24
Ewe pwon a kapwüngüla
24.1-11
1 Iwe, Kot a üreni Moses, “Kopwe feitä rei won ewe chuk, ämi me Aaron, Natap me Apihu, pwal fik souakomwen chon Israel. Nge lupwen oua chüen ekis toau, oupwe fel ngeniei.
2 En chök Moses kopwe kan ngeniei. Nge ekewe lusun resap kanetä, pwal ekewe aramas resap fitätä.”
3 Iwe, Moses a feila o üreni ekewe aramas alon ewe Samol mi Lapalap meinisin, pwal ekewe allük meinisin. Nge ekewe aramas meinisin ra pälüenipökü o apasa, “Meinisin mine ewe Samol mi Lapalap a apasa aipwe föri.”
4 Nge Moses a makei meinisin alon ewe Samol mi Lapalap. Iwe, a pwätä lesosorusich, a senätä eu rongen asor me fäsonun ewe chuk, pwal engol me ruofoch ürefau fän iten eu me eu ekewe engol me ruu ainangen Israel.
5 Mürin a tinala alüal seni me lein ekewe aramasen Israel ra eäni asoren kek, ra pwal eäni asor ätemwänin kow pwe asoren kinamwe ngeni ewe Samol mi Lapalap.
6 Iwe, Moses a angei esopun chan ekewe mönün asor o ninalong lon ekewe sepi, nge esop a uti ngeni ewe rongen asor.
7 Mürin a angei ewe puken pwon o aleani ngeni ekewe aramas. Iwe, ra apasa, “Meinisin mine ewe Samol mi Lapalap a apasa aipwe aleasochisi o föri.”
8 Iwe, Moses a angei ewe cha lon ekewe sepi, a ütätä won ekewe aramas o apasa, “Iei chan ewe pwon ewe Samol mi Lapalap a föri ngenikemi pwe longolongun ekei kapas meinisin.”
9 Mürin, Moses me Aaron, Natap me Apihu pwal fik souakomwen chon Israel ra feitä won ewe chuk.
10 Iwe, ra küna ewe Koten Israel. Fän pechen a usun chök ewe fau aüchea itan safaia, pwal usun chök arauarauen läng, lupwen a kürüfat.
11 Nge Kot esap afeiengaua ekewe souemwenin chon Israel. Iwe, ra nenengeni Kot, mürin ra mongöfengen o ünfengen.
Moses a nom won ewe chuk Sinai
24.12-18
12 Iwe, ewe Samol mi Lapalap a üreni Moses, “Kopwe feitä rei won ewe chuk o witiwit ikenan. Pun üpwe ngonuk ekewe fau mi chöpöp üa makei won ekewe allük pwe kopwe aiöü ngeni ekewe aramas.
13 Mürin, Moses a ütä me nöün chon angang Josua o feitä won ewe chukun Kot.
14 Nge a kapas ngeni ekewe souakom, “Oupwe witikem ikei, tori aipwe liwinsefälitikemi. Iwe, Aaron me Hur repwe nom remi, nge iö a wor an fitikoko, epwe feila rer.”
15 Lupwen Moses a feitä won ewe chuk, ewe kuchu a pwölüela ewe chuk.
16 Iwe, lingen ewe Samol mi Lapalap a nonom won ewe chuk Sinai, nge ewe kuchu a pwölüela ewe chuk lon ükükün wonu rän. Nge lon ewe afisuen rän Kot a kökköwu ren Moses me lon ewe kuchu.
17 Iwe, lingen ewe Samol mi Lapalap a pwäpwäla fän mesen ekewe aramasen Israel usun chök eu ekkei mi ngetenget me won ungen ewe chuk.
18 Mürin, Moses a tolong lon ewe kuchu o feitä won ewe chuk. Nge Moses a nonom won ewe chuk lon ükükün faik rän me faik pwin.