa'mʉ chʉ'ʉ mʉsanʉkonare ũcuaʉji che'choʉna jo'kasoma'ñe ũcua cuasajʉ paapʉ chini. Aperʉmʉ chʉkʉna ja'me pa'irʉmʉ, “Pãi maire cu'ache cho'ojanaa'me”, chiijʉ kʉasinaa'me mʉsanʉkonare, masia'jʉ chini. Jã'aja'ñe pa'imʉ Dios chʉ'o asa chẽa Jesucristo'te cuasanare. Chʉkʉna aperʉmʉ kʉajʉ, “Pãi Diore cuhena cu'ache cho'ojanaa'me maire”, chiisi'e cho'ocojñocuhajʉ masime mʉsanʉkona. 5 Jã'ajekʉna chʉ'ʉni cha'aʉamaʉna Timoteoni saosi'kʉa'mʉ chʉ'ʉ, mʉsanʉkona pa'iche'te ñajani ra chʉ'ʉni kʉaʉna asa masira chini, “Chʉkʉna cho'okatena Jesucristoni cuasajʉ, ¿repana re'oja'che pa'iche vatipi ʉ̃sekʉna jo'kasocuhare?”, chini cuasakʉ.

6 Chura repaʉ Timoteo mʉsanʉkona pa'icheja ñajani ranicuhasi'kʉa'mʉ. Chʉ'o rʉa re'oja'chere mʉsanʉkona pa'iche ra, ija'che kʉasi'kʉa'mʉ repaʉ chʉ'ʉre: “Re'oja'che pa'ijʉ chuta'a Diore rʉa cuasajʉ chekʉnare pãi oijʉ re'oja'che cho'okaijʉ pa'ime repana. Ũcuachi'a mai repanare ja'me pa'isi'e chuta'a cuasajʉ pojojʉ mai repanare ñañu chiicheja'che maire ũcuaja'che ñañu chiime repana”, chiiʉ kʉasi'kʉa'mʉ repaʉ chʉkʉna'te. 7 Jã'aja'ñe kʉaʉna asa pãi chʉkʉna'te cu'ache cho'ochejẽ'e cuasama'ñe jã'achi'a cuasajʉ oijʉ pa'isina mʉsanʉkona re'oja'che pa'ijʉ Diore cuasajʉ pa'iche'te asa rʉa pojome chʉkʉna. 8 Mʉsanʉkona Jesucristo'te jo'kasoma'ñe cuasajʉ pa'iche asa vajʉsinaa'me chʉkʉna. 9 Diopi cho'okaiʉna mʉsanʉkona pa'iche'te cuasani rʉa pojojʉ Dioni, “Re'orepamʉ, Ja'kʉ”, chiijʉ pa'ime chʉkʉna. 10 Diopi chʉkʉnani mʉsanʉkona pa'ichejana saoa'kʉ chini Repaʉni sẽejʉ, umucujñana'me ñami sẽekaijʉ pa'ime chʉkʉna mʉsanʉkonare, Repaʉji saoʉna mʉsanʉkonani ñajʉ ja'me pa'ijʉ Repaʉ chʉ'ore chuta'a mʉsanʉkonare karache'te na'a rʉa che'chorena re'oja'che pa'iche'te peore masia'jʉ chini.

11 Churata'ni mai Ja'kʉ Dios Maire Paakʉ Jesuna'me chʉkʉna'te mʉsanʉkona pa'ichejana saoa'kʉ. 12 Ũcuachi'a mʉsanʉkona sãiñechi'a cuasajʉ chʉkʉna mʉsanʉkonare oicheja'che pãi ũcuanʉkore si'arʉmʉ na'a rʉa oijʉ paapʉ chini, Diore sẽekaime chʉkʉna mʉsanʉkonare.

13 Ũcuachi'a Diopi cho'okaiʉna re'oja'che pa'imasijʉ Repaʉ chiichechi'a cho'ojʉ, mʉsanʉkonapi rekoñoã cu'achejẽ'e peorekoñoã paajʉna Jesús, Maire Paakʉ, Repaʉ neena re'onana'me peore jo'e cajesirʉmʉ mʉsanʉkonare ña pojokʉ, Pʉka'kʉre Diore, “Ja'kʉ, cu'ache cho'osi'e ro'iche peomʉ inare”, chiaʉ chini Diore sẽekaime chʉkʉna. Jã'aja'ñe paaʉ.