35
Iotekin ngasala seni chon oput
35.1-28
Echö än Tafit köl.
1 Ai Samol mi Lapalap, kopwe ü ngeni chokewe mi ü ngeniei,
kopwe fiu ngeni chokewe mi fiu ngeniei.
2 Kopwe angei om kewe tittin maun,
ewe mi watte me ewe mi kükün,
kopwe feito pwe kopwe alisiei.
3 Kopwe öüröürela fän wokum siles me noum kouken maun
o ü ngeni ekewe chon tapweriei.
Kopwe üreniei, “Ngang om Chon Amanau.”
4 Amwo chokewe mi mochen nieila
repwe kuf o itengau.
Amwo chokewe mi rawangauaei
repwe kulsefäl o rükö.
5 Amwo repwe usun chök pön wiich asepwäl a ässala,
nge nöün ewe Samol mi Lapalap chon läng epwe asürela.
6 Amwo aler epwe rochopwak o amitimit,
nge nöün ewe Samol mi Lapalap chon läng epwe tapweriir.
7 Pun ra aopala ar sär pwe repwe liapeniei,
ra pwal tuw eu pwang pwe üpwe turulong lon,
nge esap wor popun.
8 Amwo feiengau mi lapalap epwe toriir mwen ar silei.
Amwo repwe püsin tup lon ewe sär ra aopala.
Amwo repwe turulong lon ewe pwang o fokun feiengau.
9 Mürin ngang üpwe meseik ren ewe Samol mi Lapalap,
üpwe ingemwareiti i pokiten an angasaei.
10 Ngang üpwe apasa ngeni ewe Samol mi Lapalap ren unusen lelukei,
“Iö a wewe ngonuk?
En ka angasala ewe mi apwangapwang seni ätekewe mi pöchökül seni,
ka angasala ewe mi apwangapwang o mwelele seni ätekewe mi eliapa pisekin.”
11 Chon pwärätä chofana ra ü ngeniei,
ra atipisiei won föför üsap silei.
12 Ra liwini ngeniei ingau fän iten ai föför mürina.
Iwe, üa fokun apilükingau.
13 Nge lupwen ir ra samau, ngang üa üföüf üf seni tuk,
üa ariaföüüei ren ai öchüün,
üa pworetiu o iotek,
14 üa pwal letipeta usur usun üa letipeta fän iten chienei ika pwii.
Üa pworetiu fän ai lolilen o fetalfeil
usun eman mi kechüeiti inan.
15 Nge lupwen üa nom lon weires, ra mwicheto rei o takiriei,
ra mwichefengen pwe repwe ü ngeniei.
Chon ekis üsap sileer me mwan ra kapasingau usi,
nge resap ükütiu.
16 Ra chök alapala ar kapasen turunufas,
ra afochofoch ngeniei ren ar oputaei.
17 Ai Samol, ifa ükükün fansoun om kopwe chök nenengeni ei lapalap?
Kopwe angasaei seni ar afeiengauaei,
kopwe amanauaei seni ekei laion.
18 Mürin üpwe kilisou ngonuk lon ewe mwichelapen noum aramas,
üpwe mwareituk me lein ewe mwicheichen aramas.
19 Kosap mwüt ngeni chon palüeniei, nge esap wor popun,
pwe repwe takirin ämängauaei,
kosap pwal mwüt ngeni chokewe mi oputafatei
pwe repwe takiriei ren ai letipeta.
20 Iwe, resap eäni kapas pwetete,
nge ra eäni kapasen tipitipmwäl ngeni chokewe mi mosonoson lon ewe fanü.
21 Ra atipisiei fän leüömong o apasa,
“Aha, aha, mesem ra küna mine ka föri.”
22 Nge en, ai Samol mi Lapalap, ka küna ei lapalap,
kosap fanafanala.
Ai Samol, kosap toau seniei.
23 Ai Samol, kopwe amwökütuk o ütä pwe kopwe pwärawu ai pwüng.
Kopwe peniei, ai Kot.
24 Ai Samol mi Lapalap ai Kot, en ka pwüng, kopwe aletätä ai pwüng,
nge kosap mwüt ngeni ekewe chon oputaei pwe repwe takirin ämängauaei.
25 Kosap mwüt ngeniir pwe repwe apasa lefiler,
“Aha, a torikich mochenin letipach.
Sa awesi manauan.”
26 Amwo chokewe meinisin mi pwapwaäsini ai feiengau
repwe säw o osukosuk.
Amwo chokewe meinisin mi lamalamtekia ngeniei
repwe küna säw me itengau.
27 Amwo chokewe mi mochen pwe epwe pwä ai pwüng
repwe meseik o mweireiren pwapwa, repwe pwal apasafochei,
“Ewe Samol mi Lapalap a tekia,
a pwapwa ren feiöchün nöün chon angang.”
28 Mürin üpwe apworausafeili om pwüng
o kölün mwareituk fansoun meinisin.