ឆ៝ម់បុតឞូញចីសញជ្វាល់អ៝ន់មាផូង
ហេឞ្រើ
នាវឞោកអ៝ន់ឞូគឹតល៝រ
ឞ៝ន់អាបៃអ្យាមោហោមគឹតអោសឞូម៝សញចីសឆ៝ម់បុតអ្យា គែសឞូនុយ្សអាបាៈលាសពោល នាក់ញចីស ឞូនុយ្សអាបាៈលាសបារនាបាស (ការ ៤:៣៦; ១១:២៤)នាក់ញចីស ឞូនុយ្សអាបាៈលាសអាពោលុស (ការ ១៨:២៤-២៩; តត ៣:១៣)នាក់ញចីស។ ឞ៝ន់គឹតទើម ឞូនុយ្សនាក់ញចីសពាង់ជេងផូងអីឆ្រាអែល អីញឆីងមាឞ្រាសក្រីស ។ ឞ៝ន់មោគឹតដ៝ង់ម៝សនាម់ឞូញចីសឆ៝ម់បុតអ្យា យើនមាឞូមឹនលាសគែសញចីសអេល៝រមានាម់ ៧០។ ឆ៝ម់បុតអ្យាឞូមឹនលាសឞូញចីសតាប៝នរោម (ហេឞ ១៣:២៤)។
«ផូងហេឞ្រើ » «ផូងអីឆ្រាអែល »គែសនាវខ្លៃតឹមឞាន។ នើមញចីសឆ៝ម់បុតអ្យា មោអោសញចីសញជ្វាល់អ៝ន់មាទូនតុក មោលាសទូឞ្រីទើម យើនមាញជ្វាល់អ៝ន់មាផូងញឆីងអីឞូជានជេរតាអ៝ក់នតុក។ ឆ៝ម់បុតអ្យាមោអោសញចីសតឹមឞានមាឆ៝ម់បុតញជ្វាល់អ៝ន់មាឞូនុយ្ស នតឹតលាសមោអោសគែសនាវអោបអ្វែសលាង់តានតើមឆ៝ម់បុត ជេងញចីសតឹមឞានមានតីនាវកោរាញឞ្រាសងើយតានារពើស។
នើមអីនាក់ញចីសឆ៝ម់បុតអ្យា ពាង់ឆ៝ៈអ៝ក់ត្រ៝ងនាវកោរាញឞ្រាសងើយតាៈឞើសនាវតឹមរាង្លាប់អើម គៃមាញហើឞ្រាសក្រីស ក្វ៝ង់រាលាវមាទឹងលែៈអីគែសតានាវតឹមរាង្លាប់អើម គៃមានហាវនូយ្សផូងអីញឆីងមាឞ្រាសក្រីស ។ តារានោកឞូញចីសឆ៝ម់បុតអ្យា នាវនតុមនតីតាឆ៝ម់បុតគែសនាវខ្លៃមាផូងញឆីងតាផូងអីឆ្រាអែល អ៝ក់រាលាវដាសមាផូងអីមោទីផូងអីឆ្រាអែល កើតនទ្រីទឹងឞូក្វាល់ឆ៝ម់បុតអ្យា«ហេឞ្រើ »។
នាវអុចនត្រ៝ង់តាឆ៝ម់បុតអ្យា
ឞូនុយ្សអីញចីសឆ៝ម់បុតអ្យាលែៈឆ៝ៈនាវមឹននាវវៃផូងអីឆ្រាអែល ជេសរីនតីអីនាវទើយឞ្រាសក្រីស នើម អីអ្វែសរាលាវមាមោឆេ យ៝រលាសឞ្រាសក្រីស អីក៝នកោរាញឞ្រាសនើម ជេសរីអ្វែសរាលាវមាទឹងលែៈកោរាញជានឞ្រាសទុតក្វ៝ង់ យ៝រលាសពាង់អីកោរាញជានឞ្រាសទុតក្វ៝ង់អីទើយច្វាយនាវតីសទឹងលែៈឞូនុយ្សទូតឹទើម។ តាឆីតឹមរាកាង់ឞ្រាសយេឆូ លែៈជាវឆាក់ពាង់នើមជេងនទើជានឞ្រាសអ្វែសរាលាវមានទើជានឞ្រាសអីឞូទែញហើរតាញីសជានឞ្រាសតាផូងអីឆ្រាអែល តាអាប់រានោក យ៝រលាសឞ្រាសយេឆូ លែវឞូនុយ្សហាន់ទាច់អាកោរាញឞ្រាស ជេសរីជាននាវតឹមរាង្លាប់មហែអីហោមនឹងនហ៝រ៝។
ឞូនុយ្សអីញចីសឆ៝ម់បុតអ្យាលែៈនតុមនតីផូងញឆីងមាឞ្រាសក្រីស អ៝ន់ហោមគែសនូយ្សនហ៝ម់ញឆ្រោយ្សរាប់ជាប់នឹងតានាវញឆីង ជេសរីពាង់ងកាសផូងញឆីងមានាវញឆីងឞូកាល់អែនើស ជេសរីដាៈផូងញឆីងជានតឹងកើត។
មឞើសនាវខ្លៃតាងកោៈតាឆ៝ម់បុតអ្យា
- នាវនតើមមឞើសងក៝ច (១:១-៣)
- ឞ្រាសក្រីស អ្វែសរាលាវមាផូងតោងពារ់ (១:៤-២:១៨)
- ឞ្រាសក្រីស អ្វែសរាលាវមាមោឆេ (៣:១-៤:១៣)
- ឞ្រាសក្រីស អ្វែសរាលាវមាកោរាញជានឞ្រាសទុតក្វ៝ង់ (៤:១៤-៧:២៨)
- នាវតឹមរាង្លាប់មហែតាឞ្រាសក្រីស អ្វែសរាលាវមានាវតឹមរាង្លាប់អើម (៨:១-៩:២៨)
- ឞ្រាសក្រីស អ្វែសរាលាវមានទើជានឞ្រាសតឹងមានាវវៃមោឆេ (១០:១-៣៩)
- មានាវញឆីងមាកោរាញឞ្រាស (១១:១-១២:២៩)
- នាវគុរេសអីតឹមទីដាសនាវកោរាញឞ្រាសអុច (១៣:១-១៧)
- នាវនតិញងគ្លែៈទុត (១៣:១៨-២៥)
1
នាវនតើមមឞើសងក៝ច
1 ឞើសនតើមនើសកោរាញឞ្រាសលែៈងើយមាផូងអូចែឞ៝ន់អីផូងអីឆ្រាអែល ពាង់ងើយតឹងមាមពោលឞូនុយ្សនតើយ្សនាវងើយពាង់នើម ពាង់ងើយលែៈអ៝ក់តឹ នអ៝ប់មាអ៝ក់នតីលនាវងាន់។
2 យើនមាតារានោកងគ្លែៈទុតអាបៃអ្យា កោរាញឞ្រាសងើយមាឞ៝ន់តឹងមាក៝នឞូក្លោពាង់នើម។ ឞើសនតើមនើសពាង់អ៝ន់ក៝នពាង់នើមរាហាក់ញជេងទឹងលែៈនទើនើស ជេសរីពាង់លែៈកើយ្សជេសក៝នពាង់នើមដ៝ង់ គៃមាជាវទឹងលែៈរាងោចនទើអ៝ន់មាពាង់ម៝ត់អ្វាញ់នហ៝រ៝។
3 ក៝នអីនៃច្រាតអាងនាវច្រេកលើបកោរាញឞ្រាស នទ្រែលមាពាង់តឹមឞានមាកោរាញឞ្រាសនើមងាន់ងេនតាអាប់នតីលនាវ មោអោសគែសនាវតឹមតីសឞាល់។ ទឹងលែៈនតីលនទើហោមគែសតាៈឞើសនាវទើយនាវងើយក៝នអីនៃទើម។ ជេសពាង់ងគ្រ៝សលើយនាវតីសឞ៝ន់ ជានអ៝ន់ឞ៝ន់ក្ល៝ស ជេសរីពាង់ហាវតាកាលើត្រោកគុឞើសមាតីកោរាញឞ្រាសអីនើមទុតក្វ៝ង់។
4 កើតនទ្រីពាង់លែៈជេងទុតក្វ៝ង់រាលាវមាផូងតោងពារ់ងាន់ ជេសរីនាវកោរាញឞ្រាសក្វាល់ពាង់«ក៝ន»ញហើពាង់ក្វ៝ង់រាលាវមាទឹងលែៈនើមអីកោរាញឞ្រាសក្វាល់«តោងពារ់»ទើម។
ឞ្រាសយេឆូក្រីស ក្វ៝ង់រាលាវមាផូងតោងពារ់
5 មោគែសអោសកោរាញឞ្រាសលាសមាទូហ្វេតោងពារ់កើតពាង់លាសដាសឞ្រាសយេឆូ ៖
«មៃអ្យាក៝នគ៝ប់នើម
នារអ្យាគ៝ប់អ៝ន់ឞូគឹត គ៝ប់ឞឹមៃងាន់»។
ជេសរីពាង់លាស៖
«គ៝ប់មរាជេងអីឞឹពាង់
ពាង់មរាជេងអីក៝នគ៝ប់»។
6 ជេសរីទូតឹជឹត នោកកោរាញឞ្រាសអ៝ន់ក៝នឞូក្លោទាកឞោកពាង់នើមវាច់តានែសនតូ កោរាញឞ្រាសលាស៖
«ទឹងលែៈផូងតោងពារ់គ៝ប់នើម អ៝ន់យើកមឞាសមាពាង់»
7 កោរាញឞ្រាសងើយមាផូងតោងពារ់ពាង់នើម៖
«គ៝ប់អ៝ន់ផូងតោងពារ់គ៝ប់នើមមាជេងតឹមឞានមាឆ្យាល
គ៝ប់អ៝ន់ខាន់ពាង់អីផូងឆើមកើលជានការមាគ៝ប់ជេងតឹមឞានមាមព្យាត់អុញដ៝ង់»។
8 យើនមាកោរាញឞ្រាសលាសមាក៝នពាង់នើម៖
«អើកោរាញឞ្រាស នាវមៃម៝ត់អ្វាញ់គុតារានើលកាដាច់ហោមបាបើនហ៝រ៝
មៃម៝ត់អ្វាញ់មានាវឆ៝ង់ងាន់ ញអោតម៝ង់កាដាច់អីនទើមឞេនមានាវទើយមៃនើម។
9 យ៝រលាសមៃអុចហោងាន់មានាវឆ៝ង់ មៃឞ្យាញ់ងាន់មានាវក្វែ។
កើតនទ្រីទឹងកោរាញឞ្រាសអីឞ្រាសមៃនើមយើកមឞាស ត៝ៈទាកងីតាមៃ ជេងនទើមឞេនពាង់ដាៈមៃជានកាដាច់
ពាង់អ៝ន់មៃគែសនាវរាម់មអាកទុតហោរាលាវមាឞាល់មពោលមៃ»។
10 កោរាញឞ្រាសលាសជឹតមាក៝នពាង់នើម៖
«អើកោរាញ ឞើសនតើមឆាអើមឆាអាមនើស មៃនើមរាហាក់ញជេងនែសនតូ
ត្រោកជេងតាៈឞើសតីមៃនើមដ៝ង់ញជេង។
11 នែសនតូ នទ្រែលមាត្រោកមរារ៝សលេកលែៈផ្យៅ យើនមាមៃហោមអែនហ៝រ៝។
នែសនតូ នទ្រែលមាត្រោកមរាឆាតតឹមឞានមាឞ៝កអាវ
12 មៃមរាមអារ់លើយនែសនតូ មអារ់លើយត្រោក តឹមឞានមាឞូក្លោនមអារ់លើយអាវក្វ៝ង់ឆាត
មៃមរារាគ៝ល់នែសនតូ រាគ៝ល់ត្រោកជេងមហែតឹមឞានមាឞូតើសខ៝អាវ
យើនមាមៃនើមហោមកើតអើមនឹងនហ៝រ៝ទើម»។
13 ជេសរីកោរាញឞ្រាសមោគែសអោសលាសមាទូហ្វេតោងពារ់៖
«អ៝ន់មៃគុហ៝ម់ឞើសមាគ៝ប់តានតុកឞូលឺ
ក៝ប់គ៝ប់ញុបក៝ត់លើយផូងអីរាលាង់ដាសមៃអ៝ន់គុតាន៝ម់មពាងជ៝ង់មៃ»។
14 ទឹងលែៈផូងតោងពារ់ឞូនុយ្សមោអោសឞ្លាវឆៃ ខាន់ពាង់ជេងនើមឆើមកើលជានការមាកោរាញឞ្រាស កោរាញឞ្រាសដាៈខាន់ពាង់ហាន់ឆើមកើលជានការមាផូងឞូនុយ្សអីពាង់អុចរាក្លាយ្ស។