1 Iwe, ewe Samol mi Lapalap a kapas ngeni Moses, 2 “Kopwe üreni Aaron me nöün kewe mwän pwe repwe tümwünüöchüür ren ekewe asor mi pin ekewe chon Israel ra apini fän itei, pwe resap aitengaua itei mi pin: Ngang ewe Samol mi Lapalap. 3 Iwe, kopwe üreniir, ‘Are eman me lein mwirimwirimi a kan ngeni ekewe asor mi pin ekewe aramasen Israel ra apini fän itei, lupwen a wor an limengau, ewe aramas esap chüen tongeni föri ewe angangen souasor. Ei epwe fis seni eu täppin aramas tori eu täppin. Ngang ewe Samol mi Lapalap. 4 Iwe, are eman mwirimwirin Aaron a üri kilingau mi afeiengau ika a pu seni och chönü, esap tongeni mongö seni ekewe asor mi pin tori a limöchsefäl. Eman souasor mi atapa och mettoch mi limengau, pun a torii somä, ika a atapa eman mwän mi towu seni ewe chan mwän, i epwe limengau. 5 Nge are eman souasor a atapa sokun mantötö mi limengau, ika a atapa eman aramas mi limengau, ese lifilifil met sokun an limengau, 6 ätewe mi atapa ei sokun limengau epwe limengau tori lekuniol. Iwe, esap tongeni mongö seni ekewe asor mi pin, are esap akomw le tütü. 7 Nge lupwen akkar a tuputiu, epwe limöch. Mürin a tongeni mongö seni ekewe asor mi pin, pun ekei asor anan. 8 Iwe, esap ochoch eman man mi püsin mäla ika eman mi mäla ren manmwacho, pun epwe limengau ren: Ngang ewe Samol mi Lapalap. 9 Ekewe souasor meinisin repwe apwönüetä ai kewe allük, pwe resap atoto tipis wor o mäla pokiten ar lükümach ngeni ai kewe allük. Ngang ewe Samol mi Lapalap üa apiniir.

10 Iwe, esap wor eman me lükün familien ewe souasor a tongeni mongö seni ewe asor mi pin, sap mwo nge eman wasölan ewe souasor ika eman nöün chon angang mi mö a tongeni mongö seni. 11 Nge are eman souasor a möni ren moni eman amanau pwe nöün, ika eman amanau a uputiu lon imwan, ätewe epwe tongeni mongö seni enen ewe souasor. 12 Iwe, are nöün eman souasor fefin a pwüpwülüwu lükün an ainang, neminewe esap tongeni mongö seni ekewe asor mi pin. 13 Nge are eman fefin nöün eman souasor a mä pwülüan ika mwü seni pwülüan, esap pwal wor nöün, are a liwiniti imwen saman pwe a usun chök lekükünün, neminewe a tongeni mongö seni enen saman. Nge eman me lükün familien ewe souasor esap tongeni mongö seni. 14 Iwe, are eman aramas lükün familien souasor a mongö och seni ewe asor mi pin fän chechengau, ätewe epwe uwato siwilin ren ewe souasor, nge epwe pacheetä eu lelimu ngeni mine a angei. 15 Iwe, ekewe souasor resap fokun apiningaua än ekewe aramasen Israel asor mi pin ra eäni asor ngeniei 16 ren ar mwüt ngeni ekewe aramas pwe repwe mongö seni ekewe asor mi pin. Ren ei repwe atoto tipis me pupungau wor. Pun ngang ewe Samol mi Lapalap üa apini ekewe asor.’ ”

17 Iwe, ewe Samol mi Lapalap a pwal kapas ngeni Moses, 18 pwe epwe ngeni Aaron me nöün kewe mwän pwal ekewe aramasen Israel meinisin ekei allük: Are eman me lein chon Israel ika eman me lein ekewe chon ekis mi wasöla lon Israel a uwato an asor ngeni ewe Samol mi Lapalap, ese lifilifil ika mön eu pwon ika eu asor seni püsin letipan pwe eu asoren kek, 19 epwe chök uwato eman ätemwänin kow ika sip ika kuuch esap wor terin, pwe Kot epwe etiwa. 20 Iwe, ousap eäni asor eman man a wor terin, pun Kot esap etiwa ei sokun asor senikemi. ✡ 21 Nge are eman a eäni asor eu asoren kinamwe ngeni ewe Samol mi Lapalap, pwe epwe apwönüetä an pwon ika epwe chök asor seni püsin letipan, epwe uwato seni lein nöün kow ika sip eman man mi mürina, esap fokun wor terin, pwe Kot epwe etiwa. 22 Iwe, ousap eäni asor ngeni ewe Samol mi Lapalap eman man mi chun ika ter ika pök, ousap pwal uwato eman mi pu seni och chönü ika kilingau ika fas. Ousap eäniir le asor won ewe rongen asor ngeni ewe Samol mi Lapalap. 23 Iwe, eman kow ika eman sip mi wor efoch pechen a kon langatam ika mochomoch oua tongeni uwato fän iten asor seni püsin letipemi. Nge ei sokun man esap tufich ngeni asoren pwon. 24 Ousap eäni asor ngeni ewe Samol mi Lapalap eman man mi mwochol föün ochoun ika pachach ika pök ika kinas. Ousap fokun föri ei sokun lapalap lon fanüemi. 25 Ousap pwal eäni asor ei sokun man oua angei me ren eman chon ekis pwe asoren mongö ngeni ämi Kot. Iwe, a wor terir, iei mine Kot esap etiwa ewe asor senikemi.

26 Iwe, ewe Samol mi Lapalap a ngeni Moses ekei allük: 27 Are a uputiu eman apanen kow ika sip ika kuuch, ewe apanan epwe nom ren inelapan lon ükükün fisu rän. Nge seni ewe awaluen rän oua tufichin eäni asor ngeni ewe Samol mi Lapalap. 28 Iwe, ese lifilifil ika ewe inelap eman kow ika eman sip, ousap nipökü ewe inelap me apanan lon eu chök rän. 29 Are oua eäni asor eu asoren kilisou ngeni ewe Samol mi Lapalap, oupwe asor lon pwüngüöchün ewe angang, pwe Kot epwe etiwakemi. 30 Oupwe ochoch ewe mönün asor lon ewe chök rän oua eäni asor, nge ousap likiti och tori lesosor.

31 Iei alon ewe Samol mi Lapalap, “Oupwe aleasochisi ai kewe allük o föriir. Ngang ewe Samol mi Lapalap. 32 Ousap aitengaua itei mi pin, pun ngang üpwe pin me ren ekewe aramasen Israel. Ngang ewe Samol mi Lapalap mi apinikemi. 33 Üa emwenikemiiwu seni ewe fanü Isip pwe üpwe ämi Kot: Ngang ewe Samol mi Lapalap.”