20
Kabo bu nyi Sitana afɔ akpii kun n jɔrɛ
1 Na ma ŋu mɛrɛkɛ be ka i fite aŋgoro suba, i bita deke nbem i saa nu, kun la kadombaa bo i tu kunma ŋgoŋgo bo i la má awieeri ni, na kun gusu la jɔrɔkɔ bambaka faŋgafɔ be.
2-3 Na wɔ tara woo tiɛ ni, dada dɛɛ woo tiɛ n bo i ti Sitana ni, na bu kaaki fere i ka Dadakafɔ ni, na wɔ fa jɔrɔkɔ n acici i, na wɔ fa i atu kunma ŋgoŋgo n bo i la má awieeri n nu, ka i wó dɔ haari afɔ akpii, na wɔ tu kunma n anɔ ni, na wɔ ta akata su, na má i koro fite na i dadaka durunya n nufɔm bekun, ama, i wo dɔ haari afɔ akpii n ba ju. Nyini sin, na bu nyáŋgi i ji kaan.
4 Na ma ŋu fɛmɛya biɛm, Nyɛmɛ ama bo bu tana sum n atin ka bu di minɛm jɔrɛ. Na ma kaaki aŋu bɛrɛ bo bu yo wuuri Yesu ti ni. Minɛ yo kpiɛɛri bu tii a, dama bu yo kaanri Nyɛmɛ jɔrɛ na ba di Yesu daani n dɛɛ ti. Bɛrɛ keteeri ka bu su má boro neŋgendɔrɛ n ni i amɔɛ n a, bɛrɛ la bo bu kaaki keteeri ka bu de má i nyaari seewa bu ŋuma wara bu saa su n a, ye ba teŋge bu yiwee n nu anya ŋgɔɔ, na bu ni Kristo Tiidefɔ n saŋga di fɛmɛya afɔ akpii.
5 Ahin ti yiwee teŋge ciciri su n a. Ama, minɛm bo ba wu na ba ka ni, bɛrɛ teŋge má haari kɔ ju afɔ akpii n awieeri.
6 Bɛrɛ n bo bu du mɔ teŋgeeri bu yiwee nu ni, na bu ti minɛ casim n ni, terefiɛ wo bu dɔ, bɛrɛ ŋú má yiwee nnyɔ su n kun, bɛrɛ yó Nyɛmɛ ni Kristo Tiidefɔ sayoowa dɔŋguyofɔm a. Na bu ni yiri sáŋga di fɛmɛya n afɔ akpii.
Kabo Nyɛmɛ kunmaari Sitana ni
7 Afɔ akpii n nyaari kɔ juuri, na Nyɛmɛ má bu yi Sitana n dansaraka sɔɔ n nu ji.
8 Na i kɔ́ dadaka adamande barasu barasu kɛrɛ bo bu wo durunya n nu ni, Gogi ni Magogi asiɛn n kɛrɛ, na i tíɛn bu kɛrɛ nɔɔ na bu kɔ́ kun luɛ. Bu sunnu beberebe ka kunma ŋmiɛ wɔ.
9 Na ba tɛrɛki abara ayɛ durunya n deke kɛrɛ, na ba bara ayɛ miɛ n bo Nyɛmɛ koro i agaya ni, deke bo i minɛm wo ni, ama, na sin afite aŋgoro aba ayara bu.
10 Na ba fa Sitana n bo i dadaka bu n aji cɛɛma sin n nu, bo i je ka ferewita na i da ka tieku ni, deke bo bu faari boro neŋgendɔrɛ n ni kɔrɛfɔ n bo i yo i ŋu ka i kan Nyɛmɛ nɔaniɛ n jiiri nu ni. Dɔ na bu dí wahara, kɔŋguɛ ni wiɛsu saŋga kɛrɛ.
Kabo Nyɛmɛ dí minɛm jɔrɛ awieeri su ni
11 Na ma ŋu fɛmɛya biɛ bambaka fofoe be, ni bo i tana su ni. Na aŋgoro ni asiɛŋgu kɛrɛ amini i nyunu, bu wo má bɛrɛ kun.
12 Na ma ŋu minɛm bo ba wu ni, nfaŋgafɔm ni tarakam kɛrɛ, ka bu jina fɛmɛya biɛ n nyunu. Na ma kaaki aŋu ka be suteke kadasim, na be gusu suteke kadasi bo i ti ŋgɔɔ dɛɛ ni. Nyini kadasim ye bu fa diiri minɛm bo bu wuuri n jɔrɛ a, bu sayoowa kɛrɛ bo bu yo yoori wo nyini kadasim n nu.
13 Na tieku n awɔrɔ minɛm bo ba wu n ama, na Yiwee, ni Yiweefɔm Woobiri n awɔrɔ minɛm bo ba wu n ama, na Nyɛmɛ afa bu sayoowa bo bu yo yoori adi bu jɔrɛ.
14 Na wɔ fa Yiwee, ni Yiweefɔm Woobiri n aji sin n nu, bo i je ka ferewita na i da ka tieku ni. Ahin sin ni ti yiwee nnyɔ su n a.
15 Na ba fa sɔnɔ kɛrɛ bo i duma awo má ŋgɔɔ kadasi n nu aji sin ni.