4
Aramas ra feiöch ren tipachem
4.1-25
1 Ämi nei kana, oupwe aüselinga än semelapemi kapasen öüröür, oupwe aü selingemi pwe oupwe weweöch.
2 Pun üa ngenikemi kapasen öüröür mi mürina: Iei mine ousap likitala mine üa aiti ngenikemi.
3 Lupwen üa chüen eman kükün ät, ngang nöün semei me inei aleman,
4 semei we a soun aiti ngeniei ekei kapas o üreniei, “Kopwe amwöchü ai kewe kapas lon lelukom, kopwe aleasochis ngeni ai kewe allük pwe kopwe manau.
5 Kopwe kütta tipachem me silelap. Kosap manlükala ai kewe kapas, kosap pwal tok seniir.
6 Kosap likitala tipachem, pun epwe tümwünuk. Kopwe echeni pwe epwe mamasok.
7 Kopwe tiliken le kütta tipachem, pun iei ewe aeuin ipw kopwe angei tipachem ren. Nge ren om tipachem kopwe alapala om mirit me weweöch.
8 Kopwe fokun aücheani tipachem, pwe i epwe atekiokotä, kopwe kamwöchünük won, pwe i epwe aitöchuk.
9 Tipachem epwe usun chök epa mwärämwär mi ling won mökürom, epwe föri pwe kopwe mwärini epa mwärin king mi fokun mürina.”
10 Nei, kopwe aüselingaei o etiwa ai kewe kapas, pwe ierin manauom repwe chomongola.
11 Üa aiti ngonuk ewe alen tipachem, üa emwenuk won ewe lenien fetal mi wenechar.
12 Lupwen kopwe fetal, esap wor epetin ipwom, nge are kopwe sä, kosap chepetek.
13 Kopwe kamwöchünük won ekewe kapasen öüröür, nge kosap mwüt ngeniir repwe feil senuk. Kopwe tümwünüür, pun ina manauom.
14 Kosap feila lon ewe leni ia ekewe aramasangau ra feila ie, kosap pwal apirü än ekewe chon föföringau föför.
15 Kosap föri mine a ngau, nge kopwe sü seni. Kopwe chök fetal won ewe al mi pwüng.
16 Pun ekewe aramasangau resap tongeni annut ika resap föri mine a ngau, ra chök nennela ika resap likatupu eman.
17 Pun föföringau a usun chök ener mongö, nge angangen mwänewüs a usun chök ünümer wain.
18 Ewe al ekewe chon pwüng ra fetal won a usun chök saramen ünümweerän mi chök sasaramala tori a unusen ränila.
19 Nge ewe al ekewe aramasangau ra fetal won a usun chök rochopwak mi rochokich, ra turula, nge resap silei met ra chepetek ren.
20 Nei, kopwe fokun aüselinga ai kewe kapas. Kopwe aü selingom ngeni mine üa ürenuk.
21 Kosap mwüt ngeni ekewe kapas repwe sü senuk, nge kopwe amwöchüür lon lelukom.
22 Pun ina mine chokewe mi angei ekewe kapas repwe manau rer, inisir epwe pöchökül rer.
23 Kopwe fokun tümwünü lelukom lap seni om tümwünü och pisek aüchea, pun manau a pop seni lon lelukom.
24 Kosap fokun eäni kapas rikirik, kosap pwal eäni kapas chofana me fos mi pwor.
25 Mesom epwe newenewenela, kopwe chök nefotofotola mwom.
26 Kopwe akotöchü mine kopwe föri, mürin epwe fisiöch meinisin mine kopwe föri.
27 Kopwe fetal wenewen won ewe al mi pwüng, nge kosap rik ngeni pelifich ika pelimöng, kosap pwal föri mine a ngau.