21
Ekewe telinimwen chon ewe ainangen Lefi
21.1-42
1 Iwe, ekewe souemwenin än Lefi cho ra feito ren ewe souasor Eleasar, ren Josua nöün Nun we mwän, pwal ren souemwenin än ekewe ainangen Israel cho.
2 Iwe, ra üreniir me lon Silo lon ewe fanü Kanaan, “Ewe Samol mi Lapalap a allük ngeni Moses pwe epwe wor telinimwem aipwe imweimw lon, pwal ekewe fanü ünükür fän iten nöüm man.”
3 Iei mine ekewe aramasen Israel ra ngeni chon ewe ainangen Lefi ekei telinimw pwal ekewe fanü ünükür fän iten nöür man seni lon fanüer fän än ewe Samol mi Lapalap allük.
4 Iwe, ekewe familien lon ewe eterekesin Kohat seni ewe ainangen Lefi ra akomwen angei inetir telinimw ren üttüt. Ekewe famili ir mwirimwirin ewe souasor Aaron, ra angei ren pwüngün üttüt ükükün engol me ülüngat telinimw seni chon ekewe ainangen Juta, Simeon me Peniamin.
5 Nge ekewe lusun me lon ewe eterekesin Kohat ra angei ren pwüngün üttüt ükükün engol telinimw seni chon ekewe ainangen Efraim, Tan me esopun ewe ainangen Manasa.
6 Iwe, ekewe famili lon ewe eterekesin Kerson ra angei ren pwüngün üttüt ükükün engol me ülüngat telinimw seni chon ekewe ainangen Isakar, Aser me Naftali, pwal seni esopun ewe ainangen Manasa me lon Pasan.
7 Nge ekewe famili lon ewe eterekesin Merari ra angei ükükün engol me ruu telinimw seni chon ekewe ainangen Rupen, Kat me Sepulon.
8 Iwe, ekewe aramasen Israel ra ngeni chon ewe ainangen Lefi ekei telinimw, pwal ekewe fanü ünükür fän iten nöür man ren pwüngün üttüt, usun ewe Samol mi Lapalap a fen allük ngeni Moses.
9 Ikkei iten ekewe telinimw chon ekewe ainangen Juta me Simeon
10 ra ngeni ekewe mwirimwirin Aaron, ir seni ewe eterekesin Kohat seni ewe ainangen Lefi, pun ewe üttüt a toriir akom.
11 Iwe, ra ngeniir ewe telinimw än Arpa. (Ewe mwän Arpa semen Anak.) Iei ewe telinimw a iteni Hepron, a nom won chukuchukutän ewe fanü Juta. Ra pwal ngeniir ewe fanü ünükün fän iten nöür man.
12 Nge ekewe tanipi ünükün ewe telinimw me wisoposopun kewe ra fen ngeni Kalep nöün Jefune we mwän pwe fanüan.
13 Iei usun ra ngeni mwirimwirin ewe souasor Aaron ewe telinimw Hepron, ewe telinimwen op fän iten eman mi niela eman aramas, pwal ekewe fanü ünükün fän iten nöür man. Ra pwal ngeniir Lipna,
14 Jattir me Estemoa,
15 Helon me Tepir,
16 Ain, Jutta me Pet-semes pwal ekewe fanü ünükür fän iten nöür man, ükükün tiu telinimw seni ekei ruu ainang.
17 Iwe, seni ewe ainangen Peniamin ra ngeniir Kipeon me Kepa,
18 Anatot me Almon pwal ekewe fanü ünükür fän iten nöür man, ükükün rüanü telinimw.
19 Iwe, mwirimwirin ewe souasor Aaron ra angei ükükün engol me ülüngat telinimw pwal ekewe fanü ünükür fän iten nöür man.
20 Iwe, ekewe lusun familien lon ewe eterekesin Kohat seni ewe ainangen Lefi ra angei telinimwer kewe seni ewe ainangen Efraim.
21 Iwe, ra ngeniir Sikem ewe telinimwen op, pwal ekewe fanü ünükün fän iten nöür man lon chukuchukutän ewe fanü Efraim. Ra pwal ngeniir Keser,
22 Kipsaim me Pet-horon, pwal ekewe fanü ünükür fän iten nöür man, ükükün rüanü telinimw.
23 Nge seni ewe ainangen Tan ra ngeniir Elteke me Kipeton,
24 Aijalon me Kat-rimon, pwal ekewe fanü ünükür fän iten nöür man, ükükün rüanü telinimw.
25 Iwe, seni esopun ewe ainangen Manasa ra ngeniir Taanak me Kat-rimon, pwal ekewe fanü ünükür fän iten nöür man, ükükün ruu telinimw.
26 Iwe, ekewe lusun familien lon ewe eterekesin Kohat ra angei ükükün engol telinimw, pwal ekewe fanü ünükür fän iten nöür man.
27 Nge chon ewe eterekesin Kerson, ir seni ewe ainangen Lefi, ra angei seni esopun ewe ainangen Manasa ewe telinimw Kolan lon Pasan ewe telinimwen op, pwal Pestera me ekewe fanü ünükür fän iten nöür man, ükükün ruu telinimw.
28 Iwe, seni ewe ainangen Isakar ra angei Kision me Taperat,
29 Jarmut me En-kanim pwal ekewe fanü ünükür fän iten nöür man, ükükün rüanü telinimw.
30 Nge seni ewe ainangen Aser ra pwal angei ekewe telinimw Misal me Apton,
31 Helkat me Rehop, pwal ekewe fanü ünükür fän iten nöür man, ükükün rüanü telinimw.
32 Iwe, seni ewe ainangen Naftali ra angei ekewe telinimw Kates lon Kaliläa, ewe telinimwen op, Hamot-tor me Kartan, pwal ekewe fanü ünükür fän iten nöür man, ükükün ülüngat telinimw.
33 Iwe, ekewe familien lon ewe eterekesin Kerson ra angei ükükün engol me ülüngat telinimw, pwal ekewe fanü ünükür fän iten nöür man.
34 Iwe, ekewe lusun chon ewe ainangen Lefi, ir familien lon ewe eterekesin Merari ra angei seni ewe ainangen Sepulon ekewe telinimw Jokneam me Karta,
35 Timna me Nahalal, pwal ekewe fanü ünükür fän iten nöür man, ükükün rüanü telinimw.
36 Iwe, seni ewe ainangen Rupen ra angei ekewe telinimw Peser me Jahas,
37 Ketemot me Mefaat, pwal ekewe fanü ünükür fän iten nöür man, ükükün rüanü telinimw.
38 Nge seni ewe ainangen Kat ra angei ekewe telinimw Ramot lon Kiliat ewe telinimwen op, pwal Mahanaim,
39 Hespon me Jaser, pwal ekewe fanü ünükür fän iten nöür man, ükükün rüanü telinimw.
40 Iwe, ekewe familien lon ewe eterekesin Merari, ir lusun chon ewe ainangen Lefi, ra angei ren üttüt ükükün engol me ruu telinimw.
41 Iwe, chon ewe ainangen Lefi ra angei seni lein fanüen ekewe aramasen Israel ükükün faik me walu telinimw, pwal ekewe fanü ünükür fän iten nöür man.
42 Iwe, eu me eu ekei telinimw a wor fanü pwelin ünükün fän iten nöür man. Iei usun lapalapen ekei telinimw meinisin.
Chon Israel ra fanüeni ewe fanü
21.43-45
43 Iei usun ewe Samol mi Lapalap a ngeni chon Israel unusen ewe fanü a fen pwon fän akapel ngeni ar kewe lewo. Iwe, ra angei fanüer o nonom lon.
44 Iwe, ewe Samol mi Lapalap a fang ngeniir kinamwe ekis meinisin, usun a fen pwon ngeni ar kewe lewo. Esap wor eman chon oputeer a tongeni ü ngeniir, pun ewe Samol mi Lapalap a awinner, pwe ra akufu chon oputeer meinisin.
45 Iwe, ekewe pwon meinisin ewe Samol mi Lapalap a eäni ngeni ekewe chon Israel ra pwönüetä. Esap wor eu me leir esap pwönüetä.