12
Usun än Joas nemenem lon Juta
12.1-21
(2.Kron 24.1-16)
1 Iwe, lon afisuen ierin mwün Jehu ewe kingen Israel, Joas a tolong lon wisan wisen king o nemeni Juta. A nom lon Jerusalem o nemenem lon ükükün faik ier. Iten inan Sipia seni Persepa.
2 Joas a föri mine a pwüng me fän mesen ewe Samol mi Lapalap lon ränin manauan meinisin, pun ewe souasor Jehoiata a öüröüra.
3 Nge ekewe lenien fel won ekewe leni tekia resap katala. Ekewe aramas ra chök sopwela le äkeäni ar asor o kekkeni apach mi pwokus wor.
4 Iwe, Joas a üreni ekewe souasor, pwe repwe ionifengeni ewe moni meinisin aramas ra uwato lon imwen ewe Samol mi Lapalap pwe ar asor mi pin, ewe moni eman me eman mwän a wisen püngütiu, pwal ewe moni eman a uwato fän püsin letipan.
5 Ekewe souasor repwe angei ewe moni seni aramaser, pwe repwe nöünöü le försefäli mine a ta me won ewe imwenfel.
6 Nge seni ewe fansoun tori rüe me ülüngatin ierin mwün ewe king Joas, ekewe souasor resamwo försefäli och mine a tala me won ewe imwenfel.
7 Iei mine ewe king Joas a körifengeni ewe souasor Jehoiata me ekewe lusun souasor o üreniir, “Pwota ousap försefäli ewe imwenfel? Iei ousap chüen angei moni seni aramasemi fän itemi, pun ewe moni epwe fän iten försefälin mine a ta me won ewe imwenfel.”
8 Iwe, ekewe souasor ra tipeeu ngeni pwe resap chüen angei moni seni aramaser, resap pwal chüen wisen försefäli mine a ta me won ewe imwenfel.
9 Mürin, ewe souasor Jehoiata a angei eu pwor, a föri eu pwang won öppüngün o iseni ünükün ewe rongen asor me pelifichin ewe asamen tolong lon imwen ewe Samol mi Lapalap. Iwe, ekewe souasor mi mamasa ewe lenien tolong ra atolonga lon ewe pwor ewe moni meinisin aramas ra uwato lon imwen ewe Samol mi Lapalap.
10 Nge lupwen ra küna pwe a wor chomong moni lon ewe pwor, nöün ewe king seketeri me ewe souasor mi lap ra feito, ra aleani ewe moni o tukeni.
11 Mürin ra ngeni ekewe souemwenin angangen imwen ewe Samol mi Lapalap ewe moni. Nge ewe moni ekewe souemwen ra möni ngeni ekewe taikü me ekewe chon kaü mi angang won imwen ewe Samol mi Lapalap,
12 ra pwal möni ngeni ekewe chon ses me ekewe chon falafal fau. Iwe, ra kamö won ei moni irä me fau mi fal fän iten försefälin mine a ta me won imwen ewe Samol mi Lapalap, pwal mettoch meinisin ra aea fän iten ei angang.
13 Nge seni ewe moni aramas ra uwato lon imwen ewe Samol mi Lapalap resap föri sepi seni silifer, fichin wikken ekewe lamp, sepi mi kükün, rappwa ika sokopaten sepi seni kolt ika silifer fän iten imwen ewe Samol mi Lapalap.
14 Pun unusen ewe moni ra ngeni ekewe chon angang mi försefäli mine a ta me won imwen ewe Samol mi Lapalap.
15 Nge resap ais repootun ewe moni seni ekewe mwän mi angei ewe moni pwe repwe möni ngeni ekewe chon angang, pun ekewe mwän ra fokun wenechar.
16 Nge ewe moni seni ekewe asoren pupungau me asoren tipis resap uwalong lon ewe pwor, pun nöün ekewe souasor.
17 Iwe, lon ewe fansoun Hasael ewe kingen Siria a feito, a maun ngeni ewe telinimw Kat o liapeni. Mürin, Hasael a sap pwe epwe feitä Jerusalem o maun ngeni.
18 Nge Joas ewe kingen Juta a angei ekewe lifang mi pin meinisin Jehosafat, Joram me Ahasia semelapan kewe ekewe kingen Juta ra apini fän iten ewe Samol mi Lapalap. A pwal angei püsin an kewe lifang mi pin, ewe kolt meinisin mi nom lon lenien iseis pisek mi aüchea me lon imwen ewe Samol mi Lapalap, pwal me lon püsin imwan o tinirela ren Hasael ewe kingen Siria. Mürin, Hasael a feila seni Jerusalem.
19 Nge lusun pworausen än Joas föför meinisin a mak lon puken uruwon ekewe kingen Juta.
20 Iwe, nöün Joas kewe nöüwis ra rawangauei o niela me lon Pet-milo won ewe al mi pweretiu ngeni Silla.
21 Ikei ir ekewe nöüwis mi niela Joas: Josakar nöün Simeat we mwän me Jehosapat nöün Somer we mwän. Iwe, ra peiaseni Joas ren an kewe lewo lon ewe telinimwen Tafit, nge Amasia nöün we mwän a siwili lon wisan wisen king.