16
Usun än Ahas nemenem
16.1-20
(2.Kron 28.1-27)
1 Iwe, lon engol me fisuen ierin mwün Peka nöün Remalia we ewe kingen Israel, Ahas nöün Jotam we mwän a tolong lon wisan wisen king o nemeni Juta,
2 lupwen a ierini rüe. A nom lon Jerusalem o nemenem lon ükükün engol me wonu ier. Nge Ahas esap föri mine a pwüng me fän mesen ewe Samol mi Lapalap an we Kot, usun Tafit an we lewo a föri,
3 pwe a apirü än ekewe kingen Israel föför. A fen mwo nge keni püsin nöün ät pwe an asor ngeni ekewe uluulun anümwäl, usun än chon ekewe mwü föför mi anioput, ekewe mwü ewe Samol mi Lapalap a asürela me mwen ekewe aramasen Israel.
4 Iwe, Ahas a asor o keni apach mi pwokus lon ekewe lenien fel won ekewe leni tekia, won ekewe chuk, pwal fän iteiten irä mi muresires.
5 Mürin, Resin ewe kingen Siria me Peka ewe kingen Israel ra feito pwe repwe maun ngeni Jerusalem. Iwe, ra pwelifeili ewe telinimw fän pisekin maun, nge resap tongeni liapeni.
6 Lon ewe fansoun, ewe kingen Etom a angeesefäli ewe telinimw Elat o asüela ekewe chon Juta seni. Iwe, ekewe chon Etom ra feila Elat o nonom ikenan tori ikenai.
7 Iwe, Ahas a tinala chon künö ren Tiklat-pileser ewe kingen Asiria o üra, “Ngang noum chon angang mi nom fän nemenemom. Kopwe feito o amanauaei seni ewe kingen Siria, pwal seni ewe kingen Israel mi maun ngeniei.”
8 Ahas a pwal angei ewe silifer me kolt mi nom lon imwen ewe Samol mi Lapalap, pwal lon ewe lenien iseis pisek mi aüchea me lon imwen ewe king o tinala, pwe eu lifang ngeni ewe kingen Asiria.
9 Iwe, ewe kingen Asiria a aüselinga än Ahas tüngor. A feila pwe epwe maun ngeni Tamaskus, a liapeni ewe telinimw o uweela aramasan ngeni Kir, a pwal niela ewe king Resin.
10 Mürin, ewe king Ahas a feila Tamaskus, pwe epwe churi Tiklat-pileser ewe kingen Asiria. A küna eu rongen asor me lon Tamaskus o tinala ren ewe souasor Uria uluulun ewe rongen asor me tichikin kaükün.
11 Iei mine ewe souasor Uria a förätä eu rongen asor won aükükün mine ewe king Ahas a tinala ren, o awesala me mwen an epwe feito.
12 Lupwen ewe king a liwinto seni Tamaskus, a katol ewe rongen asor. Mürin, a kan ngeni o keni an asor won.
13 A kenala an asoren kek me asoren mongö o ninätiu an asoren ün won, a pwal äsupu chan an mönün asoren kinamwe won.
14 Nge ewe rongen asor seni piras än ewe Samol mi Lapalap mi nom lefilen än Ahas we rongen asor me ewe imwenfel Ahas a amwökütü seni lenian o anomu peliefengin an we rongen asor mi fö.
15 Mürin, ewe king Ahas a allük ngeni ewe souasor Uria, “Won ei rongen asor mi lap kopwe keni ewe asoren kek mi fis iteiten lesosor me ewe asoren mongö mi fis iteiten lekuniol, än ewe king asoren kek me asoren mongö, pwal än aramasen ei fanü meinisin asoren kek me ar asoren mongö me asoren ün. Kopwe pwal äsupu won chan ekewe mönün asoren kek me chan ekewe sokopaten mönün asor. Nge ewe rongen asor seni piras epwe fän itei, pwe üpwe eäni pwee won.”
16 Iwe, ewe souasor Uria a föri meinisin mine ewe king Ahas a allük ngeni.
17 Iwe, ewe king Ahas a etti lepekin ekewe kuruma o angei ekewe sepi me wor. A pwal angei ewe sepien koluk mi fokun watte mi nom won ekewe engol me ruoman ätemwänin kow seni piras, o anomu won eu longolong seni fau.
18 Ahas a pwal atomala ewe leni mi ekis tekia a nom ünükün imwen ewe Samol mi Lapalap, ewe ia ewe king a mot ie lon ränin sapat, pwal än ewe king alen tolong lon, pokiten a chächäri ewe kingen Asiria.
19 Nge lusun pworausen än Ahas föför meinisin a mak lon puken uruwon ekewe kingen Juta.
20 Iwe, Ahas a mäla, nge ra peiaseni ren an kewe lewo lon ewe telinimwen Tafit. Iwe, Hiskia nöün we mwän a siwili lon wisan wisen king.