15
Mɛrɛkɛm bo bu bita awieeri su kekereke ayaba nsom jɔrɛ
1 Na ma ŋu alekutura sa bambaka be aŋgoro, ka Nyɛmɛ mɛrɛkɛ nso nbem bita kekereke barasu nso n bo bu ti awieeri su dɛɛ ni. Nyini kekereke n dɛɛ sin, Nyɛmɛ fá má yaa kun.
2 Na ma ŋu deke be, i ti ka nzue bambaka a, i je ka niɛɛnu wɔ, wɔ saŋga ni sin. Na ma ŋu minɛm bo ba kunma boro neŋgendɔrɛ n ni, ba kɔ ayaki i ni i amɔɛ n ni i duma lamba. Bu jina tieku n bo i je ka niɛɛnu n su, bu bita biɛkum n bo Nyɛmɛ afa ama bu ni.
3 Na ba di Nyɛmɛ akɔɔ Moyisi ni Bɔmbaa n dɛɛ jue, ka,
“Ya Mi Nyɛmɛ Fɛmɛ Kpiri,
wɔrɔ ti adamande kɛrɛ fɛmɛ durunya n nu a.
U sayoowa ti bambaka na i ti alekutura.
U sayoowa kɛrɛ kɔ atin su wɔ, na i ti nahɔrɛ.
4 Micɛra, ŋma wo bɛrɛ bo i soro má u a,
na i wura má u kpiri a?
Dama wɔrɔ ŋgumi ti casi a.
Adamande kɛrɛ bo bu wo durunya n nu,
bu bá kutu u na bu kánsi u,
dama u nahɔrɛ sam n afite fofoe nu.”
5 Nyini sin, na ma ŋu Casi Kɛrɛ Casi Sɔɔ n bo i wo Nyɛmɛ Sereebiri Nambue n nu, na i wo aŋgoro n ka bu suteke i.
6 Na mɛrɛkɛ nsom n bo bu bita kekereke nsom n afite Nyɛmɛ Sereebiri Awuru n nu, bu wura sutura fofoe papasi, ba fa sika dambara abo bu hoe su.
7 Na deke ŋgɔɔfɔ nnam nu kun, afa sika ayabam n nso afa ama Nyɛmɛ mɛrɛkɛ nsom n ni. Ayabam n ayi ni Nyɛmɛ ahorembaa yasu, bo i kere ka Nyɛmɛ bo i la ŋgɔɔ na i la má awieeri n afa yaa agaya.
8 Na Nyɛmɛ yiko ni i jirima woowa n ama Nyɛmɛ Sereebiri Awuru n ayi ni ŋmisini, bo be akoro awura má awuru n nu, fa kɔ ju saŋga bo mɛrɛkɛ nsom fa kekereke nsom n fa jiiri durunya n nu n kɔ wieeri.