11
ឞ្រាសយេឆូ លាប់តាប៝នយេរូឆាលឹម
(មថ ២១:១-១១; លក ១៩:២៨-៤០; យហ ១២:១២-១៩)
1 ជេសរីឞ្រាសយេឆូ ហាន់នទ្រែលមពោលអ៝សម៝នជឹតប៝នក្វ៝ង់យេរូឆាលឹម ។ ខាន់ពាង់ត៝ត់កេងប៝នបេតផាឆេ នទ្រែលមាប៝នបេថានី អីគុតាយោកតើមអោលីវ មោហោមងាយមាប៝នយេរូឆាលឹម ។ ជេសរីពាង់ដាៈឞារហៃអ៝សម៝នហាន់ល៝រ ពាង់លាស៖
2 “អ៝ន់ខាន់មៃហាន់តាប៝នឞើសនាប់រី លាប់តាប៝ននៃខាន់មៃមរាឆៃទូមល៝ម់ក៝នឆែសលៀឞូក៝ត់តានៃ ឆែសលៀអីនៃអេហ៝ៈគែសឞូញច៝អោស អ៝ន់ខាន់មៃទ្រីសតេកពាង់ឞើសរីអាអ្យា។
3 លាសគែសឞូអោបខាន់មៃ៖ «ម៝សជានទ្រីសខាន់មរែនៃមេស?» ខាន់មៃអើសលាស៖ «កោរាញអុចញច៝ពាង់»។ ជេសរីពាង់ដាៈតេកមព្លឹតាអ្យាតៃគើញរ៝”។
4 ជេសរីខាន់ពាង់ហាន់រ៝ង់ឞ្រ៝ង់ត៝ត់តានៃឆៃទូមល៝ម់ក៝នឆែសលៀ ឞូក៝ត់ឞើសទីសមពោងច្វាញមែងត្រ៝ង ជេសរីខាន់ពាង់ទ្រីស។
5 តានៃគែសឞូបាបាៈអោបមាខាន់ពាង់៖ “ម៝សជានខាន់មរែនៃ? ម៝សជានទ្រីសក៝នឆែសលៀអីនៃមេស?”
6 ឞារហៃខាន់ពាង់នៃអើសមាឞូតឹងនាវអីឞ្រាសយេឆូ ទែនតិញនើស ជេសរីឞូអ៝ន់ខាន់ពាង់តេក។
7 ខាន់ពាង់លោសឞើសប៝ននៃតេកលែវអ៝ន់មាឞ្រាសយេឆូ ជេសរីលាក់អាវក្វ៝ង់ខាន់ពាង់នើមកាលើឆែសលៀនៃ អ៝ន់ឞ្រាសយេឆូ ញច៝ហាន់ជឹតប៝នយេរូឆាលឹម ។
8 គែសអ៝ក់ឞូនុយ្សលែវឞាល់ឆ៝ៈអាវក្វ៝ង់ខាន់ពាង់នើមលាក់រ៝ៈត្រ៝ងឞើសនាប់ឞ្រាសយេឆូ រី ល៝ង់ឞូបាបាៈជឹតតែនថានឆីឞើសមីរលាក់រ៝ៈត្រ៝ងនៃដ៝ង់។
9 ទឹងលែៈឞូនុយ្សអីឞ្រោៈតឹងឞ្រាសយេឆូ ឞើសនាប់ឞើសកើយ លែវឞាល់នតែរទ្រើវលាស៖
“រានេមាកោរាញឞ្រាស!
ទាន់កោរាញឞ្រាសអ៝ន់នាវគែសជេងមាពាង់អីកោរាញឞ្រាសទែដាៈវាច់!
10 ទាន់កោរាញឞ្រាសអ៝ន់នាវគែសជេងមានាវពាង់ម៝ត់អ្វាញ់អីមរាម៝ត់អ្វាញ់ហេនតឹមឞានមាកាដាច់ដាវីត អីចែហេនឞើសកាល់អែនើស!
រានេមាកោរាញឞ្រាស! រានេមាកោរាញឞ្រាសអីគុកាលើត្រោកទុតព្រេសរី!”
11 ឞ្រាសយេឆូ លែៈត៝ត់តាប៝នក្វ៝ង់យេរូឆាលឹម ពាង់ហាន់លាប់តាជ៝ង់គូងញីសជានឞ្រាសមាកោរាញឞ្រាស។ ជេសអ្វាញ់ជុមអាប់ផ្យៅឞ្រីលែៈកេងមាង់ជេស នទ្រីទឹងពាង់ព្លឹតាប៝នបេថានី នទ្រែល ១២ នុយ្សមពោលកោរាញអ៝សម៝ន។
ឞ្រាសយេឆូ រាតាប់តើមរាវី ទូតើម
(មថ ២១:១៨-១៩)
12 កាសអោយតៃខាន់ពាង់លោសឞើសប៝នបេថានី នៃហាន់ជឹតប៝នយេរូឆាលឹម ឞ្រាសយេឆូ ជីង៝តងាន់។
13 ពាង់អ្វាញ់ឞើសងាយឆៃតើមរាវី ទូតើមគែសនហានអឹររាងឹត ពាង់ហាន់អ្វាញ់ទាច់ងខេបលាសគែសព្លៃ។ ត៝ត់តាតើមនៃឆៃទើមអីនហា អេហ៝ៈទីខៃព្លៃទុមអោស។
14 ជេសរីឞ្រាសយេឆូ លាសមាតើមរាវី អីនៃ៖ “នតើមឞើសនារអ្យាមោហោមគែសអោសឞូនុយ្សឆាព្លៃមៃ!” នាវព្រែលាសនៃ មពោលអ៝សម៝នពាង់តាង់ដ៝ង់។
ឞ្រាសយេឆូ មព្រើសផូងតាច់រាគ៝ល់ឞើសញីសជានឞ្រាស
(មថ ២១:១២-១៧; លក ១៩:៤៥-៤៨; យហ ២:១៣-២២)
15 ជេសរីឞ្រាសយេឆូ នទ្រែលមពោលអ៝សម៝នពាង់ហាន់ត៝ត់តាប៝នក្វ៝ង់យេរូឆាលឹម ។ ពាង់ហាន់លាប់តាជ៝ង់គូងញីសជានឞ្រាស ផូងអីតាច់រាគ៝ល់តានៃពាង់មព្រើសលែៈផ្យៅ។ ពាង់ងក្លឹគ្រែឞូគុរាគ៝ល់ព្រាក់ នទ្រែលមាគ្រែឞូតាច់ព្លុក។
16 ពាង់មោអោសអ៝ន់ឞូញអោតលែវនទ៝សនទើលាប់គ្លាត់រ៝ៈជ៝ង់គូងញីសជានឞ្រាសមាកោរាញឞ្រាស។
17 ឞ្រាសយេឆូ នតុមនតីមាឞូលាស៖ “តាឆ៝ម់បុតនាវកោរាញឞ្រាសងើយលែៈញចីសលាស៖
«ញីសគ៝ប់ជេងនតុកអ៝ន់មាទឹងលែៈឞូនុយ្សអាប់ឞ្រីទាកមឞើសឆើម»
បេងមាខាន់មៃឆ៝ៈជាននតុកគុរាគូមមពោលនតុងច្រាវ”។
18 ត៝ត់មពោលកោរាញជានឞ្រាស នទ្រែលមាផូងនើមនតីនាវវៃផូងអីឆ្រាអែល គឹតនាវអីនៃ ខាន់ពាង់លែវឞាល់គៃមាជ៝យនាវមើមទឹងគែសងខឹតលើយឞ្រាសយេឆូ ។ យើនមាខាន់ពាង់ក្លាចពាង់ យ៝រមាផូងប៝នលាននទ្រ៝ត់ហីសរាហ៝ល់ហោងាន់មានាវនតុមនតីពាង់នៃ។
19 ត៝ត់កេងមាង់ឞ្រាសយេឆូ នទ្រែលមាមពោលអ៝សម៝នពាង់លោសឞើសប៝នអីនៃព្លឹតៃតាប៝នបេថានី ។
តើមរាវី ខឹត
(មថ ២១:២០-២២)
20 កាសអោយតៃហាន់រ៝ៈត្រ៝ង មពោលអ៝សម៝នឆៃតើមរាវី នើស នទ្រ៝ប្រុងត៝ត់អារែសឆូរ៝។
21 ជេសរីពេត្រោស កាសគឹតនាវអីឞ្រាសយេឆូ លាសនើស មឞើសមាពាង់លាស៖ “ហើយនើមនតី! ល៝ង់អ្វាញ់អ្យា តើមរាវី អីមៃរាតាប់នើសលែៈនទ្រ៝ងាន់មេ!”
22 ឞ្រាសយេឆូ លាសមាខាន់ពាង់៖ “ខាន់មៃញឆីងមាកោរាញឞ្រាសហ៝ម់!
23 គ៝ប់លាសនហេលនានេៈងាន់មាខាន់មៃ លាសគែសទូហ្វេឞូនុយ្សលាសមាយោកអ្យា៖ «ហាន់ទូឞើសនតុកអ្យាតុបអាទាកវាច់ទាកវារ់រីហ៝ម់!» លាសឞូនុយ្សអីនៃមោគែសនាវវិវែៈតានូយ្សនហ៝ម់មានទើអីនៃ នហ៝មាញឆីងមានទើអីពាង់លាសនៃមរាគែសងាន់ នទ្រីកោរាញឞ្រាសអ៝ន់នាវទើយតឹងនាវពាង់លាសនៃងាន់រ៝។
24 នទ្រីទឹងគ៝ប់មឞើសមាខាន់មៃ ម៝សនទើអីខាន់មៃមឞើសឆើមទាន់ អ៝ន់ខាន់មៃញឆីងគែសងាន់ ជេសរីកោរាញឞ្រាសអ៝ន់មាខាន់មៃគែសងាន់រ៝។
25 ជេសរីជឹត នោកខាន់មៃមឞើសឆើម លាសខាន់មៃគែសនាវជីនូយ្សដាសឞូ អ៝ន់ខាន់មៃគែសនាវយោៈ លើយហោមអោសកើបនាវតីសឞូ នទ្រីកោរាញឞ្រាសឞឹខាន់មៃអីគុតាកាលើត្រោកលើហោយោៈនអាចមោហោមកើបនាវតីសខាន់មៃដ៝ង់។
26 [តីសមាលាសខាន់មៃមោគែសនាវយោៈ ហោមកើបនាវតីសឞូ កោរាញឞ្រាសឞឹខាន់មៃអីគុតាកាលើត្រោកមោយោៈ ហោមកើបនាវតីសមាខាន់មៃដ៝ង់។]”
នាវទើយឞ្រាសយេឆូ
(មថ ២១:២៣-២៧; លក ២០:១-៨)
27 ឞ្រាសយេឆូ ហាន់ត៝ត់តាប៝នក្វ៝ង់យេរូឆាលឹម នទ្រែលមពោលអ៝សម៝នទូតឹជឹត។ នោកពាង់ឞ្រោៈរាឆ៝ងតាជ៝ង់គូងញីសជានឞ្រាសមាកោរាញឞ្រាស ត៝ត់ឞ្រោៈមពោលកោរាញជានឞ្រាស ផូងនើមនតីនាវវៃផូងអីឆ្រាអែល នទ្រែលមាផូងកោរាញឞ្រីយូដា ម៝ប់អោបពាង់៖
28 “ទាន់មឞើសអ៝ន់មាហេនគឹត នទើមៃជានអ្យាឞើសតាៈនាវទើយ? ឞូម៝សអ៝ន់នាវទើយអីនៃមាមៃមេស?”
29 ឞ្រាសយេឆូ អើសលាស៖ “គ៝ប់ទាន់អោបទូនាវមាខាន់មៃប៝ត់។ ល៝ង់ខាន់មៃអើសមាគ៝ប់ដ៝ង់ នទ្រីមើគ៝ប់មឞើសមាខាន់មៃតៃ ឞើសតាៈនាវទើយគ៝ប់ជានអ្យា។
30 ទាន់អើសមាគ៝ប់ លាសនទ្រីឞូម៝សដាៈយោហាន-បាប់តែម ជានបាប់តែមយុកមាទាក? តាៈឞើសកោរាញឞ្រាស មោលាសតាៈឞើសឞូនុយ្ស?”
31 ខាន់ពាង់តឹមញច្រាៈអេងលាស៖ “លាសឞ៝ន់លាស៖ «តាៈឞើសកោរាញឞ្រាស» ពាង់មរាលាសឞ៝ន់៖ «លាសនទ្រីមើមទឹងខាន់មៃមោអ្យាត់នាវពាង់?»
32 លាសឞ៝ន់អើសលាស៖ «តាៈឞើសឞូនុយ្ស»”។ នទ្រីខាន់ពាង់ក្លាចផូងប៝នលានជីនូយ្ស យ៝រមាអ៝ក់ឞូនុយ្សអ្យាត់នាវយោហាន-បាប់តែម កើបពាង់ជេងឞូនុយ្សនតើយ្សនាវងើយកោរាញឞ្រាសងាន់រ៝។
33 ជេសរីខាន់ពាង់អើសមាឞ្រាសយេឆូ ៖ “ហេនមោគឹតអោស!” ឞ្រាសយេឆូ លាសមាខាន់ពាង់៖ “លាសនទ្រីគ៝ប់មោដ៝ង់មឞើសអ៝ន់មាខាន់មៃគឹត ឞូម៝សអ៝ន់នាវទើយគ៝ប់ជានអ្យា”។