8
ឞ្រាសយេឆូ ឆ្យាម់ ៤០០០ នុយ្ស
(មថ ១៥:៣២-៣៩)
1 នោកនៃគែសដ៝ង់ផូងប៝នលានអ៝ក់ងាន់ហាន់គុរាគូមឞាល់ជឹត។ ខាន់ពាង់មោគែសអោសនទើមាឆោងឆា នទ្រីឞ្រាសយេឆូ ក្វាល់មពោលអ៝សម៝នពាង់ពាង់លាស៖
2 “គ៝ប់យោៈងាន់មាផូងប៝នលាននៃ ខាន់ពាង់គុនទ្រែលគ៝ប់លែៈពែនារហើយ នទើមាឆោងឆាមោគែសដ៝ង់។
3 លាសគ៝ប់ដាៈខាន់ពាង់ព្លឹឆឹតនទុលទើម រាគាញ់ចោតរ៝ៈត្រ៝ងរ៝។ ឞូអាបាៈឞ្រោៈតាៈឞើសប៝នងាយៗ”។
4 មពោលអ៝សម៝នអើសលាស៖ “តាអ្យារាង៝តរាងាត់ អាសនតុកជ៝យនទើមាអ៝ន់ខាន់ពាង់ឆោងឆាមាត៝ង់?”
5 ឞ្រាសយេឆូ អោបខាន់ពាង់៖ “នទ្រីខាន់មៃទាសអ៝ក់គែសនុមពាង់ហាៈ?” “គែសពើសមល៝ម់”។
6 ជេសរីឞ្រាសយេឆូ ដាៈផូងប៝នលានគុរើបគើបតានែសរី ពាង់ឆ៝ៈនុមពាង់ពើសមល៝ម់នៃ មឞើសឆើមលាសអ្វែសមាកោរាញឞ្រាស ពាង់គិចអ៝ន់មាមពោលអ៝សម៝នពាៈមាផូងប៝នលាននៃ ជេសរីខាន់ពាង់ជានកើតនៃ។
7 គែសកាជេៈអាបាៈដ៝ង់ នទ្រីឞ្រាសយេឆូ មឞើសឆើមលាសអ្វែសមាកោរាញឞ្រាស ជេសរីដាៈមពោលអ៝សម៝នពាៈកាអីនៃអ៝ន់មាផូងប៝នលាន។
8 ជេសជាននទ្រីលែៈខាន់ពាង់ឆាហើមរោចដ្ហោច ជេសរីរាគូមនុមពាង់ នទ្រែលមាកាអីរាមែសនៃគែសពើសឆាស។
9 ទឹងលែៈឞូនុយ្សតានៃនើសអ៝ក់ ៤០០០ នុយ្ស។ ជេសឞើសនៃឞ្រាសយេឆូ ដាៈខាន់ពាង់ព្លឹឆឹតអាជៃរី។
10 ទូនទ៝ម់ឞើសកើយនៃ ពាង់ញច៝ទូកនទ្រែលមពោលអ៝សម៝នពាង់ហាន់ជឹតឞ្រីដាល់មានូថា ។
ផូងផារីឆី អុចឆៃនាវមឞេន
(មថ ១៦:១-៤)
11 ជេសខាន់ពាង់ត៝ត់តារី ផូងផារីឆី លែវឞាល់ម៝ប់ឞ្រាសយេឆូ តឹមរាលាច់មាពាង់ ដាៈពាង់ជានទូនាវមឞេនអ្វែសអ៝ន់គឹតនហេលលាសពាង់ទើននាវទើយតាៈឞើសកោរាញឞ្រាស។
12 ជេសតាង់នាវខាន់ពាង់ដាៈនៃ ឞ្រាសយេឆូ ញឆោរនហ៝ម់ក្វ៝ង់អ្យហូត ជេសរីលាស៖ “មើមទឹងឞូនុយ្សតារានោកអាបៃអ្យាអុចគឹតឆៃនាវមឞេនកើតរី? គ៝ប់លាសនហេលនានេៈងាន់មាខាន់មៃ កោរាញឞ្រាសមោអោសអ៝ន់ឆៃនាវមឞេនមាឞូនុយ្សរានោកអាបៃអ្យា”។
13 ជេសរីឞ្រាសយេឆូ ទូឞើសខាន់ពាង់នៃ ញច៝ទូកហាន់តៃជឹតមពែសកាល់តីរី។
នាវនតីមានទ្រូយផូងផារីឆី នទ្រែលមាកោរាញម៝ត់អ្វាញ់ហេរោត-អ៝ន់តីពាស
(មថ ១៦:៥-១២)
14 ជេសរីមពោលអ៝សម៝នលែៈច្វេលញអោតនុមពាង់ តាទូកនៃគែសទូមល៝ម់នុមពាង់ទើម។
15 ជេសរីឞ្រាសយេឆូ ងើយងកាសមាខាន់ពាង់៖ “អ៝ន់ខាន់មៃញជ្រាង់ងាន់មានទ្រូយផូងផារីឆី នទ្រែលមានទ្រូយកោរាញម៝ត់អ្វាញ់ហេរោត-អ៝ន់តីពាស ដ៝ង់”។
16 មពោលអ៝សម៝នងើយនទ្រាង់ខាន់ពាង់នើម៖ “ពាង់ងើយកើតនៃអាចឞ៝ន់មោគែសនុមពាង់ទើមមោ?”
17 ឞ្រាសយេឆូ គឹតនាវខាន់ពាង់ងើយ ពាង់លាស៖ “ម៝សងើយខាន់មរែនាវមោគែសនុមពាង់នៃ? ខាន់មៃមោឆៃអ្យាត់ មោឆៃគឹតវ៝ត់នាវដ៝ង់? ខាន់មៃហោមទាង់ក៝បាស?
18 ខាន់មៃគែសទើមត្រោមមាត់អ្វាញ់មោឆៃ គែសទើមតោរអ្យាត់មោតាង់បាស? នទ្រីខាន់មៃលែៈច្វេលបាស
19 នោកគ៝ប់គិចព្រាម់មល៝ម់នុមពាង់ពាៈអ៝ន់មាឞូនុយ្ស ៥០០០ នុយ្សនើស? ជេសរីខាន់មៃរាគូមនុមពាង់អីរាមែសនើសទាសអ៝ក់ហោម?” ខាន់ពាង់អើសលាស៖ “១២ ឆាស”។
20 “នទ្រីនោកគ៝ប់គិចនុមពាង់ពើសមល៝ម់ពាៈអ៝ន់មាឞូនុយ្ស ៤០០០ នុយ្សនើស ខាន់មៃរាគូមទាសអ៝ក់ហោម?” ខាន់ពាង់អើសលាស៖ “ហោមពើសឆាស”។
21 ជេសរីឞ្រាសយេឆូ លាសមាខាន់ពាង់៖ “មើមខាន់មៃអេហ៝ៈគឹតវ៝ត់ដ៝ង់?”
ឞ្រាសយេឆូ ជានឞាសទូហ្វេឞូក្លោចែសមាត់
22 ជេសរីឞ្រាសយេឆូ នទ្រែលមាមពោលអ៝សម៝នត៝ត់តាប៝នបេតឆៃដា ។ តានៃគែសឞូលែវទូហ្វេឞូក្លោចែសមាត់ហាន់តាពាង់ ជេសរីឞ៝ញដាៈពាង់ពាសឞូក្លោអីនៃ គៃមាឞាសនាវជី។
23 ជេសរីពាង់តេកតីឞូក្លោអីចែសមាត់នៃ លែវហាន់លោសឞើសទីសប៝ន ពាង់ឆ៝សទាកទីវមហឹងកាលើត្រោមមាត់ នហ៝មាតេៈតី ជេសរីអោបពាង់៖ “មៃលែៈឆៃនទើឞើស?”
24 ឞូក្លោអីនៃងើកអ្វាញ់ មឞើសលាស៖ “គ៝ប់ឆៃឞូនុយ្សឞ្រោៈងគូយងគាយ អ្វាញ់ខាន់ពាង់តឹមឞានមាតើមឆី”។
25 ឞ្រាសយេឆូ តេៈតីកាលើត្រោមមាត់ពាង់ទូតឹជឹត ជេសរីពាង់អ្វាញ់ឆៃទឹងលែៈនទើក្ល៝សរាសវាស ត្រោមមាត់ពាង់លែៈឞាសងាន់រ៝។
26 ជេសរីឞ្រាសយេឆូ ដាៈពាង់៖ “មៃឆឹតឞ្រ៝ង់អាជៃមៃនើមរី លើយទឹងលាប់រ៝ៈប៝នយឹ”។
ឞ្រាសយេឆូ នតីមានាវតឹងពាង់
(មថ ១៦:១៣-២០; លក ៩:១៨-២១)
27 ជេសរីឞ្រាសយេឆូ នទ្រែលមាមពោលអ៝សម៝នពាង់លោសឞើសនៃ ហាន់តាប៝នអេងៗទាច់ដាសប៝នក្វ៝ង់ឆេឆារា-ផីលីប ។ នោកហាន់រ៝ៈត្រ៝ងពាង់អោបខាន់ពាង់៖ “អាមើមឞូលាសគ៝ប់?”
28 មពោលអ៝សម៝នអើសលាស៖ “អាបាៈលាសមៃជេងយោហាន-បាប់តែម អីលែៈទ៝ក់រេស អាបាៈលាសជេងអេលីយា អីឞូនុយ្សនតើយ្សនាវងើយកោរាញឞ្រាសកាល់អែនើសលែៈព្លឹតាអ្យា អាបាៈជឹតលាសមៃជេងទូហ្វេឞូនុយ្សអីអេងនើមនតើយ្សនាវងើយកោរាញឞ្រាសកាល់អែនើសលែៈទ៝ក់រេស”។
29 ជេសរីឞ្រាសយេឆូ អោបមាខាន់ពាង់នើម៖ “នទ្រីខាន់មៃលាសគ៝ប់ឞូម៝សហាៈ?” ពេត្រោស អើសមាពាង់៖ “មៃអីឞ្រាសក្រីស អីនើមរាក្លាយ្សតាៈឞើសកោរាញឞ្រាសទែញជ្វាល់ងាន់!”
30 ជេសរីឞ្រាសយេឆូ ឞ្វៃមពោលអ៝សម៝ន មោអោសអ៝ន់ខាន់ពាង់ងក៝ចនាវនៃមាឞូ។
31 ជេសរីឞ្រាសយេឆូ នតើមនតុមនតីមាមពោលអ៝សម៝នពាង់នៃ ពាង់លាស៖ “គ៝ប់អីក៝នឞូនុយ្សតាៈឞើសកោរាញឞ្រាស មោអោសទើយក្លាយ្សគែសនាវជេរជ៝ត់ទុតហោងាន់។ មពោលឞូរាញ មពោលកោរាញជានឞ្រាស នទ្រែលមាផូងនើមនតីនាវវៃឞ៝ន់មអារ់លើយគ៝ប់ នហ៝មាងខឹតគ៝ប់ដ៝ង់ យើនមាត៝ត់ពែនារឞើសកើយគ៝ប់ទ៝ក់រេសតៃ”។
32 ពាង់ងក៝ចមាខាន់ពាង់ឆ៝ង់ៗងាន់ មោគែសអោសពោនម៝។
ជេសរីពេត្រោស ជាៈឞ្រាសយេឆូ ហាន់នតុកអេងបាសមាឞូ ជេសរីឞ្វៃពាង់លើយតាងើយកើតនៃ។
33 ឞ្រាសយេឆូ រាលែអ្វាញ់ជឹតមពោលអ៝សម៝ន ជេសរីពាង់លាសពេត្រោស ៖ “ហើយឆាតាង់ មៃទូងាយឞើសគ៝ប់ហ៝ម់ នាវមឹនមៃមោទីដាសនាវមឹនកោរាញឞ្រាស អោស នាវមឹននៃតាៈឞើសឞូនុយ្សទើម”។
34 ជេសរីឞ្រាសយេឆូ ក្វាល់ផូងប៝នលាន នទ្រែលមាមពោលអ៝សម៝ន ពាង់លាសមាខាន់ពាង់៖ “ឞូម៝សពាង់អីអុចតឹងគ៝ប់ អ៝ន់មអារ់លើយនទើឆាក់ពាង់នើមអុច ជេសរីតូយឆីតឹមរាកាង់ពាង់នើម ជេងគែសនាវខ្លៃអ្យាត់នាវគ៝ប់ ឞ៝លលាសត៝ត់ខឹតឆាក់កាដោយ រីមើទើយតឹងគ៝ប់ងាន់។
35 យ៝រលាសឞូម៝សអីកើបអេងនាវរេសពាង់នើមខ្លៃរាលាវ ពាង់អីនៃមោអោសគែសនាវរេសនហ៝រ៝ យើនមាឞូម៝សខឹតយ៝រមាតឹងគ៝ប់ មោលាសយ៝រមានាវមហែមហានអ្វែស ពាង់អីនៃគែសនាវរេសនហ៝រ៝ងាន់តានារជឹតនាប់តៃ។
36 លាសទូហ្វេឞូនុយ្សពាង់គែសទឹងលែៈនែសនតូអ្យាជេងទ្រាប់នទើពាង់នើមទាទេ តីសមាឆាក់ពាង់នើមខឹតរ៝សហេង មោអោសគែសនាវរេសនហ៝រ៝ នទ្រីម៝សគែសនាវខ្លៃមាពាង់?
37 ឞូនុយ្សអើមទើយលាសឆ៝ៈទ្រាប់នទើមារាគ៝ល់នាវរេសពាង់នើមនហ៝រ៝?
38 អាបៃអ្យាខាន់អៃមៃគុនទ្រែលឞូនុយ្សអ្យើសឞូនុយ្សតីសមោអ្យាត់នាវកោរាញឞ្រាស។ ឞូម៝សអីដីតព្រេងមោឞាញ់មឞើសពាង់តឹងគ៝ប់ ដីតព្រេងតឹងនាវគ៝ប់នតីដ៝ង់ លាសនទ្រីគ៝ប់អីក៝នឞូនុយ្សតាៈឞើសកោរាញឞ្រាសដីតព្រេងមោគឹតនាល់ពាង់អីនៃដ៝ង់តានារគ៝ប់ព្លឹវាច់ នអ៝ប់មាគែសនាវអ្វែសច្រេកលើបឞឹគ៝ប់ នទ្រែលមាផូងតោងពារ់ក្ល៝សអ្វែស”។