12
Natan a apwüngü Tafit
12.1-25
1 Iwe, ewe Samol mi Lapalap a tinala ewe soufos Natan ren Tafit. Ätei a feito ren o üreni, “Mi wor ruoman mwän lon eu telinimw, eman me leir a pisekisek, nge eman a wöüngau.
2 Ewe mwän mi pisekisek a wor chomong nöün pwiin sip me kow.
3 Nge ewe mwän mi wöüngau esap wor nöün man, chilon chök eman apanen sip i a möni. Iwe, a tütümwünü ewe apanen sip, pwe ra märipökütä me püsin nöün kewe semirit. Ewe apanen sip a eti le mongö lon sepian o ün seni an kap, a pwal annut won upwan, pun a usun chök nge nöün nengin.
4 Lon eu rän a feito eman wasöla ren ewe mwän mi pisekisek. Nge ätewe esap mochen angei eman man seni nöün pwiin sip ika kow, pwe epwe amolätä enen ewe wasöla mi feito ren. Nge a angei ewe apanen sip nöün ewe mwän mi wöüngau o amolätä fän iten ewe wasöla.”
5 Mürin, Tafit a fokun song ren ewe mwän mi pisekisek. Iwe, a üreni Natan, “Mwo manauen ewe Samol mi Lapalap, ewe mwän mi föri ei sokun föför epwe mäla.
6 Epwe pwal liwini ewe apanen sip fän rüanü, pun a föri ei sokun föför, nge esap eäni tong.”
7 Iwe, Natan a üreni Tafit, “En ewe mwän. Iei alon ewe Samol mi Lapalap ewe Koten Israel, ‘Üa epituk pwe ka kingen Israel, üa pwal angasok seni Saul.
8 Üa ngonuk chon leimwen Saul me pwülüan kewe, üa pwal atolonga fän nemeniom ekewe chon Israel me chon Juta. Nge are ei esap mwo naf, üpwe pwal apacha chomong feiöch ngonuk.
9 Pwota ka aleasolap ngeni ai kewe kapas o föri mine a ngau me fän mesei? Ka niela Uria ewe ra Hit ren ketilas o angei pwülüan pwe kopwe pwülüeni. Ka niela ren nöün chon Amon ketilas.
10 Iei mine ewe feiengau ren ketilas esap chüen ükütiu me lein mwirimwirum, pun ka aleasolap ngeniei o angei pwülüen Uria we pwe pwülüom.’
11 Iei alon ewe Samol mi Lapalap, ‘Üpwe awarato om riaföü epwe pop seni püsin chon leimwom. Üpwe angei pwülüom kewe o ngeni eman mi kan ngonuk, nge i epwe kon rer lepwäpwäla.
12 En ka föri ei föför lemonomon, nge ngang üpwe föri pwal eu föför usun ei, epwe fis lepwäpwäla me fän mesen chon Israel meinisin.’ ”
13 Iwe, Tafit a üreni Natan, “Üa tipis ngeni ewe Samol mi Lapalap.” Nge Natan a üreni Tafit, “Ewe Samol mi Lapalap a amusala om tipis. Kosap mäla.
14 Nge pokiten ei föför ka awora popun än ekewe chon oput ewe Samol mi Lapalap repwe turunufasei i, iei mine ewe mönükol epwe upu ngonuk epwe mäla.”
15 Mürin, Natan a liwiniti imwan. Nge ewe Samol mi Lapalap a afeiengaua ewe mönükol pwülüen Uria a nöüni me won Tafit, pwe a fokun samau.
16 Iwe, Tafit a tütüngor ngeni Kot fän iten ewe mönükol pwe epwe chikarsefäl. A öchüna anan, a tolong lon rumwan o kon lepwül iteiten pwin.
17 Iwe, nöün kewe nöüwis mi nom lon imwan ra feito ren pwe repwe apwätäi seni lepwül, nge Tafit esap mochen, esap pwal etiir le mongö.
18 Lon afisuen rän ewe mönükol a mäla. Nge nöün Tafit kewe nöüwis ra niuokus ren ar repwe apworausa ngeni, pwe ewe mönüköl a mäla. Pun ra apasa, “Lupwen ewe mönükol a chüen manau, ese fen mochen aüselingakich, lupwen sa kapas ngeni. Epwe fen ifan mwo iei ach sipwe tongeni apasa ngeni, pwe ewe mönükol a mäla? Eli epwe tongeni püsin afeiengaua.”
19 Nge lupwen Tafit a küna pwe nöün kewe nöüwis ra mwöngününgünfengen, a mefi pwe ewe mönükol a mäla. Iwe, Tafit a aisiniir, “Ifa usun, ewe mönükol a mäla?” Nge ir ra üreni, “Ewer, a mäla.”
20 Mürin, Tafit a pwätä me lepwül, a tütü o epiti, a pwal siwili üfan. Iwe, a tolong lon imwen ewe Samol mi Lapalap o fel ngeni. Mürin a liwinla lon püsin imwan o ais anan mongö. Nge lupwen ra uwato ren, a mongö.
21 Mürin, nöün kewe nöüwis ra aisini, “Met wewen om föri ei? Ka öchüna anom o kechü fän iten ewe mönükol, lupwen a chüen manau. Nge lupwen ewe mönükol a mäla, ka pwätä o mongö.”
22 Iwe, Tafit a üra, “Üa öchüna enei o kechü, lupwen ewe mönükol a chüen manau, pun üa ekieki, ‘Io a tongeni silei, ika ewe Samol mi Lapalap epwe ümöümöch ngeniei, pwe ewe mönükol epwe manau?’
23 Nge iei a mäla, pwota üpwe chüen öchüna enei? Ifa usun, üpwe tongeni aliwinisefälieto pwe epwe manau? Ngang üpwe feila ren, nge i esap tongeni liwinto rei.”
24 Mürin, Tafit a aururu Patsipa pwülüan we, a feila ren o kon ren. Iwe, neminewe a pwopwo o nöüni eman ät, nge Tafit a aita ngeni Salomon. Iwe, ewe Samol mi Lapalap a echeni ewe ät.
25 Iei mine a tinala pworaus ren ewe soufos Natan pwe epwe aita ngeni ewe ät Jetitia , pun ewe Samol mi Lapalap a echeni.
Tafit a liapeni Rapa
12.26-31
(1.Kron 20.1-3)
26 Lon ei chök fansoun, Joap a maunei Rapa samolun telinimwen chon Amon o liapeni än ewe king lenien koluk.
27 Iwe, Joap a tinala chon künö ren Tafit o apasa, “Üa maunei ewe telinimw Rapa, nge üa fen liapeni kinikinin ewe lenien koluk.
28 Iei kopwe achufengeni ekewe lusun sounfiu, kopwe pwelifeili ewe telinimw o liapeni. Pun ika ngang üpwe liapeni ewe telinimw, epwe iteni itei.”
29 Iei mine Tafit a achufengeni ekewe sounfiu meinisin o feila Rapa, a maunei o liapeni.
30 Tafit a angei mwärin ar we king seni won möküran, ükükün choun fik me limu paun kolt, a pwal wor eföü fau aüchea won. Iwe, Tafit a isetä ewe mwärämwär won möküran, a pwal uwala chomong liapan seni ewe telinimw.
31 Iwe, Tafit a uwala ekewe aramas mi nom lon ewe telinimw o angangeer fän ngerenger, fän turupas me kouk seni mächä. A pwal angangeer fän weires le föri pilak. Iei usun a föri ngeni chon ekewe telinimwen Amon meinisin. Mürin, Tafit me nöün kewe sounfiu meinisin ra liwiniti Jerusalem.