4
ឞ្រាសយេឆូ តឹមងើយនទ្រែលទូហ្វេឞូអូរផូងឆាមារី
1 ផូងផារីឆី តាង់ឞូងក៝ចលាស ឞ្រាសយេឆូ គែសអ៝សម៝នអ៝ក់រាលាវមាយោហាន-បាប់តែម នទ្រែលមាជានបាប់តែមយុកមាទាកអ៝ន់មាឞូនុយ្សអ៝ក់រាលាវមាពាង់ដ៝ង់។
2-3 ត៝ត់ឞ្រាសយេឆូ លែៈគឹតនាវអីនៃ ពាង់លោសឞើសឞ្រីយូដា ព្លឹឆឹតតៃតាឞ្រីកាលីលេ ។ យើនមាឞ្រាសយេឆូ នើមមោអោសជានបាប់តែមយុកមាទាកអ៝ន់ឞូ គែសមពោលអ៝សម៝នពាង់ទើមជាន។
4 ពាង់ហាន់គ្លាត់រ៝ៈឞ្រីឆាមារី យ៝រមាកោរាញឞ្រាសដាៈ។
5 រ៝ៈត្រ៝ងនៃពាង់ហាន់ត៝ត់តាប៝នឆូខារ តាឞ្រីឆាមារី ប៝នអីនៃតឹមទាច់ដាសនែសយាកោប អីចែផូងអីឆ្រាអែល ពាៈមាក៝នពាង់យោឆែប កាល់អែនើស។
6 តានតុកនៃគែសទូមល៝ម់នតូទាក រាញា«នតូទាកយាកោប »។ ឞ្រាសយេឆូ ហាន់លែៈរាគាញ់ ជេសរីពាង់គុរាលូកេងនតូទាកនៃ នោកនៃក្លាប់លាសលែៈនារងក្លាងឞោក។
7 ជេសរីគែសទូហ្វេឞូអូរឆាមារី ហាន់ឞុកទាក ឞ្រាសយេឆូ លាសមាពាង់៖ “ទាន់ទាកញេតអើ”។
8 មពោលអ៝សម៝នពាង់លែៈហាន់រាវាត់នទើឆាតាប៝ន។
9 ឞូអូរឆាមារី នៃលាសមាឞ្រាសយេឆូ ៖ “មៃផូងអីឆ្រាអែល គ៝ប់ឞូអូរផូងឆាមារី ម៝សមៃទាន់ទាកគ៝ប់ច្រាវ?” ពាង់លាសកើតនៃ យ៝រលាសផូងអីឆ្រាអែល ដាសមាផូងឆាមារី មោគែសអោសតឹមទីឞាល់។
10 ឞ្រាសយេឆូ លាសមាពាង់៖ “លាសអៃនាល់នទើកោរាញឞ្រាសអុចអ៝ន់ទើមទាម នទ្រែលមានាល់គ៝ប់អីឞូនុយ្សលាសមាអៃ៖ «ទាន់ទាកញេតអើ» អៃទាន់ទាកឞើសគ៝ប់ ជេសរីគ៝ប់អ៝ន់ទាកអីអ៝ន់នាវរេសមាអៃរ៝”។
11 ឞូអូរអីនៃអើសមាពាង់៖ “អើកោរាញ នតូទាកអ្យាជ្រូងាន់ មាៈនទើមៃមាឞុក លាសនទ្រីឞើសតាៈគែសទាកអីអ៝ន់នាវរេស?
12 លាសនទ្រីមៃក្វ៝ង់រាលាវចែហេនយាកោប បាស? យ៝រលាសពាង់លែៈអ៝ន់នតូទាកអីអ្យាមាហេន។ ពាង់នើម នទ្រែលមាមពោលក៝នឞូក្លោពាង់ នអ៝ប់មាមពោមពា(ឆ្យុម)ពាង់ញេតទាកឞើសនតូអីអ្យាទាទេ”។
13 ឞ្រាសយេឆូ លាស៖ “ឞូម៝សញេតទាកអីអ្យាហោមជីហីរដ៝ង់
14 យើនមាឞូម៝សញេតទាកគ៝ប់អ៝ន់ មោហោមគែសអោសនាវជីហីរជឹត យ៝រលាសទាកគ៝ប់អ៝ន់អីនៃ ជេងតូទាកតាពាង់អីលោសរាទោលអ៝ន់គែសនាវរេសនហ៝រ៝”។
15 ឞូអូរអីនៃលាសមាពាង់៖ “អើកោរាញ! ទាន់ទាកមៃអីរីអ៝ន់គ៝ប់បាៈអើ គៃមាគ៝ប់មោហោមជីហីរ មោហោមខាច់ហាន់ឞុកតាអ្យាជឹត”។
16 ឞ្រាសយេឆូ លាសមាពាង់៖ “ឆឹតក្វាល់ឆាយអៃ ហាន់ព្លឹតាអ្យា”។
17 ឞូអូរអីនៃអើស៖ “គ៝ប់មោអោសគែសឆាយ”។ ឞ្រាសយេឆូ លាស៖ “អៃលាសអៃមោគែសឆាយកើតនៃជេងទីងាន់
18 យ៝រលាសអៃនើសលែៈគែសព្រាម់អឹឆាយ យើនមាឞូនុយ្សគុដាសអៃអាប់នារអាបៃអ្យាមោអោសទីឆាយងាន់អៃ នាវអៃងើយអីនៃជេងទីងាន់”។
19 ឞូអូរអីនៃលាស៖ “អើកោរាញ គ៝ប់គឹតមៃឞូនុយ្សនតើយ្សនាវងើយកោរាញឞ្រាសងាន់រ៝។
20 អូចែផូងហេនកាល់អែនើស អ៝ន់ផូងហេនយើកមឞាសកោរាញឞ្រាសតាកាលើយោកអ្យា យើនមាមើមទឹងផូងអីឆ្រាអែល ខាន់មៃលាសអ៝ន់យើកមឞាសពាង់តាប៝នយេរូឆាលឹម ទើម?”
21 ឞ្រាសយេឆូ លាស៖ “អើយោស អៃអ្យាត់នាវគ៝ប់អ្យា៖ ត៝ត់ទីនាររីតៃ នតុកយើកមឞាសមាកោរាញឞ្រាសអីឞឹមោគែសអោសលាសតាកាលើយោកអ្យា មោលាសតាប៝នយេរូឆាលឹម ។
22 ផូងឆាមារី ខាន់អៃយើកមឞាសកោរាញឞ្រាសយើនមាមោអោសគឹតនាល់ពាង់។ ផូងអីឆ្រាអែល ហេន ហេនយើកមឞាសកោរាញឞ្រាសនអ៝ប់មាគឹតនាល់ពាង់ដ៝ង់ យ៝រលាសនាវរាក្លាយ្សមាទឹងលែៈឞូនុយ្សកោរាញឞ្រាសអ៝ន់នៃតាៈឞើសផូងអីឆ្រាអែល ។
23 យើនមាត៝ត់ទីនារអីនៃ អាបៃអ្យាលែៈត៝ត់ជេស ឞូនុយ្សអីយើកមឞាសទីងាន់ងេនមាកោរាញឞ្រាសឞឹ យើកមឞាសពាង់មានូយ្សនហ៝ម់ មានាវងាន់ នាវយើកមឞាសកើតអីនៃជេងនាវកោរាញឞ្រាសឞឹអុច។
24 កោរាញឞ្រាសជេងហ្វេងមោគែសអោសឆាក់ជាន់ នទ្រីឞូម៝សយើកមឞាសមាពាង់ អ្យាត់មាយើកមឞាសមានូយ្សនហ៝ម់ មានាវងាន់”។
25 ឞូអូរអីនៃលាស៖ “គ៝ប់លែៈគឹតជេស ឞ្រាសមេឆី អីឞូក្វាល់ឞ្រាសក្រីស អីនើមរាក្លាយ្សតាៈឞើសកោរាញឞ្រាសទែញជ្វាល់ដ៝ង់ ពាង់មរាត៝ត់តានែសនតូអ្យា លាសពាង់ត៝ត់ ពាង់រាឞ្លាងទឹងលែៈនទើមាហេន”។
26 ឞ្រាសយេឆូ លាស៖ “គ៝ប់អីរីហែស គ៝ប់អីគុងើយនទ្រែលអៃអីអ្យាហែស”។
27 តាម៝ងនៃមពោលអ៝សម៝នពាង់ឆឹតត៝ត់តារី ខាន់ពាង់នទ្រ៝ត់ហីសរាហ៝ល់ងាន់ឆៃពាង់គុងើយនទ្រែលទូហ្វេឞូអូរ។ យើនមាមោគែសទូហ្វេអោបពាង់ ម៝សនទើពាង់ជ៝យ មោលាសមើមទឹងពាង់តឹមងើយនទ្រែលឞូអូរអីនៃ។
28 ឞូអូរអីនៃនត្លើយនោងរាឞ៝ង់ទាកតារី ជេសរីឆឹតតាប៝ន មឞើសមាឞូតារី៖
29 “ហាន់អ្វាញ់ គែសទូហ្វេឞូក្លោលាសទឹងលែៈនទើគ៝ប់លែៈជាន គឹតពាង់ឞ្រាសក្រីស ហើ?”
30 ខាន់ពាង់លោសឞើសប៝ននៃហាន់គ្រុងតាឞ្រាសយេឆូ ។
31 នទុតឞូអូរនៃឆឹតតាប៝ន មពោលអ៝សម៝នលាសមាឞ្រាសយេឆូ ៖ “អើនើមនតី ឆោងឆាហ៝ម់!”
32 ពាង់លាស៖ “គ៝ប់គែសនទើឆោងឆាហើយ ខាន់មៃមោអោសគឹតនទើគ៝ប់ឆោងឆា”។
33 មពោលអ៝សម៝នតឹមលាសនទ្រាង់ខាន់ពាង់៖ “គឹតលែៈគែសឞូអ៝ន់នទើឆោងឆាមាពាង់?”
34 ឞ្រាសយេឆូ លាស៖ “នទើឆោងឆាគ៝ប់នៃ ជេងនាវគ៝ប់ជានតឹងនាវអុចកោរាញឞ្រាសនើមអីតើមញជ្វាល់គ៝ប់វាច់ នទ្រែលមាជានលើយអ៝ន់ជេសនាវជានការអីនៃ។
35 ខាន់មៃតឹមលាស៖ «ហោមព្វាន់ខៃជឹតនាប់ ត៝ត់ខៃកាច់»។ យើនមាគ៝ប់ឞែ គ៝ប់លាសមាខាន់មៃ៖ អ្វាញ់ហ៝ម់ផូងឞូនុយ្សអីវាច់នៃ ខាន់ពាង់តឹមឞានមាទូលោកមីរអីគែសឞាលែៈទុមទីមាកាច់ងាន់ យ៝រមាខាន់ពាង់អុចញឆីងមាគ៝ប់។
36 អាបៃអ្យាមពោលឞូនុយ្សកាច់ហោមឆ៝ៈទើននទើងខោមមាខាន់ពាង់ ខាន់ពាង់រាគូមឞូនុយ្សគៃមាគែសនាវរេសនហ៝រ៝តឹមឞានមាឞូរាគូមព្លៃ លាសនទ្រីមពោលឞូនុយ្សតូច ដាសមពោលឞូនុយ្សកាច់ខាន់ពាង់រាម់មអាកតឹមឞាន។
37 កើតនទ្រីនាវវៃលាស៖ «ពាង់អ្យាមាតូច ពាង់អីត៝មាកាច់» ជេងទីងាន់។
38 គ៝ប់លែៈអ៝ន់ខាន់មៃតឹមឞានមាហាន់កាច់តាមីរនតុកខាន់មៃមោម៝ប់អោសរាអាសជាន លែៈគែសឞូនុយ្សអាអេងរាអាសជាន ជេសរីខាន់មៃមាហាន់កាច់រាគូមនទើតាៈឞើសខាន់ពាង់អីនៃរាអាសជាន”។
39 តាប៝នអីនៃគែសអ៝ក់ផូងឆាមារី ញឆីងមាឞ្រាសយេឆូ យ៝រមាតាង់នាវឞូអូរអីនៃមឞើសងក៝ចមាខាន់ពាង់៖ “គែសទូហ្វេឞូក្លោលាសទឹងលែៈនទើគ៝ប់លែៈជាន”។
40 កើតនទ្រីនោកផូងឆាមារី រានតាឞ្រាសយេឆូ រី ខាន់ពាង់ក៝ន់អ៝ន់ពាង់គុតានៃប៝ត់ ជេសរីឞ្រាសយេឆូ គុនទ្រែលខាន់ពាង់តានៃឞារនារ។
41 គែសឞូនុយ្សញឆីងមាឞ្រាសយេឆូ អ៝ក់រាលាវរីជឹត ត៝ត់មាតាង់នាវពាង់នើមមឞើសងក៝ចនៃ។
42 ផូងខាន់ពាង់លាសមាឞូអូរអីនៃ៖ “អាបៃអ្យាហេនញឆីងមាពាង់ យ៝រលាសលែៈហេននើមតាង់នាវពាង់មឞើសងក៝ច មោអោសទើននាវអៃមឞើសងក៝ចទើម នទ្រែលមាលែៈហេនគឹតពាង់ជេងនើមរាក្លាយ្សទឹងលែៈឞូនុយ្សតានែសនតូអ្យាងាន់”។
ឞ្រាសយេឆូ ជានឞាសនាវជីក៝នឞូក្លោទូហ្វេកោរាញ
43 ត៝ត់ឞារនារនៃ ជេសរីឞ្រាសយេឆូ លោសឞើសនតុកនៃ ហាន់តាឞ្រីកាលីលេ ។
44 ឞ្រាសយេឆូ លែៈលាសជេស៖ “ទឹងលែៈឞូនុយ្សនតើយ្សនាវងើយកោរាញឞ្រាស មោគែសអោសទូហ្វេឞូនុយ្សតាប៝នពាង់នើមយើកមាពាង់”។
45 ឞ្រាសយេឆូ ត៝ត់តាឞ្រីកាលីលេ នៃ ឞូនុយ្សតាឞ្រីនៃរ៝មពាង់ យ៝រលាសលែៈខាន់ពាង់ឆៃពាង់ជាននាវខ្លៃនោកញេតបុននហ៝តតាប៝នយេរូឆាលឹម នើស យ៝រលាសនោកនៃខាន់ពាង់ហាន់លាប់ញេតបុននទ្រែលតានៃដ៝ង់។
46 ជេសរីឞ្រាសយេឆូ ព្លឹតៃតាប៝នកានា ឞ្រីកាលីលេ នតុកប៝នពាង់ជានទាកអ៝ន់ជេងនទ្រាញ់ព្លៃយុងយារប៝នរីនើស។ តាប៝នកាពើនិម គែសទូហ្វេកោរាញ ក៝នឞូក្លោពាង់គែសនាវជី។
47 ត៝ត់កោរាញអីនៃតាង់លាសឞ្រាសយេឆូ លោសតាៈឞើសឞ្រីយូដា លែៈត៝ត់តាឞ្រីកាលីលេ ពាង់ហាន់ជ៝យ ត៝ត់ឆៃទាន់ឞ្រាសយេឆូ ហាន់ជានឞាសក៝នពាង់ យ៝រលាសជីឞើយមាខឹត។
48 ឞ្រាសយេឆូ លាសមាពាង់៖ “លាសផូងអីឆ្រាអែល ខាន់អៃមៃមោអោសឆៃនាវខ្លៃ នទ្រែលមានាវមឞេនគ៝ប់ជាន ខាន់អៃមៃមោញឆីងអោសមាគ៝ប់”។
49 កោរាញអីនៃលាសមាឞ្រាសយេឆូ ៖ “អើកោរាញ ទាន់មៃហាន់ហ៝ម់ គើញលាន់ខឹតក៝នគ៝ប់”។
50 ឞ្រាសយេឆូ លាសមាពាង់៖ “មៃឆឹតទោ ក៝នមៃហោមរេស”។ ពាង់អ្យាត់នាវឞ្រាសយេឆូ លាស ជេសរីពាង់ព្លឹឆឹត។
51 ទោលហាន់ឆឹតរ៝ៈត្រ៝ង គែសផូងទឹកពាង់ហាន់ច្វាៈពាង់មឞើសងក៝ចមាពាង់៖ “អើកោរាញ ក៝នមៃលែៈឞាសហើយ”។
52 ពាង់អោបផូងទឹកពាង់៖ “ម៝សម៝ងពាង់ឞាស?” ខាន់ពាង់មឞើស៖ “ម៝ងង្វាយកេងមាង់នត្រីនើសពាង់ឞាសជីក៝ប”។
53 អីឞឹរី កាសគឹតនោកម៝ងអីនៃដ៝ង់ឞ្រាសយេឆូ លាសមាពាង់៖ “ក៝នមៃហោមរេស”។ ជេសរីពាង់ នអ៝ប់មារានាក់វ៝ល់ពាង់ទឹងលែៈញឆីងមាឞ្រាសយេឆូ ទាទេ។
54 អីអ្យាជេងលែៈត៝ល់ឞារឞ្រាសយេឆូ ទែជាននាវខ្លៃ នតើមឞើសពាង់ព្លឹឆឹតឞើសឞ្រីយូដា ហាន់តាឞ្រីកាលីលេ រី។