2.Kronika
Kapas akom
I. Iten ei puk: Aruuen Kronika soposopun ekewe pworaus mi mak lon Aeuin Kronika. Lon ewe Paipelin Ipru ekei ruu puk Aeuin me Aruuen Kronika ra chök eu.
II. Chon makei ei puk: Esap fat, nge ekoch sousilelap lon Paipel ra ekieki pwe Esra a achufengeni ekewe uruwo.
III. Itelapemongen ei puk a wewefengen me Aeuin Kronika.
IV. Kapas aüchean ei puk a wewefengen me Aeuin Kronika.
V. Masouen ei puk Aruuen Kronika: Lon ei puk a soposopola pworausen uruwon ewe mwün Israel. A popuetä won pworausen än ewe king Salomon nemenem tori an mäla. Mürin a pworaus usun än Jeropoam me chon ekewe engol ainang mi nom efeng ü ngeni Rehopoam nöün Salomon we mwän. Lesopolan ei puk a mak uruwon ewe mwün Juta echök tori Jerusalem a tala lon ewe ier 586 mwen Kraist (B.C.).
VI. Tettelin masouen ei puk:
Än Salomon nemenem 1.1–9.31
1. Ekewe ier lepoputän an nemenem 1.1-17
2. Ewe imwenfel a kaütä 2.1–7.10
3. Ekewe ier lesopolan an nemenem 7.11–9.31
Chon ekewe ainang mi nom efeng ra ü ngeni ewe mwü 10.1-19
Ekewe kingen Juta 11.1–36.12
Jerusalem a tala 36.13-23
1
Salomon a tüngor an tipachem
1.1-13
(1.King 3.1-15)
1 Iwe, Salomon nöün Tafit we mwän a püsin anüküchara lon mwün, nge ewe Samol mi Lapalap an Kot a eti o fokun atekiatä.
2 Iwe, ewe king Salomon a kapas ngeni chon Israel meinisin, ngeni ekewe sounemenem won ngeröü me pükü sounfiu, ngeni ekewe soukapwüng, pwal ngeni ekewe souemwenin chon Israel meinisin, ir ekewe mwänirelan än semer kewe cho,
3 pwe repwe eti le feila ren ewe lenien fel won ewe leni tekia mi nom Kipeon. Mürin, Salomon me unusen ewe mwichen aramas ra feilapök ikenan, ewe ia än Kot we imwenfel seni mangaku a nom ie, Moses nöün ewe Samol mi Lapalap we chon angang a föri me lon ewe fanüapö.
4 Nge än Kot we pworofel a nom Jerusalem lon eu imw mangaku, ewe king Tafit a aüetä mürin an uwato ewe pworofel seni Kiriat-jearim.
5 Nge ewe rongen asor seni piras a nom mwen än ewe Samol mi Lapalap imwenfel seni mangaku lon Kipeon. Iei we rongen asor Pesalel nöün Uri we mwän, nge Uri nöün Hur, a föri. Iwe, Salomon me ewe mwichen aramas ra fel ngeni ewe Samol mi Lapalap ikenan.
6 Salomon a feitä ren ewe rongen asor seni piras mi nom ren ewe imwenfel seni mangaku mwe mwen ewe Samol mi Lapalap o eäni asor won engeröü mönün asoren kek.
7 Iwe, lon ewe pwinin Kot a pwä ngeni Salomon o üreni, “Met ka mochen üpwe fang ngonuk?”
8 Salomon a üreni Kot, “Ka eäni tong ellet mi lapalap ngeni Tafit semei we, ka pwal awisaei pwe üpwe siwili lon wisan wisen king.
9 Ai Kot Samol mi Lapalap, kose mochen kopwe apwönüetä om pwon ngeni Tafit semei we, pun en ka awisaei pwe üpwe king won eu mwichen aramas mi chomong esap wor eman a tongeni aleaniir.
10 Kopwe fang ngeniei tipachem me silelap, pwe üpwe tongeni emweni ekei aramas. Ifa usun ai üpwe tongeni nemeni noum aramas mi fokun chomong?”
11 Iwe, Kot a pälüeni än Salomon tüngor, “Pokiten ka ekieki ei lon lelukom, nge kosap tüngor pisekisek, wöü me iteüöch ika mälan chokewe mi oputok, kosap pwal tüngor fän itom pwe kopwe manauatam, nge ka tüngor om tipachem me silelap, pwe kopwe tongeni nemeni nei aramas ngang üa awisok pwe kopwe king wor,
12 iei mine üpwe fang ngonuk tipachem me silelap. Üpwe pwal fang ngonuk wöü me pisekisek me iteüöch, lap seni eman ekewe king mi akom mwom a eäni ika eman mi tapweto mürum epwe eäni.”
13 Mürin, Salomon a feila seni ewe imwenfel seni mangaku mi nom won ewe leni tekia lon Kipeon o liwinla Jerusalem. Iwe, a nemeni Israel.
Salomon a kamö o amömö oris me woken
1.14-17
(1.King 10.26-29)
14 Iwe, Salomon a achufengeni chomong woken me oris. A wor ren ükükün engeröü föpükü woken me engol me ruungeröü oris. A anomu ekoch lon ekewe telinimwen woken, nge ekoch a anomu ren lon Jerusalem.
15 Lon fansoun mwün ewe king Salomon, silifer me kolt ra chomong lon Jerusalem usun chök chomongun fau, a pwal wor chomong irä setar usun chök chomongun ewe irä sikamor mi mär fäsonun ekewe chuk.
16 Nöün Salomon kewe oris ra feito seni Isip me Kue, pun nöün kewe chon kamö ra möniir seni Kue ren moni.
17 Iwe, ra kamö efoch woken seni Isip won ükükün wonopükü föün moni silifer, nge eman oris won ükükün ipükü lime föün moni silifer. Nge nöün ewe king chon amömö ra pwal amömösefäliela ekewe woken me oris ngeni ekewe kingen chon Hit me ekewe kingen Siria meinisin.