នាវកោរាញឞ្រាសងើយនាវតឹមរាង្លាប់មហែ លូកា 2

នាវទែសឞ្រាសយេឆូ

1 នោកនៃតាប៝នក្វ៝ង់រោម គែសកោរាញកាដាច់ឞូក្វាល់ឆេឆារ * រាញាពាង់អៅកុស ពាង់លាប់ម៝ត់អ្វាញ់កាដាច់តាឞ្រីអេងៗ។ គែសទូនាររីលោសនាវតាៈឞើសកោរាញកាដាច់អីនៃដាៈប៝នលានទឹងលែៈឞ្រីអីពាង់ម៝ត់ ញចីសឆាក់កើបឞូនុយ្សតឹងឞ្រីតឹងប៝នអូចែខាន់ពាង់នើម។ 2 នាវញចីសឆាក់ប៝នលានអីនៃឞូជានឞោកទាកឞូ ទោលកីរេនីស ជានកោរាញក្វ៝ង់តាឞ្រីឆីរី ។ 3 កើតនទ្រីទឹងលែៈឞូនុយ្សហាន់គ្រុងញចីសឆាក់តឹងប៝នអូចែខាន់ពាង់នើមគុនើស។

4 ជេសរីយោឆែប លោសឞើសប៝ននាឆារែត តាឞ្រីកាលីលេ អីនតុកពាង់គុនៃ ឞ្រោៈជឹតឞ្រីលើជឹតប៝នបេតលេហឹម តាឞ្រីយូដា អីរី អីនតុកប៝នទែសកាដាច់ដាវីត កាល់អែនើស យ៝រលាសយោឆែប អីនៃពាង់រាន៝យទែសកាដាច់ដាវីត ។* 5 ពាង់ឞ្រោៈញចីសឆាក់នទ្រែលមារី អីឞូអូរឞូគឹតលាសអូរពាង់ មារី អីនៃលែៈនត្រែវដ៝ង់។ 6 ត៝ត់តាប៝នបេតលេហឹម មារី អីនៃលែៈអាប់ខៃជេស។ 7 តាជៃឞូនាច់វែសឞិចលែៈឞេងទាទេ។ ជេសរីពាង់គុអ៝សក៝នឞូក្លោ អីនៃក៝នឞោកទាក។ មេៈពាង់ងក្រូមអ៝សឞេអីនៃមាឞ៝ក ជេសរីតេៈតាឞ៝ងមពោមពា(ឆ្យុម)នៃ។

តោងពារ់មឞើសនាវទែសឞ្រាសយេឆូ អ៝ន់មាមពោលគុច្យាប់

8 មាង់អីនៃតាប៝នបេតលេហឹម គែសមពោលច្យាប់គុរាងែសក៝ប់អ្វាញ់ឞែឞ្យាប់ផូង ឞែផូងតានទ្រិចរី។ 9 ជេសរីទោមាឆៃទូហ្វេតោងពារ់កោរាញឞ្រាសទ៝ក់កេងខាន់ពាង់រី។ នាវអ្វែសច្រេកមាលើបកោរាញឞ្រាសច្រាតទាទេងាន់ជុមនតុកនៃ ត៝ត់មាខាន់ពាង់ក្លាចញឆ៝រ់ឆាក់ជាន់ហោងាន់។* 10 តោងពារ់រីលាសមាខាន់ពាង់៖ “លើយតាខាន់មៃក្លាចអោស! គ៝ប់លែវមឞើសនាវមហែមហានអ្វែសងក៝ចអ៝ន់មាខាន់មៃ។ នាវមហែមហានអ្វែសអ្យាអ៝ន់មាទឹងលែៈឞូនុយ្សរាម់មអាកងាន់។ 11 មាង់អ្យាតាប៝នបេតលេហឹម អីប៝នកាដាច់ដាវីត គែសទូហ្វេក៝នឞូក្លោមហែទែសជេងនើមរាក្លាយ្សទឹងលែៈឞូនុយ្ស។ ពាង់អីនៃឞូលែៈមឞើសល៝រកាល់អែនើស ពាង់ឞ្រាសក្រីស អីនើមរាក្លាយ្សតាៈឞើសកោរាញឞ្រាសទែញជ្វាល់ ពាង់កោរាញខាន់មៃ។* 12 ខាន់មៃគឹតនាល់ពាង់កើតអ្យា លាសឆៃទូហ្វេអ៝សឞេមហែទែសឞូពូតពាង់មាឞ៝ក អ៝ន់ឞិចតាឞ៝ងមពោមពា(ឆ្យុម)នៃ”។ 13 ជេសរីទោមាឆៃដ៝ង់ផូងតោងពារ់ទុតអ៝ក់ងាន់ ជុរតាៈឞើសកាលើត្រោកនតុកកោរាញឞ្រាសរី គុនទ្រែលទូហ្វេតោងពារ់អីនៃនើស មព្រើរានេមាកោរាញឞ្រាសលាស៖

14 “អ៝ន់រានេមាកោរាញឞ្រាសគុតាកាលើត្រោកទុតព្រេស‌

ជេសរីអ៝ន់គែសនាវដាប់មពាន់មាឞូនុយ្សអីកោរាញឞ្រាសរ៝ង់តានែសនតូអ្យា”។*

15 នទុតតោងពារ់ហាវឆឹតអាកាលើត្រោកលែៈរាង៝ត់ ខាន់ពាង់តឹមជាៈនទ្រាង់ខាន់ពាង់នើម៖ “ហោៈ! ល៝ង់ឞ៝ន់ហាន់តាប៝នបេតលេហឹម អ្វាញ់អ៝សឞេមហែទែសរី កើតនាវកោរាញឞ្រាសមឞើសមាឞ៝ន់នទើសនើស”។ 16 ជេសរីខាន់ពាង់ទ៝ក់នទាលតាៈឞើសនៃហាន់ជ៝យនតុកគុអ៝សឞេរី។ ត៝ត់អារីឆៃមារី យោឆែប នទ្រែលមាអ៝សឞេឞិចតាឞ៝ងមពោមពា(ឆ្យុម)រី។ 17 ជេសឆៃអ៝សឞេអីនៃ ខាន់ពាង់មឞើសងក៝ចនាវតោងពារ់លាសមាអ៝សឞេអីនៃនើស។ 18 លែៈឞូនុយ្សអីតាង់នាវមពោលច្យាប់ឞែឞ្យាប់ច្យាប់ឞែអីនៃងក៝ច ខាន់ពាង់នទ្រ៝ត់ហីសរាហ៝ល់តានូយ្សនហ៝ម់។ 19 ល៝ង់អីមារី នៃពាង់ហោមព្រាប់ងក្ល៝ន់នាវអីនៃតាឆាក់ពាង់នើម។* 20 ជេសរីមពោលច្យាប់ឞែឞ្យាប់អីនៃខាន់ពាង់ព្លឹឆឹត នហ៝មាមព្រើរានេមាកោរាញឞ្រាស យ៝រលាសមាត់លែៈឆៃតោរលែៈតាង់ លែៈនទើតោងពារ់មឞើសមាខាន់ពាង់នើសជេងទីទាទេ មោគែសអោសតីសទូនតីល។

21 ត៝ត់ផាមនារជេសទែស មេៈឞឹដាៈឞូក៝សនតោអ៝ន់មាអ៝សឞេអីនៃតឹងមានាវវៃផូងអីឆ្រាអែល មាក៝នឞូក្លោ នហ៝មាតេៈរាញាពាង់ ក្វាល់ «យេឆូ » កើតតោងពារ់មឞើសមាមារី នោកពាង់អេហ៝ៈនត្រែវនើសដ៝ង់។*

អីមេៈឞឹលែវអ៝សឞេជេៈយេឆូ ហាន់តាញីសជានឞ្រាស

22-24 ជេសគុអ៝សគែស ៤០ នារ មារី តឹងនាវវៃមោឆេ †លែៈញចីសកាល់អែនើស ពាង់ញហើរឆ្យុមនារមាជានឞ្រាស គៃមារាវឆាក់ពាង់នើមអ៝ន់ក្ល៝ស។ ត៝ត់ទីនារនៃពាង់ នទ្រែលមាឆាយពាង់ លែវអ៝សឞេជេៈរីតាប៝នក្វ៝ង់យេរូឆាលឹម ។ ត៝ត់តាប៝ននៃ ខាន់ពាង់លាប់តាជ៝ង់គូងញីសជានឞ្រាសមាកោរាញឞ្រាសញហើរឞារមល៝ម់ឆ្យុមនារមាជានឞ្រាសតឹមទីដាសនាវវៃកោរាញឞ្រាសលែៈដាៈញហើរនើស។ អាប់តឹជេសគុអ៝ស នាវវៃនៃដាៈឞូញហើរ “ឞារមល៝ម់នតើប មោលាសឞារមល៝ម់ព្លុករាស”។ ជេសរីមេៈឞឹញហើរអ៝សឞេរីមាកោរាញឞ្រាសដ៝ង់ ខាន់ពាង់ជានកើតនទ្រីតឹងនាវវៃកោរាញឞ្រាសលែៈដាៈឞូញចីសកាល់អែនើសលាស៖ “ទឹងលែៈក៝នឞូក្លោឞោកទាក នអ៝ប់មាក៝នមពោមពា(ឆ្យុម)ងក្វ៝ង់ឞោកទាក អ៝ន់ញហើរព្រាប់មាកោរាញឞ្រាស”។*

ឆីមេអោន ម៝ប់មាអ៝សឞេឞ្រាសយេឆូ

25 តាប៝នក្វ៝ង់យេរូឆាលឹម រីគែសទូហ្វេឞូនុយ្សរាញាពាង់ឆីមេអោន ពាង់អីឞូនុយ្សអ្វែសឆ៝ង់ឆ្រាង់ អ្យាត់នាវកោរាញឞ្រាសងាន់ ពាង់គុក៝ប់រាហើបឞ្រាសក្រីស អីកោរាញឞ្រាសត៝នដាៈហាន់រាតុករាថីនហ៝មារាក្លាយ្សប៝នលានអីឆ្រាអែល ដ៝ង់។ ឞ្រាសហ្វេងអ្វែសអីក្ល៝សអ្វែសជុរគុតាពាង់‌ 26 មឞើសអ៝ន់ពាង់គឹត ពាង់មោខឹតអោសលាសមោហ៝ៈឆៃឞ្រាសក្រីស អីនើមរាក្លាយ្សតាៈឞើសកោរាញឞ្រាសទែញជ្វាល់។ 27 កាសទូនាររីឞ្រាសហ្វេងអ្វែសដាៈឆីមេអោន ហាន់តាជ៝ង់គូងញីសជានឞ្រាសមាកោរាញឞ្រាស។ ត៝ត់តានៃឆៃយោឆែប នទ្រែលមាមារី លែវអ៝សឞេហាន់តាជ៝ង់គូងញីសជានឞ្រាសរីដ៝ង់ គៃមាញហើរអ៝សឞេអីនៃមាកោរាញឞ្រាសកើតនាវឞូលែៈជេសញចីសតានាវវៃនៃនើស។ 28 ជេសឆីមេអោន ឆៃអ៝សឞេអីរី ពាង់ក្លូ ជេសរីពាង់រានេមាកោរាញឞ្រាស៖

29 “អើយកោរាញឞ្រាស! គ៝ប់អ្យាអីឞូនុយ្សជានការអ្យាត់នាវមៃ អាបៃអ្យាលាសគ៝ប់ខឹត គ៝ប់លែៈគែសនាវដាប់មពាន់ជេស‌

យ៝រនាវមៃត៝នមាគ៝ប់នើសជេងទីងាន់រ៝។

30 ត្រោមមាត់គ៝ប់លែៈឆៃនាវរាក្លាយ្សមៃអ៝ន់ជេស។*

31 នាវរាក្លាយ្សអីនៃមៃលែៈនទ្រាប់អ៝ន់មាលែៈមពោលឞូនុយ្សឆៃ‌

32 ពាង់ជេងតឹមឞាននាវអាងគៃមាងអាងលែៈមពោលឞូនុយ្សអីមោទីផូងអីឆ្រាអែល យ៝រមាពាង់អ៝ន់ខាន់ពាង់នៃគឹតនាល់កោរាញឞ្រាស‌

ជេសរីផូងអេងៗរានេរាហើនផូងអីឆ្រាអែល យ៝រមាឞ្រាសក្រីស តាៈឞើសផូងអីនៃ‡”។*

33 មេៈឞឹអ៝សឞេអីនៃនទ្រ៝ត់ហីសរាហ៝ល់នាវឆីមេអោន លាសមាក៝នឞេខាន់ពាង់។ 34 ឆីមេអោន មឞើសនាវគែសជេងមាខាន់ពាង់ ជេសរីលាសមាមារី ៖ “កោរាញឞ្រាសលែៈអ៝ន់ឞូនុយ្សអ៝ក់តាផូងអីឆ្រាអែល គែសនាវរ៝សហេងយ៝រមាខាន់ពាង់មោអ្យាត់អោសមាក៝នឞេអ្យា យើនមាគែសអ៝ក់ជឹតគែសនាវរាក្លាយ្សយ៝រមាខាន់ពាង់អ្យាត់មាក៝នឞេអ្យា។ កោរាញឞ្រាសនើមលែៈញជ្វាល់ជេសក៝នឞេអ្យាវាច់តាអ្យា តីសមាអ៝ក់ឞូនុយ្សហោមតឹមរាទ៝ង់ដាសពាង់។* 35 នទ្រីទឹងឞូឆៃក្ល៝សរាសវាសនាវមឹនឞូនុយ្សទុតនទ៝ប់ អីអៃនើមតៃគែសជីអោសអេតអោសអេលងាន់ នហាៈមាគែសដាវនត៝ប់រាហ៝តាព្លៃនូយ្សព្លៃនហ៝ម់អៃងាន់”។

អូអាន រានេកោរាញឞ្រាស

36 ជេសរីគែសទូហ្វេអូរាញ ឞូនុយ្សនតើយ្សនាវងើយកោរាញឞ្រាស ពាង់រាញាអាន អីក៝នផានូអែល តាមពោលអាឆើរ §។ ពាង់នអាប់លែៈគែសពើសនាម់ ជេសរីឆាយពាង់ខឹត‌ 37 ជេសឆាយពាង់ខឹតនៃ ពាង់គុនទ្រោនហ៝ នោកនៃពាង់លែៈរាញ ៨៤ នាម់។ ពាង់គុងក្រែតាជ៝ង់គូងញីសជានឞ្រាស ពាង់យើកមឞាសមាកោរាញឞ្រាសទឹងមាង់ទឹងនារ គែសអ៝ក់ពាង់មឞើសឆើមអ៝ត់ឆោងឆា។* 38 នោកឆីមេអោន ហោមងើយ អូអាន ត្រុយ្សតានៃ ត៝ត់ឆៃអ៝សឞេអីនៃ ពាង់រានរានេមាកោរាញឞ្រាស ជេសរីពាង់មឞើសងក៝ចមាអ៝សឞេជេៈនៃអ៝ន់មាឞូនុយ្សអីគុក៝ប់រើបហើបឞ្រាសក្រីស អីកោរាញឞ្រាសដាៈហាន់គៃមារាក្លាយ្សប៝នលានអីឆ្រាអែល *។*

រានាក់វ៝ល់ឞ្រាសយេឆូ ព្លឹឆឹតតាប៝ននាឆារែត

39 ជេសមេៈឞឹឞ្រាសយេឆូ ជានលែៈផ្យៅតឹមទីតឹងនាវវៃកោរាញឞ្រាស ជេសរីខាន់ពាង់ព្លឹឆឹតតាប៝នខាន់ពាង់នើម ប៝ននាឆារែត តាឞ្រីកាលីលេ រី។ 40 ជេសរីឞ្រាសយេឆូ នតើមតេសដេៈក្វ៝ង់ដេៈឆាក់ជាន់ពាង់ទាង់ គែសនាវមឹនគឹតឞ្លាវងាន់ យ៝រមាកោរាញឞ្រាសគុនទ្រែលកើលមាពាង់។

ឞ្រាសយេឆូ ១២ នាម់ ពាង់គុតាជ៝ង់គូងញីសជានឞ្រាស

41 តាអាប់នាម់ឞូញេតបុននហ៝ត មេៈឞឹឞ្រាសយេឆូ នទ្រែលមាផូងប៝នលានអីឆ្រាអែល វៃហាន់តាប៝នក្វ៝ង់យេរូឆាលឹម ដ៝ង់។* 42 តឹងនាវវៃខាន់ពាង់វៃជាននើស មេៈឞឹឞ្រាសយេឆូ ហាវលាប់ញេតបុន។ ត៝ត់ទូនាម់ឞ្រាសយេឆូ លែៈគែស ១២ នាម់ ជេសរីមេៈឞឹលែវពាង់ហាន់នទ្រែលដ៝ង់។ 43 ត៝ត់លោចញេតបុន អីមេៈឞឹរីឆឹតគ្រុង។ មោគឹតអោសលាសក៝នខាន់ពាង់ហោមគុតាប៝នយេរូឆាលឹម ‌ 44 នអោនលាសលែៈហាន់នទ្រែលឞូ។ ត៝ត់ហាន់លែៈគែសទូនាររាមាង់ រីមើខាន់ពាង់នតើមជ៝យក៝នខាន់ពាង់តាឞាល់មពោលខាន់ពាង់គឹតនាល់‌ 45 ជ៝យមោឆៃអោស ជេសរីខាន់ពាង់ព្លឹតៃតាប៝នយេរូឆាលឹម គៃមាជ៝យពាង់តារី។ 46 ជ៝យត៝ត់ពែនារ ខាន់ពាង់ឆៃពាង់គុតាជ៝ង់គូងញីសជានឞ្រាសមាកោរាញឞ្រាសនទ្រែលនើមនតីនាវវៃផូងអីឆ្រាអែល តារី ពាង់គុអ្យាត់នាវឞូងើយ ងក្រែមាអោបឞូនាវអេងៗជឹត។ 47 ឞូម៝សអីតាង់នាវឞ្រាសយេឆូ អើស ឞូនទ្រ៝ត់ហីសរាហ៝ល់ងាន់ មោវ៝ត់អោសនាវពាង់អើសអីនៃឞ្លាវងាន់។ 48 ត៝ត់មេៈឞឹឆៃជេសអីក៝ននៃ ឞារហៃខាន់ពាង់នៃនទ្រ៝ត់ហីសរាហ៝ល់ងាន់។ មេៈពាង់អោប៖ “ហើយនោ! មើមជានមៃកើតនអៃនៃហាៈ? ហេនរាវៃហោងាន់ហាន់ជ៝យមៃ”។ 49 ក៝នពាង់អើស៖ “ហើយមេៈឞឹ ម៝សនាវខាន់អៃមៃជ៝យគ៝ប់? គ៝ប់អ្យាគុតាជៃអីឞឹគ៝ប់នើមហែស”។* 50 តីសមាមេៈឞឹមោវ៝ត់អោសនាវក៝នពាង់អើសអីនៃ។ 51 អីមេៈពាង់រីព្រាប់លែៈនាវអីនៃតាត្រោមឆាក់ពាង់នើម។ ជេសរីអីក៝ននៃព្លឹឆឹតអាប៝ននាឆារែត នទ្រែលមេៈឞឹ អ្យាត់នាវអីមេៈឞឹពាង់ដ៝ង់។* 52 ឞ្រាសយេឆូ លើមានទាម់ លើមាគែសនាវមឹនគឹតឞ្លាវ ទីនូយ្សទីនហ៝ម់កោរាញឞ្រាសងាន់ នទ្រែលមាទីនូយ្សទីនហ៝ម់ឞូនុយ្សដ៝ង់។*

* 2:1 «ឆេឆារ » គែសនាវខ្លៃលាស៖ «កោរាញកាដាច់» តានាវងើយលាតាង់ អីនាវងើយផូងរោម ។ * 2:4 ១ឆា ១៧:១២; មកា ៥:១ * 2:9 លក ១:១២-១៣, ២៩-៣០ * 2:11 លក ២:៣០; ៣:៦; យហ ៤:៤២; ការ ៥:៣១; ១៣:២៣; ផល ៣:២០; ២ពេ ១:១; ៣:១៨; ១យហ ៤:១៤ * 2:14 លក ១៩:៣៨; ផល ៣:១៤, ១៧ * 2:19 លក ២:៥១ * 2:21 លក ១:៣១; កាល ៤:៤; នន ១៧:៩-១៤ † 2:22-24 នាវវៃមោឆេ ជេងនាវអីមោឆេ ញចីសឞើសឆ៝ម់បុតនាវនតើមត៝ត់មាឆ៝ម់បុតនាវវៃរាខិច។ យើនមាហោមគែសនាវវៃអេងជឹតដ៝ង់តានាវវៃផូងអីឆ្រាអែល ។ * 2:22-24 កល ១២:៤, ៦; នង ១៣:២, ១១-១៦; កល ១២:៨ * 2:30 លក ២:១១ ‡ 2:32 មោលាស «ជេសរីពាង់អ៝ន់នាវច្រេកលើបមាផូងអីឆ្រាអែល អីផូងកោរាញឞ្រាសដ៝ង់»។ * 2:32 លក ១:៧៨-៧៩; អេឆា ៤២:៦ * 2:34 អេឆា ៨:១៤; រម ៩:៣៣; ១កោ ១:២៣ § 2:36 ផូងអីឆ្រាអែល កើបមពោលក្វ៝ង់តឹងក៝នឞូក្លោយាកោប ១២ នុយ្ស អាឆើរ ជេងក៝នទូហ្វេតាមពោលទឹងលែៈអីនៃ។ * 2:37 ១តម ៥:៥ * 2:38 តានាវងើយគ្រែក លាស៖ «យេរូឆាលឹម »។ * 2:38 លក ២៤:២១; អេឆា ៥២:៩ * 2:41 នង ១២:១-១៤ * 2:49 យហ ២:១៦ * 2:51 លក ២:១៩ * 2:52 លក ២:៤០; ១ឆា ២:២៦