Nau Kôranh Brah Ngơi Nau Tâm Rnglăp Mhe Yôhan 10

Brah Yêsu jêng Nơm chiăp ueh

1 Jêh ri Brah Yêsu lah jât: “Gâp lah n'hêl nanê̆ ngăn ma khân may, bu moh lăp ta trôm n'gar be biăp, mâu ôh lăp rŏ mpông n'gar, ƀêng ma hao lăp nkhơng trong êng chrao, păng i nây jêng bunuyh ntŭng. 2 Yơn ma bu moh lăp rŏ mpông n'gar, bunuyh i nây ngăn ro jêng nơm chiăp be biăp i gŭ ta trôm n'gar i nây. 3 Bunuyh mât njrăng n'gar păng sơm pơk mpông ma nơm chiăp be biăp i nây ăn lăp. Dâng lĕ be biăp năl bŏr mbung bunuyh i chiăp khân păng dadê, bunuyh i nây kuăl dâng lĕ be biăp păng nơm nây tâng rnha êng êng, jêh ri păng leo be biăp lôh bơh dih n'gar nây. 4 Tât be biăp lĕ lôh bơh dih n'gar lĕ phiao, păng nơm brô̆ bơh năp, be biăp tâng bơh kơi bơh kơi păng nơm, yorlah dâng lĕ be biăp i nây lĕ năl bŏr mbung păng dadê. 5 Phung be biăp i nây mâu ôh tâng bu êng, khân păng nchuăt ngai bơh bu êng ro, yorlah khân păng mâu ôh gĭt năl bŏr mbung bu êng.” 6 Brah Yêsu ngơi nau ntât i nây ma phung Pharisi i gŭ ta nây, yơn ma khân păng mâu vât ôh, moh nau Păng ŭch ngơi i nây.

7 Ndri dâng Brah Yêsu ngơi tay du tơ̆ jât ma khân păng: “Gâp lah n'hêl nanê̆ ngăn ma khân may, Gâp dja jêng tâm ban ma mpông be biăp ma lôh lăp.* 8 Dâng lĕ nơm nti phung Israel, ndrel ma dâng lĕ kôranh phung Israel i hăn lor bơh năp Gâp, tih ma nti nklă, khân păng bunuyh ntŭng dadê, be biăp i nây mâu iăt ôh bŏr mbung khân păng. 9 Gâp dja tâm ban ma mpông, bu moh lăp rŏ mpông i nây mra geh nau rklaih, Gâp mât njrăng păng tâm ban ma be biăp lôh lăp bơh trôm n'gar say rêp sa đŏng.* 10 Bunuyh ntŭng văch, păng gay ma ntŭng, ma nkhât, ma lơh ndjơh dơm. Yơn ma Gâp văch, gay ma ăn bunuyh geh nau rêh, geh nau rêh dŭt ueh ngăn.”

11 “Gâp dja i Nơm chiăp ueh. Nơm chiăp ueh Păng jao săk Păng nơm ăn ma be biăp Păng.** 12 Lŏng bunuyh chiăp jan kar gay ma geh ndơ nkhôm dơm, mâu ôh di jêng bunuyh chiăp ngăn, mâu ôh di jêng nơm tơm be biăp i nây, lah say tât so bri văch, păng nchuăt ntlơi be biăp ro, ăn so bri kăp sa hêk khân păng, nđâp ma jan ăn khân păng nchuăt chah chrai đŏng. 13 Păng nchuăt nơh, yorlah păng jan kar gay ma geh ndơ nkhôm dơm, păng mâu ôh rvê ma be biăp. 14 Yơn ma Gâp, Gâp nơm chiăp ueh, Gâp gĭt năl be biăp Gâp nơm, jêh ri be biăp Gâp gĭt năl Gâp* 15 tâm ban ma Bơ̆ Gâp gĭt năl Gâp, jêh ri Gâp gĭt năl Bơ̆ Gâp đŏng. Gâp jao săk Gâp nơm ăn ma be biăp Gâp.* 16 Gâp hôm geh đŏng be biăp aƀă êng mâu ôh gŭ ta trôm n'gar dja, geh nau khlay lah geh bunuyh i mâu di phung Israel mra jêng phung ƀon lan Gâp đŏng, iăt ma Gâp leo khân păng lăp ta n'gar đŏng. Khân păng i nây mra iăt bŏr mbung Gâp. Lah ndri dâng lĕ khân păng jêng du phung dơm, jêh ri geh du huê dơm đŏng Nơm chiăp.”*

17 “Bơ̆ Gâp rŏng ma Gâp, yorlah Gâp jao săk Gâp nơm, gay ma sŏ tay nau rêh. 18 Mâu geh ôh du huê dơi nkhât Gâp, Gâp nơm dơm jao săk Gâp nơm khât. Gâp geh nau dơi jao săk Gâp nơm khât, geh nau dơi sŏ tay nau rêh. Nau i nây Bơ̆ Gâp lĕ đă ma Gâp.”* 19 Nôk nây mpôl kôranh phung Israel tâm nkhah mpôl tay du tơ̆ jât, yor ma nau ngơi Brah Yêsu i nây. 20 Geh ŏk bunuyh lah: “Păng lĕ geh brah djơh gŭ ta Păng, Păng lĕ jêng trơi. Lơi hôm iăt nau ngơi Păng.” 21 Yơn ma bunuyh aƀă lah: “Nau ngơi i nây mâu ôh tă bơh bunuyh geh brah djơh gŭ ta păng, yorlah brah djơh mâu dơi ôh jan ăn say ang bunuyh cheh măt.”*

Phung Israel mâu ôh nsing ma Brah Yêsu

22 Nôk khay ji kăt nây, ta ƀon Yêrusalem ri bu jan nhêt ƀŭn lăp nhih jan brah ma Kôranh Brah*. 23 Brah Yêsu hăn rsong ta jŏng gung nhih jan brah rŏ ndring Salômôn ri.* 24 Jêh ri mpôl kôranh phung Israel gŭ jŭm Brah Yêsu, khân păng ôp: “Dah hôm jŏ May ŭch ăn hên hôm vĭ vĕ, May mâu mbơh n'hêl ma hên May Brah Krist mâu lah mâu? Lah May Brah Krist ngăn, ăn May mbơh hŏm ma hên.” 25 Brah Yêsu lah ma khân păng: “Gâp lĕ mbơh nkoch ma khân may, yơn ma khân may mâu ôh ŭch iăt nau Gâp. Dâng lĕ nau khlay Gâp jan tă bơh nau dơi Bơ̆ Gâp, ndơ i nây ăn khân may gĭt say.* 26 Yơn ma khân may mâu ŭch iăt, yorlah khân may mâu ôh di ƀon lan Gâp i tâm ban ma be biăp Gâp nơm.* 27 Dâng lĕ bunuyh i tâm ban ma be biăp Gâp nơm iăt bŏr mbung Gâp. Gâp gĭt năl khân păng, jêh ri khân păng tâng Gâp bơh kơi.* 28 Gâp ăn khân păng nau rêh n'ho ro, khân păng mâu ôh mra roh hêng, mâu đŏng geh du huê dơi pit khân păng bơh ti Gâp.* 29 Bơ̆ Gâp dŭt kuŏng rlau bu ngăn, Păng i tơm ăn khân păng i nây ma Gâp, mâu geh ôh du huê dơi pit khân păng bơh ti Păng. 30 Gâp ndrel Bơ̆ Gâp, jêng nguai dơm.”

31 Mpôl kôranh phung Israel dônh lŭ, gay ma klŭp nkhât Brah Yêsu du tơ̆ jât. 32 Brah Yêsu lah ma khân păng: “Gâp lĕ jan ndơ ueh tă bơh Bơ̆ Gâp nơm ŏk ngăn nhhơ ăn khân may say, lah ndri moh ndơ Gâp jan ndơ i nây, dâng khân may ŭch klŭp Gâp ma lŭ?” 33 Khân păng lah ma Păng: “Hên klŭp May ma lŭ, mâu geh ôh yor ma May jan ndơ ueh, ach ma May ngơi mưch rmot Kôranh Brah, yorlah May bunuyh dơm, May kơp êng săk May nơm lah May tâm ban ma Kôranh Brah.”* 34 Brah Yêsu lah ma khân păng: “Ta nau vay khân may lĕ nchih lah: ‘Kôranh Brah lah: ‘Gâp mbơh ma khân may†, khân may jêng brah’’†. 35 Ta Nau Kôranh Brah Ngơi mâu geh ôh ndơ nguai dơi jut dơi rgâl. Lah ndri lah Kôranh Brah kuăl bunuyh i nây ‘Brah’ tâm ban ma Păng nơm, 36 lah ndri mơm dâng khân may lah Gâp ƀêng ma ngơi mưch Kôranh Brah, ach ma Gâp mbơh săk Gâp nơm: ‘Gâp dja Kon Kôranh Brah’? Yorlah Gâp i dja lĕ Kôranh Brah de kơih njuăl văch ta neh ntu dja.* 37 Lah ndơ Gâp jan mâu ôh di tă bơh Bơ̆ Gâp, lơi ôh khân may nsing ma Gâp. 38 Yơn ma lah ndơ Gâp jan tă bơh Bơ̆ Gâp ngăn, ăn khân may nsing ma Gâp hŏm yor ma ndơ Gâp jan i nây, bol lah khân may mâu nsing ma nau Gâp ngơi kađôi. Ndri dâng khân may gĭt vât n'hêl Bơ̆ Gâp nơm gŭ ndrel ta Gâp, jêh ri Gâp gŭ ndrel ta Bơ̆ Gâp.”*

39 Bu gay ma ŭch nhŭp tay Brah Yêsu du tơ̆ jât, yơn ma Păng du lôh bơh ti mpôl kôranh phung Israel nây. 40 Jêh ri Păng hăn tay kăl ti dak rlai Yôrđăn ri jât, ntŭk Yôhan-Ƀaptem vay gŭ jan ƀăptem yŭk ma dak ăn bu nơh, Păng gŭ ta ntŭk nây.* 41 Geh bunuyh ŏk ngăn văch ran ta Păng, khân păng tâm lah ndrăng khân păng: “Yôhan-Ƀaptem mâu ôh prot jan nau khlay, yơn ma dâng lĕ nau Yôhan-Ƀaptem mbơh nkoch ma Bunuyh i dja, di dadê ngăn.”* 42 Ta ntŭk nây geh ŏk bunuyh nsing ma Brah Yêsu.

* 10:7 Mat 7:13 * 10:9 NMƠ 23:1-6; Êsê 34:14 * 10:11 Êsê 34:11-16 * 10:11 Mat 18:12-14; 1Yô 3:16 * 10:14 2Ti 2:19 * 10:15 Mar 10:45 * 10:16 Yôh 11:51-52; Êsa 56:8; Êsê 34:23-24 * 10:18 Yôh 14:31 * 10:21 Yôh 9:6-7 * 10:22 Klăp lah 165 năm ê lor ma Brah Yêsu nơh, geh du huê kađăch bri êng lơh ƀon Yêrusalem dơi, jêh ri jan ndơ ƀơ̆ ƀơch ta nhih jan brah ma Kôranh Brah. Jêh ri phung Israel mâu dơi jan brah ta nhih jan brah ma Kôranh Brah nây jŏ pe năm rlau. Jêh bơh nây khân păng ntơm lăp jan brah ta ntŭk nây du tơ̆ jât. Khân păng nhêt ƀŭn i nây gay ma kah gĭt mhe lăp jan brah ta nhih jan brah ăp năm, n'ho ma tât aƀaơ dja. * 10:23 Kar 3:11 * 10:25 Yôh 5:36 * 10:26 Yôh 8:45, 47 * 10:27 Yôh 10:3-4 * 10:28 Yôh 6:39; Rôm 8:38-39 * 10:33 KLê 24:16; Mat 26:65-66 † 10:34 Geh ŏk bunuyh bu mân lah ta samƀŭt Nau Mprơ Ơm, ndrel ma ta dja ‘Khân may’ geh nau khlay lah, ngơi ma kôranh phung Israel. † 10:34 NMƠ 82:6 * 10:36 Yôh 1:34 * 10:38 Yôh 5:36 * 10:40 Yôh 1:28 * 10:41 Yôh 1:29-34; 3:26-28