4
Kabo bu su Nyɛmɛ i fɛmɛya n nu barasu ni
1 Nyini sin, na wɔ yo m ka alɛlɛ dɛɛ su, na ma ŋu ka anɔ be ateke aŋgoro. Na ma ti akonvi ŋga ka awiɛ dɛɛ su sujɔjɔ m dɔ, i ti akonvi n bo i du mɔ jɔjɔɔri m dɔ n wɔ. I ŋa, “Fun bra aŋgoro fɛn, na m kére u sam bo bu bá yo ahin sin.”
2 Jina nu n bɛrɛ na Awiɛwiɛ Casi n aba awura m ŋu na ma ŋu ka fɛmɛya biɛ wo aŋgoro, be tana su.
3 Bo i tana fɛmɛya biɛ n su je piɛpiɛu kabo cɛncɛɛri nbem je barasu wɔ, nbem je fofoe na nbem je kɔkɔrɛ, na i fɛmɛya biɛ ni, deke be je piɛpiɛu aŋgoro kabo nzue ba muna na ayi kpiɛ nu ni.
4 Fɛmɛya biɛ aburanyɔ ni nna nbem taka bara yɛ i fɛmɛya biɛ ni, na nkpiɛnkpiɛnm aburanyɔ ni nna tana biɛm su, bu wura tanlɛɛ fofoem na bu butu sika kere.
5 Na fɛmɛya biɛ ni sukpɛsɛ ka nzue dɛɛ su, na i sutiɛntiɛn, na i suyo naŋmiɛ. Fitana nso taka fɛmɛya biɛ n nyunu wo je su, bɛrɛ la Nyɛmɛ awiɛwiɛ busu nsom ni.
6 Deke be gusu da fɛmɛya biɛ n nyunu ka nzue bambaka dɛɛ su, i nyunu da cain ka niɛɛnu wɔ.
Deke ŋgɔɔfɔ nna nbem gusu abara ayɛ fɛmɛya biɛ ni, bu la anyumbaa beberebe, bu nyunu ni bu sin n kɛrɛ.
7 Ciciri su dɛɛ n ti ka jara a, nnyɔ su n ti ka toora, nsan su n nyunuawa ti ka adamande wɔ, na nna su n ti ka kajiri bo i sutu landi.
8 Bu kun kun kɛrɛ la laŋkpɛtɛ nsɛn nsɛn wɔ, bu la anyumbaam bu ŋuniɛmbaa nu, ni bu ŋuniɛ kɛrɛ su. Na bu sudi jue kɔŋguɛ ni wiɛsu kɛrɛ, ka,
“Casi, casi, casi la ya Mi Nyɛmɛ Fɛmɛ Kpiri,
i yo woori bɛrɛ, na i toko wo bɛrɛ, na i bá wo bɛrɛ saŋga kɛrɛ ni.”
9 Nzɛn bu nya sudi jue na bu fa kansi, ni jirima, ni ansɛ ma yiri n bo i tana fɛmɛya biɛ n su ni, na i wo bɛrɛ saŋga bo i la má awieeri ni,
10 nyini saŋga, a ŋu ka nkpiɛnkpiɛnm aburanyɔ ni nna n sukutu i nyunu, na bu su i, yiri bo i wo bɛrɛ na i la má awieeri na i tana fɛmɛya biɛ n su ni. Na bu yi bu kere, sufa se fɛmɛya biɛ n nyunu, na bu sudi jue, ka,
11 “Ya Micɛra ni ya Nyɛmɛ, wɔrɔ ti ye ni ka
a de kansi a, ni jirima, ni yiko.
Dama wɔrɔ yiiri deke n kɛrɛ a,
u koroyanu ye a maari deke n kɛrɛ la ŋgɔɔ a.”