8
នាវតឹមរាង្លាប់អីអ្វែសរាលាវ
1 ទឹងលែៈនទើអីហេនលែៈមឞើសងក៝ចអីនៃនើសជេងកើតនអា៖ ឞ៝ន់លែៈគែសជេសទូហ្វេកោរាញជានឞ្រាសទុតក្វ៝ង់ អីគុមពែសឞើសមារានើលកាដាច់កោរាញឞ្រាសនើមអីទុតព្រេសតាកាលើត្រោកអីនតុកពាង់នើមរី។
2 ពាង់គុជានការកោរាញជានឞ្រាសទុតក្វ៝ង់តានតុកក្ល៝សអ្វែសតាចូនឞ៝កជានឞ្រាសមាកោរាញឞ្រាសអីងាន់តាកាលើត្រោក អីកោរាញឞ្រាសនើមជាន មោអោសឞូនុយ្សជាន។
3 នាវជានការមាទឹងលែៈរាងោចមពោលកោរាញជានឞ្រាសទុតក្វ៝ង់ ជេងញហើរនទើមាទាន់កោរាញឞ្រាសយោៈនាវតីស នទ្រែលមាញហើរនទើអេងៗជឹត លាសនទ្រីអ្យាត់មាខាន់ពាង់គែសនទើមាញហើរ។
4 លាសឞ្រាសយេឆូ ហោមគុតានែសនតូអ្យា ពាង់មោអោសទើយជានឞូនុយ្សជានឞ្រាស យ៝រលាសលែៈគែសជេសមពោលឞូនុយ្សជានឞ្រាសមាញហើរនទើមាកោរាញឞ្រាសតឹងកើតលែៈគែសញចីសតានាវវៃមោឆេ ។
5 ខាន់ពាង់ឆើមកើលជានការតានតុកជានឞ្រាសអីឞូជានតឹងនតុកជានឞ្រាសអីងាន់តាកាលើត្រោកអីនតុកកោរាញឞ្រាសនើម យ៝រលាសនោកមោឆេ ជានចូនឞ៝កជានឞ្រាសមាកោរាញឞ្រាសអីនៃនើស កោរាញឞ្រាសលែៈដាៈនហេលពាង់កើតនអា៖ «អ៝ន់មៃញជ្រាង់ ជានទឹងលែៈតឹងរូបអីគ៝ប់លែៈញហើជេសមាមៃ នោកមៃគុតាកាលើយោកអ្យា» នទ្រីទឹងនតុកខាន់ពាង់ជានឞ្រាសអីនៃជេងតឹមឞានមាគូយអីឞូអ្វាញ់មោអោសឆៃនទើងាន់។
6 អាបៃអ្យាកោរាញឞ្រាសលែៈកើយ្សឞ្រាសយេឆូ មាជានការកោរាញជានឞ្រាសទុតក្វ៝ង់តាកាលើត្រោក នាវជានការអីនៃអ្វែសរាលាវមានាវជានការឞូនុយ្សជានឞ្រាសតានែសនតូអ្យា ពាង់ជេងនើមលែវមានាវតឹមរាង្លាប់មហែកោរាញឞ្រាសដាសឞូនុយ្សអីអ្វែសរាលាវមានាវតឹមរាង្លាប់អីអើម ជេសរីនាវតឹមរាង្លាប់មហែអីនៃគែសនាវកោរាញឞ្រាសត៝នអីអ្វែសរាលាវ។
7 លាសនាវតឹមរាង្លាប់អីអើមនៃលែៈទុតអ្វែសជេស លាសនទ្រីមោខាច់អោសគែសនាវតឹមរាង្លាប់អាអេងជឹតមានត្រ៝ៈ។
8 យើនមាកោរាញឞ្រាសលែៈឆៃផូងប៝នលានជានរាលាវឞើសនាវតឹមរាង្លាប់អើម ទឹងពាង់លាសកើតនអា៖
«តានារជឹតនាប់តៃ
គ៝ប់មរាអ៝ន់នាវតឹមរាង្លាប់មហែមាផូងអីឆ្រាអែល រ៝
មាមពោលយូដា ។
9 នាវតឹមរាង្លាប់មហែអ្យាមោអោសតឹមឞានមានាវតឹមរាង្លាប់នោកគ៝ប់តឹមរាង្លាប់នទ្រែលអូចែខាន់ពាង់
នោកគ៝ប់តេកខាន់ពាង់ទូលោសឞើសឞ្រីអេឆីប នើស។
ខាន់ពាង់មោអោសគុរាប់ជាប់ញអោតតឹងនាវតឹមរាង្លាប់នទ្រែលគ៝ប់នៃ
នទ្រីគ៝ប់ក៝ៈមោហោមគុនទ្រែលមាខាន់ពាង់ដ៝ង់» អ្យាជេងនាវងើយកោរាញឞ្រាសនើម។
10 ជេសរីកោរាញឞ្រាសលាស៖
«នាវតឹមរាង្លាប់អីគ៝ប់តឹមរាង្លាប់នទ្រែលផូងអីឆ្រាអែល តានារជឹតនាប់តៃ ជេងកើតនអា៖
គ៝ប់មរាតេៈទឹងលែៈនាវគ៝ប់ដាៈការ់តាតោរខាន់ពាង់
នទ្រែលមាញចីសនាវដាៈអីនៃតាត្រោមនូយ្សនហ៝ម់ខាន់ពាង់
ជេសរីគ៝ប់មរាជេងឞ្រាសអីខាន់ពាង់យើកមឞាស
ខាន់ពាង់មរាជេងផូងប៝នលានគ៝ប់នើម។
11 តានោកនៃតៃ មោហោមខាច់អោសគែសឞូនុយ្សនតុមនតីមាឞូនុយ្សច្យៅមែង នទ្រែលមានទុលមពោលខាន់ពាង់នើមលាស៖
«អ៝ន់ខាន់អៃមៃគឹតនាល់កោរាញឞ្រាស»
យ៝រលាសនតើមឞើសឞូនុយ្សជេៈតាន៝ម់ឞូ ត៝ត់មាឞូនុយ្សក្វ៝ង់រាលាវឞូ
ទឹងលែៈខាន់ពាង់មរាគឹតនាល់គ៝ប់ទាទេ
12 គ៝ប់មរាយោៈនអាចទឹងលែៈនាវអ្យើសនាវតីសខាន់ពាង់
ជេសរីគ៝ប់មោហោមអោសងកាសមានាវតីសខាន់ពាង់ជឹត»។
13 យ៝រមាកោរាញឞ្រាសលែៈលាសនាវតឹមរាង្លាប់អ្យាជេងនាវតឹមរាង្លាប់មហែ នទ្រីទឹងនាវតឹមរាង្លាប់អីអើមមោហោមអោសខ្លៃមាជានតឹង។ ជេសរីនទើអើមអីមោហោមគែសខ្លៃមាជានតឹងឞើយមាលែៈរ៝សជេស។