Nau Kôranh Brah Ngơi Nau Tâm Rnglăp Mhe Nau Tâm Mpơl 12

Bu ur, ndrel ma bêh nhŭk nhăk

1 Jêh ri geh du nau mbên dŭt kuŏng say ta kalơ trôk, geh du huê bu ur* nsoh n'gut du mlŏm ndơ chrat tâm ban ma nar, geh khay ta bơh dŏng jŏng păng ri, nđâp ma geh 12 ơ̆ mănh jan môk kađăch ta bôk păng đŏng. 2 Bu ur i nây ntreo lĕ ăp khay, jêh ri nter hô ngăn yorlah ji ŭch ma gŭ oh.

3 Geh du nau mbên jât say ta kalơ trôk, geh du mlŏm bêh nhŭk nhăk dŭt kuŏng, săk păng dŭm mbu, geh pơh ơ̆ bôk, ndrel ma geh jât ơ̆ nke, jêh ri lĕ i pơh ơ̆ bôk păng ri ndô môk kađăch pơh ơ̆ đŏng.* 4 I chiăng păng ket rgum mănh ta kalơ trôk lĕ du kô̆ tâm pe (1/3) ntŭp ta neh. Păng dâk bơh năp bu ur i ŭch ma gŭ oh nây, gay ma kŏp rhôp i Kon păng ro, jêh păng deh. 5 Kon i nây mra mât uănh dâng lĕ bri dak ma nau dơi nau dăng ma mŏng loyh Păng, jêh ri bu ur i nây gŭ oh geh du huê Kon Bu Klô. Yơn ma bu pơyh mphŏk Kon i nây gŭ ndrel Kôranh Brah nơm ta rnơl kađăch Păng nơm ri.* 6 Lŏng bu ur i nây du nchuăt gŭ ta bri rdah, ntŭk nây Kôranh Brah lĕ jêh ndrăp ma păng, gay ma bu mât siăm păng jŏ 1260 nar.*

7 Jêh ri ta kalơ trôk geh nau tâm lơh kuŏng, tông păr rnha Mikel, ndrel ma phung tông păr i gŭ ta nâm păng nơm tâm lơh đah bêh nhŭk nhăk. Bêh nhŭk nhăk, ndrel ma phung tông păr i gŭ ta nâm bêh nhŭk nhăk plơng tâm lơh đah phung tông păr Mikel nây đŏng,* 8 yơn ma bêh nhŭk nhăk tâm lơh mâu ôh dơi, jêh ri joi ntŭk ma gŭ ta kalơ trôk mâu hôm geh đŏng. 9 Jêh ri bu ntŭp bêh nhŭk nhăk kuŏng i nây a su, păng i nây bêh bơh kăl e nơh, i bu kuăl lah kôranh mpôl brah djơh, mâu lah Satăng đŏng, i nơm mƀrôh rlăm dâng lĕ bunuyh ta neh ntu. Bu ntŭp păng a neh, ntŭp nđâp ma phung tông păr i gŭ ta nâm păng đŏng.*

10 Jêh ri gâp tăng nteh bŏr ta kalơ trôk lah dŭt dăng:

“Aƀaơ dja lĕ tât jêh nau Kôranh Brah rklaih bunuyh ta neh ntu,

Nau dơi Kôranh Brah, ndrel ma nau mât uănh Kôranh Brah i bân yơk mbah.

Lĕ tât đŏng nau Brah Krist nhhơ nau dơi Păng nơm.

Geh kơt nây yorlah nơm i ntôn oh nô bân ta nau nsing nơh lĕ bu ntŭp a su jêh,

Păng i nây i vay ntôn oh nô bân ta nau nsing dâng măng dâng nar ngăn ma Kôranh Brah.*

11 Phung oh nô i nây lĕ dơi đah nơm ntôn, yor ma mham Kon Be Biăp nơm,

Jêh ri yor ma mbơh nkoch Kon Be Biăp i nây jêng Kôranh khân păng nơm,

Yorlah khân păng mâu ôh nhhuach nau rêh, khân păng hôm mbơh nkoch nau i nây, bol lah bu nkhât kađôi.*

12 Lah ndri răm maak hŏm dâng lĕ nơm i gŭ ta kalơ trôk,

Ta lam ntŭk ta kalơ trôk i ntŭk Kôranh Brah, răm maak hŏm!

Lŏng lam neh ntu, ndrel ma lam dak văch dak văr geh nau rêh rnhăl ngăn ro,

Yorlah kôranh mpôl brah djơh lĕ jŭr jêh a khân ay may,

Nđâp ma ji nuih dŭt hô ngăn,

Yor ma păng lĕ gĭt mong păng nơm hôm e đê̆ dơm.”*

13 Tât ma bêh nhŭk nhăk i nây lĕ gĭt săk bu ntŭp păng a neh, păng tâng lơh bu ur i gŭ oh Kon Bu Klô i nây nơh ro. 14 Yơn ma bu ăn bar ơ̆ nar klang mbuk mbok ma bu ur i nây, pre ma mpăr ăn ngai bơh bêh nhŭk nhăk, hăn ta bri rdah ntŭk i lĕ jêh ndrăp ma păng nơh, ta ntŭk nây bu mât siăm păng jŏ pe năm n'gul†. 15 Jêh ri bêh nhŭk nhăk mbrôh dak lôh bơh mbung păng tâm ban ma dak rlai hoch bơh kơi bu ur i nây, gay ma rdu bŭk păng. 16 Yơn ma neh sơm kơl ma bu ur i nây, păng đang, jêh ri dak rlai i bêh nhŭk nhăk de mbrôh lôh bơh mbung păng nây nơh lăp jât neh ri rngăt. 17 Jêh ri bêh nhŭk nhăk i nây ji nuih hô ngăn ma bu ur i nây, păng hăn tâm lơh kuŏng đah phung kon, bu ur i nây i hôm, tâm lơh đah dâng lĕ phung i ndjôt tâng nau đă Kôranh Brah, jêng phung i hôm mbơh nkoch Brah Yêsu jêng kôranh khân păng nơm.* 18 Jêh bơh nây bêh nhŭk nhăk i nây hăn dâk ta choyh rŏ meng dak văch dak văr ri.

* 12:1 12:1: ‘Bu ur’, i nây ngơi ma phung Israel. ‘12 ơ̆ mănh’, ngơi ma 12 mpôl ta phung Israel. Kon Bu Klô bu ur i nây, ngơi ma Brah Krist (NNt 37:9). * 12:3 12:3-4: Dan 7:7; 8:10 * 12:5 12:5: NTM 19:15; NMƠ 2:8-9 * 12:6 12:6: NTM 11:3 * 12:7 12:7: Dan 10:13; 12:1; Yuđ 1:9 * 12:9 12:9: NNt 3:1, 14; Luk 10:18 * 12:10 12:10: NTM 11:15; Yôp 1:9-11; Sak 3:1 * 12:11 12:11: NTM 5:6; Rôm 8:37; 1Yô 1:7 * 12:12 12:12: Êsa 49:13 † 12:14 12:14: Mâu lah ‘Du năm, nđâp ma bar năm, nđâp ma n'gul năm’. Tâng ma bu kơp ta nôk Yôhan, pe năm n'gul, tâm ban ma 1260 nar, yorlah bu kơp du năm geh 360 nar. * 12:17 12:17: NTM 11:7; 13:7