ឆ៝ម់បុតពោលញជ្វាល់អ៝ន់មាផូងញឆីងតាប៝ន
កោលោស
នាវឞោកអ៝ន់ឞូគឹតល៝រ
នើមញចីសឆ៝ម់បុតអ្យារាញាពោល ពាង់ញចីសឆ៝ម់បុតអ្យាក្លាប់លាសតានាម់ ៦១ ក្លាប់លាស ២៨ នាម់ជេសឞ្រាសយេឆូ ទ៝ក់រេស។ ពាង់ញចីសឆ៝ម់បុតអ្យានោកពាង់ហោមគុតាត្រោមនទ្រូង នាវពាង់គុនទ្រូងនៃ យ៝រមានាវមឞើសងក៝ចនាវមហែមហានអ្វែស(កោល ៤:១០)។ ឞូមឹនលាសពាង់គុនទ្រូងតាប៝នរោម ។ នោកពោល ញជ្វាល់ឆ៝ម់បុតកោលោសអ្យា ពាង់ញជ្វាល់នទ្រែលដ៝ង់ពែអឹឆ៝ម់បុតអាអេងជឹត ១. អេផេឆោ ២. ផីលីប ៣. ផីលេមោន។ នោកនៃពោលញចីសឆ៝ម់បុតអាបាៈអេងដ៝ង់(កោល ៤:១៦) យើនមាអាបៃអ្យាឞ៝ន់មោហោមអោសគែសឆ៝ម់បុតអីនៃ។
មាឆ៝ម់បុតអាអេងអីពោល ញចីសទាន់អ្វាញ់តាឆ៝ម់បុតរោមតានាវឞោក «ឆ៝ម់បុតពោល »។
ប៝នកោលោស តាឞ្រីអាឆី ពោល មោអោសហាន់តាប៝នកោលោស នៃ យើនមាពាង់លែៈអើមគឹតនាល់នោអេពាព្រាស ឞូមឹនលាសពោល លែវអេពាព្រាស ឆឹតញឆីងមាឞ្រាសក្រីស ។ អេពាព្រាស ហាន់ខ៝ល់ពោល តាត្រោមនទ្រូង ជេសរីមឞើសមាពោល មានាវមពោលនើមនតីងក្លាៈអីហាន់តាប៝នកោលោស មពោលនើមនតីងក្លាៈអីនៃមឞើសលាស ញឆីងមាឞ្រាសក្រីស ទើមមោហ៝ៈគាប់មាគែសនាវរាក្លាយ្សឞើសនាវកោរាញឞ្រាសតេៈទោយ្សយ៝រមានាវតីសអាប់នើមឞូនុយ្សជាន យើនមាហោមអ្យាត់មាជានតឹងនាវដាៈអាបាៈជឹតគៃមាគែសនាវរាក្លាយ្ស កើតលាសនាវដាៈនាវឞ្វៃអេងៗតានារឆាបាត់ អីនាររាលូផូងអីឆ្រាអែល នាវឞ្វៃមានទើឆោងឆាអាបាៈ នាវអ្យាត់មាញេតបុនផូងអីឆ្រាអែល អេងៗ(កោល ២:១៦-១៨)។ តាឆ៝ម់បុតអ្យាពោល នតីលាស ឞ្រាសយេឆូក្រីស អីក៝នកោរាញឞ្រាសនើម ពាង់ជេងកោរាញមាទឹងលែៈនតីលនទើ។ ពោល អុចនហាវនូយ្សនហ៝ម់ផូងញឆីងតាប៝នកោលោស នៃអ៝ន់លើមាហោគុងាវតឹមទីដាសនាវកោរាញឞ្រាសអុច។ ទូត្រ៝ងអីគែសនាវខ្លៃហោងាន់តាឆ៝ម់បុតអ្យា គែសតា កោល ៣:២៣៖ «ទឹងលែៈនទើអីខាន់អៃមៃជាន អ៝ន់ខាន់អៃមៃជានហ៝ម់មាលែៈនូយ្សនហ៝ម់ តឹមឞានមាជានអ៝ន់មាកោរាញយេឆូ មោទីអោសជានអ៝ន់មាឞូនុយ្សទើម។»
មឞើសនាវខ្លៃតាងកោៈតាឆ៝ម់បុតអ្យា
- នាវអោបអ្វែសលាង់ (១:១-៨)
- នាវជានការ នទ្រែលមានាវអ្វែសឞ្រាសក្រីស នើម (១:៩-២:១៩)
- នាវរេសគុនទ្រែលឞ្រាសក្រីស (២:២០-៤:៦)
- នាវនតិញងគ្លែៈទុត (៤:៧-១៨)
1
នាវអោបអ្វែសលាង់
1 ឆ៝ម់បុតគ៝ប់ពោល ញចីស គ៝ប់កោរាញអ៝សម៝នឞ្រាសក្រីសយេឆូ តាៈឞើសនាវអុចកោរាញឞ្រាសនើម។ គ៝ប់នទ្រែលមាតីមោថេ
2 ទាន់អោបនាវអ្វែសលាង់ផូងប៝នលានកោរាញឞ្រាស ផូងអ៝សនោអីញឆីងន៝ប់មាឞ្រាសក្រីស តាប៝នកោលោស ។ ទាន់កោរាញឞ្រាសអីឞឹឞ៝ន់ អ៝ន់នាវអ្វែស អ៝ន់នាវដាប់មពាន់មាខាន់អៃមៃ។
នាវពោល លាសអ្វែស នទ្រែលមានាវពាង់មឞើសឆើម
3 ហេនលាសអ្វែសមាកោរាញឞ្រាសអីឞឹឞ្រាសយេឆូក្រីស អីកោរាញឞ៝ន់នើមបាបើងាន់ តាអាប់តឹហេនមឞើសឆើមមាខាន់អៃមៃ
4 យ៝រលាសហេនលែៈតាង់ជេសនាវឞូងក៝ចខាន់អៃមៃញឆីងមាឞ្រាសក្រីសយេឆូ នទ្រែលមានាវខាន់អៃមៃរ៝ង់មាទឹងលែៈផូងប៝នលានកោរាញឞ្រាស។
5 នាវញឆីង នាវរ៝ង់អីនៃតាៈឞើសនាវរានើមខាន់អៃមៃគៃមាឆ៝ៈទើននទើអីកោរាញឞ្រាសលែៈនទ្រាប់ជេសតាកាលើត្រោកនតុកពាង់នើមអ៝ន់មាខាន់អៃមៃ។ នាវរានើមអីនៃខាន់អៃមៃលែៈតាង់ជេសនោកឞូមឞើសងក៝ចនាវងាន់អីនាវមហែមហានអ្វែសអ៝ន់មាខាន់អៃមៃនើស។
6 លាមនែសនតូអ្យាឞូមឞើសងក៝ចនាវមហែមហានអ្វែសអីនៃ។ ជេសរីឞូនុយ្សលើមាអ៝ក់ញឆីងមាឞ្រាសយេឆូ នទ្រែលមារាគ៝ល់នាវរេស។ ខាន់អៃមៃញឆីង ខាន់អៃមៃរាគ៝ល់នាវរេសដ៝ង់នតើមឞើសនារខាន់អៃមៃតាង់នាវអីនៃ តាៈឞើសគឹតវ៝ត់នហេលនានេៈនាវអ្វែសកោរាញឞ្រាស។
7 នោអេពាព្រាស នតីទឹងលែៈនាវអីនៃអ៝ន់មាខាន់អៃមៃនើស។ ពាង់ឞូនុយ្សហេនរ៝ង់ ពាង់ជានការនទ្រែលហេន ពាង់ឞូនុយ្សជានការឞ្រាសក្រីស រាប់ជាប់នឹងអ៝ន់មាខាន់អៃមៃ។
8 ជេសរីពាង់លែៈមឞើសងក៝ចជេសមាហេននាវខាន់អៃមៃតឹមរ៝ង់នទ្រាង់ផូងញឆីងជេងនាវរ៝ង់អីតាៈឞើសឞ្រាសហ្វេងអ្វែសអ៝ន់។
9 នទ្រីហេនមោរាលូអោសមឞើសឆើមទាន់កោរាញឞ្រាសកើលខាន់អៃមៃ នតើមឞើសហេនតាង់នាវឞូងក៝ចនាវខាន់អៃមៃនៃ។ ហេនទាន់កោរាញឞ្រាសអ៝ន់ឞ្រាសហ្វេងអ្វែសកើលខាន់អៃមៃគែសនាវមឹនគឹតឞ្លាវអាប់នតីល គៃមាខាន់អៃមៃគឹតនាល់នាវកោរាញឞ្រាសអុចនហេលនានេៈងាន់។
10 ហេនទាន់កើតនៃគៃមាខាន់អៃមៃគុរេសតឹមទីដាសនាវកោរាញឞ្រាសអុច អ៝ន់ពាង់រាម់មអាកទឹងលែៈនទើខាន់អៃមៃជាន។ ជេសរីខាន់អៃមៃជាននទើអ្វែសអាប់នតីល នទ្រែលមាគឹតនាល់កោរាញឞ្រាសលើមាហោលើមាហោងាន់។
11 ទាន់ទឹងលែៈនាវទើយទុតក្វ៝ង់កោរាញឞ្រាសកើលខាន់អៃមៃ គៃមាខាន់អៃមៃគែសនាវអ៝ត់នូយ្សនឹងតានាវជេរ
12 នអ៝ប់មាលាសអ្វែសកោរាញឞ្រាសអីឞឹឞ៝ន់មានាវរាម់មអាក។ ពាង់លែៈអ៝ន់ខាន់អៃមៃឆ៝ៈទើននទើអីពាង់លែៈនទ្រាប់មាផូងប៝នលានពាង់នើមអីគុតានាវអាង។
13 ពាង់លែៈរាក្លាយ្សជេសឞ៝ន់ឞើសនតុកង៝ឞើសនាវទើយឆាតាង់ អីកោរាញមពោលឞ្រាសអ្យើស ជេសរីលែវឞ៝ន់អ៝ន់លាប់តានាវក៝នពាង់នើមម៝ត់អ្វាញ់ ជេងក៝នអីពាង់រ៝ង់។
14 ក៝នពាង់នៃលែៈច្វាយជេសឞ៝ន់ យោៈនអាចមោហោមអោសកើបនាវតីសឞ៝ន់ជឹត។
ឞ្រាសក្រីស ក្វ៝ង់រាលាវឞូ
15 ឞ្រាសក្រីស តឹមឞានមាកោរាញឞ្រាសងាន់។ ឞូនុយ្សមោអោសឞ្លាវឆៃកោរាញឞ្រាស យើនមាលាសឞ៝ន់គឹតនាល់នូយ្សនហ៝ម់ គឹតនាល់នាវទើយឞ្រាសក្រីស អីក៝នពាង់ ឞ៝ន់គឹតនាល់នូយ្សនហ៝ម់ គឹតនាល់នាវទើយកោរាញឞ្រាសដ៝ង់។ ឞ្រាសក្រីស ក្វ៝ង់រាលាវមាទឹងលែៈនទើអីគែសរាហាក់ញជេង តឹមឞានមាក៝នឞោកទាកក្វ៝ង់រាលាវមាអីអ៝ស។
16 តាឞ្រាសក្រីស គែសរាហាក់ញជេងទឹងលែៈនទើតាកាលើត្រោកនទើតានែសនតូ ឞ៝លលាសនទើអ្វាញ់ឆៃនទើអ្វាញ់មោឆៃ ឞ៝លលាសហ្វេងឞ្រាសអេងៗ គែសនាវទើយគែសនាវទាង់ គែសនាវក្វ៝ង់ គែសនាវម៝ត់អ្វាញ់កាដោយ។ កោរាញឞ្រាសអ៝ន់ក៝នពាង់រាហាក់ញជេងទឹងលែៈនទើ គៃមាទឹងលែៈនទើយើកមាក៝នពាង់ទាទេ។
17 ឞ្រាសក្រីស លែៈអើមគែសដាសលែៈរាងោចនទើអេងៗ ជេសរីទឹងលែៈរាងោចនទើហោមគែសយ៝រមាពាង់អ៝ន់។
18 ពាង់កោរាញមាទឹងលែៈផូងញឆីងមាពាង់ តឹមឞានមាឞោកកោរាញមាឆាក់ជាន់។ ពាង់ជេងតើមនាវរេសនហ៝រ៝ ពាង់អីទ៝ក់រេសល៝រឞូតាទឹងលែៈឞូនុយ្សខឹត គៃមាពាង់នើមជានកោរាញមាទឹងលែៈរាងោចនទើ។
19 កោរាញឞ្រាសគុតាឞ្រាសក្រីស ងាន់ងេន អ៝ន់ជេងឞ្រាសក្រីស តឹមឞានមាពាង់នើមតាអាប់នតីលនទើ ពាង់អុចហោងាន់ជានកើតនៃ។
20 យ៝រមាមហាមក៝នពាង់នើមហ៝ចនោកខឹតតាឆីតឹមរាកាង់នើស ទឹងកោរាញឞ្រាសអ៝ន់គែសនាវដាប់មពាន់ពាង់នើមដាសទឹងលែៈរាងោចនទើ ឞ៝លលាសនទើតានែសនតូ មោលាសនទើតាកាលើត្រោកតានតុកពាង់នើមគុ។
21 ឞើសនតើមនើសខាន់អៃមៃតឹមងខាសគុងាយដាសកោរាញឞ្រាស ជេងឞូនុយ្សតឹមរាទ៝ង់មាពាង់មានាវមឹនអ្យើស នទ្រែលមាជាននទើអ្យើស។
22 យើនមាអាបៃអ្យាពាង់លែៈអ៝ន់នាវដាប់មពាន់ជេសមាខាន់អៃមៃដាសពាង់នើម ខាន់អៃមៃទើយគុនទ្រែលដាសពាង់ យ៝រមាឆាក់ជាន់ក៝នពាង់លែៈខឹតជេសគៃមាអ៝ន់ខាន់អៃមៃជេងក្ល៝សអ្វែស។ ខាន់អៃមៃមោហោមគែសនាវមានទុយ្ស មោហោមគែសទូនតីលនាវតីសអោសតានាប់ពាង់។
23 កោរាញឞ្រាសអ៝ន់នាវដាប់មពាន់អីនៃ លាសខាន់អៃមៃគុញអោតន៝ប់រាក៝ក់នឹងនាវញឆីង មោអោសងក្លើយឞើសនាវរានើមមានទើពាង់លែៈត៝នតានាវមហែមហានអ្វែស។ នាវមហែមហានអ្វែសអីនៃខាន់អៃមៃលែៈតាង់ជេស លែៈឞូមឞើសងក៝ចអ៝ន់មាទឹងលែៈឞូនុយ្សលាមនែសនតូ។ ជេសរីគ៝ប់អ្យាលែៈជានការមាមឞើសងក៝ចនាវមហែមហានអ្វែសអីនៃដ៝ង់។
នាវការពោល ទុតជេរងាន់
24 អាបៃអ្យាគ៝ប់គែសនាវរាម់មអាកងាន់ យ៝រមាគ៝ប់ឆ៝ៈទើននាវឞូជានជេរជ៝ត់ នាវជេរជ៝ត់គ៝ប់អ្យាកើលខាន់អៃមៃ។ នាវជេរជ៝ត់គ៝ប់អីនៃកើលទឹងលែៈផូងញឆីងមាពាង់។ នាវជេរជ៝ត់តាឆាក់ជាន់គ៝ប់អ្យាជេងទូនតីលនាវជេរជ៝ត់មាទឹងលែៈនាវជេរជ៝ត់អីនៃ។ អ្យាត់មាហោមគែសនាវជេរជ៝ត់ឞ្រាសក្រីស ។ ជេសរី ផូងញឆីងជេងតឹមឞានមាឆាក់ជាន់ពាង់នើម។
25 គ៝ប់អ្យាជេងឞូនុយ្សកើលជានការអ៝ន់មាទឹងលែៈផូងញឆីង គ៝ប់ឆ៝ៈទើននាវជានការអីនៃតាៈឞើសកោរាញឞ្រាសដាៈ នទ្រីពាង់លែៈដាៈគ៝ប់មឞើសងក៝ចទឹងលែៈនាវពាង់អ៝ន់មាខាន់អៃមៃដ៝ង់។
26 នាវពាង់អីនៃអាល៝រនើសនទ៝ប់មពោនតឹមអាប់រានោកងាន់ យើនមាអាបៃអ្យាពាង់លែៈញហើជេសអ៝ន់មាផូងប៝នលានពាង់នើមគឹតនាល់គឹតឆៃ។
27 កោរាញឞ្រាសលែៈអុចផូងប៝នលានពាង់នើមគឹតវ៝ត់នាវឞ្រាសក្រីស មោអោសទើនគែសនាវខ្លៃមាផូងអីឆ្រាអែល ទើម យើនមាគែសនាវខ្លៃមាផូងអីមោទីផូងអីឆ្រាអែល ដ៝ង់។ នាវឞ្រាសក្រីស អីនៃគែសនាវច្រេកលើបទុតក្វ៝ង់។ ជេសរីម៝សនាវនទ៝ប់មពោនអីនៃ? ជេងឞ្រាសក្រីស គុនទ្រែលតាខាន់អៃមៃ។ នទ្រីខាន់អៃមៃលែៈគឹតនហេលនានេៈជេស ខាន់អៃមៃគែសនាវច្រេកលើបនទ្រែលឞ្រាសក្រីស ដ៝ង់។
28 ហេនមឞើសងក៝ចនាវឞ្រាសក្រីស អ៝ន់មាទឹងលែៈឞូនុយ្ស ដាៈញជ្រាង់ឆាក់ នទ្រែលមានតុមនតីមាលែៈនាវមឹនគឹតឞ្លាវអីហេនគែស គៃមាទឹងលែៈផូងញឆីងមោហោមជេងតឹមឞានមាក៝នឆែតានាវគុនទ្រែលឞ្រាសក្រីស ។
29 គ៝ប់ជានការតានាវមឞើសងក៝ចនាវអីនៃញឆ្រោយ្សហោងាន់ ឞ៝លលាសគែសនាវជេរកាដោយ។ គ៝ប់ជានតាៈឞើសនាវទើយក្វ៝ង់ឞ្រាសក្រីស អ៝ន់មាគ៝ប់។