Sona
Kapas akom
I. Iten ei puk: Sona, pun mine a mak lon, püsin pworausan. Wewen ei it Sona: Lisom
II. Chon makei ei puk: Sona
III. Itelapemongen ei puk: Kot a pwäri an tong ngeni chon lükün Israel, usun chök an tongei chon Israel.
IV. Kapas aüchean ei puk: Aramasen eu telinimwen chon lükün Israel mi fokun watte ra ekieksefäl o kul ngeni Kot pokiten än ewe soufos Sona afalafal ngeniir.
V. Masouen ei puk Sona: Ei puk a sokofesen seni ekewe puken soufos lon Paipel. Lon ei puk a mak pworausen ewe soufos Sona mi aleasolap ngeni mine Kot a akünö ngeni. Kot a üreni Sona pwe epwe feila Ninifa samolun telinimwen ewe mwün Asiria mi fokun watte. Ewe mwün Asiria a fokun oput ewe mwün Israel. Nge Sona esap mochen feila Ninifa o föri mine Kot a akünö ngeni, pun a mefi pwe Kot esap apwönüetä an ekiekin ataela ewe telinimw. Mürin fisin ekoch mettoch mi amwarar ngeni Sona, Sona a asopwisekin aleasochis ngeni Kot. Nge lesopolan a amwünümwünüla, lupwen esap fis ewe feiengau a afalafal usun. Lon ei puk sa küna usun epilolen än Kot nemenem won unusen förian meinisin. Nge mine a kon lap seni ei, pwe Kot a eäni tong o ümöümöch, a mochen amusala tipisin chokewe mi oput nöün aramas o amanaueer, lap seni an epwe apwüngüür o aroserela.
VI. Tettelin masouen ei puk:
Kot a akünöü Sona, nge Sona a aleasolap ngeni 1.1-17
Sona a ekieksefäl o ngasala 2.1-10
Sona a aronga usun feiengauen Ninifa 3.1-10
Kot a eäni ümöümöch ngeni chon Ninifa 4.1-11
1
Sona a aleasolap ngeni Kot
1.1-17
1 Iwe, lon eu rän ewe Samol mi Lapalap a kapas ngeni Sona nöün Amittai we mwän o üreni,
2 “Kopwe ütä o feila Ninifa ewe telinimw mi lapalap, pwe kopwe apwüngü aramasan, pun üa küna ar föför mi fokun ngau.”
3 Iwe, Sona a ütä, nge esap feila Ninifa, pwe a sü seni fän mesen ewe Samol mi Lapalap. A feila Joppa, nge ikenan a küna efoch sip epwe sai ngeni Tarsis . Iwe, a mönätiu liwinin an sai won ewe sip pwe epwe fiti tori Tarsis, pun a mochen sü seni fän mesen ewe Samol mi Lapalap.
4 Nge ewe Samol mi Lapalap a tinato eu asepwäl mi pöchökül won matau. Iwe, ewe sip a arap ngeni an epwe ta ren watten ewe mölümöl.
5 Mürin ekewe säla ra fokun niuokus o köri koten en me fanüan pwe repwe alisiir. Iwe, ra pwal aturala leset üttenen war we sip, pwe epwe pänätä. Nge Sona a tötiu leföön ewe sip, a konola o anutochou.
6 Iwe, ewe pölü a tötiu ren, a föngüni o apasa, “Pwota ka anutochou? Kopwe pwätä o köri koten fanüom pwe epwe alisikich. Eli epwe tongeekich pwe sisap feiengau.”
7 Mürin, ekewe säla ra kapasfengen lefiler, “Ou etto, sipwe asisil pwe sipwe silei iö leich a atoto woch ei feiengau.” Nge lupwen ra asisil, a pwä pwe Sona.
8 Iwe, ra aisini, “Kopwe pwäri ngenikem met popun a torikich ei feiengau? Met wisom? Ia ka feito me ie? Ifa fanüom? En re ia?”
9 Sona a pälüeniir, “Ngang eman re Ipru. Üa fel ngeni ewe Samol mi Lapalap, ewe Koten läng mi föri matau me fanü.”
10 Iwe, Sona a pwal üreniir pwe a sü seni fän mesen ewe Samol mi Lapalap. Iwe, ekewe säla ra fokun niuokus o aisini, “Pwota ka föri ei sokun?”
11 Mürin ra pwal aisini, “Met aipwe föri ngonuk pwe epwe lüala won matau?” Pun nonoon won matau a fokun wattela seni me mwan.
12 Iwe, Sona a üreniir, “Oupwe aturueitiu leset, mürin epwe lüala won matau. Pun üa silei pwe ei mölümöl mi watte a chök feito womi pokitei.”
13 Nge ekewe säla ra chök achocho le fatülei war we sip pwe epwe tori fanü. Iwe, nge resap fokun pwäk ngeni, pun ewe mölümöl mi watte a chök aliwiniir.
14 Iei mine ra siö ngeni ewe Samol mi Lapalap, “Äm Samol mi Lapalap, aia tüngor ngonuk, kose mochen kosap afeiengaua manauem are aipwe angei manauen ätei, nge kosap pwal liwini ngenikem tipisin äm aipwe afeiengaua eman are esap tipis. Pun en, Samol mi Lapalap, ka föri mine ka efich.”
15 Mürin ra angei Sona o aturätiu lematau. Iwe a lüala won matau.
16 Ren ei ekewe säla ra fokun niuokusiti ewe Samol mi Lapalap, pwe ra asor ngeni o pwon pwe repwe angang ngeni.
17 Iwe, ewe Samol mi Lapalap a akünöü eman ik mi watte pwe epwe oromala Sona. Iwe, Sona a nonom lon upwen ewe ik lon ükükün ülüngat rän me ülüngat pwin.