59
Kapasen pwärätä usun än chon Israel tipis
59.1-21
1 Nengeni, pöün ewe Samol mi Lapalap esap mochomoch, a tongeni amanauakemi, selingan esap pinela, a tongeni rongorong ämi siö.
2 Nge ämi föföringau a aimwükemi seni ämi Kot, nge ämi tipis a pwölüela won mesan, iei popun esap rongorong.
3 Pun pöümi a limengau ren ämi niela aramas me ämi föföringau, awemi a chofana o kapasingau.
4 Esap wor eman a kapwüng ngeni aramas fän pwüng me wenechar. Iwe, ra lükülük won kapas mi lomotongau, ra chofana, ra pwal ekiekin fitikoko o föföringau.
5 Ar rawangau a afeiengau usun chök än eman alopa sokulen serepenit mi poison. Eman mi ochei ekewe sokul epwe mäla, nge seni eföü sokul mi mök eman serepenit mi poison epwe towu. Ra pwal türüni türün ninnä.
6 Iwe, türünier tür resap lomot ngeni üf, aramas resap tongeni üföüf. Ar angang angangen föföringau chök, nge pöür ra chök föri föförün chon mwänewüs.
7 Iwe, pecher ra fetalekai ngeni mine a ngau, ra müttir ngeni ni aramas esap wor ar tipis, ra chök ekiekingau lon letiper, nge ia ra feila ie a chök fis feiengau.
8 Iwe, resap silei ewe alen kinamwe. Meinisin mine ra föri esap pwüng. Ra püsin föri aler mi pwor, nge ir mi fetal won resap sile kinamwe.
9 Iwe, ekewe aramas ra apasa, “Pwüng a toau senikich, ach ngasala esap fokun torikich. Sa kütta saram, nge meinisin a kiroch, sa witiwiti mallen rän, nge sa chök fetal lon rochopwak.
10 Iwe, sa atapfetal won tit usun chök chon chun ika usun chokewe esap wor meser. Sa chepetek leoloas usun chök lefäf, sa pwal wewe ngeni somä lein chon pöchökül.
11 Kich meinisin sa wörüwör usun ekewe pear, sa pwal ngüngü usun ekewe lisom. Iwe, sa kütta pwüng, nge esap wor, sa pwal witiwiti ach sipwe ngasala, nge a toau senikich.
12 Äm Samol mi Lapalap, a kon watte äm pupungau fän mesom, nge äm tipis kana ra aturukem. Ewer, aia mefi äm pupungau o silei pwe aia föföringau.
13 Äm aia ü ngonuk o pöütukala, en äm Samol mi Lapalap, aia pwal kul senuk, en äm Kot. Iwe, aia ariaföüü aramas o pälüenuk, aia pwal ekieki mine a ngau o apasätä kapas chofana.
14 Iwe, pwüng a sü senikem o toauala, let esap fis lon lenien chulap, nge wenechar esap tongeni tolong lon.
15 Ewer, let esap chüen nom, nge eman mi ükütiu le föföringau epwe riaföü me ren chon föföringau.”
Iwe, ewe Samol mi Lapalap a küna ei, nge a oput pwe esap wor pwüng.
16 A küna pwe esap wor eman mi alisi chokewe mi riaföü, a pwal weitifengeni pwe esap wor eman mi peniir. Iei mine a püsin aea an manaman pwe epwe angaseer, nge püsin an pwüng a atufichi.
17 A pwilitalong pwüng won pwe ina an sekit seni mächä, nge an amanaua aramas ina imwan akkaw. A pwilitalong won apwüng pwe ina üfan, pwal song pwe ina üfan owokot.
18 Iwe, epwe ngeni chon oputan liwinin ar föför, epwe song ngeni chon pälüeni, epwe pwal apwüngü chokewe mi nom won ekewe fanüen lematau.
19 Mürin, aramas meinisin seni lotou tori ötiu repwe niueiti ewe Samol mi Lapalap o meniniti an ling. Pun ewe Samol mi Lapalap epwe feito usun eu chanpupu mi pumong, pwal usun eu mölümöl.
20 Iwe, epwe feito ngeni Jerusalem pwe epwe amanaua chokewe lon Israel mi kul seni ar tipis. Iei usun mine ewe Samol mi Lapalap a apasa.
21 Iwe, iei alon ewe Samol mi Lapalap, “Iei ai pwon ngenikemi: Ngüni a nonom womi, üa pwal ngenikemi ai kapas pwe epwe nonom remi, epwe pwal nom ren nöümi me mwirimwirir kana seni ikenai tori feilfeilachök.”