1 Iwe, lupwen Tafit a feila ekis pekilan ungen ewe chuk, Sipa nöün Mefiposet we chon angang a churi, nge a emwenato ruoman aas mi wor lenien mot wor. Ekewe aas ra uwei rüöpükü fochun pilawa, ipükü umwun föün wain mi pwas, ipükü föün irän leräs me eu rumen wain. ✡ 2 Iwe, ewe king a aisini Sipa, “Pwota ka uwato ekei mettoch?” Nge Sipa a üreni, “Ekewe aas fän iten chon om famili pwe repwe wawa, ekewe pilawa me ekewe föün irän leräs fän iten ekewe mwän pwe repwe mongö, nge ewe wain fän iten chokewe mi malülü lon ewe fanüapö pwe repwe ün.” 3 Iwe, ewe king a ais, “Ifa i Mefiposet nöün nöün om we samol Saul?” Sipa a üreni ewe king, “A chök nonom lon Jerusalem, pun a ekieki pwe ikenai chon Israel repwe aliwinato ren mwün semen saman.” ✡ 4 Mürin, ewe king a üreni Sipa, “Meinisin mine än Mefiposet iei en kopwe eäni.” Nge Sipa a üra, “Üa asamoluk. Ai samol me ai king, amwo üpwe küna ümöümöch me reöm iteiten fansoun meinisin.”

5 Nge lupwen Tafit a tori Pahurim, a war eman mwän seni ewe familien chon leimwen Saul itan Simei nöün Kera we mwän. Iwe, lupwen a feito, a chök ottekichöüü Tafit. 6 Ätei a monei fau ngeni Tafit pwal ngeni nöün kewe nöüwis meinisin, pwal mwo nge ekewe sounfiu me ekewe mwän mi pwora meinisin ra nom ünükün Tafit. 7 Iwe, Simei a otteki Tafit o apasa, “Kopwe süla, kopwe süla. En eman mwän mi nimanauei aramas, en eman mi fokun föföringau. 8 Ewe Samol mi Lapalap a ngonuk chappen om nimanauei chon leimwen Saul. En ka angei seni mwün, nge iei ewe Samol mi Lapalap a ngeni Apsalom noum we mwän ewe mwü. Nengeni, a kuuk feiengau, pun en eman mwän mi nimanauei aramas.”

9 Mürin, Apisai nöün Seruia we mwän a üreni ewe king, “Pwota enan kolak mi mä a tongeni ottekiik, ai samol me ai king? Kopwe mwüt ngeniei pwe üpwe feila ren ikenan o pöküela üan.” 10 Nge ewe king a üra, “Pwal met wewen ngenikemi ämi nöün Seruia mwän? Are ätewe a ottekiei, pun ewe Samol mi Lapalap a üreni pwe epwe ottekiei, iön epwe tongeni üra: Pwota ka föri iei usun?” 11 Iwe, Tafit a üreni Apisai me nöün kewe nöüwis meinisin, “Püsin nei a ekiekin nieila. Pwota oua weitifengenikemi pwe ei re Peniamin a föri ei sokun? Oupwe chök likiti epwe ottek, pun ewe Samol mi Lapalap a üreni pwe epwe ottek. 12 Eli ewe Samol mi Lapalap epwe nenengeni ai riaföü o liwini ngeniei feiöch siwilin an ottekiei ikenai.” 13 Iei mine Tafit me nöün kewe mwän ra sopwela le fetal won ewe al. Nge Simei a fetal won ewe al lepekin ewe chuk sasape ngeni Tafit. A fetal nge ottek o momonei ngeni Tafit fau me pwül. 14 Iwe, ewe king me ekewe aramas meinisin mi eti ra tori ewe chanpupu Jortan, nge ra fokun malülü. Ikenan ewe king a asösö.

15 Lon chök ei fansoun Apsalom me ekewe re Israel meinisin ra tori Jerusalem, nge Ahitofel a pwal eti. 16 Iwe, lupwen Husai ewe re Ark chienen Tafit a feito ren Apsalom, a üreni, “Ewe king epwe manauatam! Ewe king epwe manauatam!” 17 Nge Apsalom a aisini Husai, “Ifa usun, iei ükükün om allükülük ngeni Tafit chienom we? Pwota kosap eti?” 18 Nge Husai a üreni Apsalom, “Apwi. Pun iö ewe Samol mi Lapalap me ekei aramas, pwal ekewe re Israel meinisin ra filätä, ätewe üpwe eti. Üpwe chök nonom reöm. 19 Pwal eu chök, iö üpwe angang ngeni? Pwota üsap angang ngeni nöün ai samol? Usun üa angang ngeni semom, iei usun üpwe pwal angang ngonuk.”

20 Mürin, Apsalom a üreni Ahitofel, “Kopwe öüra ngenikem mine aipwe föri.” 21 Ahitofel a üreni, “Kopwe tolong ren ekewe ülüpwülüen semom we, a likitiir pwe repwe tümwünü ewe imwen king. Mürin, chon Israel meinisin repwe rong pwe ka püsin föri met semom epwe oput ren en, nge chokewe meinisin mi nom reöm repwe pöchökülela.” 22 Iei mine ra aüetä eu imw mangaku won ewe imwen king fän iten Apsalom. Nge Apsalom a tolong o kon ren ekewe ülüpwülüen saman fän mesen chon Israel meinisin. ✡ 23 Iwe, lon ena fansoun än Ahitofel öüröür a aüchea usun chök än Kot. Iei usun Tafit me Apsalom ra aücheani än Ahitofel öüröür meinisin.