3
1 លាសនទ្រី យ៝រលាសខាន់អៃមៃតឹមឞានមាលែៈទ៝ក់រេសនទ្រែលឞ្រាសក្រីស អ៝ន់ខាន់អៃមៃជ៝យហ៝ម់នទើអីគែសនាវខ្លៃតានតុកកោរាញឞ្រាសនើម ជេងនតុកអីឞ្រាសក្រីស គុមពែសឞើសមាតីពាង់នើមតានតុកឞូយើករាលាវឞូ។
2 អ៝ន់មឹនមានទើគែសនាវខ្លៃតានតុកកោរាញឞ្រាសនើមហ៝ៈ លើយមឹនអោសនទើតានែសនតូអ្យា
3 យ៝រលាសខាន់អៃមៃតឹមឞានមាលែៈខឹតជេស ជេសរីអាបៃអ្យាខាន់អៃមៃលែៈគែសជេសនាវរេសមហែអីនៃ ឞ៝លលាសអេហ៝ៈឆៃកាដោយ។
4 ឞ្រាសក្រីស អ៝ន់ខាន់អៃមៃគែសនាវរេសមហែអីនៃ ត៝ត់នារពាង់ញឆោសឆាក់អ៝ន់មាទឹងលែៈឞូនុយ្សឆៃនាវច្រេកលើបពាង់ តានារអីនៃដ៝ង់កោរាញឞ្រាសអ៝ន់ខាន់អៃមៃគុនទ្រែលពាង់តានាវច្រេកលើបអីនៃ។
នាវរេសអើម នទ្រែលមានាវរេសមហែ
5 លាសនទ្រីអ៝ន់ខាន់អៃមៃងខឹតលើយហ៝ម់ទឹងលែៈនទើអ្យើសតានូយ្សនហ៝ម់។ ជេងនាវតឹមទ៝ង់ នាវកើញហោអីរ នាវកើញមានាវខើសក្លែរ នាវកើញមានទើអ្យើស នទ្រែលមានូយ្សនហ៝ម់រាវានកើញគែសមាទ្រាប់នទើ។ នាវរាវានកើញគែសមាទ្រាប់នទើអីនៃជេងតឹមឞានមាយើកមឞាសឞ្រាសអេង។
6 យ៝រមាខាន់ពាង់ជានទឹងលែៈនទើអីនៃ ទឹងកោរាញឞ្រាសមរាតេៈទោយ្សតានារជឹតនាប់តៃមាផូងឞូនុយ្សអីមោអ្យាត់ពាង់។
7 ឞើសនតើមនើសខាន់អៃមៃលែៈវៃជានទឹងលែៈនទើអីនៃដ៝ង់ អេល៝រមាខាន់អៃមៃឆឹតញឆីងមាឞ្រាសយេឆូ ។
8 យើនមាអាបៃអ្យាអ្យាត់មាខាន់អៃមៃមអារ់លើយហ៝ម់ទឹងលែៈនទើអ្យា នាវជីនូយ្ស នាវទោសនូយ្ស នាវនូយ្សនហ៝ម់អ្យើស នាវងើយញចើតឞូ នទ្រែលមានាវមឞើសងើយឞីរលោសឞើសឞ៝រ់មឞូងខាន់អៃមៃនៃ។
9 លើយអោសតឹមមរោសឞាល់ យ៝រមាខាន់អៃមៃលែៈមអារ់លើយនូយ្សនហ៝ម់អើមអីអុចជានអ្យើស។
10 ខាន់អៃមៃលែៈគែសនូយ្សនហ៝ម់មហែអីលើមាមហែ យ៝រមាខាន់អៃមៃលើមាហោគឹតនាល់នើមរាហាក់ញជេងខាន់អៃមៃ។ ខាន់អៃមៃលើមាជេងតឹមឞានមាពាង់។ នទើអីនៃតឹមឞានមាទ្រ៝សលើយខ៝អាវអើម ញឆ៝សខ៝អាវមហែ។
11 មោហោមគែសអោសផូងអីមោទីផូងអីឆ្រាអែល មោលាសផូងអីឆ្រាអែល ដ៝ង់ ផូងអីលែៈក៝សនតោ មោលាសផូងអីមោក៝សនតោដ៝ង់ ផូងឞូនុយ្សឞ្រី មោលាសផូងឞូនាច់អេងដ៝ង់ ផូងទឹកឞូ មោលាសផូងក៝នមែដ៝ង់ យ៝រលាសឞ្រាសក្រីស ទើមគែសនាវខ្លៃ ពាង់គុនទ្រែលទឹងលែៈឞ៝ន់។
12 កោរាញឞ្រាសលែៈកើយ្សជេសខាន់អៃមៃជេងផូងប៝នលានពាង់នើម នទ្រែលមាពាង់រ៝ង់ខាន់អៃមៃ។ លាសនទ្រីអ៝ន់ខាន់អៃមៃគែសនូយ្សនហ៝ម់យោៈនអាច នូយ្សនហ៝ម់អ្វែស នូយ្សនហ៝ម់ទេសរាហេត នាវឞ្លាវញជុរអេងឆាក់ នអ៝ប់មានាវអ៝ត់នូយ្ស។
13 អ៝ន់ញឆ្រោយ្សគុនទ្រែលឞាល់ ឞ៝លលាសគែសនាវឞូមោលាង់ជានអ្វែសកាដោយ។ លាសគែសទូហ្វេឞូនុយ្សនទុយ្សឞូនុយ្សអាអេងជានអ្យើស អ៝ន់តឹមយោៈ លើយហោមតឹមក្លាប់នទាង់។ ឞ្រាសយេឆូ លែៈយោៈជេសខាន់អៃមៃ មោហោមក្លាប់នទាង់ លាសនទ្រីអ៝ន់ខាន់អៃមៃជានតឹងកើតពាង់ដ៝ង់។
14 រាលាវឞើសនៃជឹត អ៝ន់ខាន់អៃមៃគែសនូយ្សនហ៝ម់រ៝ង់ទឹងលែៈឞូនុយ្ស យ៝រលាសនាវរ៝ង់ជានអ៝ន់តឹមគុនទ្រែលទុតអ្វែសងាន់ អ៝ន់គែសនូយ្សនហ៝ម់នាវមឹនទូនតោរនាវ។
15 អ៝ន់នាវដាប់មពាន់ឞ្រាសក្រីស ជេងកោរាញតានូយ្សនហ៝ម់ខាន់អៃមៃ គៃមាគុតានាវដាប់មពាន់នទ្រាង់ផូងញឆីង។ ជានកើតនៃយ៝រលាសលែៈកោរាញឞ្រាសក្វាល់ជេសខាន់អៃមៃនើសជេងទូមពោលតឹមឞានមាទូឆាក់ជាន់ទើម។ ជេសរីអ៝ន់លាសអ្វែសមាកោរាញឞ្រាសនឹង។
16 អ៝ន់នាវនតុមនតីឞ្រាសក្រីស ជេងកោរាញមាទឹងលែៈនទើខាន់អៃមៃគឹត ខាន់អៃមៃជាន។ ជេសរីតឹមនតុមនតី តឹមងកាសនទ្រាង់នើមមានាវគឹតឞ្លាវអាប់នតីល។ អ៝ន់មព្រើគែសនូយ្សនហ៝ម់លាសអ្វែសមាកោរាញឞ្រាស មានាវមព្រើអើម មានាវមព្រើរានេមាកោរាញឞ្រាស នទ្រែលមានាវមព្រើតាៈឞើសឞ្រាសហ្វេងអ្វែស។
17 ទឹងលែៈនទើខាន់អៃមៃជាន ឞ៝លលាសនាវមឞើសងើយ មោលាសនាវអាអេងកាដោយ អ្យាត់មាជានតឹងនាវអុចកោរាញយេឆូ ទាទេ នអ៝ប់មាលាសអ្វែសកោរាញឞ្រាសឞឹឞ៝ន់ យ៝រមាខាន់អៃមៃតឹមរាង្លាប់មាកោរាញយេឆូ ។
នាវដាៈមារានាក់វ៝ល់អីញឆីងមាឞ្រាសក្រីស
18 អើរោសមែអីលែៈគែសឆាយ អ៝ន់អ្យាត់ឆាយខាន់អៃនើម យ៝រលាសនាវអីនៃជេងទីមាផូងញឆីងមាកោរាញយេឆូ ។
19 អើកោញវាអីលែៈគែសអូរ រ៝ង់ហ៝ម់ដាសអូរខាន់មៃនើម លើយអោសជានអ្យើសមាពាង់។
20 អើផូងក៝នឆែ អ៝ន់អ្យាត់ហ៝ម់នាវមេៈឞឹមាទឹងលែៈនទើជាន យ៝រលាសជានកើតនៃទីនូយ្សនហ៝ម់កោរាញឞ្រាសងាន់។
21 អើផូងអីលែៈជេងឞឹ លើយអោសគ៝ៈល៝ក់ក៝នខាន់មៃ ក្លាចលាសខាន់ពាង់រាអ្យានូយ្សនហ៝ម់។
22 អើខាន់អៃមៃអីជេងទឹកឞូ អ្យាត់ហ៝ម់កោរាញខាន់អៃមៃនើមតានែសនតូអ្យាមាទឹងលែៈនទើអីខាន់អៃមៃជាន។ មោអោសទីជានកើតនៃនោកកោរាញឆៃគៃមាអ៝ន់ពាង់រានេទើម អ៝ន់ខាន់អៃមៃជានមាលែៈនូយ្សនហ៝ម់ យ៝រលាសខាន់អៃមៃក្លាចយើកមាកោរាញយេឆូ ។
23 ទឹងលែៈនទើអីខាន់អៃមៃជាន អ៝ន់ខាន់អៃមៃជានហ៝ម់មាលែៈនូយ្សនហ៝ម់ តឹមឞានមាជានអ៝ន់មាកោរាញយេឆូ មោទីអោសជានអ៝ន់មាឞូនុយ្សទើម។
24 យ៝រលាសខាន់អៃមៃលែៈគឹតជេសគែសនាវងខោមតាៈឞើសកោរាញយេឆូ នទ្រីខាន់អៃមៃមោទីអោសឆើមកើលជានការមាឞូនុយ្ស យើនមាឆើមកើលជានការមាឞ្រាសក្រីស កោរាញឞ៝ន់។
25 ឞូម៝សជានតីស កោរាញឞ្រាសមរាព្លើងមានទើតីសពាង់ជាន កោរាញឞ្រាសមោអោសកើយ្សឞូនុយ្ស។