144
Eu iotek pwe Kot epwe amanaua o afeiöchükich
144.1-15
Echö än Tafit köl.
1 Üpwe mwareiti ewe Samol mi Lapalap ai achau
mi asipa pei ngeni maun,
pwal kumuchi ngeni fiu.
2 I ai Kot mi tongeei me imwei imwen maun, ai lenien op mi pöchökül
me ai Chon Amanau,
i a epeti seniei feiengau.
Üa anomu ai apilükülük won
ewe mi akufätiu chon ekewe mwü fai.
3 Ai Samol mi Lapalap, met aüchean aramas pwe ka chüngüw,
nge met aüchean nöün aramas pwe ka ekieki usun?
4 Pun eman aramas a wewe ngeni enienin ngasangas,
nge ränin manauan a usun chök och nür mi morokai.
5 Ai Samol mi Lapalap, kopwe asanga om we läng o feitiu.
Kopwe atapa ekewe chuk pwe repwe ötüöt.
6 Kopwe efifi ekewe inefi o atoropasa chon oputom,
kopwe esefichala om kewe föün esefich o tinifeiliir.
7 Kopwe aitietiu poum seni pekitä,
kopwe amanauaei seni ekewe koluk mi alolol
o angasaei seni fän nemenien ekewe chon ekis,
8 seni chokewe mi chök kapas chofana,
ra mwo nge aitietä pöüifichir lon ar akapelmwäl.
9 Ai Kot, üpwe eäni ngonuk echö köl mi fö,
üpwe ettiki ngonuk kitar mi wor engol saitenin.
10 En ka awinna ekewe king,
ka amanaua Tafit noum we chon angang.
11 Kopwe amanauaei seni ekewe chon oputaei mi mochen afeiengauaei,
kopwe angasaei seni fän nemenien ekewe chon ekis,
seni chokewe mi chök kapas chofana,
ra mwo nge aitietä pöüifichir lon ar akapelmwäl.
12 Amwo nöüch kewe ät
repwe wewe ngeni irä mi mär pöchökül lon ar alüal,
nge nöüch kewe nengin repwe wewe ngeni üren lepwokuku mi rup pwe alingen lon imwen king.
13 Amwo ach kewe lenien iseis
repwe ur ren sokopaten föün irä,
nge nöüch kewe sip
repwe oupwätiu ngeröü me engol ngeröü sip lon ach kewe mälämäl.
14 Amwo nöüch kewe pwiin kow repwe nöünöü chomong,
nge esap mwet seniir nöür ika mä nöür.
Amwo esap fis puchörün riaföü lon ach kewe al.
15 Feiöchün chon ekewe mwü a toriir ekei sokun feiöch.
Feiöchün chon ekewe mwü mi eäni Kot ewe Samol mi Lapalap.